1-2. (1) Samaan ko demak ngaˈ ngaˈay mihadidi to pasangaray i romiˈamiˈad hani? (2) Oniya lalakaw mamilengo to maanan?

“ITIYA ano kako aca ko misiˈayaway toya sapalifet, cato ka pakahadidi kako.” Na mihadakay kiso to hatiniay a sowal han? Adihayay salikaka iraay ko mahaenay a harateng alatek. Pakidemay ko adada iso alatek, anca mapatayay ko salawina, tikolen miharateng, mafanaˈay kiso o sakangaˈay iso mihadidi to romiˈamiˈad to pasangaray i, pakayniay sapafeli no Kawas a fangcalay ˈicel, hato iraay ko ‘mikiriwiˈay a ˈicel’ iso padadotoc a tanektek.—2 Korinto 4:7-9.

² O roma i, misaaliay kita to fangcalay ˈicel ngaˈ, pakaremo to tatiihay pifiyor noniya ciraraway a hekal, hanaca ira ko ˈicel padadotoc malalefo to ‘tatiihay coyoh.’ (Ifiso 6:12; 1 Yohani 5:19) Dotoc wa milengo kita, o fangcalay ˈicel itini tosa maanan a pakayraan padama kitaanan, ikor wa milengo kita sasamaan milifok to matomesay a fangcalay ˈicel.

3. Samaanay padama ci Yihofa kitaanan, itini pasangaray padadotoc a midemak to ˈinorong hani?

³ Tano fangcalay ˈicel padama ci Yihofa kitaanan, paˈicel kitaanan itini pasangaray padadotoc a midemak to ˈinorong. Sowal no tarokos ci Pawlo mitiˈeray cingra to ‘ˈicel ni Kristo,’ hato ngaˈayay i pasangaray padadotoc matayal saki Kawas. (2 Korinto 12:9) Itini saka tosa piliwko a mitosil, cowa ko pisaˈicel aca ni Pawlo a mitosil matayalayho to sakaˈorip. Itini i Korinto cingra i, itiniay i lomaˈ ni Akuila aci Priskila cingra. Oniya mararamoday misangaˈay to pakopangan sakaˈorip, mafanaˈay ci Pawlo toniya demak, latekay malacafayay cangranan a matayal. (Dmak 18:1-4) Mitiˈeray ci Pawlo to fangcalay ˈicel, cowa  ko picokang aca, ngaˈayayho a midemak to mitosilay.

4. Pakayni 2 Korinto 12:7b-9, hano misemsemay saan ko harateng ni Pawlo hani?

⁴ ˈOsien ko 2 Korinto 12:7b-9. Sowal ni Pawlo ‘mapacekay no ceka ko tireng’ ningra sanay, o maanan ko tatodong nonini hani? Ano mapacek no cecay ceka ko tireng iso, maedeng wa adada kiso. O tatodong ni Pawlo i, misiˈayaway cingra to sasemsemen a sapalifet. Sowal ningra oniya sapalifet malecaday o ‘coyoh ni Satan,’ padotocay a mitepiˈ to laway ningra, anca padadotocay a ‘mipekpek’ cingranan (o sapatongal pihongyak.) Oniya malecaday o ceka a pasangaray, cowa ko ci Satan anca tatiihay a coyoh ko mifekaday, kawra mahapinang nangra koniya ‘ceka,’ misaˈicelan a patolem koniya ‘ceka,’ mitongal to pisemsem ni Pawlo. Samanayto ko demak ni Pawlo hani?

5. Samaanay ko sapacaˈof ni Yihofa to satolon ni Pawlo hani?

⁵ Salakat sapiwanikaw ci Pawlo toniya ‘ceka,’ sanay ko sowal ningra: ‘Kinatoloay kako micangacang ci Yihofaan, mitokel paliyas toniya ceka takowanan.’ Kawra, kamayan mipacek i tireng ningra koya ‘ceka.’ Cowa ka pacaˈofen ni Yihofa ko satolon ningra han? Cowa ka hatira. Soˈlin cowa ka saysayen ni Yihofa ko pasangaray ni Pawlo, kawra pafeliay to ˈicel cingranan padadotoc a mihadidi. Sanay ko sowal ni Yihofa: ‘O ˈicel Ako itini kalonayan no tamdaw mahapinangay ko kalefot.’ (2 Korinto 12:8, 9) Itini sapadama no Kawas, ngaˈayay ci Pawlo mitafo to lipahakay a falocoˈ ato rihaday.—Filipi 4:4-7.

6. (1) Samaanay ko sapacaˈof ni Yihofa to satolon no mita hani? (2) Itini toniya fatac, o maanan a sinael parihadayay to falocoˈ iso halo milifok to haˈicel hani?

⁶ Malecaday kiso ci Pawloan, na micangacangay ci Yihofaan padama tisowanan misaysay to pasangaray han? Soˈlin fanekfek kiso a micangacang Cingranan, kamayan a micariraw ko pasangaray tisowanan, anca matongalay ko pakidem, cowa kaolah ci Yihofa tisowanan sanay ko harateng iso han? Ano iraay ko mahaenay a sasa iso, haratengen ci Pawlo, pacaˈofan ni Yihofa ko satolon ningra, oha papacaˈof to satolon iso! Alatek cowa ko papadama ci Yihofa tisowanan misaysay to pasangaray, kawra papafeli cingra to fangcalay ˈicel tisowanan, padama tisowanan padadotoc a mihadidi. (ˈOlic 61:3, 4) Soˈlin ‘matapiˈ’ kiso to cecay liyad, cowa ko mamifalah ci Yihofa tisowanan.—2 Korinto 4:8,9; Filipi 4:13.

7-8. (1) Hano patinakoen ko fangcalay ˈicel to fali hani? (2) Milengo to samanay misaka dademak ko fangcalay ˈicel i, misaka dademakan ni Pitiro ko maanan a sowal hani?

⁷ O fangcalay ˈicel wa itiniho i maanan pakayraan a padama kitaanan hani? Ngaˈayay patinakoen ita ko fangcalay ˈicel to fali. Soˈlin taˈangayay ko tapelik no riyar, ngaˈayay micaliw ko tamina to ˈicel no fali, rihaday a tangasa i kahiceraan. Malecaday, soˈlin misiˈayaw to masakenaay a pasangaray, wa ngaˈay padama ko fangcalay ˈicel kitaanan padadotoc a midoko to Kawas, tahira picomodan i faelohay hekal.

⁸ Nao mifotingay ko tarokos ci Pitiro, cipinangay to samaanay ko lakat no tamina, mansa milengo to samanay misaka dademak ko fangcalay ˈicel i, o misaka dademakan ningra a sowal milingatay to lakat no tamina. Sanay cingra: ‘O sapairasol cowa ko nano harateng no tamdaw a misowal, ao fangcalay ˈicel ko micorohay to tamdaw, mihadak to sowal no Kawas.’ Mihongyakan to ‘micoroh’ no Krisiya sowal, tatodong i ‘kayaten a tatemik’ sanay.—2 Pitiro 1:21 ato sapatongal pihongyak.

9. Saka dademakan ni Pitiro ko ‘kayaten a tatemik’ a sowal, sapitadtadaw to maanan a demak hani?

⁹ Saka dademaken ni Pitiro ko ‘kayaten a tatemik’  a sowal, sapitadtadaw to maanan a demak hani? Misaka dademakan ni Luka koniya sowal, o tamina nangra mitooray to fali ‘maˈalol.’ (Dmak 27:15) O cecay mikingkiway to Fangcalay Cudad a tamdaw sanay, o sowal ni Pitiro papiharatengay to tamdaw to lakat no tamina. Tatodong ni Pitiro i, malecad o tamina itini picoroh no fali tahira kahicelaan, o pairasolay ato mitiliday to Fangcalay Cudad a tamdaw itini picoroh no fangcalay ˈicel milaheci to tayal nangra. Sanayho ko sowal noniya tamdaw, o mitiliday to Fangcalay Cudad malecaday o tamina, ‘micelakay to kopang.’ Padamaay ci Yihofa cangranan, pafeli to ‘fali,’ oya fangcalay ˈicel. Mihadakay to ˈicel ko mitiliday to Fangcalay Cudad, midoedo to pakaynian no Kawas i fangcalay ˈicel a sakayat cangranan.

10-11. Ano sapilifokaw to fangcalay ˈicel i, wa midemak kita to maanan tosaay a demak hani? Patinakoen a mitadtad.

¹⁰ Soˈlin, cowato pikayat ko Kawas to tamdaw mitilid to Fangcalay Cudad, kawra papadamaho Cingra to sikawdan Ningra, pafeli to ˈicel misaka dademak cangranan. Sasamaan kita ngaˈ malifok ko fangcalay ˈicel hani? Oha mamisaˈicel kita midemak to hademak ita.

¹¹ Haratengen ko ilaenoay a sapatinako, ano sapicadaaw to ˈicel no fali, o taminaay a tamdaw oha mamidemak to tosaay a demak. Saka 1, patayraen ko tamina i cifaliay a kitiraan. Ano paterep han ko tamina i awaay ko fali a minato i, cowa ko tatalaˈayaw ko tamina. Saka 2, saˈicelen ningra micelak to kopang no tamina, ano caka celaken ko kopang, soˈlin ira ko fali cowa ko tatalaˈayaw ko tamina. Mihaenay i, ano sapilifokaw to fangcalay ˈicel padadotoc matayal saki Yihofaan, wa midemak kita to tosaay a demak. Saka 1, oha mirienang kita to iraay ko fangcalay ˈicel a demak. Saka 2, samacayen ita midemak koniya demak, mahecad misaˈicel ‘micelak to kopang no tamina’. (ˈOlic 119:32) Ano songilaˈen ita midemak koniya tosa a demak, soˈlin ira ko malecaday o tapelik  a pasangaray ato sapalifet, o fangcalay ˈicel wa padama kitaanan madimadi tahatolas, micomod i faelohay a hekal no Kawas.

12. Dotoc mamilengo kita to maanan?

¹² Maharekayto kita milengo, o fangcalay ˈicel wa paˈicel kitaanan itini sapalifet padadotoc a madimadi, micorohayho kitaanan padadotoc talaˈayaw i saka tahadaˈoc no ˈorip a lalan. Dotoc, milengo kita to maanan sepat a pakayraan padama kitaanan milifok to matomesay a fangcalay ˈicel.

13. Pakayni 2 Timoti 3:16, 17, o Fangcalay Cudad samaan ko pilingat kitaanan hani? Kawra sasamaan ko hademak ita hani?

¹³ Saka 1, micekiw to Fangcalay Cudad. (ˈOsien ko 2 Timoti 3:16, 17.) Mihongyakan to ‘mikayat ko Kawas’ a Krisiya sowal, o tatodong i ‘miˈiyofay ko Kawas.’ Saka dademakan no Kawas ko fangcalay ˈicel Ningra, malecaday o miˈiyofay to fali, miparo to harateng no Niyah i ponoˈ no mitiliday to Fangcalay Cudad a tamdaw. Ano miˈosi kita ato midotim to lalakaw no Fangcalay Cudad i, o sapasifanaˈ no Kawas micalepay i ponoˈ ato falocoˈ no mita, padama kitaanan a misalof, palecad to saali no Kawas. (Hipray 4:12) Mihaenay, ano sapilifokaw to matomesay a fangcalay ˈicel, mamicerid kita micekiw to Fangcalay Cudad, misongilaˈho miharateng to maˈosiay a lalakaw. Mihaen, o mamifiyor ko Kimad no Kawas to sasowalen ato waywayan ita.

14. (1) Itini kasaˈopoan a toki, samaan mafanaˈ kita to dademakay ko fangcalay ˈicel ni Yihofa hani? (2) Sasamaan ko hademak ita ngaˈ milifok to matomesay a fangcalay ˈicel i kasaˈopoan hani?

¹⁴ Saka 2, malacafay to salikaka midoko to Kawas. (ˈOlic 22:22) Ano masaˈopo i, malecaday kita to itiniay ‘cifaliay a kitiraan,’ samanen dademakay ko fangcalay ˈicel ni Yihofa. (Paˈarawan 2:29) Itini kasaˈopoan a toki, micangacangay kita to Kawas pafeli to fangcalay ˈicel, romadiwayho to mikitiniay Fangcalay Cudad a radiw no Hongti Kitakit. Misikayay a salikaka o minilnilan no fangcalay ˈicel no Kawas, o sapasifanaˈ nangra mikitiniay i Fangcalay Cudad. Roma i, iraay ko fafahiyan salikaka mirienang to roma a saˈopo, misaday ato mikimad cangra i, milifokay to sadama no fangcalay ˈicel. Manaokaniw, o mamisaday kita to saˈopo, hanaca tawlik a pacaˈof. Mihaen, malecaday kita to ‘micelakay to kopang a tamina,’ ngaˈay milifok to matomesay a fangcalay ˈicel.

15. Samaan ko hademak ita ngaˈ malifok ko fangcalay ˈicel i pitosilan hani?

¹⁵ Saka 3, mirienang to mitosilay. Mitosil ato pasifanaˈ kita to tao misaka dademak to Fangcalay Cudad, wa malifok ko sapadama no fangcalay ˈicel. (Loma 15:18, 19) Sapilifokaw to matomesay a fangcalay ˈicel, wa micerid kita a mitosil, hanaca misaka dademak to sinael. Ngaˈayay tanamen ita misaka dademak ko sakasasowal a taˈarawan no Rayray no Saˈopo, mihaen o caciepoc ko pitosil.

16. Sapilifokaw to fangcalay ˈicel, sakalikiay a pakayraan o maanan hani?

¹⁶ Saka 4, tolonen ci Yihofa. (Matay 7:7-11; Luka 11:13) Sapilifokaw to fangcalay ˈicel, sakalikiay a pakayraan i, mitolon to Kawas. Soˈlin itini kita i kapalitan, tano masakenaay a pakayraan ci Satan a miconged, oha mamatengil no Kawas ko satolon ita, pafeli to fangcalay ˈicel kitaanan. (Yakop 1:17) Sasamaan ko pitolon ita ngaˈ milifok to matomesay a fangcalay ˈicel hani? Ngaˈayay songilaˈen ita a miharateng ko cecay sapatinako, oniya sapatinako itiniay aca i Luka a masadak. *

17. Pakayni satolon, mikitini i Luka 11:5-9, 13 a sapatinako mananam ita ko maanan hani?

¹⁷ ˈOsien ko Luka 11:5-9, 13. O sapatinako ni Yis mitadtaday, oha sasamaan kita micangacang to Kawas pafeli kitaanan to fangcalay ˈicel. Masowalay no sapatinako, soˈlin o lafiito, cowa ka talaw cingra miafad to fiyaw. Samanen ‘timoloay padadotoc’ cingra, salikor malifokay ko misaalian a dafong. Oniya sapatinako samanay milingat to satolon hani? Sanay ci Yis: ‘Ka padadotoc a micangacang, o papafelien kamo; padadotoc a mikilim, o mamahela; padadotoc a mikongkong, o fafohaten ko fawahan.’ Mikitini wa mananam ita ko maanan hani? Sapilifokaw to fangcalay ˈicel, oha padadotoc a mitolon kita.

18. O sapatinako ni Yis hano ngaˈay pakasoˈlin kita to, wa pafeli ci Yihofa to fangcalay ˈicel kitaanan hani?

¹⁸ O sapatinako ni Yis wa padamaho kitaanan mihapinang, hano pafeli ci Yihofa kitaanan to fangcalay ˈicel. Itini sapatinako, itiniay i lafii a milisoˈ ko lafang, soˈlin awaay ko maanan a kakaenen no cilomaˈay, kawra kamayan sapahololaw to lafang. Sowal ni Yis, samanen oniya cilomaˈay timoloay a micangacang, mansa pafeli hananay no fiyaw to pina a epang. O maanan ko tatodong ni Yis hani? O cowa kalefot a tamdaw pakayni ka padadotoc no tao a micangacang makahiay a padama, oraho sidaˈitay a Wama hokira? Mihaenay i, ano padadotoc kita micangacang ci Yihofaan, o papacaˈof Cingra kitaanan, halo pafeli to fangcalay ˈicel.—ˈOlic 10:17; 66:19.

19. Hano cowa ko mamalowid ni Satan kita hani?

¹⁹ Soˈlin tano masakenaay a pakayraan ko sapilowid ni Satan kitaanan, cowa ko mamalaˈosi cingra. Samanen o fangcalay ˈicel wa pafeli kita to ˈicel mihadidi to sapalifet, micorohayho to ‘kopang no tamina’ ita, padama kitaanan padadotoc matayal saki Kawas, pasayra i faelohay hekal a talaˈayaw. Nanay saˈosien ita ko falocoˈ, papisaka dademaken ko fangcalay ˈicel i tireng no mita!