ˈAyaw no mapatay ci Yis a dadaya, palimoˈotay to tarokos hamaan micangacang to saaroˈan ilalomaˈ no salikaka. Sanay ko sowal ni Yis cangranan: “O mikowanay to finawlan ko hongti nonini a hekal. O midipotay han no finawlan ko mikowanay. Nikawrira, caay ko hahaenen kono namo.”—Luka 22:25, 26.

O misowalan ni Yis a Midipotay Tapang, o cima? O miterekan no Krisiya ato Loma a mitoˈtoˈan, tangloy ato mitilidan, paihkalay o tamdaw itiya panganganan ko idahiyay anca mikowanay tamdaw to Ayfoitis a ngangan. Itini Krisiya a sowal, o tatodong no Ayfoitis, o Midipotay a Tamdaw anca, o Midipotay a Tapang. Samanen midemakay koniya tamdaw to palemeday to finawlan a demak, malifokay nangra ko hatiniay sapangangan.

O roma hongti panganganan to Midipotay a Tapang, tinakoen o hongti no Icip sakatolo a Toremi, sakafalo a Toremi, hongti no Loma ci Yulius Kaysa, Aukustus, ato hongti no Yutiya ci Hiroti. Tinakoen ci Hiroti, na miˈacaay cingra to emi padama to tahapadesay a tamdaw, hanaca parikoˈay to manikaway a tamdaw, pakayniay ko pilifok to Midipotay Tapang a ngangan.

Micacekiway to Fangcalay Cudad no Towic ci Atawf Tasman paihkalay, Midipotay Tapang sanay a ngangan matenakay itiya. Sanay ko sowal ningra: “Ano mikilim i litengan a mitoˈtoˈan to Midipotay Tapang a ngangan, wa kaliki mahela iso ko mataˈlifay ko semoˈot a misaka dademakay toniya ngangan a tinakoan.”

Hano pasowal ci Yis to nisawawaan: “Caay ko hahaenen kono namo?” Tatodong ni Yis, cowa kangaˈay ko nisawawaan fanekfek to saki ˈalomanay a demak, hamaan ciharateng to sakangaˈay no finawlan han? Cowa ka hatira. O ka ciharatengan ni Yis, o araaw no tamdaw midemak to ngaˈayay.

Itini romiˈad ni Yis, o cihafayay tamdaw midamaay to lawla ato misiayay i kasasiayan a kitiraan, patirengayho to koing, fiw ato pakiyaho to mahecaday a demak. Kawraan, mihaen ko demak nangra sapilifokaw to pipaepa no tamdaw, ho matongal ko pihamham no tamdaw to niyah, anca adihay ko malifokay a paya misinkiw. O cecay taˈarawan a cudad sanay ko sowal: “Soˈlin o roma tinakoan paihkalay, hinapaladaˈ ko roma tamdaw, o soˈliˈlinay ko falocoˈ. Kawra mihaen ko demak no ˈalomanay mikitiniay misatekeday no mirikecay ko araaw.” O hatiniay misakaretengay tono tekedan a epoc ato maˈanofay a harateng, onini ko misowalan ni Yis to laliyasen no nisawawaan.

Ikor no pina miheca, misaˈicelay ko tarokos ci Pawlo toniya soˈlinay kimad, ano paladaˈ kitinien i matatodongay a araaw ko pidemak. Itini sapatikami ningra to Korintoay a kasakopang, sanay ko sowal: “Kao nihapinangan no falocoˈ no kahacecacecay ko sapasadak. Aka kao nisaˈidiˈidian, aka kao nipaciecian a falocoˈ ko sapasadak.”—2 Korinto 9:7.