Cacekiwen Lalakaw 41
Misikay Pacekiw to Fangcalay Cudad, Padama to Pacekiwan Micada to Paputisem—Saka 1
O tikami ni Kristo kamo, kami o malo sikawdan no Kawas ko mitiliday.—2 KORINTO 3:3.
RADIW 94 Pasifanaˈen to Tamdaw to Kimad no Kawas
KALIMLAAN NO LALAKAW *
Pakaynien i polong a kasakopang, maˈaraw ko kaolahan a pacekiwan micada to paputisem iraho ko mikikakaay tonini a kahemekan han? (Nengnengen saka 1 fatac)
1. O saka 2 Korinto 3:1-3 padama kitaanan cipinang, misikay pacekiw to Fangcalay Cudad padama to pacekiwan micada to paputisem hano o kalikoanto hani? (Nengnengen ko papotal coka.)
ITINI kasakopang iso maˈaraw ko cecay pacekiwan micada to paputisem, samaan ko harateng iso hani? Maedeng o lalipahak! (Matay 28:19) Ano o pacekiway noniya tamdaw kiso, maedeng o mamatongal ko lipahak! (1 Tisalonika 2:19, 20) O micadaay to paputisem a tamdaw cowa ko sapaˈayaw aca a tikami no pacekiway, o “sapaˈayaw a tikami” no polong a kasakopang.—ˈOsien ko 2 Korinto 3:1-3.
2. (1) Wa ngaˈay kita miharateng to maanan kalimlaan a salicay hani? Misamanay? (2) O maanan ko pacekiway to Fangcalay Cudad hani? (Nengnengen ko ilaenoay safanaˈ)
2 Itini mataˈlifay 4 miheca, itini cowacowa pala a mitosilay hikingen to folafoladan 1000 efan ko pacekiwan to Fangcalay Cudad *, hikingen cecay miheca 28 efan ko micadaay to paputisem malo Misawacayay Tamdaw ni Yihofa. Ano adihayay ko minanamay a tamdaw to Fangcalay Cudad, sasamaan kita padama to ˈalomanay tamdaw micada to paputisem hani? Anini, kamayanho paihkal ci Yihofa to mihadidiay i tamdaw, ira ko toki no tamdaw malo Krisciyang. Makalimay kita padama cangranan macakat, kaliki micada to paputisem, samanen cowato ka hakowa ko toki.—1 Korinto 7:29a; 1 Pitiro 4:7.
3. Oniya lalakaw wa mitadtad to manan hani?
3 Samanen o macalohay ko pipadama to tamdaw malo Krisciyang, milicayay ko malohemay malitengay i congpo to kasa fenpo, sakafanaˈaw to sasamaan padama to ˈalomanay pacekiwan micada to paputisem. Oniya lalakaw ato dotoc lalakaw wa milengo, o sapaini no adihayay ko nalifetan a misakafahay, milakowitay to riyar a mitosilay ato kasakilac kantok, o singsi ato pacekiwan sasamaan ko hademak, ngaˈ ciepoc ko pilengo to Fangcalay Cudad. * (Taneng 11:14; 15:22) Oniya lalakaw wa mitadtad, midemak ko pacekiwan to manan lima a demak, wa ngaˈay padotoc a macakat, saikor micada to paputisem.
MINANAM TO LIPALIPAY
Licayen ko pacekiwan ngaˈay maroˈ a minanam to Fangcalay Cudad hokira (Nengnengen saka 4-6 fatac)
4. Itinisa i fawahan no cilomaˈay a malalengo to Fangcalay Cudad wa ira ko maanan a pasangaray hani?
4 ˈAlomanay salikaka itiniay fawahan no cilomaˈay a malalengo to Fangcalay Cudad. Satapang aca ciepocay ko kalalengo to Fangcalay Cudad, kawra kamotoˈay ko toki a malalengo, hanaca cowa padotoc to lipalipay. Sapitongalaw to kaolah no cilomaˈay, milicayan no mitosilay ko cilomaˈay sasamaan mararinnak, ˈayaw no mamilisoˈ patingwaen cingra, paladaˈ to kalimlaan a kimad no Fangcalay Cudad. Mihaen ko kalalengo wa padadotoc to pina folad alatek. Ano hatini aca ko mihadakan no pacekiwan a toki minanam to Fangcalay Cudad, wa matoor ko patosokan micada to paputisen han? Cato alatek.
5. Mikitini Luka 14:27-33, wa pakalaloken ita ko pacekiwan midemak to maanan hani?
5 Patinakoay ci Yis mitadtad sasamaan ko demak no cecay tamdaw ngaˈ malo nisawawaan ningra. Sanay ci Yis, cecay tamdaw sapatirengaw to lomaˈ, ‘wa salakatho misaˈosi to mamapalak a payci,’ mihaen ngaˈ malaˈosi ko pipatireng. Sanayho ci Yis, cecay hongti sapiloodaw to ˈada, ‘maroˈho a malalengo,’ mihapinang iraay ko ˈicel a miocor to sofitay hokira. (ˈOsien ko Luka 14:27-33.) Tatodong ni Yis i, ciharateng ko tamdaw malo nisawawaan ningra, wa ihkal a cipinang o maanan ko tatodong malo Krisciyang. Mihaenay, pakalaloken ita ko pacekiwan masaˈosi ko toki to lipalipay a malacafay kitanan minanam to Fangcalay Cudad. Sasamaan ko hademak ita hani?
6. Sapadamaaw to pacekiwan macakat, wa ngaˈay kita midemak to maanan hani?
6 Salakat, ngaˈayay koˈedawen ko toki itini fawahan no cilomaˈay a malalengo to Fangcalay Cudad, alatek tongalen to cecay sinael a malalengo to cilomaˈay. Ano mananamto ko cilomaˈay koˈedaw to miming ko toki malalengo, ngaˈayay licayen cingra wa ngaˈay maroˈ a minanam to Fangcalay Cudad hokira. O caˈof no cilomaˈay wa mahapinang ita to hakowaay ko pisaareteng ningra minanam to Fangcalay Cudad. Cecay liyad i, sapadamaaw to pacekiwan kaliki ko kacakat, ngaˈayay licayen cingra mamakahi cecay lipay kinatosa a minanam hokira. Kawra, cowa ko pinanam aca to lipalipay, iraayho ko hademak no pacekiwan.
MISADAY TO CACEKIWEN LALAKAW
Misaday to cacekiwen a lalakaw, pasifanaˈ to pacekiwan samaan a misaday (Nengnengen saka 7-9 fatac)
7. Sasamaan ko singsi misaday to cacekiwen lalakaw?
7 Malo singsiyay, wa misongilaˈ kita misaday to cacekiwen a lalakaw. Ngaˈayay asipen ita ko lalengoen a lalakaw ato sinael, mafanaˈ to kalimlaan no lalakaw. Nengnengen ko lalangian no lalakaw, dama lalangian, salicay no fatac, coka ato misaˈosiyan “aasipen” a sinael, miharateng tano masamanay ika a padama ko pacekiwan cipinang to lalangian no lalakaw. Dotoc haratengen ko pakayraan no pacekiwan, miharateng tano kantangay a pakayraan mitadtad to lalakaw, ho madolo ko pacekiwan cipinang ato misaka dademak.—Nihimiya 8:8; Taneng 15:28a.
8. Pakayni Kolosay 1:9, 10, sasamaan kita patado to pacekiwan a mitolon?
8 Ano misaday kita to lalakaw i, ka pakayni pacekiwan ato saali ningra mitolon ci Yihofaan, micangacang to sadama ni Yihofa tano Fangcalay Cudad a patemer to falocoˈ no pacekiwan. (ˈOsien ko Kolosay 1:9, 10.) Paˈayaw a miharateng to kafokilan anca micadaay to maanan ko pacekiwan. Haratengen, o patosokan ita i, papadama cingranan micada to paputisem.
9. Sasamaan ko singsi pasifanaˈ to pacekiwan misaday to lalakaw?
9 Tokel ita pakayni ka picerid no pacekiwan minanam to Fangcalay Cudad a miakoˈid ci Yihofaan ato nano demak ni Yis, hanaca makalim sapitongalaw to kacipinang. (Matay 5:3, 6) Sapilifokaw to adihayay a epoc a minanam, wa misarocod a minanam ko pacekiwan. Mihaenay, papadamaen ita ko pacekiwan mihapinang, paˈayaw a misaday ato miharateng sasamanen misaka dademak o kalimlaan. Samaan ko pidemak hani? Ngaˈayay malacafay kita to pacekiwan a misaday, paˈarawen samaan mikilim to caˈof, ato samaan mikonis to kalimlaan sowal no caˈof. Dotoc, ngaˈayay pakalalok cingranan tano niyah a sowal a pacaˈof, mihaen o mamahapinang hokowaay ko kacipinang ningra. * Roma i, iraayho ko cecay hademak ita.
TO ROMIˈAMIˈAD MASASOWAL CI YIHOFAAN
Padama to pacekiwan mafanaˈ masasowal ci Yihofaan (Nengnengen saka 10-11 fatac)
10. (1) To romiˈamiˈad miasip to Fangcalay Cudad hano masakalimlaan? (2) Samaan ko picekiw to Fangcalay Cudad ngaˈ adihay ko malifokay a epoc?
10 Cowa ko kalacafay aca to singsi minanam to Fangcalay Cudad to lipalipay, o pacekiwan wa masasowal ci Yihofaan to romiˈamiˈad, masasowal ato mitengil to sowal Ningra to romiˈamiˈad. Miasip to Fangcalay Cudad to romiˈamiˈad ko pacekiwan, o mitengilay to sowal ni Yihofa. (Yosuwa 1:8; ˈOlic 1:1-3) Ngaˈayay pasifanaˈen no singsi ko pacekiwan misaka dademak to jw.org wangcan “Dadoedoen Miˈosi to Fangcalay Cudad a Rayray,” * sapadamaaw to pacekiwan adihay ko malifokay, pakalaloken no singsi cingra miharateng, o sinael samaan padama cingranan matongal ko kafanaˈ ci Yihofaan, ato samaan cingra misaka dademak.—Dmak 17:11; Yakop 1:25.
11. (1) Sasamaan ko pacekiwan minanam mitolon? (2) Micerid ko pacekiwan pasayra ci Yihofaan mitolon hano kalimlaan hani?
11 Pakalaloken ko pacekiwan mitolon to romiˈamiˈad, masasowal ci Yihofaan. O singsi misatapang ato mahererek ko pinanam mikifalocoˈ a mitolon to Kawas, itini satolon sowalen ko demak no pacekiwan. Matengil no pacekiwan ko mahaenay satolon ita, wa mafanaˈto mikitini falocoˈ a mitolon, mafanaˈho to papakaynien i ngangan ni Yis a mitolon ci Yihofaan. (Matay 6:9; Yohani 15:16) To romiˈamiˈad miasip ko pacekiwan to Fangcalay Cudad (mitengil to sowal ni Yihofa) ato mitolon (masowal ci Yihofaan), wa matongal ko piingid ci Yihofaan. (Yakop 4:8) Saka laˈosiyaw no patosokan micada to paputisem, iraayho ko cecay hademak no pacekiwan.
PADAMA TO PACEKIWAN MALA WIDANG CI YIHOFAAN
12. Sasamaan ko singsi padama to pacekiwan miingid ci Yihofaan?
12 Makalimay kita padama to pacekiwan mafanaˈ ci Yihofaan, kawra kalimlaan ko patemer to falocoˈ no pacekiwan, mihaen wa makalim cingra misaka dademak to mananamay. Mahaenay ko sapasifanaˈ ni Yis, cowa ko katatodong aca no sowal ningra, tangongolay ko pitemer to falocoˈ no tamdaw, mansa makahi ko tamdaw mihakelong ci Yisan. (Luka 24:15, 27, 32) Padamaen ita ko pacekiwan mihapinang, soˈlinay materek ci Yihofa, ngaˈayay ingiden ita Cingra, hanaca ngaˈayay malo Wama ita Cingra, malo Widang no Kawas. (ˈOlic 25:4, 5) Ano misikay to pacekiw i, padamaen ko pacekiwan mihapinang to makapahay capeling ni Yihofa. (Kasadakan 34:5, 6; 1 Pitiro 5:6, 7) Ano o mananto a lalakaw ko milengoan, paihkalen to masamanay a Kawas ci Yihofa. Papitinakoen ko pacekiwan to olah ni Yihofa, sidaˈitay ato siniˈadaay falocoˈ. Sanay ci Yis, ‘sataˈangayay, kalimlaan a sarikec’ i ‘maolah ci Yihofaan Kawas iso,’ mihaenay mamisarocod kita padama to pacekiwan maolah ci Yihofaan.—Matay 22:37, 38.
13. Sasamaan ko singsi padama to pacekiwan cipinang to capeling ni Yihofa?
13 Ano masasowal kita to pacekiwan i, talaˈayaw a misowal to olah no niyah ci Yihofaan. O papadama koni to pacekiwan mihapinang, o mamihaen cingra a maolah ci Yihofaan, malo widang ni Yihofa. (ˈOlic 73:28) Ano micekiw kiso i, madeng iraay ko sowal anca sinael mitemeray to falocoˈ iso, matongal ko kacipinang iso to capeling ni Yihofa, tinakoen, o olah, taneng, masadafdafay, ˈicel. Pasowalen ko pacekiwan to nafalocoˈan iso, ho mafanaˈ cingra to hano maolah kiso ci Yihofaan. Dotoc nengnengen ita ngaˈay padama to pacekiwan macakat roma a demak.
PAKALALOK TO PACEKIWAN MIRIENANG TO SAˈOPO
Pakalalok to pacekiwan ranikay mirienang to saˈopo (Nengnengen saka 14-15 fatac)
14. Pakayni Hipray 10:24, 25, mirienang to saˈopo hano ngaˈay padama to pacekiwan a macakat?
14 Tokel ita nanay micada to paputisem malo Krisciyang ko pacekiwan, mihaenay pakalaloken ita cangra mirienang to saˈopo no kasakopang. Iraay ko nalifetan a singsi sanay, ano ranikay ko pacekiwan mirienang to saˈopo, wa kaliki a macakat. (ˈOlic 111:1) O roma singsi pasowalay to pacekiwan, wa ngaˈay cangra itini kasaˈopoan minanam to adihayay lalakaw cowa ko mamananam i picekiwan. Ka malacafay to pacekiwan miasip to Hipray 10:24, 25. (ˈOsien) Pasowalen cingra mirienang to saˈopo wa milifok to maanan a epoc, ngaˈayay malacafay minengneng to Samanay ko Saˈopo i Hongti Kitakit Kasaˈopoan? A ika. * Padamaen ko pacekiwan misetek to falocoˈ mirienang to saˈopo to lipalipay.
15. Sasamaan kita pakalalok to pacekiwan micerid mirienang to saˈopo?
15 O pacekiwan iso ano cowaho pirienang to saˈopo, anca cowa picerid a mirienang, sasamaan hani? Ngaˈayay lipahak kiso a paladaˈ cingranan to mananamay iso i kasaˈopoan. Maˈaraw ningra ko kaolah iso masaˈopo, wa makalim a mirienang alatek. Ngaˈayay pafelien cingra to cecay Mikecolay anca Rayray no Saˈopo, pasowalen cingra o maanan ko lalakaw no dotoc a saˈopo, ngaˈayay licayen cingra o maanan a lalakaw ko kaolahan ningra. O matinakoay no pacekiwan sakinacecay mirienang to saˈopo, maedeng ikakaay ko kangaˈay to pirienang to roma pihakelongan. (1 Korinto 14:24, 25) Itini kasaˈopoan wa adihay ko maˈaraway ningra ngaˈayay a taˈarawan, malacafay to mahaenay a widang micawmaˈ o papadama cingranan misetek to falocoˈ micada to paputisem.
16. (1) Sapadamaaw to pacekiwan micada to paputisem, sasamaan ko demak no singsi? (2) Dotoc a lalakaw wa milengo to maanan?
16 Pakayni pipadama to pacekiwan micada to paputisem, mikitini toniya lalakaw mananamay ita ko maanan hani? Padamaen ita ko pacekiwan misaareteng to pilengo to Fangcalay Cudad, masaˈosi ko picekiw to lipalipay, hanaca misaday to lalengoen a lalakaw. Pasifanaˈenho ita ko pacekiwan masasowal ci Yihofaan to romiˈamiˈad, palahad to kalawidang Cingranan. Pakalalokenho ko pacekiwan micerid mirienang to saˈopo. (Nengnengen ko sapatongal lalakaw, “ Saka Laˈosi no Patosokan Micada to Paputisem, Mamidemak ko Pacekiwan to Maanan?”) Dotoc a lalakaw wa milengo, sapadamaaw to pacekiwan micada to paputisem, wa midemakho ko singsi to maanan lima a demak.
RADIW 111 Mahemekay Mitosil!
^ 5段 ‘Pasifanaˈ’ o padamaay to tamdaw tano cowa kalecad anca “faelohay a pakayraan misimsim, mitinako anca dademak.” Matay 28:19 o pakamihecaay sinael i 2020 miheca, patalipaˈelalay koniya sinael kitanan, pasifanaˈ to tao minanam to Fangcalay Cudad ato padama cangranan malo Krisciyang o kalimlaan a tayal. Oniya lalakaw ato dotoc a lalakaw wa milengo, sasamaan kita misongilaˈ midemak toniya tayal.
^ 2段 SAPITADTAD A SOWAL: Ano saka dademakan iso ko mitepangan no likakawa a cudad pasifanaˈ to tamdaw minanam to Fangcalay Cudad, o misikayay to pacekiway to Fangcalay Cudad. Paˈarawen iso sasamaan a minanam to Fangcalay Cudad ikor kinatosa a malalengo, hanaca o papadotoc cingra a minanam, ngaˈayayto mihokok to cecay pacekiwan.
^ 3段 2004 miheca 7 folad tangasa 2005 miheca 5 folad Pakafoladay a Salasil iraay ko “Misikay Pacekiw to Fangcalay Cudad, Padama to Pacekiwan Macakat” madadoedoay lalakaw, oniya lalakaw ato dotoc a lalakaw wa milengo to pina a sapaini.
^ 9段 Nengnengen Pasifanaˈ to Pacekiwan Misaday 4 ehon a ika. Itini JW Library® (app) keniˈen LALAKAW NO IKA > SAˈOPO NO KRISCIYANG ATO MITOSILAY > MISALOF TO INANENG MITOSIL.
^ 10段 Keniˈen ko FANGCALAY CUDAD ATO NOKAˈORIP > LALOSIDAN MICEKIW TO FANGCALAY CUDAD.
^ 14段 Itini JW Library® (app) keniˈen ko LALAKAW NO IKA > SAˈOPO NO KRISCIYANG ATO MITOSILAY TAYAL > MILINGATAY TO MITOSILAY A IKA.
