1-2. (1) Pakayni Ifiso 6:16, o pakasoˈlinay falocoˈ ita hano pahecaden to ‘taˈangayay sapatada’ hani? (2) Oniya lalakaw wa pacaˈof to maanan a salicay hani?

O PAKASOˈLINAY falocoˈ iso malecaday o ‘taˈangayay sapatada’ han? (ˈOsien ko Ifiso 6:16.) Malecad o taˈangayay sapatada ngaˈayay midipot to sofitay caka madokaˈ, o pakasoˈlinay falocoˈ wa ngaˈay midipot tisowanan ho eca picada to tatiihay pifiyor no hekal, tinakoen o maˈodangay, mariˈangay, ato romaroma misafelitay to palinian no Kawas a demak.

² Kawraan, itiniay kita i ‘salikoray romiˈad’ a maˈorip, o tatahacada to sapalifet. (2 Timoti 3:1) O kakinsaen ita ko taˈangayay sapatada no niyah, misaˈosi to tanektekay hokira? Samaan ko hademak ita, ho ngaˈay miˈamet to ‘taˈangayay sapatada,’ patanektek ko pakasoˈlinay falocoˈ hani? Oniya lalakaw papacaˈof toniya salicay.

3. Nolitengan a sofitay samanay mikinsa to sapatada hani? Hano rariden a mihaen ko demak hani?

³ Itini lintad no Fangcalay Cudad, o misadayan no sofitay a sapatada mitafoan to katol ko papotal. Padawdawan no sofitay ko sapatada, mihaen ho eca ka citaˈi ko malad no sapatada. Ano mapalak ko sapatada, tatangsol ko sofitay a misangaˈ, mihaen maharek ko pisaday a malingad milood. Cipinang tonini, pakayni sapatanektekaw to pakasoˈlinay falocoˈ, wa ira ko maanan a sadama hani?

4. (1) Hano mamicerid kita mikinsa to taˈangayay sapatada no niyah hani? (2) Sasamaan ko hademak ita hani?

 ⁴ Malecad nolitengan a sofitay, mamicerid kita mikinsa to taˈangayay sapatada no mita, maharek ko pisaday a milood. Malo Krisciyangay, malalooday kita to tatiihay coyoh. (Ifiso 6:10-12) O kahacecay tamdaw o mamitamorong to ˈinorong no niyah, mitafo to tanektekay a pakasoˈlinay falocoˈ. Hano mafanaˈ kiso to papakaremo ko pakasoˈlinay falocoˈ no niyah to sapalifet hani? Salakat, mitolon to sapadama no Kawas. Dotoc, micekiw to Fangcalay Cudad ato mikinsa to niyah. (Hipray 4:12) Sanay ko sowal no Fangcalay Cudad: ‘Sarocoden iso mitadiˈec ci Yihofa, aka mitiˈer to taneng no niyah.’ (Taneng 3:5, 6) Haratengen ko misaˈosian iso a demak. Taˈangayay ko saroero no sakaˈorip iso han? Ano mahaenay, maharatengay iso ko sakiˈok ni Yihofa i Hipray 13:5 han? Sowal Ningra: ‘Cowa ko fafalahen Ako kiso, cowa ko mamiliyas tisowanan.’ Oniya sakiˈok pakasoˈlinay kiso to papadama ci Yihofa kisowanan han? Ano mahaenay ko harateng iso, o tanektekayto ko taˈangayay sapatada no miso.

5. Maharek mikinsa to taˈangayay sapatada i, wa mahapinang iso ko maanan hani?

⁵ Maharek mikinsa to taˈangayay sapatada i, mamahapinang ko cowa ka sinanot i salakat a pasangaray alatek. Tinakoen, mahapinang iso mipalakay to pakasoˈlinay falocoˈ iso ko cariraw, mangah ato matoleday a harateng. Ano mahaenay, sasamaan kiso a midipot to pakasoˈlinay falocoˈ hani?

6. Calemcem kita to maanan a demak hano cowa ko mararaway hani?

⁶ Calemcem kita to kalo a demak cowa ko mararaway. Tinakoen, ciharatengay kita to kalalaˈed no niyah ci Yihofaan aci Yisan, makalim micada to pihayda Nangra. (1 Korinto 7:32) Ano mararaw kita i, wa calemcem ko falocoˈ, makalim patikol ngaˈay ko kalalaˈed ci Yihofaan. (ˈOlic 38:18) Calemcemayho kita eca ka hemek ko ramod, ciharateng to paro no lomaˈ ato salikaka.—1 Korinto 7:33; 2 Korinto 11:28.

7. Pakayni Taneng 29:25, misamaanay hano cowa ko mamatalaw kita to tamdaw hani?

⁷ Nikawrira, pakidem ko cariraw wa mipalak to pakasoˈlinay falocoˈ no mita. Ano mararid a calemcem cangoˈot ko kakaenen ato rikoˈ, wa misamacayto ko harateng mietan to payci, alatek mamaˈanof to hafay. (Matay 6:31, 32) Mihaenay, wa cangoˈot ko pakasoˈlin ita ci Yihofaan, palidlid sato miliyas Cingranan. (Marko 4:19; 1 Timoti 6:10) Roma i, pakidem ko calemcem to pinengneng no tao, wa mipalak to pakasoˈlinay falocoˈ no mita. Ano sapilifokaw kita to pihayda no hekal a tamdaw i, wa matalaw to salikaf ato sapalak nangra, telocto midemak to kapiliˈan ni Yihofa a demak. Mihaenay, o cacangacangen ita ci Yihofa pafeli kitaanan to pakasoˈlinay falocoˈ ato timolo a miremo to ciˈangiay.—ˈOsien ko Taneng 29:25; Luka 17:5.

8. Ano pasowal ko tamdaw kitaanan to mangah, o sasamaan hani?

⁸ Ci Satan o ‘wama no misamangahay tamdaw,’ misaka dademakan ningra ko maontingay ningra a tamdaw miyakayak to pakayniay ci Yihofaan ato salikaka a mangah. (Yohani 8:44) Tinakoen, itini wangcan, tilifi ato sinpon milasilay ko misafelitay to kimad a tamdaw to cowa ko soˈlinay a safanaˈ pakayni i Misawacayay Tamdaw ni Yihofa, o hatiniay a lihaf sahtoay mikitiniay ci Satanan a ‘cinamalay a panaˈ.’ (Ifiso 6:16) Ano pasowal ko tamdaw kitaanan to mahaenay a mangah, o sasamaan hani? Cowa ko tatengilen ita! Pakasoˈlinay kita to Kawas ci Yihofaan ato salikaka, mihaenay cowa ko mamiingid to misafelitay to  kimad a tamdaw. Ano o maanto a demakan, maanan a lalangian, cowa ko mamacacoli kita cangraanan, cowa ko fafahekaˈ a masasowal cangraanan.

9. O matoleday a harateng mamipalak to maanan hani?

⁹ O matoleday a harateng wa mipalak to pakasoˈlinay falocoˈ no mita. Misiˈayaway ko kahacecay tamdaw to pasangaray, latekay matoleday ko falocoˈ. Soˈlin cowa ko papakihateren ita ko pasangaray, kawra cowa ka ngaˈay saromiˈamiˈad saan a macariraw, ano mahaen wa madolo a matawal to makapahay a sakiˈok ni Yihofa. (Paˈarawan 21:3, 4) Ano pakidem ko katoled ita, wa malahedaw ko ˈicel, salikor wa sawad saan midoko to Kawas. (Taneng 24:10) Nikawrira, o ngangaˈay miliyaw a talifak kita.

10. O tikami no cecay fafahiyan salikaka wa mananam iso ko maanan hani?

¹⁰ O cecay fafahiyan salikaka i Padaka midimokosay to aretengay ko adada a faˈinay, hano padadotoc cingra pakasoˈlin to Kawas hani? Patikamian ningra ko Congpo, sanay ko sowal: “Latekay taˈangayay ko saroero niyam, matoleday, kawra matomesay ko tokel niyam to hanoikor. Koˈiday ci Yihofa pafeli to adihayay mitepangan a cudad, paˈicel to pakasoˈlinay falocoˈ niyam, miliyaw a patalifak tamiyanan. Oniya limoˈot ato sapakalalok o misaalian niyam. Sakadademakan ni Satan ko masiˈayaway niyam a pasangaray a mitapiˈ tamiyanan, kawra kamayan a tanektek kami.” O sowal noniya salikaka pahapinangay kitaanan, wa ngaˈay maremo ita ko matoleday a harateng. Haratengen, misaka dademakan ni Satan ko malifaay ita a pasangaray mitapiˈ tisowanan, kawra pakasoˈlinen ci Yihofa o mamisayar tisowanan, sangaˈayen a misaka dademak ko mitepangan no likakawa a cudad patanektek to pakasoˈlinay falocoˈ.

11. Ano sapihapinangaw to o tanektekay ko pakasoˈlin no falocoˈ no niyah i, ngaˈay haratengen ita ko maanan a salicay hani?

¹¹ Maharateng ko pina pakayraan i fafekang, mahapinangay iso ko taˈangayay sapatada no niyah iraay ko tatapiden han? I ngata a toki, miliyasay kiso to pakidemay a cariraw han? Ano milasil ko misafelitay to mangah i, cowa ka pitengil ato macacoli han? Ano matoled i, misaˈicelay kiso a miliyaw talifak han? Ano mahaenay i, o tanektekay ko pakasoˈlin no falocoˈ  iso. Kawra, oha mamitafo kiso to talipaˈelalay, samanen iraayho ko roma sapilood ni Satan a lalosidan, dotoc nengnengen ita ko pina.

12. Pakadafongay a harateng mamikayat to samanay a hateloc hani?

¹² Pakadafongay a harateng wa mipalak to pakasoˈlinay falocoˈ ita, ecato ka pisamacay matayal saki Yihofaan. Sowal no tarokos ci Pawlo: ‘O mala sofitayay a tamdaw cowa ko mamaafad no misasindiay a demak, sapilifokaw to pihayda no mitahidangay cingranan a tamdaw.’ (2 Timoti 2:4) Nolitengan a sofitay i Loma, cowa pidemak to roma a tayal, ano caka pidofdof cangra toniya limoˈot, wa samaan ko teloc nangra hani?

13. Ano misasindi ko sofitay i, wa samaan ko hateloc hani?

¹³ Haratengen ko cecay a pakayraan. Cecay a kapot no sofitay saromiˈad sa mikongling, o cecay a sofitay tayraay i icifa paliwal to dafong. Dadaya sa, o roma sofitay milenacay to fonos ato mikinsa to sapilood a lalosidan, oya sa sofitay misamacayay misaday to hanocira a sindi. Nocira papacem i, fahal sa miˈodis ko ˈada. O cima ko tatangsol milood to ˈada milifok to kasemer no tapang hani? Ano milood kiso i, o cima ko kaolahan iso malacafay a milood hani? Oya maharekay misaday a sofitay, anca oya samisimisi sanay ko falocoˈ a sofitay han?

14. Malo sofitay ni Kristo, o maanan ko misaaretengan no mita hani?

¹⁴ O pahecaden ita ko tadamaanay a sofitay, misamacay to kalimlaan a patosokan, hamamilifok to pihayda no Tapang ita ci Yihofa aci Yis. Palalinien to pihayda Nangra, awaay ko kapo no mihadakan ni Satan, mansa, saˈosien ita adihayay ko toki ato ˈicel ita matayal saki Yihofaan, songilaˈen a mikinsa to taˈangayay sapatada ato sapafeli no Kawas a polong sapilood a rikoˈ.

15. Mihadakay ko tarokos ci Pawlo to maanan a sapirikec hani? Hano mihaen ko sowal ningra?

¹⁵ Sowal no tarokos ci Pawlo ‘ciharatengay saka cihafayaw a tamdaw’ wa ‘mararaw ko lalan, miliyas to pihakelongan,’ mihaenay aka a misawad talipaˈelal. (1 Timoti 6:9, 10) Ano makalim kita sapilifokaw to cowa ko kalimlaan a dafong, oha ‘mamararaw ko lalan,’ o lalomahad  i falocoˈ ko ‘tatiihay a coos.’ Saka dademakan ni Satan ko hatiniay a coos mipalak to pakasoˈlinay falocoˈ no mita, mihaenay o tatanektek kita a micoˈay!

16. Maharek minengneng to Marko 10:17-22 a sinael, haratengen ita ko maanan a salicay hani?

¹⁶ Ano iraay ko payci iso i, miˈacaay to cowa ko misaalian a dafong, o mararaway a demak han? Cowa ka hatira. Kawra ano iraay ko payci iso miˈaca toya dafong, wa ira ko toki ato ˈicel iso a misaka dademak ato midipot toya dafong han? Wa samacay sa kiso miharateng to miˈacaan a dafong iso han? Wa pakidem ko pisakareteng iso to dafong, mahecad oya minaˈayay to satahidang ni Yis a kapah, caka sapitongalaw to tayal ni Yihofa han? (ˈOsien ko Marko 10:17-22.) Soˈlinay i, doloen ko kaˈorip, saka dademaken ko toki ato ˈicel midemak to kaolahan no Kawas a demak, mihaen ngaˈ o sangaˈayay no kaˈorip!

17. Haharatengen ita ko maanan hani?

¹⁷ Haharatengen ita, ci Satan mamiˈodis kitaanan to romiˈamiˈad, mihaenay i, songilaˈen ita misaday, ngaˈngaˈay ko pilood. (Paˈarawan 12:17) O salikaka cowa ko papatado kitaanan mitatiw to taˈangayay sapatada, patanektek to pakasoˈlinay falocoˈ o niyah a ˈinorong.

18. Nolitengan a sofitay ano milood hano metmeten ko sapatada no niyah hani?

 ¹⁸ Nolitengan, ano timolo ko sofitay milood micadaay to sapalifon, kawra ano eca pakadipot to sapatada, masakangodoanto konini. Mikingkiway to likisi no Loma ci Tacitos sanay: “Pakayni i sofitay, ano mahiday ko sapatada o kangodoan a demak.” Mihaenay ano milood i, miˈametan no sofitay ko sapatada no niyah.

19. Sasamaan ko demak ita, wa ngaˈay mimetmet to taˈangayay sapatada no niyah hani?

¹⁹ Malecaday, o kakelecen ita mimetmet ko taˈangayay sapatada no niyah. Wa micerid kita mirienang to saˈopo, milasil to ngangan ni Yihofa ato Hongti Kitakit Ningra, to romiˈamiˈad micekiw to Fangcalay Cudad ato micangacang to sadama ni Yihofa misaka dademak to minanaman. (2 Timoti 3:16, 17; Hipray 10:23-25) Mihaen, ano o mananto ko misaka dademakan ni Satan ‘sapilood a lalosidan,’ awa ko pakayraan tahadaˈoc a midokaˈ kitaanan. (Isaya 54:17) O pakasoˈlinay falocoˈ ita wa malecad o taˈangayay sapatada midipot kitaanan, tanektek kita a tomireng, malacafay to salikaka a micoˈay ci Satanan. Kalimlaan i, wa masongilaˈto ni Yis a milowid ci Satan ato kapot ningra, midama kita ci Yisan, wa mikapot to pakalowiday!—Paˈarawan 17:14; 20:10.