1, 2. Hipray 13:4 palimoˈotay kitaanan to maanan?

MAKALIMAY kiso mikangodo ci Yihofaan han? Hano eca, makalimay kiso mihaen to demak! Citatodongay ci Yihofa to kakangodoen no mita, mikiˈokay Cingra to mamisaareteng kitaanan. (1 Samuil 2:30; Taneng 3:9; Paˈarawan 4:11) Mitokelay Cingra kitaanan mikangodo to tao, tinakoen mikangodo to mirikecay tamdaw. (Loma 12:10; 13:7) Mitokelayho Cingra kitaanan mikangodo to maanan hani? O limasmas no raramod.

² Sowal no tarokos ci Pawlo: ‘O kakangodoen no tamdaw ko raramod, hamaan pakaditen ko takar no raramod.’ (Hipray 13:4) Cowa ko sapaini aca ko sowal ningra, oniya sinael palimoˈotay to Krisciyang, mikangodo ato misalimla to raramod. Mahaenay ko pinengneng iso to raramod han? Ano ciraramodayto kiso, mikangodoay kiso ato misalimlaay to raramod han?

3. Pakayni i raramod pasowalay ci Yis to maanan a limoˈot hani? (Nengnengen ko satapangan coka.)

³ Ano mikangodoay kiso to raramod, o mitodongay to taˈarawan ni  Yis. Mikangodoay ci Yis to raramod. Tiya licayen no Farisay tamdaw ci Yis, samaan ko pinengneng to malalikongay i, miliyawan ni Yis ko pinengneng no Kawas to saka cecay a raramod, sanay cingra: “Liyasen no tamdaw ko mama ato ina ningra. . . . Malacecayto ko tireng noya tatosaay.” Dotoc pasowalayho cingra: “O nipalacecayan no Kawas i, aka palicinowasen no tamdaw.”—ˈOsien ko Marko 10:2-12; Satapangan 2:24.

4. Pakayni i raramod, patirengay ci Yihofa to maanan a palinian?

⁴ O sowal ni Yis paihkalay to, o limasmas no raramod mikitiniay i Kawas, o tahadaˈocay ko kalalaˈed no raramod. Cowa pihai ko Kawas ci Atam aci Ifa malalikong. Salakat, o limasmas no Kawas to raramod i Itin, cecay ko faˈinay cecay ko fafahi, oniya “tatosaay” wa tahadaˈoc a malacafay.

5. O patay samaanay malingat to raramod hani?

⁵ Tiya somowal ci Pawlo to cowato ko mamidofdof ko Krisciyang to sarikec ni Mosi i, cipinangay kita, samanen mararaw ci Atam, mapatay ko tamdaw, mansa milingatay to limasmas no raramod. Ano mapatay ko cecay i, o kalalaˈed no raramod wa mahererekayto, oya maˈoripayho wa ngaˈay miliyaw a ciraramod.—Loma 7:1-3.

6. Pakayni i pinengneng no Kawas to raramod, itini i sarikec ni Mosi mananamay ita ko maanan?

⁶ O sapafeli no Kawas to Israil a sarikec, mahawpay ko limasmas no raramod. ˈAyaw no pafeli ko Kawas to sarikec, adihayayto ko fafahi no roma Israil a faˈinayan, soˈlin ikorto mihaiay ko sarikec toniya demak, kawra midipotay ko sarikec to fafahiyan ho eca ka masamsam. Tinakoen, ano cifafahi ko faˈinayan to koli, ikor cifafahi to saka tosa, oha papafelien ningra koya koli to kakaenen, rikoˈ ato madadiˈiay a demak, samanen misaaliay ko Kawas to faˈinay, padotoc midipot ato midimokos to fafahi. (Kasadakan 21:9, 10) Anini, cowato ko mamidofdof to sarikec ni Mosi, kawra mikitini i sarikec mahapinangay ita to misaaretengay ci Yihofa to limasmas no raramod. Ano hatiraay i, coko mamatongal ko pikangodo ita to raramod han?

7, 8. (1) Tooren ko Limoˈot 24:1 pakayni i malalikongay, o maanan ko saˈosi no sarikec ni Mosi hani? (2) Samaanay ko pinengneng ni Yihofa to malalikongay?

⁷ Pakayni i malalikongay, o maanan ko saˈosi no sarikec hani? Cowa ka falic ko pinengneng no Kawas to raramod, kawra mihaiay ko sarikec pakayni maanan a lalangian malalikong ko tamdaw. (ˈOsien ko Limoˈot 24:1.) Tinakoen, maˈaraway no faˈinay ko fafahi, “ira ko caay ka tatodong a demak”, wa ngaˈayto malalikong. Soˈlin cowa pitadtad ko sarikec to, o maanan kora “caay ka tatodong a demak”, maedeng o pakidemay anca o kaacekan a demak, cowa ko mimingay a raraw. (Limoˈot 23:14) Ka adayayan i, itini i lintad ni Yis, ˈalomanay Yutaya tamdaw tano ‘masakenaay a lalangian’ a malalikong. (Matay 19:3) Cowa ko sapahecadaw kita tora Yutaya a tamdaw.

⁸ O pairasolay ci Malaki, somowalay cingra to pinengneng no Kawas to malalikongay. Itini i lintad ningra, misafakofakoay ko falocoˈ no ˈalomanay faˈinayan, malalikongay to “kalakapahanho a fafahi” no niyah, alatek saka cifafahiyaw to midokoay to makaniway kawas a kaying. Sowal ni Malaki: ‘ˈIntehay ko Kawas to malalikongay.’ (Malaki 2:14-16) Cowa ka falic ko pinengneng no Kawas to raramod, tiya mararamod ci Atam aci Ifa i, sanay ci Yihofa: “Malacecay ato fafahi ningra, o malacecayayto ko tireng nonini a tatosaay.” (Satapangan 2:24) Mahecaday ko pinengneng ni Yis to Wama ningra, sanay: “O nipalacecayan no Kawas i, aka palicinowasen no tamdaw.”—Matay 19:6.

9. O maanan ko tatodong no sinael i Marko 10:11, 12?

⁹ Wa milicay ko roma tamdaw alatek: “Samaan ko pakayraan ngaˈ ngaˈay ko Krisciyang malalikong, miliyaw a ciraramod hani?” Milengo ci Yis to milikongay i, sanay cingra: “O misawaday to fafahi no tireng a ciramod to roma a fafahiyan i, o maˈodangay cingra a pararaw to saˈayaway a fafahi  ningra. Mahaen ko fafahi ano misawad to faˈinay no tireng a ciramod to roma a faˈinayan i, o maˈodangay cingra.” (Marko 10:11, 12; Luka 16:18) Mitokelay ci Yis mikangodo ko tamdaw to limasmas no raramod. Ano milikong ko cecay faˈinayan to madimadiay a fafahi (anca o fafahiyan to madimadiay a faˈinay), ikor ciramod to roma, o maˈaˈodangayto. Kawra, cowa ko mihaian no Fangcalay Cudad a lalangian a malalikong, cowa ka hererek ko kalaliting no raramod, samanen minengneng ko Kawas, kamayan o “cecayay ko tireng” no raramod. Mihaenay ko sowal ni Yis, ano patelas a likongen no faˈinay ko madimadiay fafahi i, wa pakararaw to fafahi to maˈodangay alatek, hano mahaen hani? Samanen cowa ko ngangaˈay koniya fafahiyan miliyaw a cifaˈinay, kawra pakayni sakaˈorip miliyaw a cifaˈinay, mahecaday o maˈodangayto cingra.

10. Ngaˈayay malalikong ko Krisciyang, edengan a lalangian miliyaw ciraramod o maanan?

¹⁰ Pakayni i edengan a lalangian to sapihererekaw to raramod, masowalay ni Yis: “Sowalen ako kamo, ano caay ko nikaˈodangan [Krisiya, por·neiʹa] no fafahi ko sapisawad no faˈinay to fafahi ningra ta cifafahi to roma i, o maˈodangay cingra,” sanay. (Matay 19:9) O Pasifanaˈ i Lotok ni Yis milengoay to maˈodangay. (Matay 5:31, 32) Toniya tosa tatokian, o misowalan ni Yis a “maˈodangay”, mitoroˈ to potalay no raramod a madadiˈiay a demak, mahawpay ko maˈaˈodangay, pacopiyaway, ˈayaw mararamod madadiˈiay, tongsinlien, midiˈi to ˈaˈadopen. Ano midemak ko cifafahiayto a faˈinayan to maˈodangay, wa ngaˈay ko fafahi ningra misaˈosi to mamilikong cingraanan. Ano misaˈosi ko fafahi milikong, o raramod nangra mahererekayto wasa ko pinengneng no Kawas.

11. Soˈlin maˈodangay ko ramod i, misamaanay o makoracay a tamdaw mipiliˈ to cowa ko malalikong hani?

¹¹ Sasinanoten i, cowa ka somowal ci Yis ano maˈodang (por·neiʹa) ko ramod, o mamalalikong ngaˈ ngaˈay. Tinakoen, soˈlin maˈodang ko faˈinay, alatek papadotocen no fafahi ko raramod. Kamayanho a maolah to faˈinay a makahi a misodod cingraanan, hanaca malacafay a misalof to kalalaˈed no raramod. Ano milikong ko fafahi a eca ka piliyaw cifaˈinay, o mamisiˈayaw to pasangaray alatek. Sasamaan cingra mirenec to nodafongan ato midiˈiay a saali no niyah hani? Sasamaan misiˈayaw to matoˈolay a pakayraan? Ano iraay ko wawa, sasamaan mafiyor ko wawa i noka lalikong hani?  Ano malalikong i, wa matongal ko pasangar a pasifanaˈ to wawa a mihodop to Kawas hokira? (1 Korinto 7:14) Mihaenay, o makoracay a tamdaw mipiliˈ a malalikong, mamisiˈayaw to adihayay a pasangaray.

12, 13. (1) O raramod ni Hosiya mifekaday ko maanan hani? (2) Misamaanay hano liyawen ni Hosiya micada ci Komil? (3) O maanan ko mamananam ita hani?

¹² Wa ngaˈay kita mikitini i malifaay ni Hosiya, minanam to pinengneng ni Yihofa to raramod. Palimoˈotan no Kawas ci Hosiya, misafafahi ci Komilan somowalayho o mamala ‘maˈodangay fafahiyan’ cingra, hanaca papalahaden ni Hosiya ko ˈmikitiniya kaˈodang’ a hofocen a wawa. Safafahiento ni Hosiya ci Komil i, “cipuyapuy ci Komil ta mahofoc cingra to cecay a faˈinayan a wawa [ni Hosiya].” (Hosiya 1:2, 3) Ikor, mahofocayho ci Komil to fafahiyan ato faˈinayan a wawa, oniya tosa a wawa, ono kaˈodang a hofocen alatek. Soˈlin saliyaliyaw saan ci Komil a maˈodang, cowa ka likongen ni Hosiya cingra. Saikor, miliyasay cingra ci Hosiyaan mala koli, kawraan miˈacaan ni Hosiya cingra a panokay. (Hosiya 3:1, 2) Tano milifetan ni Hosiya ko sapitadtad ni Yihofa, misaliyaliyaw ko Israil tamdaw, midoko to makaniway kawas, mahecaday o maˈodangay, kawra padotocay ci Yihofa a misodod cangraanan. Mikitini toniya maˈoningay, mamananam ita ko maanan hani?

¹³ Ano maˈodang ko raramod no Krisciyang, o madimadiay i raramod a tamdaw wa misaˈosi to sasamaan ko demak. Sowal ni Yis, o makoracay tamdaw, iraay ko tatodong a mipiliˈ to milikong, ikor miliyaw a ciraramod. Kawra, wa ngaˈay a misodod, mahaen o picada ni Hosiya ci Komilan. Patikolto ci Komil i, pasowalan ni Hosiya cingra, akato ka dadiˈi to roma faˈinayan. O cecay a liyad, cowa ka dadiˈi ni Hosiya ci Komilan. (Hosiya 3:3) Ikor, miliyaw ci Hosiya madadiˈi ci Komilan. Mihaen ko demak ni Hosiya tahapinangan to makahiay ci Yihofa miliyaw a micada to Israil tamdaw, padotoc malo finawlan Ningra. (Hosiya 1:11; 3:3-5) O maanan ko mamananam ita hani? O makoracay tamdaw ano padotoc a madadiˈi to raramod, paihkal to misododanto koya mararaway. (1 Korinto 7:3, 5) Ano mihaen ko saˈosi no makoracay tamdaw, awaayto ko lalangian no Fangcalay Cudad a malalikong, o kakalacafay to raramod misaˈicel a tano harateng no Kawas a misalof to raramod.

14. Sowal no saka 1 Korinto 7:10, 11, alatek mafekaday ko maanan a pakayraan i raramod hani?

¹⁴ Soˈlin cowa ka lefet ko tamdaw, o Krisciyang wa misaˈicel a misaareteng to raramod, papahecad ci Yihofaan aci Yisan. Kawra, o roma Krisciyang cowa pikangodo to raramod. (Loma 7:18-23) Saka 1 hahekalan, iraay ko pasangar no raramod no roma Krisciyang. Sanay ko sowal ni Pawlo: ‘Aka piliyas ko fafahi to faˈinay.’ Kawraan mifekaday ko hatiniay demak itiya.—ˈOsien ko 1 Korinto 7:10, 11.

15, 16. (1) Ano tahalifa ko raramod to sapalifet i, wa misaˈicel cangra misamaan to demak? Misamaanay? (2) Ano cecayay aca ko midokoay to Kawas no raramod, ano tahalifa to sapalifet i, wa samaan ko demak nangra?

¹⁵ Cowa ka pitadtad ci Pawlo to lalangian no kalicinowas no raramod, kawra mahapinangay ita, cowa ko pakayniay i kaˈodang no faˈinay, samanen ano maˈodangay ko faˈinay, tatodong no fafahi a milikong miliyaw a cifaˈinay. Kawra, sowal ni Pawlo, ano o malaliyasay ko fafahi ato faˈinay i, ‘cowa ka ngaˈay miliyaw a ciramod. Ano eca i, o nika rarihaday ato faˈinay ko ngaˈay,’ samanen kamayan o mararamoday, sanay ko pinengneng no Kawas cangraanan. Palimoˈotay ci Pawlo, ano o mananto ko malifaay no raramod a sapalifet, ano cowa ko pakayniay i maˈodangay, wa misaˈicel ko mararamoday a mararihaday. Wa ngaˈay misaali to sadama no malohemay malitengay ko mararamoday, cowa ko mamisakakinih ko malohemay malitengay midama to cecay, oha mamihadak to limoˈot no Fangcalay Cudad.

¹⁶ Ano cecayay aca ko midokoay to Kawas no raramod, ano tahalifa ko raramod to sapalifet i, wa  ngaˈayto malicinowas ko raramod han? Sowal no Fangcalay Cudad pakayni i kaˈodang no raramod, wa ngaˈay ko Krisciyang milikong, kawra cowa pitadtad to ngangaˈay pakayni maanan a lalangian a malalicinowas. Sanay ko sowal ni Pawlo: “Ano ira ko cifaˈinayay a salikaka to caayho pipasoˈlin ci Kristoan i, ano maolah koya faˈinay a cicafay to fafahi ningra i, aka piliyas toya faˈinay.” (1 Korinto 7:12, 13) Oniya safalod matatodongay i aniniay a Krisciyang.

17, 18. Soˈlin tahalifa ko raramod to sapalifet, misamaanay hano misaˈosi ko roma Krisciyang materek i tihi no raramod?

¹⁷ Kawra, oya cowa pidoko to Kawas a faˈinay mariˈangay to fafahi, cowa ka “cicafay to fafahi”. Tinakoen, cowa pidoko to Kawas a faˈinay pakidemay mariˈang a midokaˈ to fafahi, mangalef miroeroay to ˈorip no fafahi. Alatek caka sapitamorongaw to midipot to fafahi ato paro no lomaˈ a ˈinorong, miconged to fafahi mihodop to Kawas. Ano samaanay ko harateng no faˈinay, hato cowa ka olah cicafay to fafahi, sanay ko harateng no fafahi alatek, mansa, o hatiniay a pakayraan ngaˈay malacinowas. Nikawrira, o roma Krisciyang misiˈayaway to mahecaday a pakayraan, cowa ka lalicinowas ko raramod nangra, padotocay cangra mihadidi a misalof to kalalaˈed nangra, hano mahaen ko saˈosi nangra hani?

¹⁸ Mihaen i, ano malalicinowas ko Krisciyang to raramod i, o kalalaˈed nangra kamayan o raramod cangra. Kawra, wa tahalifa to sapalifet cangra, mahecaday malengoay i saˈayaw. Masowalay ni Pawlo ko roma lalangian to papadotoc a mitafo to raramod, sanay cingra: “Nawhani pakayni i nika raramod nangra a mapalemed no Kawas koya caay pipasoˈlin ci Kristoan a faˈinay. Malecad tonini, pakayni i nika raramod no tatosa a mapalemed no Kawas ko caay pipasoˈlin ci Kristoan a fafahi. Ano caay ka hatira i, matiya o mafokilay to Kawas ko wawa namo. Nikawrira, mapalemedto no Kawas imatini ko wawa namo.” (1 Korinto 7:14) ˈAlomanay madimadiay a Krisciyang, soˈlin tahalifaay to pasangaray, kamayan cangra padotoc mitafo to kalalaˈed no raramod. Ano mala Misawacayay Tamdaw ni Yihofa ko raramod, maedeng wa mahemek to na misaˈicelay ato kinafalahay ko niyah, malifokay ko sapalemed nohatini.—ˈOsien ko 1 Korinto 7:16; 1 Pitiro 3:1, 2.

19. Hano adihayay ko lipahakay a raramod i kasakopang no Krisciyang hani?

¹⁹ Ihkalay ci Yis mitadtad to edengan a lalangian malalikong, palimoˈotan ni Pawlo to malicinowasay. Tokel nangra mikangodo ko Krisciyang to raramod. Anini, itini i kasakopang no Krisciyang icowacowa pala, adihayay ko lipahakay ko raramod, itini kasakopang iso iraay ko hatiniay tinakoan alatek. Oniya lipahakay raramod, maolahay ko madimadiay faˈinay to fafahi, tangongolay ko pikangodo no fafahi to faˈinay, mikangodoay cangra to raramod. Tada mahemekay kita maˈaraw to ˈalomanay mararamoday, misaka dademak to Kimad no Kawas: “Onini ko saka liyasen no tamdaw ko mama ato ina ningra a malacecay ato fafahi ningra. Malacecayto ko tireng noya tatosaay.”—Ifiso 5:31, 33.