1, 2. (1) O maanan ko misalimlaan iso hani? (2) O maanan a soˈlinay kimad no Fangcalay Cudad ko misakaretengan iso? Misamaanay hani? (Nengnengen ko satapangan coka.)

O MAANAN ko misalimlaan iso hani? Wa oya madoloay a dafong ko sapifalic iso han? Pakaynien i patafangayto to tireng ci Yihofaan a tamdaw, oniya tosa a salicay cowa ka pasangar a pacaˈofen, samanen o sakakaay misakaretengan ita, o kalalaˈed no niyah aci Yihofa, mansa cowa ko sapilifokaw to maanan a dafongan a mifalah toniya kalimlaan a kalawidang. Misaaretengayho kita to soˈlinay kimad, samanen cipinang to soˈlinay kimad wa ngaˈay patireng to ngaˈayay kalalaˈed to kakarayan a Wama.​—Kolosay 1:9, 10.

² O kasapaan a singsi ci Yihofa, pakayniay i Fangcalay Cudad a pasifanaˈ kitaanan to adihayay a demak. Tinakoen, paihkalay ci Yihofa kitaanan to o maanan ko tatodong no ngangan Ningra, ato makapahay a capeling Ningra. Mifanaˈayho kitaanan, milimasmasay Cingra to sapatefoc, kinafalah to wawa no Niyah ci Yisan, paihkalay konini tada maolahay Cingra kitaanan. O roma, masowalay ni Yihofa i Fangcalay Cudad ko Hongti Kitakit ni Misiya, somowalayho Cingra o mapasimalay Krisciyang iraay ko hatokel, tayra i  kakarayan tahadaˈoc a maˈorip, o ‘roma lopayˈay siri’ wa itini i sera a Lakoing tahadaˈoc a maˈorip. (Yohani 10:16) Itini Fangcalay Cudad pasifanaˈay ci Yihofa kitaanan, sasamaan ko waywayan a maˈorip. Misalimlaay kita toniya soˈlinay kimad, samanen o soˈlinay kimad papadama kitaanan miingid to misangaˈay a Tatapangan. Ono kaˈorip ita wa ira ko epoc.

3. Wa mipalak kita to payci a miˈaca to soˈlinay kimad han? Tadtaden hena.

³ Hinapaladaˈay ci Yihofa, makahiay Cingra palemed to mikilimay to soˈlinay kimad a tamdaw. Pakayni tamdaw kinafalahay Cingra to ˈorip no wawa no Niyah. Mansa cowa pisaali Cingra kitaanan tano payci miˈaca to soˈlinay kimad. Ci Simon ciharatengay tano payci miˈaca to sapiadah to adada a ˈicel, telocto mirikecan ni Pitiro, sanay cingra: “Mamana maˈkak kiso atora [payci] iso. Nawhani maedeng a maˈaca no ekim ko sapafeli no Kawas a [fangcalay saocor] o saan kiso.” (Dmak 8:18-20) Ano hatiraay i, hano misaali ko Fangcalay Cudad kitaanan ‘miˈaca to soˈlinay kimad’ hani?

4. Oniya lalakaw mamilengo to maanan?

⁴ ˈOsien ko Taneng 23:23. Ano sapakahelaaw to soˈlinay kimad, wa misaˈicel kita ngaˈ, anca makahiho a kinafalah to kihcod a milifok to soˈlinay kimad. Sowal no mitiliday to Taneng, ‘miˈaca’ kita to soˈlinay kimad, anca malifok ko soˈlinay kimad, sasinanoten hamaan ‘paˈacaen’ anca mahiday ko soˈlinay kimad. Dotoc wa milengo kita to, o maanan ko tatodong no ‘miˈacaay’ to soˈlinay kimad, minengnengho pakayni sapilifokaw to soˈlinay kimad wa pasadak kita to maanan a sapiˈaca. Cipinang kita toniya lalakaw wa matongal ko piakoˈid to Kawas pafeli to soˈlinay kimad, misaˈosi to falocoˈ eca ka ‘paˈaca’ to soˈlinay kimad. Wa mahapinangho ita, sapiˈacaaw to soˈlinay kimad a mihadakan to sapiˈaca tada ciepocay.

5, 6. (1) Tano tinakoen a mitadtad, hano cowa ko tatano payci kita a miˈaca to soˈlinay kimad. (2) Saka dademaken ko soˈlinay kimad wa milifok to maanan a epoc hani?

⁵ O roma dafong cowa papaycien, kawra misaaliayho kitaanan misaˈicel ngaˈ malifok ko dafong. Mihongyakan i Taneng 23:23 a ‘miˈaca’ a tilid no Hipray iraay ko ‘malifokay’ a tatodong. Ano hongyaken to ‘miˈaca’ anca ‘malifokay’, sahtoay mamihadak to ˈicel ngaˈ, anca tano mafafalicay a pakayraan milifok to ciepocay a dafong. O laenoay tinakoan, wa mitadtad to o maanan ko tatodong no ‘miˈacaay’ to soˈlinay kimad. Ano itini icifa, iraay ko cowa papaycien a pawli, oniya pawli cowa ko fahal saan mahadak i eto no lomaˈ ita, tatayra kita i icifa panokay to pawli. Toniya sapatinako, soˈlin cowa pipalak kita to payci miˈaca to pawli, kawra mamipalak kita to toki ato ˈicel tayra i icifa. Mahecaday, o soˈlinay kimad cowa ko tatano payci a miˈaca, kawra ano sapilifokaw to soˈlinay kimad, oha mamihadak kita to ˈicel ngaˈ ngaˈay.

⁶ ˈOsien ko Isaya 55:1-3. O sinael no Isaya padamaay kitaanan matongal ko kacipinang to o maanan ko tatodong no miˈaca to soˈlinay kimad. Toniya matiliday, patinakoan ni Yihofa ko kimad Ningra to nanom, hacol, epah. O Kimad no Kawas hato tingalaway makoracay a nanom, paˈicelay ato pasinoway to tireng. Mahecad o hacol pahaleday to tamdaw, palahad to ˈengaenga, o Kimad no Kawas patanektekay to noˈadingoan no mita. O Kimad no Kawas ngaˈayay patinakoen to epah. Sowal no Fangcalay Cudad pakahemekay ko epah to tamdaw. (ˈOlic 104:15) Tokel ni Yihofa nanay miˈaca ko finawlan Ningra to epah, mikiˈokay Cingra kitaanan, ano tooren ita ko palinian no Fangcalay Cudad a maˈorip, wa ira ko lipahak. (ˈOlic 19:8) Tada matatodongay ko sapatinako no Fangcalay Cudad, ano minanam to Kimad no Kawas ato saka dademaken ko safalod no Fangcalay Cudad i nokaˈorip i, hato tano payci a sapiˈaca to soˈlinay kimad, wa milifok to epoc. Dotocto wa milengo Pakayni sapiˈacaaw  to soˈlinay kimad, wa pasadak kita to maanan a lima sapiˈaca?

7, 8. (1) Miˈaca to soˈlinay kimad hano mamipalak to toki hani? (2) Pakayni sapiˈacaaw to soˈlinay kimad, samaanay ko demak no cecay kaying? Samaanay ko minaroˈan?

⁷ O Toki. O miˈacaay to soˈlinay kimad a tamdaw wa misadak to toki. Ano mitengil to lihaf no Hongti Kitakit, micekiw to Fangcalay Cudad ato mitepangan cudad, micada to pipacekiw to Fangcalay Cudad, misaday to lalakaw no saˈopo anca mirienang to saˈopo, oha mamipalak to toki. Mihaenay, wa mikitini kita i cowa ko kalimlaan a demak ‘miˈaca’ to toki. (ˈOsien ko Ifiso 5:15, 16.) Wa hakowa ko papalaken a toki cipinang to taˈenengan a kimad no Fangcalay Cudad hani? Awaay ko masaˈosiay a caˈof nonini. Nikawrira, o taneng ni Yihofa, pakayraan a dademak ato waywayan Ningra, awaay ko tolas ita a misolap. (Loma 11:33) O saka cecay mitepangan a Mikecolay, patinakoay to “cecay hana” ko soˈlinay kimad, sanay ko lalakaw: “Hamaan masaloen to cecay a hana no soˈlinay kimad. Ano cecay ko hana maedengto, nimaan adihay ko hana hani. Ka padotoc a mipitin, mikilim.” Wa ngaˈay miharateng kita: “Hakowaay ko marorongay a hana no mita hani?” Soˈlin wa awa ko tolas no toki ita noikor, pakayniay ci Yihofaan a sifanaˈ cowa ko mamaemin ita a minanam. Mihaenay, songilaˈen misaka dademak ko toki, miˈaca to soˈlinay kimad. Anini, ˈalomanay ko sapikilimaw to soˈlinay kimad a tamdaw, nengnengen ita ko cecay tinakoan.

⁸ O cecay kaying ci Mariko, * tayraay cingra i Niwyok micudad. O cecay misakafahay fafahiyan salikaka pakalomalomaˈay mitosil malisoˈay ci Mariko. Soˈlin iraayto ko pihakelongan ni Mariko, kawra minanam cingra to Fangcalay Cudad tada lipahakay, mansa misaaliay to salikaka cecay lipay kinatosa a micekiw. Soˈlin adihayay ko tatiliden ni Mariko, ato tayal, kamayan cingra misatapang a mirienang to saˈopo. Ci Mariko sapi ‘ˈacaaw to toki’ minanam to Fangcalay Cudad, cowato pirienang to kalo a cawmaˈ. Makahiay cingra mipalak to toki, kalikiay ko kacakat i noˈadingoan, caka cecay miheca micadaayto inoˈ. Enem a folad misatapangay misakafah ci Mariko, mikitini 2006 miheca tahanini a misakafah.

9, 10. (1) Ano sapiˈacaaw kita to soˈlinay kimad, wa samaan ko pinengneng to hafay? (2) O cecay fafahiyan o maanan ko misawadan hani? Samaanay ko harateng ningra?

⁹ O Hafay. Latekay, sapiˈacaw kita to soˈlinay kimad, wa misawad to ˈakawangay ko lifon a tayal anca kamawmahan. Tinakoen, tiya tahidangen ni Yis koya mifotingay a Pitiro aci Antiri malo ‘milifokay to tamdwa a mifotingay’, ‘tangsolay misawad to tafokod’ cangra mikotod ci Yisan. (Matay 4:18-20) Manaokaniw, cowa ka sahto sa ko minanamay to Fangcalay Cudad a tamdaw mamihaen misawad to katayalan, samanen sowal no Fangcalay Cudad, o tamdaw iraay ko ˈinorong midimokos to paro no lomaˈ. (1 Timoti 5:8) Kawra, ˈalomanay minanamay to soˈlinay kimad a tamdaw wa mifalic to harateng no niyah minengneng to payci, pakahapinang to iraay ko mikikakaay to hafay ko kalimlaan a demak. Ihkalay ko sapatalipaˈelal ni Yis kitaanan: “Aka pinaˈang itini i hekal to malodafong namo . . . Naˈangen i kakarayan ko malodafong namo.” (Matay 6:19, 20) Nengnengen ko milifetan no cecay kaemangay fafahiyan.

¹⁰ Ci Mariya cowaho picudad mafanaˈayto mimali to kawefo. Tahini kocong, matongalay ko inaneng a mimali, malifokay ko siwhing micudad to taˈangayay picudadan. Masalalomaˈay no kaˈorip ko pimali to kawefo ni Mariya, o patosokan ningra malo misiayay to kawefo, kadofah ko kaˈorip. Ikor, misatapangay ci Mariya minanam to Fangcalay Cudad, maolahay cingra to mananamay a soˈlinay kimad,  iraay ko sadama no Fangcalay Cudad to kaˈorip ningra. Sanay ko sowal ni Mariya: “Tooren ako ko paliniyan no Fangcalay Cudad misalof to kaˈorip, matongalay ko lipahak,” sanay. Mahapinangayho ni Mariya, cowa ko ngangaˈay micangacang to hafay ko niyah, a kamayan macakat i noˈadingoan. (Matay 6:24) Mihaenay, sawad hananay ni Mariya ko malo misasiayay to kawefo a patosokan, misawadayho to saka cinganganaw a toki. Miˈacaay to soˈlinay kimad ci Mariya, samanayto ko minaroˈan hani? O lipahakay a misakafahay cingra no hatini, tada iraay ko epoc no kaˈorip sanay a miharateng.

11. Ano mitoor kita to soˈlinay kimad a maˈorip wa misamaan milingat to kalalaˈed no niyah ato tao?

¹¹ O kalalaˈed to salawina ato widang. Ano mitoor kita to soˈlinay kimad a maˈorip, wa milingat to kalalaˈed no niyah to salawina ato widang alatek. Patadoan ni Yis ko nisawawaan a mitolon: “Nanay, pakaynien Iso i sowal Iso ko pisafangcal i cangraan. . . o [soˈlinay kimad] ko sowal Iso.” (Yohani 17:17) “Pisafangcal i cangraan” ngaˈay tano “pacinowasen cangra” sanay. Micadaay kita to soˈlinay kimad i, wa malacinowas to kalo a tamdaw, cowa to ka malacafay toniya hekal. Samanen, mafalicay ko harateng no mita, mitooray to palinian no Fangcalay Cudad a maˈorip, alatek iraay ko masasiromaay a pinengneng no tao kitaanan. Cowa ko misaˈadaay kita to tao, kawra, iraay ko roma salawina ato widang palidlid sanay a miliyas kitaanan, mangalef misafelitay to pihakelongan no mita. Cowa ko kafahkaˈan koni, samanen, o sowal ni Yis: “O mamalaˈada no tamdaw ko paro no lomaˈ ningra.” (Matay 10:36) Kawra, mikiˈokay ci Yis kitaanan, soˈlin kinafalahay kita to dafong pakayni sapiˈacaaw to soˈlinay kimad, kawraan mikikakaay ko mamalifok ita a dafong to malahdaway.—ˈOsien ko Marko 10:28-30.

12. O cecay Yutaya a faˈinayan pakayni sapiˈacaaw to soˈliny kimad, misadakay to maanan sapiˈaca aki?

¹² O cecay misasingdiay a Yutaya tamdaw ci Alon, kaemangho pasifanaˈan to aka a sowalen ko ngangan no Kawas. Nikawrira, iraay ko noˈadingoan a saali ni Alon. Kinacecayay, o cecay Misawacayay Tamdaw ni Yihofa pasowalay ci Alonan, pakakadepen ko sepat no Hipray a ngangan no Kawas, ngaˈayay ˈosien to “Yihofa”. Mafanaˈ ci Alon tada mahemekay, tangsolay tayra i sefi mikilim to lapi, pasowal toniya demak. Harateng ni Alon wa mahecad ko lapi cingraanan, pakayni kafanaˈ to ngangan no Kawas a mahemek, ˈarawhan cowa ka haen, misopaˈan no lapi ci Alon, o misafelitay to kimad sanay minengneng cingranan. Telocto, marawraway ko kalalaˈed ni Alon to paro no lomaˈ. Kawra, padotocay ci Alon miˈaca to soˈlinay kimad, mipiliˈ malo Misawacayay ci Yihofaan i hakelong no kaˈorip. Wa mahecad kita ci Alonan mitoor to soˈlinay kimad a maˈorip, caka talaw malikaf no paro no lomaˈ ato roma tamdaw han?

13, 14. Pakayni sapiˈacaaw to soˈlinay kimad, o mamifalic ko tamdaw to maanan a harateng ato waywayan? Patinakoen.

¹³ Mararaway a harateng ato waywayan. Ano sapicadaaw to soˈlinay kimad a midoedo to palinian no Fangcalay Cudad a maˈorip i, wa makahi a misalof to harateng ato waywayan ngaˈ. Sowal ni Pitiro: “Kao mitengilay to sowal kamo. Akato pihakelong to masamaamaanay a ˈanof namo a matiya o demak namo yo mafokilho kamo to Kawas. Kamatiya o nika fangcal no mitahidangay tamowanan a Kawas ko nika fangcal namo i polong no demak namo.” (1 Pitiro 1:14, 15) Tatiihay ko waywayan nolitengan a Korinto a tamdaw, mansa, ano sapiˈacaaw cangra to soˈlinay kimad, wa misongilaˈ a mifalic to nokaˈorip no niyah ngaˈ. (1 Korinto 6:9-11) Anini, iraay ko ˈalomanay tamdaw pakayni sapiˈacaaw to soˈlinay kimad a misawad to tatiihay a waywayan. Pakayni toniya demak pasowalay ci Pitiro: “Naniti:yaho kamo a midemak to kaolahan no roma a finacadan a demak a maˈotit, maˈanof, malasang, haliacang tono hekal. Malaliepah kamo. O kaˈosian ko demak namo a mitaˈong to samiyay. Maedengto. Akato piliyaw to matiraay.”—1 Pitiro 4:3.

 ¹⁴ Ci Tewien aci Ciyasmin halafinay ko haliepahay a nanaman. Soˈlin mafanaˈay ci Tewien tono kayki a demak, kawra pakayni haliepah, cowa ka halafin ko katayalan. Ci Ciyasmin mariˈangay ko pinangan, misasetiˈay ko waywayan. Cecay romiˈad, malasangay ci Ciyasmin romakat i lalan, tatosaay milakowitay to riyar a mitosilay misawacayay cingraanan, milimasmas to roma lipay pasifanaˈ cingraanan to Fangcalay Cudad. Mitooran no mitosilay ko toki a mikilim ci Ciyasmin, ˈarawhan malasangay ci Tewien aci Ciyasmin. Cowa ka harateng ni Tewien aci Ciyasmin, soˈlinay a ciharateng cangraanan ko milakowitay to riyar a mitosilay, miliyaway a milisoˈ cangraanan. Ikor, miliyaw ko mitosilay tayra i lomaˈ ni Tewien i, cowato ka hecad ko pakayraan, mikitini saka cecay minanam to Fangcalay Cudad i, misaˈicelay cangra a minanam, misatapangay mitoor to soˈlinay kimad no Fangcalay Cudad a maˈorip. Caka tolo folad, misawadayto ci Tewien aci Ciyasmin a komaen to epah, ikor mitingkiay to raramod nangra. Mahapinang no niyaroˈay tamdaw ko kafalic ni Tewien aci Ciyasmin, ikor ˈalomanay ko makalimay minanam to Fangcalay Cudad.

15. (1) Pakayni sapiˈacaaw to soˈlinay kimad, o roma tamdaw misadakay to maanan sapiˈaca aki? (2) Mihaen to demak hano pasangar hani?

¹⁵ Misafelitay to Fangcalay Cudad a nanaman ato demak. Pakayni i roma tamdaw, sapifalahaw to misafelitay to Fangcalay Cudada a nanaman ato demak, tada pasangarayto. O roma tamdaw ikor no mafanaˈ to cowa ka tatodong to safalod no Fangcalay Cudad ko nanaman no niyah, cowato pitoor to nanaman a midemak, kawra o roma tamdaw pasangaray misawad toniya nanaman, samanen mafanaˈay cangra o kalo a tamdaw naifalocoˈay a maolah to nanaman, mangalef ko milingatay to mitaˈongay to mapatayay a nanaman, hato calemcemay cangra to cowa ko mamakahi ko salawina ato widang micada to kafalic nangra. (Limoˈot 14:1) Ngaˈay kita mikitini taˈarawan no tao minanam to sasamaan timolo misalof to demak no niyah. Nengnengen ita ko timoloay a demak no saka cecay hahekalan itiniay Ifiso a tamdaw.

16. O roma Ifiso a tamdaw sapiˈacaaw to soˈlinay kimad, sasamanen ko hademak hani?

¹⁶ O Ifiso o hinakawasay a niyaroˈ, mihaenay oya misasakawasay a tamdaw i, sasamaan ko demak a miˈaca to soˈlinay kimad hani? Sowal no Fangcalay Cudad: “Patayraen no ˈalomanay a cikawasay ko cudad nangra a misaˈopo. Todohen nangra a mifalah konini i kaˈayaw no ˈalomanay. Saˈosi han nangra ko ˈaca nonini a cudad i, lima a ˈofad (50,000) a rimood no ekim. Mahaen ko nika ciˈicel ciˈicel no sowal [ni Yihofa] a matenak.” (Dmak 19:19, 20) Oniya madimadiay a Krisciyang, soˈlin mihadakay to ˈakawangay sapiˈaca, kawra milifokay to kadofahay a sapalemed no Kawas.

17. (1) Ano sapiˈacaw kita to soˈlinay kimad wa misadak to maanan sapiˈaca aki? (2) O laenoay lalakaw wa milengo to maanan salicay?

¹⁷ Pakayni sapiˈacaw to soˈlinay kimad mihadakay kiso to maanan a sapiˈaca hani? Kita o cecacecay tamdaw mipalakay to toki mipitin to “hana no soˈlinay kimad”. O roma tamdaw misawaday to hafay ato katayalan; o roma tamdaw cowato ka ngaˈay ko kalalaˈed to salawina ato widang; o roma tamdaw misalofay to harateng ato waywayan; o roma tamdaw mifalahay to misafelitay to safalod no Fangcalay Cudad a nanaman ato pakayraan. Wa mihai kita, ano o mananto ko mihadakan ita a sapiˈaca, o epoc no soˈlinay kimad no Fangcalay Cudad, ikakaay to mifalahan ita a dafong. O soˈlinay kimad padamaay kitaanan malo widang ni Yihofa, oniniyan ko misalimlaan ita a demak. Ano haratengen ita ko malifokay a lemed i, ikor no cipinang to soˈlinay kimad, ecato ka patelas a ‘paˈaca’ to soˈlinay kimad. Kawra, iraay ko ‘paˈacaay’ to soˈlinay kimad a tamdaw, hano mihaen ko demak nangra hani? Wa samaan kita miliyas to sapidemakaw to hatiniay pakidemay a raraw hani? O laenoay lalakaw wa milengo toni salicay.