1. Hano misaaliay kita to sasayar?

O TAMDAMDAW misaaliay to sasayar. Itini kaˈorip ita awaawa sa misiˈayaway to ka calemceman, ka toledan, ka rorayan a demak. O roma tamdaw mihadidiay to katoˈas no tireng, adada anca masomad to kapatay no salawina. O roma salikaka tahacadaay to sapalak. Roma, i taliyokay ita a tamdaw matongalay ko kariˈang. Oniya ‘pasangaray siˈayawen’ a pakayraan misawacayay to itiniay kita i ‘salikoray ˈawaled’ a maˈorip, pakasoˈlinay kita mataˈlif ko cecay romiˈad, mingataay kita to faelohay hekal. (2 Timoti 3:1) Kawra, halafinayto kita mitala to sakalaˈosiaw no sakiˈok ni Yihofa alatek, adihay adihayay ko masiˈayaway a pasangaray. Samaan ko demak ita ngaˈ, milifok to sasayar hani?

2, 3. (1) Pakayni ci Hapakukan, o maanan ko kafanaˈan ita? (2) Hano milengo kita to lalakaw no Hapakuk?

² Micekiw kita to Hapakuk wa mahela ko sapacaˈof. Ilalomaˈ no Hapakuk, soˈlin cowa pihadak to kihcod a demak ni Hapakuk, kawra ngaˈayay milifok kita to sasayar. O Hapakuk a ngangan, iraay ko “ciolahay a mitakec” a tatodong, mitoroˈan nonini o pisayar ni Yihofa mahecaday o dihkoay a pitakec kitaanan, matomesay ko pakasoˈlin no finawlan Ningra a mitadiˈec Cingraanan. Masasowalay ci Hapakuk to Kawas, milicay to pina salicay Cingraanan, ano patemeran ni Yihofa  ci Hapakuk mitilid to kasasowal nangra, mihaenay oniya salicay mahecaday o patadoay kitaanan a milicay.—Hapakuk 2:2.

³ Pakayni ci Hapakukan, ngaˈayay kita mikitini kasasowal noniya masomaday a pairasolay aci Yihofa a mafanaˈ cingraanan. O Hapakuk a cudad o ‘i saˈayaway matiliday a sowal’, o materekay ilalomaˈ no Fangcalay Cudad, “o sapasifanaˈ i titaanan to sakakodait ita, ta mapaˈicel no Fangcalay Cudad kita to sapasayraaw ita i kacifalocoˈan.” (Loma 15:4) Micekiw kita to Hapakuk a cudad, wa malifok ko maanan a haepoc hani? Wa mananam ita, mitiˈer ci Yihofaan o maanan ko tatodong; o sapairasol ni Hapakuk padama kitaanan pakasoˈlin, ano tahalifa kita to pasangaray ato sapalifet, wa kamayan ira ko rihadayay a falocoˈ. Dotoc, nengnengen ita ko pitadtad no Hapakuk a cudad.

4. Misamanay hano adadaen ko falocoˈ ni Hapakuk hani?

⁴ ˈOsien ko Hapakuk 1:2, 3. Itiniay ci Hapakuk i pasangaray lintad a maˈorip, adadaay ko falocoˈ ningra, samanen, i taliyok ningra adihayay ko mararaway, mariˈangay a tamdaw. Miharateng ci Hapakuk: “Oniya tatiihay tamdaw ato demak, wa hacowa a mahererek hani? Hano ecaho pidemak ci Yihofa hani?” O maˈaraway ni Hapakuk sahtoay miroeroay ko finawlan to tamdaw, cowa ka sadafdaf ko waywayan. Awaayto ko pinang ni Hapakuk, mansa micangacang cingra ci Yihofaan misalof to demak. Harateng ni Hapakuk cowa ka ciharateng ci Yihofa to finawlan, cowa ko tatangsol a midemak sanay. Na iraay ko mahecaday a harateng iso toniya madimadiay a sikawdan han?

5. Mikitini Hapakuk mananam ita ko maanan kalimlaan a demak? (Nengnengen ko satapangan coka.)

⁵ O cowato ka pitiˈer ci Hapakuk ci Yihofaan, cowato pakasoˈlin to sakiˈok ni Yihofa hokila? Cowa ka hatira! O hinapec ato kacalemceman ni Hapakuk ci Yihofa ko pasowalan ningra cowa ko tamdaw, paihkalay konini soˈlin matoled cingra pakasoˈlinayho ci Yihofaan. Masomaday a maorat cingra, samanen cowa ka cipinang cingra, hano ecaho pidemak ko Kawas, hano palifaen cingra to hatiniay a roray. Patemeren ni Yihofa ci Hapakuk mitilid to harateng no niyah, mananamay ita ko cecay kalimlaan a demak: Ngaˈayay pasowalen ita ko Kawas to nai falocoˈay a hinapec ato kacalemceman a demak. Sidaˈitay ci Yihofa mitahidang kitaanan pasowal Cingraanan to nai falocoˈay a harateng. (ˈOlic 50:15; 62:8) Palimoˈotay ko Taneng 3:5 kitaanan: ‘Sarocoden ko falocoˈ a mitiˈer ci Yihofaan. Aka pitiˈer to fanaˈ no niyah.’ Soˈlinan ni Hapakuk minaˈang i falocoˈ koniya sinael.

6. O satolon hano masaka limalaan hani?

⁶ Talaˈayaway ci Hapakuk a miingid ci Yihofaan, pakasoˈlinay cingra to kakarayan Wama, kalawidang to kakarayan a Wama. Cowa ka haharateng sa ci Hapakuk to kacalemcemay no niyah a pakayraan, ciharateng to sapitiˈeraw to fanaˈ no niyah. Pasayraay cingra i Kawas a mitolon, mihadak to harateng ato cariraw no niyah. Tada o ngaˈayay a taˈarawan ita cingra. O mitengilay to satolon a Tatapangan ci Yihofa, tokel Ningra pakasoˈlin kita Cingraanan, pakayni i satolon pasowal Cingraanan to kacalemceman a demak. (ˈOlic 65:2) Mihaen ko demak ita, wa mahapinang ko sidaˈitay sakayat ni Yihofa pacaˈof to satolon no mita, mahecad o pafeliay to dihkoay a satakec. (ˈOlic 73:23, 24) Wa padama Cingra kitaanan, tano pinengneng Ningra ko pinengneng to roray no niyah. Mikitiniay i falocoˈ a satolon ita paihkalay to tada mitiˈeray ko niyah to Kawas.

7. Pakani i satolon ni Hapakuk samaanay ko caˈof ni Yihofa?

⁷ ˈOsien ko Hapakuk 1:5-7. Maharek ci  Hapakuk pasowal ci Yihofaan to hinapec ato kacalemceman i, wa miharateng cingra to sasamaan ci Yihofa a midemak alatek. O iraay ko siniˈadaay a falocoˈ ni Yihofa, hanaca o cipinangay to harateng a Wama, Cowa ka keter Cingra to pihadak ni Hapakuk to harateng no niyah. Mafanaˈay ko Kawas to pisadak aca ni Hapakuk to nano roray ato somad no niyah. Pasifanaˈan ni Yihofa ci Hapakuk to sasamaan ko hateloc no cowa ka madimadi a Yutaya tamdaw, hanaca o saka cecay ci Hapakuk a mafanaˈ to mangataayto ko sapisawkitaw ni Yihofa.

8. Hano maoraten ci Hapakuk to sapacaˈof ni Yihofa hani?

⁸ Pafanaˈen ni Yihofa ci Hapakuk to, maharekayto misaday Cingra a midemak, wa kaliki Cingra mitefoc toya mariˈangay a Yutaya tamdaw. O sowal ni Yihofa ‘itini romiˈad namo’, tatodong i, wa malaod ko sayfang itini i lintad ni Hapakuk. O sapacaˈof ni Yihofa cowa ka hecad to maharatengay ni Hapakuk, paliˈayaway pasowal ci Yihofa to mamacada no Yutaya tamdaw ko adihayay a pades. * O mariˈangay a finacadan ko Papilon a tamdaw, mikikakaay toya misa o midokoay ci Yihofaan a Yutaya tamdaw ko kariˈang nangra. Hano saka dademaken ni Yihofa koniya mariˈangay mitaˈongay to makaniway a kawas a finacadan, misayfang to finawlan no Niyah hani? Ano matengil iso ko hatiniay a sayfang, sasamaan ko harateng iso hani?

9. Milicayayho ci Hapakuk to maanan a salicay hani?

⁹ ˈOsien ko Hapakuk 1:12-14, 17. Soˈlin mafanaˈay ci Hapakuk to saka dademaken ni Yihofa ko Papilon a misawkit, misayfang to taliyokay ningra a tatiihay tamdaw, kawra kamayan a maorat cingra. Nikawrira misapoeneray to falocoˈ ci Hapakuk pasowal ci Yihofaan, kamayan a ‘o ˈongcoy’ ningra ko Kawas. (Limoˈot 32:4; Isaya 26:4) Pakasoˈlinay ci Hapakuk to iraay ko olah ato sidaˈit no Kawas ci Yihofa, mihaenay milicayay aca cingra to pina salicay ci Yihofaan, tinakoen: Hano haien no Kawas malingad ko tatiih no pakayraan no Yutaya kitakit? Hano eca ka tangsol Cingra a midemak? O malefotay ko ˈicel a Kawas, hano mihadidi to adihayay a tatiihay demak mifekad hani? Maˈaraw Ningra ko adihayay a pades, hano “terep sa” hani? O “fangcalay” Cingra, “o fangcalay Kiso, maˈosi Kiso a minengneng to tatiihay” kiya!

10. Alatek wa ira ko maanan mahecaday ni Hapakuk a harateng no mita hani?

¹⁰ Latekay mahecaday ko harateng ita ci Hapakukan. Hakelongen ita ko limoˈot ni Yihofa, misarocod to falocoˈ mitiˈer Cingraanan ato micekiw to kimad Ningra, mihaen wa matongal ko pakasoˈlin to hatokel no ikor. Micada kita to sapasifanaˈ no likakawan no Kawas, cipinang to araaw ni Yihofa. Soˈlin mahaen, sakafanaˈawho kita, o malifaay ita a pades wa hacowa a mahererek. Wa ngaˈayho kita mikitini tireng ni Hapakuk minanam to maanan hani?

11. Misaˈosiay ko falocoˈ ni Hapakuk misamaan ko demak?

¹¹ ˈOsien ko Hapakuk 2:1. Ikor no pasowalen ni Hapakuk ci Yihofa to nafalocoˈan a sowal rihadayayto ko falocoˈ, misaˈosiay ko falocoˈ padotoc a mitala ci Yihofaan, pakasoˈlin to mamidemak Cingra. Ira ko hatiniay a harateng ni Hapakuk cowa ko cecayay liyad a pakasoˈlin, miliyaway cingra paˈicel to saˈosi no falocoˈ, sowal ningra ‘wa sapater sa mitala to kapadesan a romiˈad’ sanay. (Hapakuk 3:16) Cowa ko ci Hapakuk aca, iraayho ko roma madimadiay a sikawdan no Kawas mahecaday a mitiˈer to Kawas, mihadidi a mitala Cingraanan, o taˈarawan nangra pakalalokay kitaanan aka a pisawad, talaen ko pidemak ni Yihofa.—Mika 7:7; Yakop 5:7, 8.

12. Mikitini ci Hapakukan ngaˈayay kita minanam to maanan hani?

 ¹² Mikitini misaˈosian ni Hapakuk ngaˈayay mananam ita ko maanan hani? Saka cecay, ano o maananto ko malifaay ita a pasangaray, aka pisawad mitolon ci Yihofaan. Saka tosa, o hahakelongen ita ko sakayat no pakaynian ni Yihofa i Kimad Ningra ato likakawa Ningra kitaanan. Saka tolo, oha mamihadidi kita mitala ci Yihofaan, misarocod to falocoˈ mitiˈer Cingraanan, pakasoˈlin to maharekayto Cingra misaˈosi to toki palahdaw to roray no mita. Ano mahecad kita ci Hapakukan, padotoc pasowal ci Yihofaan to nafalocoˈan a harateng, mihakelong Cingraanan ato mihadidi a mitala Cingraanan, mihaen o rarihaday ko falocoˈ ita, ira ko ˈicel mihadidi. O sapafeli ni Yihofa kitaanan a tokel, wa padama kitaanan padotoc a mihadidi, soˈlin misiˈayaw to masakenaay a pasangaray, wa ngaˈayho a lipahak. O sapafeli no Kawas kitaanan a tokel patongalay to pakasoˈlin no falocoˈ ita, pakasoˈlin to mamidemak ko kakarayan a Wama.—Loma 12:12.

13. Itini Hapakuk 2:3 ngaˈayay pakasoˈlin kita to maanan hani?

¹³ ˈOsien ko Hapakuk 2:3. Maˈaraw ni Yihofa misetek to falocoˈ ni Hapakuk mihadidi mitala maedeng mahemekay. Malefotay ko ˈicel a Kawas ihekalay a mafanaˈ to hakowaay ko pasangar no pakayraan ni Hapakuk, hato sidaˈitay a misayar ci Hapakukan, padama cingraanan to mamalifok ningra ko sapacaˈof, cato ka halafin wa malahdaw ko kacalemceman ningra. Mihaen ko demak ni Yihofa, mahecaday o pasowalay ci Hapakukan: “Ka pihadidi, pakasoˈlinen Kako, soˈlin manayar ko kafalic no pakayraan, oha papacaˈofen Ako ko micangacangan iso.” Patalipaˈelalan ni Yihofa ci Hapakuk, maharekayto Cingra misaˈosi to toki palaˈosi to sakiˈok, hato pakalalokay ci Hapakukan a mitala. Saikor, cowa ka lakisaw ko mitokelan ni Hapakuk.

14. Ano tahalifa kita to sapalifet, wa misaˈosi to falocoˈ misamaan ko demak?

¹⁴ Mihadidi kita a mitala ci Yihofaan, misongilaˈ mihakelong to limoˈot Ningra kitaanan, wa matongal ko pakasoˈlin no falocoˈ, ano o mananto ko malifaay a sapalifet ngaˈayay mitafo to rihadayay a falocoˈ. Misaaliay ci Yis kitaanan mitiˈer ci Yihofaan, wa tooren ko toki no Niyah palaˈosi to araaw, hamaan patelas kita misaˈosi to hahacowa a “toki ato romiˈad” ko Kawas midemak. (Dmak 1:7) Aka a pisawad kita, sapoeneren ko falocoˈ, mitiˈer to Kawas, mihadidi a mitala Cingraanan, sangaˈayen misaka dademak ko toki misaˈicel a mihodop ci Yihofaan.—Marko 13:35-37; Kalatiya 6:9.

15, 16. (1) Iraay ko maanan kalimlaan a sakiˈok i Hapakuk hani? (2) Mikitini i Hapakuk a sakiˈok, ngaˈayay kita minanam to maanan?

¹⁵ Mihadakay ci Yihofa to sakiˈok toya mitalaay Cingraanan a moecelay tamdaw, sanay ko sowal Ningra: “O mamalafadoc a maˈorip ko moecelay a tamdaw . . . O mamatiya o nika tomes no riyar ko nika ledef no fanaˈ no tamdaw itini i hekal to nika tadamaan [ni Yihofa].” (Hapakuk 2:4, 14) Mitiˈeray to Kawas, mihadidiay mitala Cingraanan a tamdaw wa malifok ko ˈorip.

¹⁶ Pakayni sakliˈok ni Yihofa i Hapakuk 2:4, kalimlaan sanay ko piharateng ni Pawlo, mansa kina toloay misaka dademak toniya sinael i sapatikami ningra to kasakopang! (Loma 1:17; Kalatiya 3:11; Hipray 10:38) Ano o maananto ko malifaay no moecelay tamdaw a sapalifet wa pakasoˈlin to Kawas, hato papakaˈaraw to kalaˈosi no sakiˈok no Kawas. Tokel ni Yihofa kitaanan samoceken ko pinengneng to halifon no ikor.

17. Ano mitiˈer kita ci Yihofaan, mikiˈokay Cingra to sasamaan ko demak hani?

¹⁷ Maˈorip i salikoray a romiˈad, ngaˈayay kita  mkitini Hapakuk minanam to kalimlaan a sifanaˈ. Mikiˈokay ci Yihofa wa paˈoripen Ningra koya pakasoˈlinay ko falocoˈ a moecelay tamdaw. Mihaenay, ano o maananto ko misiˈayawan ita a sapalifet ato ka carirawan a demak, papadotocen paˈicel ko pakasoˈlin to Kawas. O misowalan ni Yihofa ci Hapakukan a demak pairaay to pakasoˈlin ita, oha mamikapot Cingra kitaanan, milidong kitaanan. Sidaˈitay Cingra mitahidang kitaanan pakasoˈlin Cingraanan, mihadidi a mitala Cingraanan, maharekayto Cingra misaˈosi to toki pakayni i Hongti Kitakit Ningra a mikowan to polong a cikiw, wa matomes ko lipahakay ato madaˈmaˈay a tamdaw i cikiw, sahtoay o finawlan no Kawas cangra.—Matay 5:5; Hipray 10:36-39.

18. O sowal ni Yihofa samaanay ko pilingat ci Hapakukan?

¹⁸ ˈOsien ko Hapakuk 3:16-19. Sowal ni Yihofa taˈangayay ko pifiyor ci Hapakukan. Midotim ci Hapakuk to nano demak ni Yihofa i salakat to finawlan Ningra, matongalay ko tanektek no pakasoˈlin to Kawas, mafanaˈay cingra wa kaliki ci Yihofa a midemak. Soˈlin mafanaˈay ci Hapakuk wa mihadidiho to pades ko niyah to cecay a liyad, kawra kamayan a milifok to sasayar. Na iraay ko sasa ni Hapakuk to Kawas, kawra marocekay nohatini ko pakasoˈlin ningra mitiˈer to sapilidong a ˈicel ni Yihofa. O sowal ningra i Hapakuk 3:18, o sakakaay a paihkalan a pakasoˈlinay falocoˈ i likisi no tamdaw, o roma micacekiway tamdaw pakayni saka 18 sinael ngaˈayay haenen ko somowal: “Wa pakayni kako i Tatapangan mahemek a maacang, wa pakayni kako i Kawas lipahak a mikarireng.” Mikitini sakiˈok ni Yihofa tada taˈangayay ko malifokay ita a sapakalalok! Cowa ko makapahay aca a sakiˈok ko sapafeli ni Yihofa kitaanan, mikiˈokayho Cingra to palaˈosien Ningra ko araaw no Niyah.

19. Samaan kita ngaˈ, mamahecad ci Hapakukan milifok to sasayar hani?

¹⁹ Mihadakay ko Hapakuk to cecay kalimlaan a lihaf wa tiˈeren ci Yihofa. (Hapakuk 2:4) Sa padotocaw kita pakasoˈlin ci Yihofaan, kalimlaan ko pitongal to kalawidang ita Cingraanan, mihaenay pahecaden ita ci Hapakuk, (1) padotoc a mitolon, pasowalen ci Yihofa to cariraw ato ka ciharateng no niyah a demak, (2) songilaˈen mihakelong ko Kimad no Kawas ato sakayat no likakawa Ningra, ato (3) madimadi ci Yihofaan, mihadidi mitala Cingraanan. Ci Hapakuk satapang masasowal to Kawas i masomadayho, ikorto matomesay ko pakasoˈlin ato lipahak. Todongen ita ko taˈarawan ningra, wa malifet ko mahecaday o wama ko pitakec ni Yihofa kitaanan. Manaokaniw, itiniay kita toniya ciraraway a hekal, o cimaho ko ngangaˈay pafeli kitaanan to hatiniay taˈangay a sasayar hani?