1, 2. Palidlid sa macakat kita i noˈadingoan, mananamay ko maanan hani? Patinakoen a mitadtad.

MILIFOK ko wawa to sapatelong, pasowalay ko wama wina cingraanan: “Miakoˈid!” Mitoor cingra to limoˈot no wama wina a miakoˈid, cowa ko naifalocoˈay a miakoˈid. Molahadto cingra i, cipinangay to harateng no wama wina, mafanaˈayho to kalimlaan ko miakoˈiday to tao. Palidlid sato, ano caka patalipaˈelalen no wama wina, mafanaˈay miakoˈid to tao ko wawa. Samanen mananamay ningra mikitini falocoˈ a miakoˈid to tao.

² Mahecaday ko pinanam ita to soˈlinay kimad, isatapang aca, mahapinangay ita to kalimlaan ko pidofdof to saali ni Yihofa. Ikorto, palidlid sa macakat kita i noˈadingoan, matongalay ko kacipinang to harateng ni Yihofa, cipinang to o manan ko kaolahan Ningra, o manan ko kapiliˈan Ningra, ato pinengneng Ningra to demak. Samanen mitodongay kita to pakayraan ni Yihofa a miharateng, tano harateng ni Yihofa mikayat to waywayan ato saˈosi no mita, telocto i, ngaˈay kita tano harateng ni Yihofa a minengneng to demak.

3. Misamaanay tano harateng ni Yihofa a minengneng to demak hano cowa ko madoloay?

³ Soˈlin minanam to harateng ni Yihofa a midemak, wa ira ko lipahak, kawra cowa ko madoloay a midemak nolatekay, samanen cowa ko malefotay tamdaw kita. Cipinangay kita to pinengneng ni Yihofa  pakayni i makoracay a waywayan, o dafong ato hafay, o mitosilay, patelas misaka dademak to ˈirang ato romaroma a demak, alatek i, cowa ka cipinang to misamaanay hano ira ko hatiraay a harateng Ningra. Nikawrira, samaan kita matongal matongal a mafanaˈ tano harateng ni Yihofa a minengneng to demak hani? Ano mihaen ko demak ita i, wa samaan milingat to saˈosi ita anini ato noikor hani?

4. Palimoˈotay ci Pawlo kitaanan, ‘misafaeloh to harateng’, samaan ko demak ita ngaˈ matoor konini?

⁴ ˈOsien ko Loma 12:2. Na somowalay ko tarokos ci Pawlo to sasamaan kita minanam tano harateng ni Yihofa a minengneng to demak. Palimoˈotay cingra kitaanan, ‘aka madenga nonini a hekal,’ sanay, mahecad o masowalay isaˈayaw a lalakaw, sasinanoten ita a miliyas ko pinengneng ato harateng no hekal. Kawra, masowalay ni Pawlo, sasinanoten ita a ‘misafaeloh to harateng’. Sapidemakaw tonini a demak i, micekiw to Kimad no Kawas, cipinang to harateng Ningra, dotimen ko pakayraan Ningra a miharateng ato misaˈicel a pahecad to harateng Ningra.

5. O maanan ko tatodong no micekiway?

⁵ Micekiw to Fangcalay Cudad, cowa ko kaliki a minengneng to lalakaw ato pikonis aca ilaenoay to sapacaˈof. O haharatengen ita, oniya lalakaw ngaˈay padama kitaanan mihapinang to, o maanan a capeling ni Yihofa, o pakayraan Ningra a dademak ato pinengneng Ningra. Misaˈicel kita a mihapinang, hano misaali ci Yihofa kitaanan midemak to cecay a demak ato hano mirikec Cingra to cecay a demak. Ngaˈay kita miharateng to kaˈorip ato falocoˈ no mita, o manan ko sasalofen. Soˈlin, micekiw kita to lalakaw i, cowa ko mamadotim a maemin ko kalimlaan, kawra, ano micekiw kita i, mihadak to kalitosa a toki a misongilaˈ a midotim to lalakaw, wa taˈangay ko sapadama kitaanan.—ˈOlic 119:97; 1 Timoti 4:15.

6. Midotim kita to Kimad no Kawas, wa ira ko maanan a ngaˈayay minaroˈan hani?

⁶ Micerid a midotim to Kimad no Kawas, wa ira ko maanan ngaˈayay a minaroˈan hani? Ngaˈay kita pasoˈlin to o malefotay ko harateng no Kawas. Satapang kita minanam tano harateng Ningra a minengneng to demak, ikorto, mikitini falocoˈ micada to harateng Ningra. ‘Faelohto’ ko harateng ita, palahadho to faelohay a pakayraan miharatengan. Matongal matongal mafanaˈ tano harateng Ningra a minengneng to demak.

7, 8. (1) Samaanay ko pinengneng ni Yihofa to dafong ato hafay hani? (Nengnengen ko satapangan coka.) (2) Ano pairaen ita ko harateng ni Yihofa, wa misakareteng to maanan?

⁷ Miharateng cowa ko tano ponoˈ aca a miharateng, milingatay ko harateng to waywayan ita. (Marko 7:21-23; Yakop 2:17) Nengnengen ko pina tinakoan, itini i Ratoh no Fangcalay Cudad, ngaˈay mahela ita ko pinengneng ni Yihofa to dafong ato hafay. Mipiliˈ ci Yihofa ci Yosif aci Mariyaan a midimokos to wawa Ningra, cowa ka cihafay ko lomaˈ noniya mararamoday. (Lifi 12:8; Luka 2:24) Ya hofocen ci Yis i, “[telian] i toptop no paefaan, nawhani awaayto ko malokafotiˈan nangra i pilafinan a lomaˈ.” (Luka 2:7) Ano makahi ci Yihofa i, wa ngaˈay Cingra milimasmas to wawa Ningra itini ngaˈayay a kitiraan. Kawra, pakayni ci Yihofaan, o sakakaay paitinien i midokoay to Kawas a paro no lomaˈ a palahad ci Yisan.

⁸ Mikitini pihofoc ci Yisan a maˈoningay, wa ngaˈay mananam ita ko harateng ni Yihofa to dafong ato hafay. Anini, misaˈicelay ko roma wama wina, ira ko adihayay a dafong no wawa, soˈlin o pihaen to demak wa malingat ko kalalaˈed no wawa aci Yihofa. Kawra, o harateng ni Yihofa, paitinien i sakakaay miteli ko noˈadingoan a demak. Mihaenay, misaka dademakan  iso ko harateng ni Yihofa a minengneng to demak han? O waywayan iso paihkalay to maanan hani?—ˈOsien ko Hipray 13:5.

9, 10. Samaanen ita paihkal to iraay ko ni Yihofa a harateng no niyah, caka midemak to pakapolinay to tao a demak hani?

⁹ O sakatosa a tinakoan i samaanay ko pinengneng no Kawas to pakapolinay to tao. Sowal ni Yis: “O [pakapolinay] to cecay nonini a sasafaay a mitiˈeray i takowanan i, o nika soˈot no liˈel ningra i tataˈangay a fokeloh a tailangan a mafahkol i riyar ko ngaˈay.” (Marko 9:42) Oniya ciˈicelay a sowal ni Yis, paihkalay o pakidemay a raraw ko pakapolinay to tao a demak! Mahecaday ko harateng ni Yis to kakarayan a Wama, mansa ngaˈay pakasoˈlin kita, ano haratengay saan ko tamdaw midemak to pakapolinay to Krisciyang a demak, cowa ko mamahemek ci Yihofa.—Yohani 14:9.

¹⁰ Mahecaday ko harateng ita ci Yihofaan aci Yisan han? Paihkalay to maanan ko waywayan ita hani? O kaolahan ita a nanaman ci rikoˈ ato pilafa, ano o kapiliˈan ato mamifekad ko mararaway a harateng no salikaka, wa makahi kita pakayni saka ciepoc no salikaka a misawad to kaolahan no niyah, itini no caˈedongan a demak hokira?—1 Timoti 2:9, 10.

11, 12. Palahad kita to miˈimeray a capeling, ˈinter to kaˈinteran ni Yihofa, wa milifok kita to maanan a epoc hani?

¹¹ O sakatolo a tinakoan i, ˈinteray ci Yihofa to tatiihay a demak. (Isaya 61:8) Mafanaˈay ci Yihofa to cowa ko malefotay kita, mansa ira ko mararaway a harateng. Kawra, palimoˈotay Cingra kitaanan mitodong Cingraanan a ˈinter to tatiihay a demak. (ˈOsien ko ˈOlic 97:10.) Midotim to lalangian a ˈinter ci Yihofa to tatiihay demak, wa madoloto kita palahad to harateng ni Yihofa, ira ko ˈicel micoˈay to sapidemakaw to tatiihay demak a harateng.

¹² Ano mahecad kita ci Yihofaan a ˈinter to tatiihay a demak, soˈlin cowa ka ihkal ko Fangcalay Cudad misaˈosi to o maanan ko tatiihay waywayan, wa ngaˈay a mahapinang no mita. Tinakoen, itini cepiˈ a makero, o hatiniay a kero, o kaackan a waywayan, kawra malenakay toniya hekal anini. Harateng no roma tamdaw, o hatiniay a kero, cowa ko soˈlinay madadiˈi to tamdaw, coko mararaway a waywayan sanay. * Kawraan, o ˈinteray to tatiihay demak a Yihofa, wa mihaen ko piharateng han? Oha mamisaˈosi kita to falocoˈ palahad to miˈimeray a capeling, ˈinter to kaˈinteran ni Yihofa, miliyas to kihcod a tatiihay demak.—Loma 12:9.

13. ˈAyaw no tahalifa kita to pasangray, hano isalakat to misimsim to harateng ni Yihofa hani?

¹³ Ano micekiw kita i, songilaˈen misimsim ko harateng ni Yihofa, wa padama konini kitaanan, ano tahalifa to pasangaray no ikor, wa padama kitaanan inaneng ko misaˈosian. Mihaenay, soˈlin tatangsol kita misaˈosi to demak, cowa ko mamafokil to sasamaan ko demak. (Taneng 22:3) Nengnengen ita ko tinakoan i Fangcalay Cudad.

14. Manaˈay ci Yosif to pikayhid no fafahi ni Potifa, mikitini i milifetan ningra, mananam ita ko maanan hani?

¹⁴ Haratengen ko pakayraan ni Yosif, tiya kayhiden no fafahi ni Potifa cingra i, tangsolay cingra a minaˈay. Maedeng na midotimay ci Yosif to pinengneng ni Yihofa to raramod, mafanaˈ to mitokelay ko Kawas madimadi to raramod. (ˈOsien ko Satapangan 39:8, 9.) Sanay ko sowal ni Yosif to fafahi ni Potifa: “Saka, maanen ako ko pidemak to matiniay a tatiihay a ciraraw i kaˈayaw no Kawas saw?” O  sowal ni Yosif paihkalay to iraay ko ni Yihofa a harateng ningra. Samaanay kita hani? Ano mikalona ko cafay matayal tisowanan, anca ira ko patikamiay tisowanan i soci to kaackan a sasing, wa samaan ko demak iso hani? * ˈAyaw no tahalifa to pasangaray i, ano maharekayto kita a midotim to harateng ni Yihofa, hanaca misaˈosi to falocoˈ tano harateng Ningra a misaˈosi, wa kaliki kita matatodong ko demak.

15. Samaanen ita pahecad toya tatoloay Hipray tamdaw, madimadi ci Yihofaan, eca ka mapadik no saroero hani?

¹⁵ O roma tinakoan i, tatoloay Hipray tamdaw ci Satrak, Misak, Apitniko. Misaˈosiay to falocoˈ cangra eca ka pidoko to patirengan ni Nipukatnicar no ekim a samiay, mikitini i sowal nangra to hongti ngaˈayay mahapinang, maharekayto cangra midotim sasamaan a madimadi ko niyah ci Yihofaan. (Kasadakan 20:4, 5; Taniil 3:4-6, 12, 16-18) Haratengen ita ko cecay pakayraan, ano misaali ko tawki iso pasadak to payci midama to cecay lisin, oniya demak milingatay to mararaway pihakelongan, wa samaan ko demak iso hani? Hamaan tahinito pifekadan no pasangaray itiya saho misimsim, no hatiniho a misimsim to harateng ni Yihofa. Ano mihaen, mifekad ko mahecaday a demak i, wa ngaˈay kiso mahecad toya tatoloay Hipray tamdaw, ihkal mafanaˈ to sasamaan pasowal, sasamaan ko hademak.

16. Cipinang to harateng ni Yihofa, hano papadama kitaanan ngaˈay ko pisaday to macalohay no paisingay a demak?

¹⁶ Roma i, ano saka madimadiaw kita ci Yihofaan, misiˈayaw to macalohay no paisingay a demak, wa isalakat midotim to harateng ni Yihofa. Manaokaniw cowa ko papacomod kita i tireng to ˈilang. (Dmak 15:28, 29) Kawra, o roma sapiadah a demak macapiday ko ˈilang, o tatooren no Kriciyang ko safalod no Fangcalay Cudad a misaˈosi. Hatiraay, wa hacowa kita a misimsim toniya demak hani? Tahira to kita i pipaisingan a toki han? Mihadidiay kita to adada itiya alatek, itini laeno no saroero caloh wa saan a misaˈosi. Mihaenay, nohatiniho mikilim to lalakaw, mitoor to saˈosi iso a misaday to iraay ko noholic sapaising a minkiw, masasowalho to ising samaanay ko saˈosi no miso. *

17-19. Aniniho minanam to harateng ni Yihofa hano o masaka limlaan. Tano tinakoen a mitadtad.

 ¹⁷ Salikor, nengnengen ita ko tinakoan ni Yis, misaalian ni Pitiro ci Yis: ‘Tapangaw, salimlaen iso ko niyah.’ Tangsolay minaˈay ci Yis toniya sapaini. Maedeng maharekayto cingra miharateng to ˈinorong no niyah itini lalomaˈ no araaw no Kawas, maharatengayho ko nano sowal no sapairasol to demak ningra i fafekang no sera ato kinafalah to ˈorip a demak. Cipinang toniya demak padamaay cingraanan misaˈosi to falocoˈ mitafo to madimadi i Kawas, makahi a patado kitaanan a kinafalah to ˈorip.—ˈOsien ko Matay 16:21-23.

¹⁸ Anini, makalimay ko Kawas malawidang Ningra kita, mitokelay kitaanan misaˈicel mirienang to milasilay to ngaˈayay lihaf a tayal. (Matay 6:33; 28:19, 20; Yakop 4:8) Kawra, mamalifa ita ko mahcaday ni Yis a pakayraan alatek, tinakoen mikitini ngaˈayay harateng no roma tamadaw, misaali kitaanan hamaan adihay ko mipalakan a toki i noˈadingoan a demak. Ano papacakaten no tawki ko lifon no miso, kawra oniya faelohay ˈinorong, wa mifiyor to noˈadingoan a demak iso, wa samaan ko hademak iso hani? Ano micudaday kiso, ira ko toki micada to ˈakawangay picudadan, kawra o mamiliyas to lomaˈ tayra i roma pala, wa samaan ko hademak iso hani? Ano soˈlin masiˈayaw iso ko hatiniay pakayraan, wa mitolon alatek, mikilim to milingatay a lalakaw, malalengo to paro no lomaˈ anca malohemay malitengay ikorto misaˈosi, kawra o sangaˈayay a demak i, aniniho midotim to samaanay ko harateng ni Yihofa toniya demak, songilaˈen tano harateng Ningra a minengneng to demak. Mihaen, soˈlin misiˈayaw to mahecaday a pakayraan no ikor, cowa ko mamakayhid ko falocoˈ iso, samanen maharekayto kiso patireng to noˈadingoan a palinian ato misaˈosi to falocoˈ pasayra i palinian a talaˈayaw, ano tahalifa to sapalifet i, cipinangayto kiso to sasamaan ko demak.

¹⁹ Maharatengayho iso ko roma pakayraan alatek, oniya pakayraan fahar sa a palifet to madimadi ita ci Yihofaan alatek. Soˈlinay i, awaay ko pakayraan ita paˈayaw a misaday to mamifekad a demak. Kawra, saka dademaken ita ko picekiwan a toki midotim to harateng ni Yihofa, ano malifa ita ko maanan a pakayraan i, wa kaliki maharateng ko micekiwan a lalakaw, hanaca misaka dademak to kalimlaan. Mihaenay, sasongilaˈen ita midotim ko harateng ni Yihofa, tano harateng Ningra a minengneng to demak, misimsim to harateng Ningra sasamaan padama kitaanan anini ato noikoran inaneng ko misaˈosian.

20, 21. (1) Itini faelohay hekal, o soˈlinay a pasalat hano papalipahak kitaanan hani? (2) Anini, samaan kita ngaˈ ngaˈay milifok to lipahakay a kaˈorip hani?

²⁰ Hinatalaay kita sakairaaw no faelohay hekal, ˈalomanay tamdaw ilalomaˈ ita mitokelay tahadaˈoc maˈorip i Lakoing. Itini pikowan no Hongti Kitakit no Kawas, wa milifok ko tamdaw to soˈlinay a pasalat, cowato ko mamiemem to masakenaay a roray ato somad toniya hekal. Itini faelohay hekal, wa padotoc ko tamdaw milifok to pasalatay a harateng, o cecacecay tamdaw wa ngaˈay mitoor to kaolahan ato matatodongay a saali no niyah a misaˈosi.

²¹ Kawraan, o soˈlinay a pasalat cowa ko awaay ko tolas, itini pisaˈosi to matatodongay tatiihay a demak, o misapoeneray ko falocoˈ a tamdaw, wa micada to sakayat no sarikec ato harateng ni Yihofa, mihaen to demak, wa paira to taˈangayay lipahak, tahaceremay a dipayal no tamdaw. (ˈOlic 37:11) Nohatini, ano mafanaˈ kita tano harateng ni Yihofa minengneng to demak, wa ngaˈay milifok to lipahakay a kaˈorip.