1. Mihayan ni Yihofa ko tamdamdaw midemak to maanan hani?

MIHAYAN ni Yihofa kita tano niyah a mipiliˈan a pakayraan a maˈorip, pasifanaˈayho Cingra kitaanan sasamaan misaˈosi to citanengay a saˈosi, o saˈosi ita ano pakahemek Cingranan i, papadamaho Cingra kitaanan milaheci to hademak ita. (ˈOlic 119:173) Ano ceriden ita misaka dademak ko taneng no Fangcalay Cudad i, wa ngaˈay madoloto a misaˈosi to citanengay a saˈosi.—Hipray 5:14.

2. Ikor no misaˈosi kita i, alatek wa misiˈayaw to maanan a pasangaray hani?

² Nolatekay, ngaˈayay ko misaˈosian ita, kawra milaheci to misaˈosian cowa ko madoloay. Haratengen ko laenoay tinakoan: O cecay kapah salikaka misaˈosi miemin a miˈosi to Fangcalay Cudad, satapang no pina lipay ngaˈayay ko demak ningra, ikorto cowa to padadotoc a miˈosi. O cecay fafahiyan salikaka misaˈosiay malo misakafahay, ˈarawhan halafinayto ko toki cowaho pisatapang. O cecay kasakopang kasacefang no malohemay malitengay, misaˈosiay cangra mararid milisoˈ to salikaka, kawra ikor no pina folad, caho ka pisatapang milisoˈ to salikaka. Oniya demak iraay ko mahecaday a pakayraan, cowa pilaheci to i salakatay a misaˈosian. Itini saka 1 hahekalan, o Korinto a Krisciyang misiˈayaw to mahecaday a pakayraan. Mikitini i nalifetan nangra mamananam ita ko maanan hani?

3. O Korinto a Krisciyang misaˈosiay to maanan a saˈosi hani? Ikorto mafekaday ko maanan a demak hani?

³ Saka 55 miheca, misaˈosiay ko Korinto salikaka to masaka limlaan a demak. Mafanaˈ cangra to i Yirusalim ato Yutiya a salikaka cangoˈotay ko kakaenen ato rikoˈ nangra, o roma kasakopang a salikaka mihopeday to kiyaho a padama to tahapadesay  a salikaka. O Korinto a Krisciyang ciharatengay to itiraay salikaka, mansa misaˈosiay cangra hinapaladaˈ a pakiyaho, milicayay cangra ci Pawloan sasamaan ko demak wa ngaˈ. Ikor mihadakan ni Pawlo ko sakayat, miocoran ci Titus padama cangraanan mihoped to sapakiyaho. (1 Korinto 16:1; 2 Korinto 8:6) Kawra ikor no pina folad, mafanaˈayto ci Pawlo, o Korinto a salikaka cowa ka midoedo to misaˈosian i salakat a milaheci to demak, mihaenay i, awaay ko mihopedan a kiyaho, cowato ka kiyamaw pahecad to roma kasakopang patayra i Yirusalim to kiyaho.—2 Korinto 9:4, 5.

4. Itini i 2 Korinto 8:7, 10, 11, palimoˈotay ci Pawlo to Korinto a tamdaw to maanan a demak hani?

⁴ Tada ngaˈayay ko pisaˈosi no Korinto a salikaka, o tanektekay ko pakasoˈlinay falocoˈ, o hinapaladaˈay sanay ko pakahemek ni Pawlo cangranan, kawra palimoˈotan ningra ko Korinto a salikaka, o misaˈosian nangra a demak wa lahecien ngaˈ ngaˈay. (ˈOsien ko 2 Korinto 8:7, 10, 11.) Pakayni toniya demak mahapinangay ita, soˈlin o madimadiay a Krisciyang i, pasangaray a milaheci to misaˈosian alatek.

5. Wa milengo kita to maanan a salicay hani?

⁵ Mahecad o Korinto a salikaka, alatek pasangaray kita a milaheci to misaˈosian a demak. Misamaanay hano mahaen hani? Kita maemin cowa ko malefotay a tamdaw, mansa madolo a minayar to demak. Roma i, ano mafekad ko cowa ka harateng a pakayraan, wa pasangar a mitoor to misaˈosian a milaheci to demak. (Patnakay 9:11; Loma 7:18) Ano mahaen i, sasamaan kita mihapinang to o maanan a saˈosi misaaliay to sasalofen ngaˈ, o citanengay a saˈosi hani? Sasamaan kita milaheci to misaˈosian hani?

6. Hano misaaliay kita misalof to isaˈayaway a saˈosi hani?

⁶ O roma masaka limlaan a saˈosi, ano misaˈosianto i, cowa ko mamafalic, tinakoen, ano misaˈosi kita patafang to tireng a mihodop to Kawas, wa madimadi Cingranan tahadaˈoc. Roma i, mamisaˈosi kita a mitoor to miketonan a sowal i raramod, wa madimadi to ramod. (Matay 16:24; 19:6) Kawra, ano mafalic ko pakayraan i, o misaˈosian ita a roma demak misaaliay to sasalofen alatek. Ano mihaenay i, o maanan a pakayraan ko papadama kitaanan citanengay ko misaˈosian hani?

7. Mitolon kita micangacang to maanan? Misamaanay hani?

⁷ Mitolon micangacang to taneng. Yakop 1:5: ‘Ano cima ko cangoˈotay ko taneng i, cangacangen ko Kawas, wa malifok ko taneng, samanen o halipafeliay a Kawas wa pafeli to polong a tamdaw.’ Itini roma a demak i, cangoˈotay ko taneng ita, mihaenay i, ˈayaw no misaˈosi anca mamifalic to isalakatay a saˈosi i, tatiˈeren ci Yihofa, wa padama Cingra kitaanan ira ko taneng a misaˈosi.

8. ˈAyaw no misaˈosi i, samaanen ita micangacang ko citanengay a sakayat hani?

⁸ Cangacangen ko citanengay a sakayat. Songilaˈen a miˈosi ko Fangcalay Cudad, mikingkiw to mitepangan a lalakaw no likakawa no Kawas, licayen ko pakasoˈlinan no miso a tamdaw. (Taneng 20:18) Ano mamifalic kiso to tayal anca malinah tayra i roma pala, hanaca misaharateratengay kiso to mamicada to ˈakawangay a picudadan, ngaˈ ira ko sakaˈorip iso padadotoc a midoko to Kawas sanay ko harateng, ano mahaen i, cangacangen ko citanengay a sakayat tada masaka limlaan.

9. Ano soˈlinen ita a mihapinang ko harateng no niyah, wa ira ko maanan ngaˈayay a minaroˈan hani?

⁹ Hapinangen ko nafalocoˈan a harateng no niyah. Misaaretengay ci Yihofa to nafalocoˈan a harateng no mita. (Taneng 16:2) Mitokelay ci Yihofa kitaanan itini i kihecod a demak awaay ko misakaniway, mansa ano misaˈosi kita to demak i, hapinangen ko nafalocoˈan a harateng no  niyah, hamaan milipalaw to niyah ato tao. Ano cowa ka soˈlinen a mihapinang ko niyah i, wa pasangar a milaheci to misaˈosian a demak. Tinakoen, o cecay salikaka misaˈosiay cingra malo misakafahay, kawra cowa pakatoor toya toki, ikor awaay ko hemek ningra i pitosilan. Alatek sapakahemekaw cingra ci Yihofaan itini i misakafahay a tayal, kawra, o soˈlinay a harateng ningra o sapakahemekaw cingra to wama wina anca roma tamdaw hokira?

10. Ano mamifalic kita i, sakakaay a nafalocoˈan a harateng o maanan hani?

¹⁰ Haratengen ko roma tinakoen. O cecay mikingkiway misaˈosiay cingra misawad to tamako, isatapang tada pasangaray a misawad, ikor cowa to pitamako cingra to tosa a lipay, ˈarawhan miliyaway cingra a mitamako. Salikor i, malaˈosiayto cingra misawad mitamako. Samanen oniya mikingkiway tangongolay ko olah ci Yihofaan, sapakahemekaw ci Yihofaan, mansa maremoayto ningra koniya tatiihay a nanaman.—Kolosay 1:10; 3:23.

11. Hano patireng kita to ihkalay a patosokan o kalimlaan hani?

¹¹ Ihkalen ko patosokan. Ano ihkalen ko patosokan iso i, wa madolo a malaheci ko demak. Tinakoen, alatek misaˈosiay kiso mararid miˈosi to Fangcalay Cudad ikaka to isaˈayaway, kawra ano awaay ko ihkalay a dadoedoen a rayray, wa pasangar a milaheci to patosokan. * O cecay kasakopang a kasacefang no malohemay malitengay, misaˈosiay mararid a milisoˈ to salikaka, kawra ikor i, cowa kalaˈosi koya miˈosiayan a demak. Ano sapilaheciaw to patosokan i, o malohemay malitengay a tamdaw ngaˈay licayen ko niyah: “Masaˈosiay to kita o cima ko lalisoˈen a salikaka han? Misaˈosiay to kita hahacowa milisoˈ cangranan han?”

12. Nolatekay mamisalof kita to maanan hani? Misamaanay hani?

¹² Patatodongen ko ˈicel no niyah. Alatek sapilaheciaw kita to kihecod a demak, kawra o toki, ˈicel ato dafong ita iraay ko tolas. Mahenay i, patatodongen ko ˈicel. O misaˈosian iso a patosokan ano mataelifay ko ˈicel iso i, ngaˈay salofen ko misaˈosian iso. (Patnakay 3:6) Ano mahapinang iso to sasalofen ko saˈayaway a misaˈosian i, ikor miliyaw a misaˈosi, wa sasamaan kiso milaheci hani? Dotoc iraay ko lima a pakayraan.

13. Sasamaan kiso milifok to haˈicel a misaka dademak hani?

¹³ Mitolon micangacang to haˈicel. Wa pafelien ko Kawas kiso to ‘haˈicel a misaka dademak,’ milaheci to misaˈosian a demak. (Filipi 2:13) Mihaenay i, cangacangen ci Yihofa pafeli tisowanan to fangcalay ˈicel. Ano cowa ka tangsol sa pacaˈof ko Kawas to micangacangan iso, padadotocen a micangacang mitolon, o sowal ni Yis: ‘Padadotoc micangacang, wa pafelian kamo.’—Luka 11:9, 13.

14. Samaan kiso misaka dademak to safalod no Taneng 21:5 milaheci to patosokan hani?

¹⁴ Limasmasen ko halaka. (ˈOsien ko Taneng 21:5.) Sapilaheciaw to demak i, pairaen ko halaka, dotoc doedoen koya halaka a midemak. Ano misaˈosi to demak i, sarayrayen ko misaˈosian iso, doedoen ko limasmas a midemak to halaka iso. Tinakoen, na pakalalokan ni Pawlo ko Korinto a salikaka, itini ‘saka cecay romiˈad no cecay lipay’ a pakiyaho, coko taynito cingra i caloh sa a mihoped to kiyaho. (1 Korinto 16:2) Mahapinangayto ita, o pasangaray a demak sieroden ato parayrayen a midemak i, wa kahenay malaheci ko tayal, cowato ka roray ko falocoˈ.

15. Ikor no patireng to halaka i, wa ngaˈayho midemak kiso to maanan hani?

¹⁵ Ano tiliden iso ko halaka i, wa madolo  a milaheci to demak. (1 Korinto 14:40) Tinakoen, pakayni sakayat no likakawa no Kawas, o kasacefang no malohemay malitengay, ocoren ko cecay mitilid to masaˈosiay a demak, oniya lalakaw mahawpay ko o cima ko ciˈinorong toniya demak, ato tiliden ko hahacowa a malaheci koni demak. Ano tooren no malohemay malitengay koniya sakayat i, wa madolo milaheci to misaˈosiyan a demak. (1 Korinto 9:26) Oniya safalod ngaˈayay sakadademaken iso misaysay to niyah a demak. Tinakoen, rayrayen kono romiˈamiˈad a demak, doedoen koya rayray a midemak, mihaenay wa kaliki milaheci toya misaˈosian iso a midemak.

16. Pakayni Loma 12:11, ano sapilaheciaw to patosokan i, wa sasamaan ko hademak iso hani?

¹⁶ Sarocoden a misaˈicel. Dengan misaˈicel ngaˈ mamalaheci ko patosokan ita. (ˈOsien ko Loma 12:11.) Pakalalokan ni Pawlo ci Timoti padadotoc a misaˈicel, ‘tanoktoken a padadotoc’ misalof to pasifanaˈ a inaneng no niyah. Ano samaanto ko hademak ita ci Yihofaan i, sahto misaaliay to sapisaˈicelaw ita a midemak.—1 Timoti 4:13, 16.

17. Samaan kita misaka dademak to safalod no Ifiso 5:15, 16 hani?

¹⁷ Songilaˈen misaka dademak ko toki. (ˈOsien ko Ifiso 5: 15, 16.) Limasmasen to hahacowa a misatapang a dademak, ikor tooren ko toki a misatapang. Talaen ho ko matatodongay a toki wa ngaˈay a misatapang sanay ko harateng no miso, Kawra ano mihaen i hahacowa a misatapang hani? (Patnakay 11:4) Aka makalisanga no cowa ko kalimlaan a demak, awato ko ˈicel ato toki a midemak to kalimlaan a demak. (Filipi 1:10) Ngaˈayay itini i cowa ka makalisanga no tao a toki a midemak, pasowalenho ko tao, oniya tatokian, hamaan mikilim takowanan. Sapisongilaˈaw a midemak i, ngaˈayay paedeng ko soci anca ikorto minengneng to tikami i tingnaw. *

18-19. Ano misiˈayaw kiso to pasangar i, sasamaan ko hademak iso eca ka tangsol a misawad hani?

¹⁸ Samacayen miharateng ko kalahecian a demak. Ano saka tahiraaw kiso i kahicelaan, soˈlin mapalakay ko lalan, o fafalicen iso ko lalan a tayra. O misaˈosian iso a demak, mahecaday tora, ano samacayen miharateng ko kalahecian a demak i, soˈlin tahalifa to pasangar ato sapalifet i, cowa ko tatangsol a misawad kiso.—Kalatiya 6:9.

¹⁹ Citaneng ko misaˈosian cowa ko madoloay, songilaˈen a milaheci ko misaˈosian o pasangaray. Kawra pakayni pitiˈer to sapafeli ni Yihofaan a taneng ato ˈicel, wa ngaˈay malaheci ko misaˈosian iso a demak.