CACEKIWEN LALAKAW 41
Mitafo to Madimadiay Milakowit to ‘Taˈangayay Padiing’
O madimadiay a finawlan ni Yihofa, ka olah kamo Cingranan. Midipotan ni Yihofa ko madimadiay a tamdaw.—ˈOLIC 31:23
RADIW 154 Kiemelen Ita Mihadidi
KALIMLAAN NO LALAKAW *
1-2. (1) O kalo kitakit wa milasil to maanan a lihaf? (2) Sakafanaˈaw kita to caˈof no maanan a salicay?
HARATENGEN hena, mifekadayto ko pairasolan no Fangcalay Cudad a demak, milasilayto ko kalo kitakit to ‘dipayalayto’ sanay a lihaf, sowal nangra, malaodayto ko sarihadayay a lintad. Tokel nangra, nanay pakasoˈlin ko polong a tamdaw, o pakayraan no hekal maontingay no kamay nangra sanay. Kawraan, awaay ko pakayraan nangra mionting to mamifekad a demak. Pairasolay ko Fangcalay Cudad: ‘Fahal sanay a laˈafo wa tangsol mifekad i tireng nangra, . . . cowa ko papakalaliw cangra.—1 Tisalonika 5:3.
2 Sakafanaˈaw kita to: Itini taˈangayay padiing wa mifekad ko maanan a demak? Tokel ni Yihofa kitaanan itini taˈangayay padiing sasamaan ko hademak? Sasamaan kita ngaˈ padadotoc a madimadi, milakowit to taˈangayay padiing?—Matay 24:21.
ITINI TAˈANGAYAY PADIING WA MIFEKAD KO MAANAN A DEMAK?
3. Pakayni Paˈarawan 17:5, 15-18, samanen no Kawas palaˈafo ko ‘Taˈangayay Papilon’ hani?
3 ˈOsien ko Paˈarawan 17:5, 15-18. Pairasolay ko Fangcalay Cudad, o ‘Taˈangayay Papilon’ wa masongilaˈ a malaˈafo! Awaay ko pakayraan no kalo a kitakit mionting to mamifekad a demak, samanen ‘miparoan no Kawas ko harateng no Niyah i falocoˈ no pohong, a papidemak to pohong.’ O maanan a harateng hani? Oha papalaˈafoen ko kihcod mararaway pihakelongan no hekal, mahawpay ko makaniway a Kristokiyo. * Sanay ko sowal no Paˈarawan, o hatiniay a harateng wa paroen no Kawas i falocoˈ no “moetepay pohong” no “kahngangay a ˈaˈadopen.” O “ˈaˈadopen” mitaypiyaway to Makomoday Kitakit, “moetepay pohong” mitaypiyaway to kihcod midamaay to Makomoday Kitakit a mikowanay. (Paˈarawan 17:3, 11-13; 18:8) Ano misatapang ko mikowanay miˈodis to mararaway pihakelongan i, misatapangto ko taˈangayay padiing. Oniya fahal sanay a padiing wa milingat to polong a tamdaw.
4. (1) O maanan a lalangian ko sapiˈodis no mikowanay no kalo kitakit to Taˈangayay Papilon hani? (2) Ikor no malaˈafo ko mararaway pihakelongan i, wa samaan ko hademak no mihakelongay tamdaw hani?
4 Cowa kafanaˈ kita, tatano maanan a lalangian ko sapiˈodis no mikowanay no kalo kitakit to Taˈangayay Papilon, alatek o micongeday ko pihakelongan to saka dipayal no hekal, ato micapid to mikowanay saan a lalangian nangra, anca adihayay ko mitalingan no pihakelongan a hafay ato dafong saan ko sowal. (Paˈarawan 18:3, 7) Ano samaanto ko lalangian, o patosokan no mikowanay, cowa ko mihakelongay tamdaw ko papalaˈafoen, o polong a lekakawa no pihakelongan ko papalaˈafoen. Ano palaˈafo koniya lekakawa, mamahapinangto no mihakelongay to, cowa kangaˈay tiˈeren ko ˈaˈideman no pihakelongan, orato mamiliyas cangra to mararaway pihakelongan.
5. Palaˈafo to Taˈangayay Papilong, mikiˈokay ci Yihofa to maanan hani? O manan ko lalangian hani?
5 Cowa ka somowal ko Fangcalay Cudad to hahakowa ko halafin no toki a palaˈafo to Taˈangayay Papilong, kawra cowa ko hahalafin koniya toki. (Paˈarawan 18:10, 21) Mikiˈokay ci Yihofa ‘wa lowanen koya romiˈad,’ mihaen ngaˈ materek ko ‘mipiliˈan Nangra a finawlan’ ato matatodongay a pihakelongan. (Marko 13:19, 20) Kawra, mikitini pisatapangan no taˈangayay padiing tangasa i Armakiton a tatokian, mitokelay ci Yihofa kitaanan samaan ko hademak hani?
PADADOTOC MIDOPO TO MATATODONGAY A PIHAKELONGAN
6. Cowa ko piliyas aca to mararaway a pihakelongan, oha midemakho kita to maanan hani?
6 Masowalay i fafekangay lalakaw, misaaliay ci Yihofa to midokoay Cingranan a tamdaw, miliyas to Taˈangayay Papilong. Kawra, cowa ko hatira aca, mitokelayho ci Yihofa kitaanan midama to matatodongay a pihakelongan, misarocod a midoko Cingranan. Dotoc wa milengo, wa ngaˈay kita midemak to maanan tosa a demak a midopo to matatodongay a pihakelongan.
Soˈlin itini pasangaray a pakayraan, cowa ko mamisawad kita masaˈopo (Nengnengen ko saka 7 fatac) *
7. (1) Ano tanektek kita midofdof to moecelay palinian ni Yihofa, cowa ko mamidemak to maanan? (2) Hipray 10:24, 25 samanay misaˈicel pasowal to masakalimlaan ko saˈopo hani? Hano aniniho kita mihaen to demak hani?
7 Salakat, o tatanektek a midofdof to moecelay palinian ni Yihofa. Cowa ko mamicada kita to harateng ato palinian no hekal. Tinakoen, cowa ko mamihayda kita to malafoay madadiˈiay a waywayan, mahawpay ko tongsilien a mararamoday ato waywayan. (Matay 19:4, 5; Loma 1:26, 27) Roma i, wa padadotoc kita malacafay to salikaka a midoko to Kawas. Ano itinito i Hongti Kitakit Kasaˈopoan, i lomaˈ no salikaka, anca i mahimeday a kitiraan. Ano samaanto ko pakayraan, cowa ko mamisawad kita a misaˈopo. Nohatini oha mararid kita a malacafay to salikaka a midoko to Kawas, samanen ‘mangataayto koya romiˈad.’—ˈOsien ko Hipray 10:24, 25.
8. Itini taˈangayay padiing, wa samaan ko kafalic no milasilan ita a lihaf hani?
8 Itini taˈangayay padiing, wa mafalic ko milasilan ita a lihaf alatek. Anini, o ngaˈayay lihaf no Hongti Kitakit ko milasilan ita, padama to tamdaw malo Krisciyang. Kawra itini taˈangayay padiing, o pakidemay a lihaf ko lalasilen ita, alatek malecaday o masaˈikayay a soeda. (Paˈarawan 16:21) Alatek o mamilasil kita to mamalaˈafoto ko hekal ni Satan, kawra, o ihkalay a pakayraan cowa kafanaˈ kita nohatini. Wa padadotoc kita tono ˈayaway a pakayraan milasil toniya pakidemay a lihaf han? Anca o roma a pakayraan hokira? Ikor, wa mafanaˈ kita. Ano samaanto, o tatimolo kita milasil to sapisawkit ni Yihofa a lihaf!—Icikil 2:3-5.
9. (1) Pakayni milasilan ita a lihaf, o mikowanay no kalo kitakit wa samaan ko harateng nangra hani? (2) Ngaˈayay pakasoˈlin kita to maanan hani?
9 Alatek o mikowanay no kalo kitakit, wa mapakangolaw no milasilan ita a lihaf a sapicongedaw to mitosilay a tayal. Anini mitosil kita mitadiˈec ci Yihofaan, itiya mamatongal ko saali ita to sadama Ningra. Pakasoˈlinay kita, o papaˈicelen ni Yihofa kita milaheci to patorodan Ningra a tayal.—Mika 3:8.
SONGILAˈEN KO PISADAY MISIˈAYAW TO SAˈODIS NO KALO KITAKIT
10. Pakayni Luka 21:25-28, itini taˈangayay padiing, wa ira ko masamaanay a harateng no ˈalomanay hani?
10 ˈOsien ko Luka 21:25-28. Itini taˈangayay padiing, papakidem ko kaˈangi no tamdaw, samanen maˈaraway ko kapelal no mitadiˈecan nangra a demak. Wa ‘pakidem ko adada’ nangra, calemcem to mamapatay ko niyah toniya satoˈmanay a tatokian. (Cifaniya 1:14, 15) Itiya, o papasangar ko kaˈorip, ano finawlanto ni Yihofa o mamalecad ko malifaay. Samanen o tatanektek a miliyas toniya hekal a tahalifa to roray, o cacangoˈot to sakaˈorip alatek.
11. (1) Hano saˈadaen no hekal tamdaw ko Misawacayay Tamdaw ni Yihofa hani? (2) Misamanay hano cowa ko mamarawraw kita?
11 Itini taˈangayay padiing, o na pakasoˈlinay to mararaway pihakelongan a tamdaw, maˈaraw dengan to ko pihakelongan no Misawacayay Tamdaw ni Yihofa ko materekay, wa pakidem ko kangolaw alatek, misatapang a miˈodis kitaanan, tinakoen itini wangcan a mitongangan kitaanan. O mikowanay no kalo kitakit na sapalahdawaw to polong a pihakelongan no hekal, kawra padadotocay ko Misawacayay Tamdaw ni Yihofa a midoko to Kawas, orato o kalo kitakit ato miontingay cangranan a Akoma Satan mamisaˈada kitaanan. Malaod ko toki, o mamalo pairasolanto no Fangcalay Cudad ko mikowanay no kalo kitakit a ‘Makok a Kok,’ * mamakomod a mifekad to pakidemay a saˈodis to finawlan ni Yihofa. (Icikil 38:2, 14-16) Samanen cowa ka ihkal ko kafanaˈ to sasamaan ko mifekaday a demak, o cacalemcem kita alatek. Kawra ngaˈayay pakasoˈlinen i, cowa ko marawraw kita, o papafeli ci Yihofa to sakaˈorip ita a sakayat. (ˈOlic 34:19) Itiya, oha ‘mamicaˈa to tireng’ kita, samanen mafanaˈay to ‘mamalidongto’ ko niyah. *
12. O ‘madimadiay citanengay a koli’ samaanay padama kitaanan pakayni i taˈangayay padiing a misaday hani?
12 O ‘madimadiay citanengay a koli’ misaˈicelay padama kitaanan mitafo to madimadiay, milakowit to taˈangayay padiing. (Matay 24:45) O cecay tinakoan i: mikitini 2016-2018 miheca a kasapala taykay. Patalipaˈelalay kitaanan, mangatamangataay ko romiˈad ni Yihofa, mansa papadadotoc kita a palahad to kalimlaan a capeling. Dotoc tikolen ita miharateng koya capeling.
PADADOTOC PALAHAD TO MADIMADI, MIHADIDI, TIMOLO
Ano sapilakowitaw to taˈangayay padiing, aniniho a misaday (Nengnengen ko 13-16 fatac) *
13. (1) Sasamaan kita ngaˈ mitafo to madimadi ci Yihofaan hani? (2) Hano aniniho misaˈosi to falocoˈ madimadi to Kawas hani?
13 Madimadi: O lalangian no kasapala taykay i 2016 miheca i “Ka Madimadi ci Yihofaan!” Patalipaˈelalay ko taykay kitaanan, ano tangongol ko kalawidang ita ci Yihofaan, oha mamadimadi Cingranan. Ano mikifalocoˈ a mitolon ato malalok a micekiw to Fangcalay Cudad, mamatongal ko piingid ita ci Yihofaan, wa ira ko ˈicel a miremo to masakenaay a pasangaray. Mamahererekto ko lekakawa ni Satan, ano saka madimadiaw kita to Kawas ato Hongti Kitakit Ningra, o tatahalifa to adihayay sapalifet. O lalikafen no hekal kita alatek, samanen mitafoay kita to misatenokay, wa matongal ko pihaen nangra to demak. (2 Pitiro 3:3, 4) Mihaenay, nohatiniho misaˈosi kita to falocoˈ madimadi to Kawas, mihaen ngaˈ tahatolas ko madimadi i taˈangayay padiing.
14. (1) Itini taˈangayay padiing, o cima ko mamikayat to finawlan no Kawas hani? (2) Itiya hano padadotoc kita madimadi midama to mikayatay a salikaka hani?
14 Itini taˈangayay padiing, o cima ko mamikayat to finawlan no Kawas hani? Itiya, polong a salikaka ni Kristo, wa saˈopoen i kakarayan, mirienang to Armakiton a lalood. (Matay 24:31; Paˈarawan 2:26, 27) Mihaenay, wa awato ko Malohemay Malitengay i Congpo itiya. Kawra, o iraay ko tatodong a faˈinayan salikaka i lalomaˈ no taˈangayay ˈopo a tamdaw, mamikotay to tayal nangra, padadotoc a mikayat to salikaka. Itiya, o mamidama kita to mikayatay a salikaka, midofdof to pakaynian no Kawas cangranan a sakayat. Mihaen to demak o madimadiay to Kawas, dengan mihaen ngaˈ milakowit kita to taˈangayay padiing!
15. (1) Samaanen ita ngaˈ mitafo to madimadi hani? (2) Hano aniniho palahad toniya capeling hani?
15 Mihadidi: Lalangian no kasapala taykay i 2017 miheca, o “Aka a Pisawad!” Padamaay ko taykay kitaanan tanektek a mihadidi i sapalifet. Soˈlin caka falic ko pakayraan, ano mitadiˈec ci Yihofaan o ngangaˈay mitafo to mihadidiay. (Loma 12:12) Nanay aka pawan kita to sakiˈok ni Yis, sanay: ‘O tahatolasay ko pihadidi a tamdaw, o mamalidong.’ (Matay 24:13) O tatodong ni Yis, ano samaanto ko pasangar ita i, oha padadotoc madimadi to Kawas ngaˈ madidong. Ano misiˈayaw kita to sapalifet mitafo to mihadidiay, wa matongal ko tanektek no pakasoˈlinay falocoˈ, maharek ko pisaday pakayni i taˈangayay padiing.
16. (1) O manan ko soˈlinay a timolo? (2) Samanen ita ngaˈ matongal ko pitadiˈec ci Yihofaan, ato timolo no niyah hani?
16 Timolo: Lalangian no kasapala taykay i 2018 miheca, o “Ka Timolo!” Pacipinangay ko taykay kitaanan, o soˈlinay a timolo cowa ko ˈicel no mita, pakayniay pitadiˈec ci Yihofaan. Sasamaan kita ngaˈ matongal ko pitadiˈec ci Yihofaan hani? To romiˈamiˈad micekiw to Fangcalay Cudad, midotim to samanay ci Yihofa milidong to finawlan Ningra i saˈayaw. (ˈOlic 68:20; 2 Pitiro 2:9) Ano miˈodis ko kalo kitakit kitaanan i taˈangayay padiing i, misaaliay kita to timolo, wa mikikaka to salakatay ko pitadiˈec ci Yihofaan. (ˈOlic 112:7, 8; Hipray 13:6) Ano aniniho kita a mitadiˈec ci Yihofaan, wa taˈangay ko timolo no ikor a misiˈayaw to saˈodis ni “Kok.” *
MITALA TO SALIDONG NI YIHOFA
Cato ka halafin wa mikerid ci Yis to kakarayan sofitay a efa milood, itini Armakiton palaˈafo to ˈada no Kawas! (Nengnengen ko 17 fatac)
17. Hano cowa ko matalaw kita to Armakiton hani? (Nengnengen ko papotal coka.)
17 Masowalay no fafekangay lalakaw, o kaˈorip no ˈalomanay tamdaw i lalomaˈ ita, itiniay ‘salikoray a romiˈad.’ Soˈlin mahaen, iraay ko tokel ita milakowit to taˈangayay padiing. O papalaˈafo to lekakawa ni Satan ko Armakiton a lalood. Kawra cowa ko mamatalaw kita, samanen ono Kawas a lalood konini. (Taneng 1:33; Icikil 38:18-20; Cikariya 14:3) Matengil ko limoˈot ni Yihofa, mikeridto ci Yis Kristo to salikaka ningra ato masacaˈolay efan a coyoh milood, miˈodis ci Satanan ato tatiihay coyoh, ato kalo kitakit.—Taniil 12:1; Paˈarawan 6:2; 17:14.
18. (1) Mikiˈokay ci Yihofa kitaanan to maanan hani? (2) Pakayni i Paˈarawan 7:9, 13-17 wa pakasoˈlin kita to manan hani?
18 Mikiˈokay ci Yihofa pasowal: ‘O sapiˈodis tisowanan a lalosidan, wa awa ko kapo.’ (Isaya 54:17) Wa ‘masadak i taˈangayay padiing’ ko ‘taˈangayay ˈopo a tamdaw,’ ikor aitini faelohay hekal padadotoc a midoko ci Yihofaan. (ˈOsien ko Paˈarawan 7:9, 13-17.) Padamaay ko Fangcalay Cudad kitaanan pakasoˈlin, oha mamalidong kita! Mafanaˈay kita ‘Dadipoten ni Yihofa ko madimadiay a tamdaw.’ (ˈOlic 31:23) Itiya, o mamikangodo ko tamdamdaw to fangcalay ngangan ni Yihofa, polong maolahay ato pakahemekay ci Yihofaan a tamdaw o tataˈangay ko lipahak.—Icikil 38:23.
19. Iraay ko manan makapahay a hatokel no mita hani?
19 Haratengen hena, o misowalan no 2 Timoti 3:2-5 a tamdaw itiniay i faelohay hekal, i cowato ka fiyor ni Satan a pakayraan, sasamaan ko pitilid no sinael hani? (Nengnengen ko sapatongal lalakaw “O Harateng Ato Waywayan no Tamdaw i Faelohay Hekal.”) Ci Ciyawce Kankase * na o Malohemay Malitengay i Congpo cingra, sanay milengo to pakayraan no Lakoing: “Noikor polong no hekal o salikaka maemin, tada makapahayto! Cato ka halafin, wa itinito i faelohay hekal maˈorip kiso, hakowa ko halafin ni Yihofa maˈorip, wa hatira ko halafin iso a maˈorip. Wa tahadaˈoc a maˈorip kita.” Hinatalaay kiso to kaira noniya makapahay romiˈad han?
Radiw 32 Tanoktoken!
^ 5段 Mafanaˈay kita cato ka halafin wa misiˈayawto ko tamdaw to ‘taˈangayay padiing’. Itini taˈangayay padiing, o sasamaan ko malifaay no sikawdan no Kawas hani? Mitokelay ci Yihofa kitaanan samaan ko hademak itiya hani? O papalahad kita to maanan a capeling, ngaˈ padadotoc a madimadi hani? Oniya lalakaw wa milengo toniya salicay.
^ 3段 SAPITADTAD A SOWAL: O makaniway a Kristokiyo oya misa o mikotoday ci Kristoan, kawra cowa pitoor to palinian ni Yihofa a midoko to Kawas a kasacefang no pihakelongan ko mitoroˈan.
^ 11段 SAPITADTAD A SOWAL: O Makok a Kok o makomoday a kalo kitakit i taˈangayay padiing ko mitoroˈan, o mamiˈodis cangra to matatodongay pihakelongan itiya.
^ 11段 Sakafanaˈaw to mamifekad a demak i ˈayaw no Armakiton, nengnengen ko Mikowanayto ko Hongti Kitakit no Kawas! Saka 21 fedengan. Sapitongalaw a cipinang to piˈodis no ‘Makok a Kok,’ ato sasamaan ci Yihofa i Armakiton milidong to finawlan Ningra, nengnengen ko Mikecolay 2015/7/15, 14-19 fiedac. (no Kowaping)
^ 16段 O lalangian no kasapala taykay i 2019 miheca i “Midaˈocay ko Olah,” Mikitini toniya taykay, wa mananam ita, ira ko olah ato sadipot ni Yihofa, oha rarihaday kita.—1 Korinto 13:8.
^ 19段 Nengnengen ko Mikecolay, 1994/12/1 “O Minaroˈan no Tayal Ningra Mikotoday Cingranan.” (no Kowaping)
