O MIFANAˈAY to romiˈad a tamdaw, misongilaˈay minengneng to sasing no royta, maˈaraway to aira ko ciˈicelay a faliyos, mamingata to ˈalomanay ko tamdaw a kilac. Tada calemcemay cingra, kalamkam saan pangiha a parikec to tamadaw.

Nohatini, iraay i ˈaˈayaw ko papalaˈafo a sano ˈadiyocay a faliyos, ci Yihofa mirikecay to paro no kakarayan a tamdaw. Tano masamaanay a pakayraan a mirikec hani? Hano pakasoˈlinen ita, wa pafelien Ningra ko tamdaw to hatoki a misakadademak han? Nengnengen ita itini i nolitenganho samaanay ci Yihofa paliˈayaw a mirikec.

Itini i lintad no Fangcalay Cudad, na paliˈayaway ci Yihofa pangiha to aaira ko sano ˈadiyocay a faliyos, pasowal to mamisawkit toya padetengay micoli to sapalimoˈot Ningra a tamdaw. (Taneng 10:25; Yirimiya 30:23) ˈAyaw no mamisawkit ko Kawas, paliˈayaway a pasowal to sasamaan pasasiyor, midofdof to sapalimoˈot Ningra. (2 Hongti 17:12-15; Nihimiya 9:29, 30) Marariday Cingra miocor to madimadiay sikawdan palihaf tora sasawkit, micoracor to tamdaw kaliki a midemak.—Amos 3:7.

Patinakoen, ci Nowa na milasilay to sasawkit no Kawas. Pinaay a miheca, timoloay cingra mirikec toya maˈodangay, mariˈangay a tamdaw, pasowal to tatefaden no Kawas ko Taˈangayay a Lenlen. (Satapangan 6:9-13, 17) Pasowalho cingra to sasamaan cangra ngaˈ matafo ko ˈorip. ˈIfowaay ci Nowa mitosil, mankora o “patenakay to moecelay demak” a tamdaw han cingra.—2 Pitiro 2:5.

Soˈlina misaˈicelay parikec ci Nowa, ˈarawhan cowa ka sikolen nangra kora lihaf. Telocto i, irato ko Lenlen, “mikeric i cangranan a maemin.” (Matay 24:39; Hipray 11:7) Mapatayto cangra cowa ko rarorohen ko Kawas caka paliˈayaw a parikec i cangranan.

Nolatekay, mangata to mamisawkit ci Yihofa i, parikec hananayho ko tamdaw, kawra pairaan Ningra ko toki no tamdaw a midemak. Patinakoen, ta mamitefad ci Yihofa toni moetep a padiing i Icip i, pasowalay a parikec to tamdaw. ˈAyaw no mamatefad ko saka pito a padiing i, ocoran Ningra ci Mosi aci Aron pasowal ci Falawan ato matayalay ningra, to cila a romiˈad o aira ko masaˈikayay a soeda. Iraay ko toki nangra milimek toniya soeda han? Sowal no Fangcalay Cudad: “Matalaw ko romaroma a matayalay a tapatapang noya hongti to sowal [ni Yihofa] saka, pacomoden nangra ko kuli ato pinaˈorip nangra i taloˈan. Nikawrira, caay pitengil to sowal [ni Yihofa] ko romaroma, pakonira han nangra ko kuli ato pinaˈorip i paputal.” (Kasadakan 9:18-21) Mankora, matengilay no tamdamdaw ko saparikec ni Yihofa, kalamkam saan a midemak, cowa ka matira to romaroma a adihay ko malahdaway.

ˈAyaw no mamafekad ko padiing i, paliˈayawan ni Yihofa parikec ci Falaw ato matayalay ningra, kawra cowa pakifalocoˈen nangra. (Kasadakan 4:22, 23) Teloc i, siˈayaw han minengneng ko kapatay no fisac a wawa nangra! (Kasadakan 11:4-10; 12:29) Soˈlinay haw i, o ngangaˈay maliyas nangra koni kasomadan a teloc han? Hayi, ngaˈayay. Haratengen hena, ta matengil ni Mosi ko salasil no Kawas i, tangsolay parikec to Israil tamdaw toni aaira a padiing, pasowal cangranan to mamisamaan a midipot to paro no lomaˈ. (Kasadakan 12:21-28) Hakowaay a tamdaw  ko mitooray to sapalimoˈot ni Mosi hani? Ano saˈosien i, ikor no saka moetep a padiing, maedeng 300 a ˈofad tamdaw ko miliyasay to Icip, lalomaˈ nangra iraay ko Israil tamdaw, iraay ko “ˈalomanay” a Icip tamdaw ato roma finacadan a tamdaw. Cangra maemin rihadayay a mitaˈlif toniya padiing.—Kasadakan 12:38.

Mikitini i nalifetan no Israil, mahapinang ita ano paliˈayaw ci Yihofa a parikec i, pairaan Ningra ko toki no tamdaw a midemak. (Limoˈot 32:4) Misamaanay hano mihaen to demak Cingra hani? Sowal sa ci Pitiro: “Nawhani mangalay [ci Yihofa] to sakasasiyoraw no falocoˈ no tamdaw a maemin a miliyas to raraw. Caay ka ngalay Cingra to nika laˈafo no cecacecay aca a tamdaw.” (2 Pitiro 3:9) Tada ciharatengay ko Kawas to tamdaw, mitokel cangranan miamet to toki a pasasiyor, hongaˈ caka masawkit a malaˈafo.—Isaya 48:17, 18; Loma 2:4.

Anini, iraay ko cecay tada kalimlaan a saparikec to paro no kakarayan a tamdaw, oha papacaˈof ko tamdaw maemin. Ta itiniho i sera ci Yis na somowalay, oniniya hekal o aitini i ‘taˈangayay padiing’ masongilaˈ a malaˈafo sanay. (Matay 24:21) Misaheciay pasowal cingra ˈayaw no mamalaˈafo, mamaˈaraw no nisawawaan ato tatahalifa to maanan a demak cangra. Nohatini, oniniya mamifiyor to polong no hekal a demak mifekadayto.—Matay 24:3-12; Luka 21:10-13.

Mihaenay haw i, palimoˈotay ci Yihofa to polong a tamdaw, nohatiniho midofdof Cingranan. Mitokelay ko Kawas to midofdofay Cingranan a tamdaw lipahak ko kaˈorip, halo milifok to adihayay a sakaraheker i faelohay a hekal. (2 Pitiro 3:13) Toha sapadamaaw to tamdaw pakasoˈlin to sakiˈok Ningra, pasowalay Cingra to sakalidong a ngaˈayay lihaf, oya ‘ngaˈayay lihaf no Hongti Kitakit’. Oniniya ngaˈayay lihaf o ‘papatenaken i paro no kakarayan’ sanay, toha sakatengilaw no kasakitakit a tamdaw. (Matay 24:14) Nohatini, palisopsopan ni Yihofa ko tamdaw Ningra a milikakawa, itini i 240 a kakilacan no cikiw a patenak toniya lihaf. ˈAyaw no mamisawkit, mitokelay ci Yihofa to ˈaˈaloman ko tamdaw pakatengil toniya saparikec a midemak, ho maliyas koniya aira a sano ˈadiyocay a faliyos.—Cifaniya 1:14, 15; 2:2, 3.

Ano paliˈayaw ci Yihofa a parikec i, pairaay to toki no tamdaw a midemak, o pinangan no demak Ningra koni. Kawra, mameten no tamdaw ko toki mitengil to saparikec han? Nanay kiemel kita mitenak to lihaf no Kawas, padama to ˈalomanay tamdaw, ho matafo ko ˈorip toniya pihererekan noni hekal!