1. Sapalaˈosiaw to araaw no Niyah, samaanay ko demak ni Yihofa hani?

PAKAYNI sapalaˈosiaw to araaw no Niyah, o maananto a demak malaˈosiay ni Yihofa a maemin. Tinakoen, ngaˈayay a malo tadamaanay a singsi ci Yihofa, malo misayaray a Wama, malo milasilay to ngaˈayay lihaf a Kawas. (Isaya 48:17; 2 Korinto 7:6; Kalatiya 3:8) Roma i, sakadademakanho Ningra ko tamdaw palaˈosi to araaw Ningra. (Matay 24:14; 28:19, 20; 2 Korinto 1:3, 4) Wa pafeli ci Yihofa kitaanan to taneng ato ˈicel, ho ngaˈay malaˈosi ita ko araaw Ningra, o harateng no roma mikingkiway tamdaw, o tatodong no ngangan ni Yihofa konini sanay.

2. (1) O roma tamdaw hano cisasa to ngangaˈay sakadademaken ni Yihofa ko niyah hokira? (2) Oniya lalakaw wa milengo to maanan?

² Ciharatengay kita ngaˈay sakadademaken ni Yihofa, kawra o roma tamdaw alatek pakayni i mihecaan, inaneng anca pakayraan noniyah a cisasa to ngaˈay malaˈosi koniya palinian hokira, sanay miharateng. O roma tamdaw i, madengayto ko katayal ako ci Yihofaan hamaanto misaˈicel a midemak, saan cangra. Oniya lalakaw mamilengo to, sasamaan ci Yihofa padama kitaanan misaˈicel a milaheci to araaw Ningra, mamilengoho to roma maˈoningay i Fangcalay Cudad a madimadiay a faˈinayan ato fafahiyan, samanan ni Yihofa padama cangranan ira ko kalim ato ˈicel a dademak. Saikor i, wa milengo to, ano sapicadaaw kita to sakadademaken ni Yihofa, samanen ita misaˈicel a midemak.

3. Sowal i Filipi 2:13 ci Yihofa pairato makalimay a falocoˈ no mita a dademak, o manan ko tatodong hani?

³ ˈOsien ko Filipi 2:13. * Sasamanen ni Yihofa pairato makalimay a falocoˈ no mita a dademak hani? Alatek mafanaˈay kita to iraay ko papadamaen a tamdaw i kasakopang, anca matengilay ita ko piˈosi no malohemay malitengay to tikami no Fenpo, mafanaˈ to misaaliay ko roma kilac to papadamaen, saan ko piharateng: “Wa ngaˈay kako a midemak to maanan hani?” Anca mitahidangay ko likakawa kitaanan micada to pasangaray a demak, saan kita miharateng: “Samanen ngaˈ malaheci koniya demak hani?” Alatek maˈosiay ita ko cecay sinael, saan ko harateng: “Wa samaan kako misakadademak toniya sinael padama to tao hani?” Manaokaniw, cowa ko papacieci ci Yihofa kitaanan a midemak, kawra maˈaraway Ningra ko masimsimay ita a hademak, wa padama kitaanan ira ko makalimay a falocoˈ a midemak.

4. Sasamaan ci Yihofa pafeli kitaanan to ˈicel a dademak hani?

⁴ Pafelian ni Yihofa kita to ˈicel a dademak. (Isaya 40:29) Tano fangcalay saocor Cingra a patongal to na iraay a ˈicel no mita. (Kasadakan 35:30-35) Pakayniayho i likakawa Ningra, pahatatanam kitaanan sasamaan midemak to tayal Ningra. Ano awaay ko pinang iso misakadademak to tayal Ningra, licayen ko tao ato cangacangen ko hinapaladaˈay a Wama, pafeli tisowanan to tadamaanay a ˈicel. (2 Korinto 4:7; Luka 11:13) Adihayay ko maˈoningay i Fangcalay Cudad a demak, ano o faˈinayan, fafahiyanto, wa padama ci Yihofa cangranan ira ko kalim ato ˈicel a dademak to tayal Ningra. Dodoc mamilengo kita to pina lalakaw, haratengen to sasamaan ci Yihofa misakadademak tisowanan midemak to mahecaday a tayal.

5. Pakayni i pisakadademak no Kawas ci Mosian a nalifetan, mananamay ita ko maanan hani?

⁵ Palaˈaideman ni Yihofa ci Mosi a milidong to Israil a tamdaw. I hacowaay Cingra misakadademak ci Mosian hani? Itiniay “mapakafanaˈ cingra to masamaamaanay a sifanaˈ no Icip” ikorto i, matatodongay to han? (Dmak 7:22-25) Cowa, misalofan ni Yihofa ci Mosi, malo misapoeneray ato damsayay a tamdaw ikor ngaˈ, misatapang a misakadademak cingranan. (Dmak 7:30, 34-36) Pafelian ni Yihofa ci Mosi to timolo, ngaˈay tomireng i ˈaˈayaw no ˈakawangay ko saaroˈan a mikowanay no Icip milasil to araaw no Kawas. (Kasadakan 9:13-19) Pakayni i pisakadademak no Kawas ci Mosian a nalifetan, mananamay ita ko maanan hani? Miocoran ni Yihofa ko misaˈicelay mitodong ato mitiˈeray Cingranan a tamdaw.—Filipi 4:13.

6. Mikitini misakadademak no Kawas ci Parcilayan midipot ci Tafitian a demak, mananamay ita ko maanan?

⁶ Ikor no pina soˈot miheca, misakadademakan ni Yihofa ci Parcilayan padama ci Tafitian. Itiya, milimekay ci Tafiti ci Apsaloman, macahiway ci Tafiti ato sikawdan ningra. Soˈlin matoˈasto ci Parcilay, kawra kamayanayho cingra padama ci Tafitian ato sikawdan ningra. Ci Parcilay malitengayto kako awaayto ko kapo cowa ka saan ko piharateng, hinapaladaˈay cingra padama to sikawdan no Kawas. (2 Samuil 17:27-29) O manan ko mananamay ita hani? Ano hakowaay ko mihecaan ita, wa sakadademaken no Kawas kita a padama to itiniay a  salikaka ato roma kitakit a salikaka, pafeli cangranan to hasaka ˈorip a dafong. (Taneng 3:27, 28; 19:17) Ano cowa ka tangsol sa militemoh padama cangraanan, kawra ngayˈay kita pakiyaho midama i polong no hekal to salikaka, midama to tahapadesay a salikaka.—2 Korinto 8:14, 15; 9:11.

7. Samaanay ci Yihofa misakadademak ci Simiyongan hani? Mananamay ita ko maanan hani?

⁷ Itiniay i Yirusalim ko kitiraan ni Simiyong, madimadiay cingra to Kawas, soˈlin matoˈasayto cingra, kawra, mikiˈokay ko Kawas, ˈayaw no mapatay cingra wa pakaˈaraw ci Misiyaan sanay. Halafinto mitala ci Simiyong ci Misiyaan, o sakiˈok ni Yihofa mitemeray ko falocoˈ ningra. Cecay romiˈad, o pakasoˈlinay falocoˈ ato mihadidiay ningra milifokay to sapalifon. Miocoray ko fangcalay saocor cingranan a tayra i fangcalay sefi, maˈaraway ko ‘engaengaho a Yisan, misakadademakanho no Kawas cingra a pasowal to pakayniay ci Yisan a sapairasol. (Luka 2:25-35) Cowa ka ˈaraw ni Simiyong ko pisatapang ni Yis a mitosil i hekal alatek, kawra miakoˈiday cingra to Kawas misakadademak cingranan. Itini faelohay a hekal, mamilifok cingra to adihayay a lifon! Mamaˈaraw ningra, mikowan ci Yis to polong a tamdaw milifok to lipahakay a ˈorip. (Satapangan 22:18) Ngaˈayay kita mitodong ci Simiyongan, ano sakadademaken ni Yihofa kita midemak to maanan, pairaen ko miˈakoiday a falocoˈ ita.

8. Samanen ni Yihofa misakadademak kitaanan mahecad o pisakadademak ci Parnapasan hani?

⁸ Saka 1 hahekalan, ci Yosifo o hinapaladaˈay a tamdaw makalimay cingra sakadademaken ni Yihofa. (Dmak 4:36, 37) Tada mafanaˈay ci Yosifo misayar to tao, mansa ci Parnapas saan ko tarokos pangangan cingranan, tatodong i, “o mihinomay.” Tinakoen ikor no malo tarokos ci Sawlo i, matalaway mingata ko salikaka cingranan, samanen na mipalakay cingra to kasakopang. Kawra talaˈayaway ci Parnapas padama ci Pawloan, maedeng masemeray ci Pawlo cingranan. (Dmak 9:21, 26-28) Ikor i Yirusalimay a malohemay malitengay sapiocoran to tamdaw tayra i Antiok pakalalok to salikaka, o cima ko miocoran nangra hani? Ci Parnapas. Tada ngaˈayay ko mipiˈliˈan nangra, sowal no Fangcalay Cudad, ci Parnapas ‘pakalalokay to salikaka tanotok ko falocoˈ, mitadiˈec to Tapang.’ (Dmak 11:22-24) Anini, ci Yihofa papadama kitaanan malo “o mihinomay” a tamdaw, pakalalok to salikaka. Tinakoen sakadademak Cingra kitaanan misayar to mapatayay ko salawina a tamdaw. Latekay miocoran Ningra kita milisoˈ ato patingwa to adadaay ato masomaday a salikaka, somowal to pakalalokay a sowal mikowad cangraanan. Maolahay kiso sakadademaken no Kawsa, mahecad o pisakadademak Ningra ci Parnapasan han?—1 Tisalonika 5:14.

9. Samaanan ni Yihofa padama ci Wasili malo inanengay a malohemay malitengay hani? Mananamay ita ko maanan?

⁹ O cecay a salikaka ci Wasili, itini i sadama ni Yihofa malo inanengay a malohemay malitengay. 26 ko mihecaan ningra manilnilay malo malohemay malitengay, calemcemay cingra awaay ko inaneng no niyah pakalalok to salikaka, mangalefay oya tahalifaay to pasangaray a tamdaw. Kawra, mikitini i adihayay ko milifetan a malohemay malitengay ato Sapahatatanam to Ciˈinorongay a Kantok, macakatayto cingra. Tinakoen patirengay cingra to palinian, tiya malaˈosito ko palinian i, matongalmatongal ko pakasoˈlinay a falocoˈ no niyah. Sowal sa cingra: “Isaˈayaw, cowa ka fanaˈ kako sasamaan pakalalok to salikaka, nohatini,  mahemekay kako pakalalok to salikaka. Ano padama ci Yihofa takowanan tano matatodongay a sinael misayar to salikaka i, masaloay ko falocoˈ ako!” Salikakaaw, ano makahi kamo pahecad ci Wasilian micada to pisakadademak ni Yihofa, wa pafelien no Kawas kiso to ˈicel mitamorong to taˈangayay a ˈinorong i kasakopang.

10. Midemakay ci Apikail to maanan? Mikitira cingranan mananam ita ko maanan?

¹⁰ Sapipatayaw ci Sawlo ci Tafitian ato mikotoday cingranan a tamdaw, misaaliay cangra to sadama. Tiya saalian ni Tafiti ci Napal to kakaenen, ano o maananto ngaˈayayto saan ci Tafiti. Samanen midipotay cangra to siri ni Napal mansa misaali to kakaenen. ˈArawhan cowa pisikol ci Napal, tangsol sa minaˈay tada o maˈidiay a tamdaw cingra. Mangolaway ci Tafiti sapipatayaw ci Napalan ato polong no paro no lomaˈ ningra a faˈinayan. (1 Samuil 25:3-13, 22) O fafahi ni Napal ci Apikail, makapahay cingra, citanengay a tamdaw cingra. Timoloay cingra mikilim ci Tafitian a mipitolos i ˈaˈayaw ningra, mingitangit aka mariˈang mipatay to tamdaw sanay ci Apikail. Madaˈmaˈan ni Apikail pasowal ci Tafitian a pakasoˈlin to papadama ci Yihofa cingranan. O misapoeneray a sowal ato waywayan ningra mitemeray to falocoˈ ni Tafiti, mahapinangto, o Kawas ko miocoray cingranan tayni mirikec takowanan. (1 Samuil 25:23-28, 32-34) Ci Apikail palahadan ningra ko makapahay a capeling, mansa misakadademakan no Kawas cingra. Mihaenay i, ano citanengay ko waywayan no fafahiyan salikaka, madaˈmaˈ ko sasowalen nangra, wa sakadademaken ni Yihofa pakalalok to paro no lomaˈ ato kasakopang a tamdaw.—Taneng 24:3; Titus 2:3-5.

11. O fafahiyan a wawa ni Salong midemakay to maanan a tayal hani? Anini cima ko mitodongay to ngaˈayay taˈarawan nangra hani?

¹¹ Ikor no pina soˈot miheca, misakadademakan ni Yihofa ko fafahiyan a wawa ni Salong misangaˈ to lowil no Yirusalim. (Nihimiya 2:20; 3:12) Soˈlin o ˈaˈideman ci Salong, makahiay ko wawa ningra dademak to marorayay katalawan a tayal. (Nihimiya 4:15-18) O cifadangalay no Tikeya tamdaw cowa kahecad, cowa kakahi cangra i laeno no mikayatay a dademak. (Nihimiya 3:5) Haratengen hena, 52 romiˈad malaheciayto a misangaˈ ko lowil, tada mahemekay ko wawa ni Salong! (Nihimiya 6:15) Anini, ˈalomanay fafahiyan salikaka makahiay mirienang to mikiriwiˈay a tayal, patireng ato misakapah to pidokoan to Kawas a kitiraan. Malaˈosi koniya tayal, inanengay, ato fanekfekay madimadiay fafahiyan salikaka, tada kalimlaan ko demak nangra!

12. Samanen ni Yihofa misakadademak kitaanan mahecad ci Tapisaan hani?

¹² Mapakalalokay ni Yihofa ci Tapisa, ‘hinapaladaˈay to tao,’ hanaca makahiay a midimokos to maponengay. (Dmak 9:36) Samanen hinapaladaˈay ato sidaˈitay ci Tapisa, mansa mapatay cingra i, ˈalomanay ko tomangicay a tamdaw. Ikor patikolan ni Pitiro a paˈorip cingra, lipahakayto ko ˈalomanay. (Dmak 9:39-41) Mikitini ci Tapisaan mananam ita ko maanan? Ano faˈinayanto fafahiyanto a maemin, wa ngaˈay midemak kita, mihadak to ciepocay a sadama to salikaka.—Hipray 13:16.

13. Halingodoay salikaka ci Losi, kawra samanan ni Yihofa misakadademak cingra hani? Samaanay ko harateng ningra?

¹³ Iraay ko cecay fafahiyan salikaka ci Losi, halingodoay cingra i salakat, kawra makalimay malo milakowitay to riyar a mitosilay. Sanay cingra: “Tada maolahay  kako mitosil.” Pakayni cingranan, malalengo to cilomaˈay to ngaˈayay lihaf cowa ko madoloay, kaemangho ano mitosil cingra i, mikitini cecay lomaˈ comikay tayra i roma lomaˈ, pipalilam aca to tancang miliyasayto. Soˈlin kalingodo ci Losi, 18 ko mihecaan misatapangayto misakafah. 1946 miheca, mirienangay cingra to Kiliyat Picudadan, ikor itiniay i Hawai ato Dipong a dademak. Misakadademakan ni Yihofa cingra, adihayay ko midemakan a mitosilay tayal tora kilac. Misatapang a mitosil maedeng 80 miheca, sanay ko sowal ni Losi: “Padadotocay ci Yihofa midama takowanan, cowato ka halingodo kako. Pakasoˈlinay kako, o kihcod mitadiˈecay ci Yihofaan a tamdaw o sasakadademaken Ningra.”

14. Pakayni Kolosay 1:29, misamaan kita ngaˈ sakadademaken ni Yihofa kita hani?

¹⁴ Ci Yihofa misakadademakay to sikawdan Ningra midemak to masasiromaay a tayal. Samaan ci Yihofa misakadademak kisowanan hani? Oniya salicay milingatay to makalimay ko falocoˈ iso hokira. (ˈOsien ko Kolosay 1:29.) Ano makalimay kiso patafang to niyah i, wa sakadademaken ni Yihofa kiso a palaˈosi to araaw Ningra, alatek malo ˈifowaay a mitosilay, inanengay a singsi, mafanaˈ misayar to tamdaw, anca malo ngaˈayay widang no tao.

15. Pakayni 1 Timoti 4:12, 15, o kapah salikaka oha mamicangacang ci Yihofaan to maanan hani?

¹⁵ O kapah a salikakaaw, mangatato 20 ko mihecaan namo ha? Nohatini misaaliay ko kasakopang to talifakay a faˈinayan malo padamaay sikawdan, mitamorong to adihayay a ˈinorong, samanen ˈalomanˈaloman ko malohemay malitengay. Makahiay kamo mitamorong to ˈinorong han? O sowal no roma salikaka: “Malo kalo a mitosilay ngaˈayayto kako.” Sanay. Ano mahaenay ko harateng iso i, cangacangen ci Yihofa pafeli tisowanan to makalimay a falocoˈ malo padamaay sikawdan, halo pafeli kisowanan to ˈicel matayal saki Cingranan. (Patnakay 12:1) Kapah a salikakaaw, misaaliay kami to sadama namo!—ˈOsien 1 Timoti 4:12, 15.

16. Cangacangen ita ci Yihofa to maanan hani? Misamaanay?

¹⁶ Ano samaanto ko pisakadademak ni Yihofa tisowanan i, wa padama tisowanan pakafilo to tayal Ningra. Mihaenay i, cangacangen Cingra pafeli tisowanan to makalimay a falocoˈ midemak to tayal Ningra, halo pafeli to ˈicel a misakadademak. Ano hakowato ko mihecan iso i, songilaˈen misakadademak to toki iso, ˈicel iso, ato dafong iso mikangodo ci Yihofaan. (Patnakay 9:10) Hamaan a calemcem anca misakahmaw to niyah, wa awato ko toki iso misamacay matayal saki Yihofaan. Misaˈicel kita pakahemek ci Yihofaan, tada kalikoanto konini!