IITINI i lintad no Fangcalay Cudad, oya mikowanay to lomaˈ a tamdaw mikowanay to payci, midimokos to lomaˈ no tao.

Wawa ni Yakop ci Yosif malo koli itini i Icip, ikor manilnilay no tapang cingra malo mikowanay to lomaˈ a tamdaw, midimokos to kihcod. (Satapangan 39:2-6) Ikor, malo ˈakawangay ko saaroˈan ni Yosif i Icip, o lomaˈ ningra iraay ko mikowanay to lomaˈ a tamdaw midimokos to lomaˈ ningra.—Satapangan 44:4.

Itini i lintad ni Yis, oya ciomahay a tawki maroˈay i ka ˈalomanay tamdaw a niyaroˈ, mansa miocoray to mikowanay to lomaˈ a tamdaw, mikantok to mawmahay a tamdaw.

O mikowanay a tamdaw mamitoor to maanan a palinian hani? Saka 1 hahekalan a mitiliday a tamdaw ci Kelomayra pasowalay, ano mamipiliˈ to koli ko tapang i, wa mihapinangho iraay ko maanan a nalifetan no tayal ningra, mamafanaˈ cingra a milimasmas to tayal, cowa ko papakidem ko saali to tamdaw cingra hokira. Sowal sa ci Kelomayra: “O kalimlaan i, oya mikowanay to lomaˈ a tamdaw, cowa ka ngaˈay paira to misaidahidahiay a harateng, oha malalokay minanam a tamdaw ngangaˈay.”

Patinakoan no Fangcalay cudad ko mikowanay to lomaˈ a tamdaw, malecad o tayal no Krisciyang i kasakopang. Tinakoen, palimoˈotan ni Pitiro ko Krisciyang, soˈlin ‘malo ngaˈayay a mikowanay a tamdaw’, sangaˈayen a kalasaka dademak ko pafelian no Kawas a inaneng, ‘misaˈicel a matayal saki tamdamdaw.’ Sanay.—1 Pitiro 4:10.

Itini i Luka 16:1-8, na patinakoan ni Yis ko mikowanay to lomaˈ a tamdaw. Pairasolay ci Yis ano malo Hongti cingra i, mamafekad ko maanan a demak, wa nilnilen ningra ko ‘madimadiay citanengay a koli’, anca o ‘madimadiay citanengay mikowan to lomaˈ a tamdaw’. O sakakaay a ˈinorong no ‘mikowanay to lomaˈ a tamdaw’, itini i salikoray a romiˈad, padadotoc a paladaˈ to “kakaenen” paˈicel to pakasoˈlinay falocoˈ no Krisciyang. (Matay 24:45-47; Luka 12:42) Ano icowa to kita, wa ngaˈay milifok to mitepangan a lalakaw no ‘mikowanay to lomaˈ a tamdaw’, tada miakoˈiday kita cangranan!