O CECAY siniˈadaay a demak ngaˈayay paira to taˈangayay sahinom ato sapakalalok to tamdaw! Siniˈada ko tao kitaanan, miakoˈiday kita. Ano maolahay kita siniˈada ko tao micada kitaanan, wa samaan kita palahad toniya makapahay a capeling hani?

O cecay siniˈadaay a tamdaw cowa ko kangodo aca to tao, wa pakayni i sasowalen ato waywayan, paihkal to soˈlinay kaciharateng ato padama to tamdaw. Sapalahadaw ko tamdaw to siniˈadaay a capeling, pairaen ko soˈlinay a olah ato siniˈadaay a falocoˈ. Roma i, palimoˈotay ko Kawas to Krisciyang palahad to minaroˈan no fangcalay saocor, o siniˈadaay o minaroˈan no fangcalay saocor. (Kalatiya 5:22, 23) Nengnengen ita, ci Yihofa ato wawa Ningra samaanay a siniˈada to tamdaw, wa samaan kita a mitodong to taˈarawan Nangra, palahad toniya kalimlaan a capeling.

Ciharatengay ato misangaˈayay ci Yihofa to polong a tamdaw, mahawpay ko “mafokilay to siniˈada ato tatiihay a tamdaw.” (Luka 6:35) Ci Yihofa “malecad ko nipipacidal Ningra to mariˈangay ato ngaˈayay a tamdaw. Paˈoraden Ningra ko ngaˈayay a tamdaw ato tatiihay a tamdaw.” (Matay 5:45) Oya cowa pihai to misangaˈay a Tatapangan ci Yihofa a tamdaw, kamayan pafelien ni Yihofa cangra to sakaˈorip, hato ngaˈayay cangra milifok to lipahak i kaˈorip.

Mikitini picada ni Yihofa ci Ataman aci Ifaan a pakayraan, wa mananam ita to sasamaan siniˈada to tamdaw. Caka halafin a mararaw ci Atam aci Ifa, “dapic han nangra a misolsol ko papah no sokon a kilang a misatalip to satahpo nangra to tireng.” Nikawrira, maˈkakto ko potalay no Itin a sera, “papalengawen no sera ko ceka a semot ato talod,” maˈorip ci Atam aci Ifa i potal no Itin, misaaliay to matatodongay a rikoˈ. Mihaenay, “sangaˈen [ni Yihofa ko] rafir no ˈaˈadopen ko rikoˈ a pafeli ci Ataman ato fafahi ningra a pacaˈdong.” Paihkal to siniˈada cangraanan.—Satapangan 3:7, 17, 18, 21.

Siniˈada ci Yihofa micada to ‘tatiihay tamdaw ato ngaˈayay tamdaw,’ kawra mikiriwiˈay Cingra paihkal to siniˈada i madimadiay a coyoh ato sikawdan. Tinakoen, itini romiˈad no pairasolay ci Cikariya, maˈaraw no cecay coyoh tomerepay ko pipatireng to fangcalay sefi i Yirusalim, makesemay ko falocoˈ. Mitengilan ni Yihofa ko sowal noniya coyoh, hanaca tano ‘madaˈmaˈay a sowal mihinom’ cingraanan. (Cikariya 1:12, 13) Roma i, siniˈadaay ci Yihofa a micada ci Iliyaan. Na matoleday ko falocoˈ ni Iliya, micangacangay ci Yihofaan miala to ˈorip ningra. Mafanaˈay ci Yihofa to harateng ni Iliya, miocoray to coyoh a paˈicel cingraanan, mikiˈokayho ci Iliyaan, cowa ko matoˈolay cingra. Matengil ni Iliya koniya siniˈadaay a sowal, malifokay ko sapadama, padadotoc midemak to patorodan no Kawas a ˈinorong. (1 Hongti 19:1-18) Hatiraay, itini lalomaˈ no sikawdan no Kawas, o cima ko malefotay a paihkal to siniˈadaay a capeling ni Yihofa hani?

Mitosil ci Yis i fafekang no sera, siniˈadaay a sidaˈit, cowa pakidem ko saali ningra to tamdaw, cowa pisatakalaw. Matomesay ko siniˈadaay a falocoˈ, sanay ko sowal ningra: “Kamo o marorayay ato karetengay ko ˈinorong a tamdamdaw i, katayni i takowanan a maemin ta pahanhanen ako kamo.” (Matay 11:28-30) Samanen o cisiniˈadaay a tamdaw ci Yis, ano talacowato cingra, mikotoday ko ˈalomanay tamdaw cingraanan. Maˈaraw ni Yis cangra, “sasiniˈada sa cingra i cangraan,” pakaenen cangra ato miadah to masakenaay ko adada a tamdaw. Pasifanaˈan ni Yis cangra to adihayay pakayniay i kakarayan Wama a demak.—Marko 6:34; Matay 14:14; 15:32-38.

Tada siniˈadaay ci Yis, cipinangay cingra to harateng no tao. ‘Mihamhamay’ ci Yis to soˈliˈlinay ko harateng a tamdaw, mihadidi a padama cangraanan. (Luka 9:10, 11) Tinakoen, o maleslesay ko remes to 12 miheca a fafahiyan makalimay sakaadahaw hato kama sanay to rikoˈ ni Yis. Tooren ko sarikec ni Mosi, cowa ka korac koniya fafahiyan, kawra cowa ka rikecen ni Yis cingra. (Lifi 15:25-28) Siniˈaday ci Yis toniya halafinay ko adada a fafahiyan, pasowal cingraanan: “Kayingaw, o nano nipitiˈer iso i Kawas ko sakaadah iso. Sangaˈayen ko rakat iso. O maadahayto kiso.” (Marko 5:25-34) Tada cisiniˈadaayto ci Yis!

Mikitini fafekangay a tinakoan mahapinangay ita, o soˈlinay a siniˈada iraay ko waywayan. Tano ngaˈayay a Samariya tamdaw a tinakoan ko pisaˈicel ni Yis tonini. Itini tinakoan, o cecay Samariya tamdaw itini i lalan maˈaraway ko cecay miˈafasan, mipekpekan madokaˈay a Yutaya tamdaw. Soˈlin makakaˈadaay ko Samariya tamdaw ato Yutaya tamdaw itiya, kawra maˈaraw noniya Samariya koniya mamapatayto a Yutaya tamdaw i, siniˈadaay ko falocoˈ. Oniya Samariya tamdaw tano waywayan a paihkal to siniˈadaay, patado toniya madokaˈay a Yutaya tamdaw mitafo to dokaˈ, miˈorong cingraanan tayra i pilafinan a midimokos. Ikor, pateliayho to payci koniya Samariya tamdaw i tawki no pilafinan, misaali cingraanan midimokos toniya madokaˈay a Yutaya tamdaw, hai sanay pasadak to payci.—Luka 10:29-37.

Cowa ko pidemak aca, wa ngaˈay somowal kita to sidaˈitay ato pakalalokay to tao a sowal. Sanay ko Fangcalay Cudad: “O sakatoled no tamdaw ko rawraw no falocoˈ, o sakalipahak no tamdaw ko ngaˈayay a sowal.” (Taneng 12:25) Ano siniˈada ato ngaˈay ko picada ita to tamdaw, wa pasowal to pakalalokay cangraanan a sowal, padama cangraanan fanekfek ko harateng. * O siniˈadaay a sowal mifanaˈay to tamdaw to ciharatengay kita cangraanan, ano mihaen wa mapaˈicel cangra, ira ko ˈicel misiˈayaw to malifaay a pasangar i nokaˈorip.—Taneng 16:24.

“Palecaden no Kawas to tireng Ningra ko tamdaw a misangaˈ”, polong a tamdaw wa ngaˈay palahad to siniˈadaay a capeling. (Satapangan 1:27) Tinakoen, o cecay ci Yuliyus a tapang no sofitay no Loma, citodongay mipalit ci Pawloan tayra i Loma, kawra siniˈadaay ci Yuliyus ci Pawloan. Tiya tahira cangra i Siton i, “sangaˈayen ni Yuliyus ko nipidipot ci Pawloan saka, haydaen ningra ko nika tayra ni Pawlo a milisoˈ to widang ningra ato nipihalhal nangra ci Pawloan.” (Dmak 27:3) Ikor, tahapadesay ko tamina ni Pawlo, cingra ato cafay i tamina midangoyay tayra i Malta a potipot. O tamdaw i potipot “fangcal ko demak no itiraay a tamdaw,” paihkalay cangra to siniˈadaay, miromrom to namal paringo ci Pawloan ato tahapadesay a tamdaw. (Dmak 28:1, 2) O demak no potopotay tamdaw citodongay to papakahemeken. Kawra, latekay aca ira ko siniˈadaay a waywayan cangoˈotayho.

Ano sapakahemekaw kita ci Yihofaan, itini kihcod no kaˈorip papaihkal to siniˈadaay. Palimoˈotay ci Yihofa kitaanan ‘micaˈedong’ to siniˈadaay. (Kolosay 3:12) Nikawrira, halingodoay kita alatek, cangoˈotay  ko rihaday no falocoˈ, tahacadaay to sapalak anca iraay ko misatekeday falocoˈ, hato pasangaray micerid siniˈada to tao. Kawra, ano todongen ita ci Yihofa, hanaca mitadiˈec to fangcalay saocor no Kawas, oha ngangaˈay kita pakaremo to pasangaray, micaˈedong to siniˈadaay.—1 Korinto 2:12.

Mahapinangay ita ko niyah to aicowa paihkal to siniˈadaay han? Licayen ita ko niyah: “Iraay ko siniˈaday ako a falocoˈ mitengil to sowal no tao han? Misinanotay kako to saali no tao han? Misangaˈayay kako to cowa ko salawina ato widang a tamdaw han? Dotoc, ngaˈayay patireng kita to patosokan, adihay ko kafanaˈan itini taliyokay ita a tamdaw, mangalef ko itiniay kasakopang a Krisciyang. Mihaen, wa matongal ko pisinanot ita to pakayraan ato saali nangra, paihkal to siniˈada cangraanan. Ano maolahay kita siniˈada ko tao micada kitaanan, wa tano mahecaday a pakayraan ko sapicada ita cangraanan. (Matay 7:12) Saikor, mitolon kita micangacang ci Yihofaan padama kitaanan palahad to siniˈadaay a capeling, o noka pisaˈicel ita wa milifok to sapalemed no Kawas.—Luka 11:13.

Itini i saka 2 Korinto 6:3-6, mihadakay ci Pawlo to pina capeling paihkal to sikawdan no Kawas ko niyah, masalalomaˈay ko “siniˈadaay.” Pakaynian ni Pawlo i siniˈadaay a sasowalen ato waywayan paihkal to soˈlinay a harateng i tamdaw, mansa maolah ko tamdaw miingid cingraanan. (Dmak 28:30, 31) Mahecaday, o siniˈadaay a waywayan ita wa misolot to tamdaw sapinanamaw to soˈlinay kimad. Siniˈada kita micada to polong a tamdaw, mahawpay ko mipalakay kitaanan a tamdaw, halatek wa mafasaw ko waywayan nangra, palahdaw to misaˈadaay harateng nangra, halatek wa makahito cangra a mitengil to lihaf no Fangcalay Cudad.—Loma 12:20.

Caka halafin mamalo Lakoing koniya cikiw, polong miliyaway maˈorip a tamdaw wa micada to siniˈadaay, maedeng o lalipahak a matemer ko falocoˈ nangra. I lalomaˈ nangra o roma tamdaw sakinacecay mitanam to olah no tao alatek. Wa taˈangay ko piakoˈid no miliyaway maˈorip a tamdaw, papaihkal cangra to siniˈadaay i tao. Itiya, cowa ko mamihai ko Kawas ira ko misatekeday a tamdaw i Lakoing, edeng oyana ciolahay ato siniˈaday micada to tao a tamdaw ko mamlifok to hemek no Kawas, tahadaˈoc a maˈorip. (ˈOlic 37:9-11) Tada o rihadayay, dipayalay a hekal itiya! Kawra, ˈayaw no ira ko makapahay a romiˈad, siniˈada micada to tamdaw, wa ngaˈay samaan padama kitaanan hani?

Sowal no Fangcalay Cudad: ‘O siniˈadaay tamdaw saka ciepoc no niyah.’ (Taneng 11:17) Tocerid maolahay ko tamdaw miingid to siniˈadaay a tamdaw, o siniˈadaay a tamdaw wa milifok to siniˈadaay a picada no tao. Sowal ni Yis: “Ano o maan ko sapilatang namo a pafeli i taowanan i, orira ito ko sapilatang no Kawas a pafeli i tamowanan.” (Luka 6:38) Mihaenay, o siniˈadaay a tamdaw iraay ko ngaˈayay a widang, halafin ko kalawidang.

Pakalalokay ko tarokos ci Pawlo to Ifisoay a Krisciyang: “Kasasiniˈadaˈada, kasasipaˈayaw kamo. Kasasihepol kamo to raraw.” (Ifiso 4:32) Ilalomaˈay no kasakopang a tamdaw ano madadama ato paihkal to siniˈadaay falocoˈ, wa taˈangay ko haepoc no kasakopang! O siniˈadaay a tamdaw cowa ko sasomowal to midokaˈay, milikafay, milokesay a sasowalen, cowa ko papalenak to sanaysanay a sowal, oha mamisaˈicel somowal to sapakalalok to tao a sowal. (Taneng 12:18) Mihaen, itini noˈadingoan wa taˈangay ko kacowat no kasakopang.

O siniˈadaay a capeling pakaynian i sasowalen ato waywayan a paihkal. Siniˈada kita micada to tamdaw, o mitodongay to Kawas ci Yihofaan, paihkal to dihkoay hinapaladaˈay a capeling Ningra. (Ifiso 5:1) Mihaenay, wa ngaˈay kita paira to epoc no kasakopang, wa ngaˈayho misolot to adihayay tamdaw mirieneng to matatodongay a pidoko. Nanay padadotoc kita paihkal to siniˈadaay i polong a tamdaw!