1, 2. (1) Misaaliay ci Pitiro ci Yisan, ‘salimlaen iso ko niyah,’ samaanay ko harateng ni Yis? (Nengnengen ko satapangan coka.) (2) Misamaanay hano ira ko hatiniay a harateng ni Yis hani?

TOKEL no nisawawaan wa miliyaw ci Yis patireng to Israil kitakit, ˈarawhan caka halafin wa micada to roray ato patayen, sanay ci Yis, pasangaray a micada ko nisawawaan. Pasowalay ko tarokos ci Pitiro ci Yisan: “Tapangaw, [salimlaen iso ko niyah.] Caay ko aira ko matiniay a demak i tisowanan.” Pacaˈof sa ci Yis cingranan: “Satanaw, piliyas i takowanan. O mitenaˈay kiso takowanan. Caay kono Kawas ko niharatengan iso. Ono tamdawan ko niharatengan iso.”—Matay 16:21-23; Dmak 1:6.

² Paihkalay ko sowal ni Yis, o harateng no Kawas cowa ka hecad to harateng no hekal ni Satan. (1 Yohani 5:19) Misaaliay ci Pitiro ci Yisan, salimlaen ko niyah, paihkalay to iraay kono hekal a harateng ningra. Kawra mafanaˈay ci Yis, o tokel no Wama cingraanan, misiˈayaw to roray ato patay. Mikitini i sowal ningra ci Pitiroan, mahapinang ita to micadaay ci Yis to  harateng ni Yihofa, eca ka fiyor no hekal ko niyah.

3. Sakairaaw kono Kawas a harateng, hano cowa ko madoloay hani?

³ Iraay kono Kawas anca hekal a harateng ita hokira? O waywayan ita mahecaday to palinian no Kawas alatek, kawraan o falocoˈ ita samaanay? Misaˈicelay kita pahecad to harateng no niyah ato harateng ni Yihofa han? Sapidemakaw kita tonini, wa misaˈicel ngaˈ ngaˈay. Nikawrira, itini taliyok ita matomesay ko pinangan no hekal, mansa madoloay a mafiyor kita. (Ifiso 2:2) Roma i, salimlaen ko niyah sanay a sasowalen, maoratay ko harateng ita. Mihaenay, sapipalahadaw ko tamdaw to harateng ni Yihofa, cowa ko madoloay, kawra madoloay a madenga no hekal.

4. (1) Ano papifiyoren ita koniya hekal to harateng no niyah, wa samaan ko teloc hani? (2) Oniya lalakaw wa milengo to maanan?

⁴ Ano papifiyoren ita koniya hekal to harateng no niyah, wa madoloto malo misatekeday, o niyah saan ko misaˈosi to ngaˈayay, tatiihay. (Marko 7:21, 22) Mihaenay, kalimlaan i, papalahaden ko “harateng no Kawas”, cowa kono “tamdaw a harateng”. Oniya lalakaw wa padama kitaanan, palahad to harateng no Kawas hano cowa ko mapalitay, oha saka ciepoc no mita. Mamilengoho sasamaan ko demak ita, ho eca ka fiyor no hekal. Dotoc a lalakaw wa milengo to samaan cipinang to pinengneng ni Yihofa to demak, ato sasamaan palahad to mahecaday no Kawas a harateng.

5. O roma tamdaw hano cowa pihai a mafiyor no nima ko pinengneng nangra hani?

⁵ O roma tamdaw cowa pihai mafiyor no nima ko pinengneng nangra, sanay ko sowal: “O niyah ko tawki ako.” O tatodong i, misaˈosi to kihcod a demak, o fadangalan nangra sanay. Cowa ka olah cangra malahdaw ko fadangalan no niyah, hato mapalitay. *

6. (1) Pafeli ci Yihofa kitaanan to pasalat, ngaˈay midemak to maanan? (2) O hatiniay a pasalat, awaay ko tolas han?

⁶ Nikawrira, tano harateng ni Yihofa minengneng to demak, cowato ka ngaˈay ira kono niyah a harateng, cowa ka saan. Saka 2 Korinto 3:17, sanay ko sowal, ‘icowaay ko fangcalay saocor ni Yihofa, iraay ko pasalat itira.’ Soˈlinay haw i, misangaˈ ci Yihofa kitaanan i, pafeliay kitaanan to pasalat, ngangaˈay kita ira ko niyah a pinangan, kaolahan, ato palahad to kahemekan no niyah. Kawra, o hatiniay a pasalat, iraay ko tolas. (ˈOsien ko 1 Pitiro 2:16.) Tokel ni Yihofa ano mamisaˈosi kita to ngaˈayay tatiihay i, micada to sakayat no Kimad Ningra. Mihaen to demak, o pakidemay a mipalit kitaanan, anca o saka ciepoc no mita han?

7, 8. Misamaanay palahad to harateng ni Yihofa, cowa ko pakidemay a mipalit kitaanan hani? Patinakoen hena.

⁷ Patinakoen, misaˈicel ko wama wina pasifanaˈ to wawa to matatodongay a harateng, ato soˈliˈlin ko falocoˈ, malalok, patado to tao a miharateng, mihaen to demak cowa ko pakidemay a mipalit to wawa, o papadama to wawa lipahak ko kaˈorip noikor. Molahadto ko wawa, mipiliˈ ko niyah a midemak to maanan, o pasalat ningra. Ano doedoen ningra ko sapasifanaˈ no wama wina i nokaˈorip, cowa ko mamidemak to saka somad no  niyah a saˈosi, cowa ko papaira to adihayay pasangaray ato kacarirawan a demak.

⁸ Ci Yihofa, mahecaday o maolahay to wawa a wama, tokel Ningra nanay ciepoc ko kaˈorip no mita. (Isaya 48:17, 18) Mihaenay, pafeliay Cingra kitaanan to palinian no waywayan ato safalod, mitokelayho kitaanan palahad to harateng Ningra, ato midoedo to safalod Ningra a maˈorip. Mihaen ko demak Ningra, cowa ko mipalitay kitaanan, wa pacakat to sapiharateng a ˈicel no mita. (ˈOlic 92:5; Taneng 2:1-5; Isaya 55:9) Mahecad ko harateng ita ci Yihofaan i, wa kamayan ira ko kaolahan no niyah, wa ngaˈayho matatodong ko misaˈosian, palipahak to niyah. (ˈOlic 1:2, 3) Ira ko harateng ni Yihofa no mita, tada o saka ciepoc!

9, 10. Hano mikikakaay ko harateng no Kawas to harateng no hekal hani?

⁹ Hano palahaden ita ko harateng ni Yihofa, samanen o harateng Ningra mikikakaay to harateng no hekal. Pakayni waywayan, kalalaˈed no paro no lomaˈ, katayalan ato romaroma, adihayay ko sapaini no hekal, nikawrira cowa ka hecad to harateng no Kawas. Tinakoen, palitaˈang to niyah o matatodongay, sanay ko harateng no ˈalomanay, anca madadiˈi to potalay no raramod, cowa ko mararaway saan. Sapaini no roma tamdaw, wa ngaˈay patelas sanay a malicinowas anca malalikong ko raramod, mihaen to demak mamatongal ko hemek, sanay cangra. O hatiniay a sapaini micoliay to safalod no Fangcalay Cudad, wa soˈlin saka ciepoc no aniniay a tamdaw han?

¹⁰ Sowal ni Yis: “Mahapinang i demak no Kawas ko nika citaneng Ningra.” (Matay 11:19) Anini, kalikiay macakat ko kakak, nikawrira cowa pakasaysay to adihayay a pasangaray, tinakoen o lalood, misakakinihay to finacadan, ato raraw. Roma i, madadiˈi to potalay no raramod, cowa ko mararaway sanay ko tamdaw, kawra mihayay ko ˈalomanay, maˈodangay wa mipalak to paro no lomaˈ, adada ato roma pasangaray. Cowa ka hecad ko Krisciyang, samanen iraay ko harateng ni Yihofa no mita, ngaˈayay misalof to kalalaˈed no paro no lomaˈ; pakayni kakorac no waywayan, ho eca ka madenga no adada; ngaˈayayho malacafay to salikaka i polong no hekal, pairaay to lipahak no mita. (Isaya 2:4; Dmak 10:34, 35; 1 Korinto 6:9-11) Soˈlinay, mikikakaay ko harateng ni Yihofa to harateng no hekal.

11. (1) O nima a harateng ko mikayatay ci Mosian hani? (2) Samaanay ko minaroˈan hani?

¹¹ Nolitengan a madimadiay sikawdan ni Yihofa, pakahapinangay to sakakaay ko harateng ni Yihofa. Tinakoen, ci Mosi “mapakafanaˈ cingra to masamaamaanay a sifanaˈ no Icip”, kawra kamayan milongoc to Kawas cingra, ho “matongal ko taneng”. (Dmak 7:22; ˈOlic 90:12) Micangacangay cingra ci Yihofaan: “Nanay pasifanaˈen kako to niharatengan Iso,” han ningra. (Kasadakan 33:13) Makayatay no harateng ni Yihofa ci Mosi, ikor ngaˈayay midemak cingra to palaˈosi to sakiˈok no Kawas a demakan, halo malikoay cingra, ‘o pakasoˈlinay falocoˈ a tamdaw,’ sanay masowalay no Fangcalay Cudad.—Hipray 11:24-27.

12. O maanan ko mitooran no tarokos ci Pawlo a misaharaterateng hani?

¹² Citanengay ko tarokos ci Pawlo, adihayay ko sifanaˈ, mafanaˈayho to Krisiya ato Hipray a sowal. (Dmak 5:34; 21:37, 39; 22:2, 3) Kawra, ano sapafafidaˈaw cingra to demak i, wa tano Kimad  no Kawas a misaharaterateng, cowa ko mamitoor to taneng no hekal a midemak. (ˈOsien ko Dmak 17:2; 1 Korinto 2:6, 7, 13 *.) Mansa iraay ko ngaˈayay a minaroˈan i pitosilan, mamilifok cingra to tahadaˈocay a ˈorip noikor.—2 Timoti 4:8.

13. Palahad to harateng ni Yihofa, o nima a ˈinorong hani?

¹³ Soˈlin o harateng no Kawas mikikakaay to harateng no hekal. Ano tooren ita ko harateng no Kawas a maˈorip, wa milifok to hemek. Kawra, cowa ka pacieci ci Yihofa kitaanan, pahecad to harateng Ningra, o ‘madimadiay citanengay a koli’ ato malohemay malitengay, cowa ko mamiˈmet to harateng no mita. (Matay 24:45; 2 Korinto 1:24) Soˈlinay i, palahad to harateng ni Yihofa, o niyah a ˈinorong. Wa ngaˈay kita misamaan a midemak hani?

14, 15. (1) Ano makalimay kita ira ko mahecaday ni Yihofa a harateng, ngaˈayay misimsim to maanan? (2) Pakayni Loma 12:2, hano cowa ka ngaˈay kita minanam to harateng no hekal hani? Tano tinakoan a mitadtad.

¹⁴ Palimoˈotay ko Loma 12:2 kitaanan: ‘Aka madenga nonini a hekal, safaelohen ko harateng a mifalic to niyah, ho cipinang to ngaˈayay no Kawas, o malefotay kahemekan Ningra a araaw.’ Mahapinangay ita, ˈayaw no minanam to soˈlinay kimad, ano mafiyoray no harateng no hekal, oha ngangaˈay mifalic to niyah a miingid to harateng no Kawas. Soˈlin kalomahadan ato milifetan isaˈayaw, awaawa sa mafiyoray ko harateng no mita, kawra sapi falicaw to harateng no mita, milingatay to picada to samaanay a harateng. Ano misimsim kita to harateng no Kawas, wa mahapinang to o matatodongay ko harateng Ningra, padama kitaanan pahecad ko harateng ita to harateng Ningra.

¹⁵ Ano makalimay kita ira ko mahecaday ni Yihofa a harateng, ‘aka madenga nonini a hekal.’ Cowa ka ngaˈay kita minanam to micoliay to harateng no Kawas a sasowalen. Tano tinakoan a mitadtad: Saka tanoktokaw ko tireng no tamdaw, mansa komaen to cihaleday a kakaenen. Kawra, ano mararid cingra komaen to maponiˈay a kakaenen, wa tanoktokho cingra han? Ano minanam kita to harateng ni Yihofa, kawra makahiay kita mafiyor no mararaway a sasowalen, wa awaayto ko epoc tora.

16. Sasinanoten ita miliyas to maanan a demak?

¹⁶ Kawraan, wa ngaˈay kita misongilaˈ a miliyas to harateng no hekal han? Ecato, samanen itiniay kita toniya hekal a maˈorip, awaawa sa mingataay to harateng no hekal. (1 Korinto 5:9, 10) Tinakoen, itini i pitosilan, marariday a mitengil to mararaway sasowalen, kawra cowa ko haharateng han ita kora mararaway sasowalen, cowa ko hahaien ita. Mansa pahecaden ita ci Yis, tangsol sa miconged to harateng ni Satan. Cowa konini aca, misaˈicel kita miliyas to harateng no hekal.—ˈOsien ko Taneng 4:23.

17. Sasamaan kita ngaˈ, eca ka piingid to harateng no hekal hani?

¹⁷ Sasamaan kita ngaˈ, saka ecaaw piingid to harateng no hekal hani? O pakayraan i, sasinanoten a mipiliˈ to widang. Palimoˈotay ko Fangcalay Cudad kitaanan, aka mararid a micawmaˈ to cowa pidoko ci Yihofaan a tamdaw, ho eca ka madenga nangra. (Taneng 13:20; 1 Korinto  15:12, 32, 33) Sasinanoten ita mipiliˈ to lawla. Ano liyasen ita ko lalakaw no sinkalong, mariˈangay anca maˈodangay a lawla, ecato ka warak no ‘pacoliay to sifanaˈ no Kawas’ a harateng.—2 Korinto 10:5.

18, 19. (1) O harateng no hekal wa tano maanan a pakayraan a mipalak kitaanan? (2) Pakayni i lawla, lalicayen ita ko niyah to maanan? Misamaanay?

¹⁸ Nolatekay, o harateng no hekal tano cowa ka hapinang a pakayraan a mipalak kitaanan, oha mamisinanot kita ngaˈ ngaˈay. Tinakoen, o roma a sinfon milamlamay tono mirikecay a harateng; o roma safanaˈ no tamdaw miowingay to ˈalomanay, micangacang to palinian no hekal; o roma ika ato cudad milengoay to “sakakaay ko niyah”, anca “sakakaay ko paro no lomaˈ” sanay a harateng, o matatodongay konini. O hatiniay a sasowalen misakahmaw to pinengneng no Fangcalay Cudad, nikawrira, edeng misarocod a maolah ci Yihofaan ngaˈ, maraheker ko paro no lomaˈ ato niyah. (Matay 22:36-39) Roma i, o tawcikel cudad ato mangka hato ngaˈayay nengnengen, kawra cowa ko kafanaˈan to mafiyorayto ko waywayan no wawa.

¹⁹ Wa ngaˈay kita mirienang to saka ciepoc no tireng a lawla, kawra lalicayen ita ko niyah: “Oniya lawla ano tano cowa ka hapinang a pakayraan a milamlam to mararaway a harateng, wa ngaˈay mahapinang ako han? Wa miˈimer kako to niyah ato wawa, aka pakidem a minengneng to milawlaay a kamok anca lalakaw han? Wa padama to wawa ako, tano harateng ni Yihofa a minengneng to demak, ho eca ka mafiyor no harateng no hekal han? Ano mahapinang ita ko kasasiroma no harateng no Kawas ato harateng no hekal, cato ka ‘madenga nonini a hekal.’

20. Wa mafiyor no nima kita, o maanan ko piˈarawan hani?

²⁰ Haratengen ita, o macadaay ita a lihaf, ano cowa ko naitiraay ci Yihofaan i, o naitiraay i hekal ni Satan. O mamafiyor no nima kita, ora micadaan ita a lihaf ko piˈarawan. Ano micada kita to harateng no hekal, wa mafiyor no hekal kita, o harateng ato waywayan ita, wa mahecad to hekal a tamdaw. Mihaenay, mamisinanot kita to micadaan no niyah a lihaf ato lalakaw.

21. Dotoc a lalakaw wa milengo to maanan a kalimlaan demak hani?

²¹ Mikitini toniya lalakaw mahapinangay ita, ano sapahecadaw to harateng ni Yihofa, cowa ko pisaˈicel aca miliyas to pifiyor no tatiihay, wa minanamho tano harateng ni Yihofa a misimsim. Dotoc a lalakaw wa milengo, samaan ko demak ita ngaˈ ngaˈay palahad to harateng ni Yihofa.