1, 2. Ano mamisaˈosi kita to patosokan no ikor i, hano mitengil to sapaini ni Yihofa hani? (Nengnengen ko satapangan coka.)

ANO O KAPAH kiso, maedeng ˈalomanay ko painiay kisowanan to pakayniay i hanoikor a demak. O singsi ato roma tamdaw painiay kisowanan, micada to ˈakawangay picudadan, ngaˈ ira ko ˈakawangay ko lifon a katayalan. Cowa ka hecad ko pinengneng ni Yihofa, tokel Ningra malalok kiso i picudadan minanam, ira ko inaneng, micudiyapto ira ko sakaˈorip. (Kolosay 3:23) Mafanaˈay ci Yihofa to taˈangayay ko sasaˈosien no kapah tamdaw i hakelong no kaˈorip, mansa pafeli Cingra to safalod a mikayat a padama tisowanan i salikoray romiˈad midofdof to araaw Ningra.​—Matay 24:14.

² Haratengen ita, cipinangay ci Yihofa to kihcod, mafanaˈay to sasamaan ko kafalic no hekal, cipinangayho to hakowaay ko pingata ita to kahererekan. (Isaya 46:10; Matay 24:3, 36) Cipinangay ci Yihofa kitaanan, mafanaˈ to—o maanan ko papakahemek kitaanan, o maanan ko papatoled kitaanan. Mihaenay ano samaanto ko kangaˈay no sowal no tao, ano cowa ko misalalangiay to Kimad no Kawas, cowa ko ngaˈayay a sapaini.—Taneng 19:21.

3, 4. Mitengilan ni Atam aci Ifa ko mararaway a sapaini, samaanay ko pifiyor cangraanan ato teloteloc nangra hani?

³ Caka halafin masangaˈ ko tamdaw, pafeliayto ci Satan to mararaway sapaini i tamdaw. Misatakaraway cingra, pasowal ci Ifaan ato faˈinay ningra, o niyah saan ko misaˈosi to sasamaan ko kaˈorip, ano mihaen wa matongal ko lipahak sanay. (Satapangan 3:1-6) Misatekeday ko harateng ni Satan, nanay midofdof cingraanan ci Atam aci Ifa ato teloteloc nangra, midoko cingraanan a eca ka pidoko ci Yihofaan. Kawra, awaay ko sapafeli ni Satan cangranan, pafelian ni Yihofa cangraanan ko kihcod—o ngaˈayay tihi nangra, makapahay a kitiraan, ato malefotay a tireng ngaˈayay a tahadaˈoc maˈorip.

⁴ Kawraan, cowa pidofdof ci Atam aci Ifa to Kawas, miliyasay to Kawas, ka adayayan ko teloc. Mahecad o mipitinan a hana palidlid sato a mafadiˈ, ci Atam aci Ifa ato teloteloc nangra, micadaay to roray, ikorto mapatayay. (Loma 5:12) Soˈlin mahaen, kamayan eca ka pidofdof ko ˈalomanay to Kawas, toor sanay to harateng no niyah a maˈorip. (Ifiso 2:1-3) Telocto mikitini i pakayraan no tamdaw maˈaraway ita, ‘misaˈada ci Yihofaan, awaay ko taneng’ no tamdaw.—Taneng 21:30.

5. Mafanaˈay ci Yihofa wa ira ko tamdaw midemak to maanan hani? Paihkalay ko demak to maanan?

⁵ Kawra, mafanaˈay ci Yihofa wa ira ko micangacangay ato midokoay Cingranan a tamdaw, mahawpay ko fangcalay a kapah. (ˈOlic 103:17, 18; 110:3) Sano odoˈay ko pinengneng ni Yihofa cangranan! Ano o midokoay kiso to Kawas a kapah, o papafelien no Kawas kiso to adihayay ‘makapahay dafong’, hanaca wa matongal ko lipahak iso toniya makapahay dafong. (ˈOsien ko ˈOlic 103:5; Taneng 10:22) O mamilengo koniya lalakaw to sepat ‘makapahay dafong’, o kadofahay noˈadingoan a kakaenen, ngaˈayay a widang, ciepocay a patosokan, soˈlinay a pasalat.

6. (1) Misamaanay hano sasinanoten iso ko saali no niyah i noˈadingoan hani? (2) Samaanay ci Yihofa a misalo to saali iso i noˈadingoan?

⁶ Cowa ka hecad ko tamdaw ato ˈaˈadopen, iraay ko saali no tamdaw to noˈadingoan, mihaenay edengan ci Yihofa ko mamisalo toniya saali. (Matay 4:4) Ano mitengil kiso to Kawas, wa ngaˈay micalep ko kafanaˈ to demak, halo milifok to taneng ato lipahak. Sanay ci Yis: ‘O mafanaˈay to cangoˈotay ko noˈadingoan i, o malemeday.’ (Matay 5:3) Pakaynian ni Yihofa i Fangcalay Cudad ato sapafelian no ‘madimadiay citanengay a koli’ to kadofahay a noˈadingoan a kakaenen, ho ngaˈay masaloen kiso i noˈadingoan. (Matay 24:45) Oniya noˈadingoan a kakaenen adihayay masasiroma, hanaca kadofahay!​—Isaya 65:13, 14.

7. Ano komaen kiso to noˈadingoan a kakaenen, wa milifok to samaanay a epoc?

⁷ Ano komaen kiso to noˈadingoan a kakaenen, mamilifok to taneng ato sapisimsim a inaneng, oniya capeling wa midipot kisowanan. (ˈOsien ko Taneng 2:10-14.) O taneng ato inaneng a misimsim wa padama kisowanan, cowa ko mamalipalaw no misamangahay, tinakoen, cowa ko papasoˈlin to “awaay ko Misangaˈay a Tapang”, anca milifok to adihayay a payci ato dafong ngaˈ ira ko hemek, sanay a mararaway kimad. O taneng ato inaneng a misimsim, wa ngaˈayho padama kisowanan mihapinang to samaanay a coos, o mararaway, ato samaan mifalah toniya coos no ponoˈ. Mihaenay padotoc kiso mikilim to taneng no Kawas, palahaden ko inaneng a misimsim, halo misakareteng toniya capeling. Ano ira ko hatiniay a kalimlaan capeling iso, mamahapinang to hakowaay ko olah no Kawas kisowanan, nanay pafeli tisowanan  to sangaˈayay a dafong.—ˈOlic 34:8; Isaya 48:17, 18.

8. Misamaanay hano miingid kita to Kawas nohatini? Wa ira ko maanan a sadama tisowanan hani?

⁸ Cato ka halafin, hekal ni Satan mamaperar, edeng ci Yihofa ko mamidipot kiaanan. Mihaen i, edeng tadiˈecen ko Kawas ci Yihofa, aira ko kakaenen to romiˈamiˈad. (Hapakuk 3:2, 12-19) Mansa, miingid to Wama i kakarayan anini, wa ngaˈay matongal ko pakasoˈlin i Cingraan. (2 Pitiro 2:9) Ano mihaen ko demak ita i, misiˈayaw kiso to maamaan a pasangaray, wa ira ko mahecaday ni Tafiti a harateng: “Mararid a mahapinang ako ko nika ira no Tapang i kaˈayaw ako, ira Cingra i tatihi ako saka, caay ka ngiyangi kako.”—ˈOlic 16:8.

9. (1) Pakayni Yohani 6:44 sinael wa misamaan ko demak ni Yihofa hani? (2) Ano malitemoh iso ko cecay Misawacayay Tamdaw ni Yihofa anca cowa pidoko to Kawas a tamdaw, o maanan ko kasasiromaan hani?

⁹ Haratengen hena, malitemoh iso ko cowa pidoko to Kawas a kafahalan a tamdaw, hakowaay ko kafanaˈ iso cingraanan? Edengan mafanaˈ kiso to ngangan ato pising ningra. Kawra, isalakat malitemoh iso ko cecay Misawacayay Tamdaw ni Yihofa, mafanaˈto kiso o maolahay to Kawas cingra, roma i, samanen manengnengay no Kawas ko makapahay a pinangan ningra, ho micada cingraanan malo paro no lomaˈ no Kawas. (ˈOsien ko Yohani 6:44.) Mihaen, soˈlin cowa ka hecad ko kalomahadan, finacadan, ato kitakit, hato o mala widangayto kamo.

10, 11. O maanan ko kahecadan no finawlan ni Yihofa? O hatiniay a demak pafeliay kitaanan to samaanay a sapalemed?

¹⁰ Ano malitemoh iso ko roma midokoay to Kawas a tamdaw i, wa kahnay mahapinangto mahecaday o somowalay kamo to ‘makoracay a sowal’. (Cifaniya 3:9) Mafanaˈay kamo to maka mitiˈeray to Kawas, midofdof to mahecaday palinian no waywayan, mahecaday ko hatokel no ikor. Saka cipinangaw kiso to cecay tamdaw, mafanaˈ toniya demak ngaˈ, mihaen wa ngaˈayto ira ko pasoˈlin namo, hanaca patireng to halafinay a kalawidang.

¹¹ Ano midoko kiso ci Yihofaan wa ira ko  ˈalomanay ngaˈayay a widang, naitiniay icowacowa pala cangra, o roma cowaho ka soˈaraw iso! Edengan ko finawlan ni Yihofa, o cima ko mamalifok to hatiniay makapahay a sapalemed hani?

12. Wa ngaˈay kiso patireng to samaanay a patosokan i noˈadingoan?

¹² ˈOsien ko Patnakay 11:9—12:1. Misaˈicelay kiso milaheci to noˈadingoan a patosokan han? Alatek misaˈicelay kiso miˈosi to Fangcalay Cudad to romiˈamiˈad, anca misalof to pipaihkal ato sapasifanaˈ a inaneng. Ano o mananto ko patosokan iso, ano maˈaraw iso ko ngaˈayay minaroˈan—anca pakahemek ko tao to nika cakat iso—samanay ko harateng iso hani? Maedeng masaloay, mahemekay kiso. Mahemek kiso samanen mitodongay kiso ci Yisan, misaˈicel isalakat a midofdof to araaw no Kawas.—ˈOlic 40:8; Taneng 27:11.

13. Midoko to Kawas hano mikikakaay to micangacangay to ngangan ato hafay hani?

¹³ Ano pasayra kiso i noˈadingoan a patosokan talaˈayaw, o mamasalo ko falocoˈ, samanen o nano demak iso, cowa ko mamalahorac. Sowal no tarokos ci Pawlo: ‘Katanektek a tomireng, kararid midemak to demak no Tapang, samanen mafanaˈay to cowa ko mamalahorac ko nano roray namo.’ (1 Korinto 15:58) Ano palalinien, micangacangay to ngangan ato hafay ko hakelong no ˈorip—hato malaˈosiay nengnengen—salikor awaay ko kapo. (Luka 9:25) Misawacayay ko milifetan no hongti ci Solomon tonini.—Loma 15:4.

14. Mikitini i nalifetan ni Solomon, mananamay ita ko maanan?

¹⁴ Ci Solomon cipayciay cifadangalay, na toor hananay ningra ko harateng no niyah a maˈorip, sanay pasowal to niyah: “Dada, lifeten a lipahak, karihaked a malemed.” (Patnakay 2:1-10) Patirengay cingra to lomaˈ ato makapahay a koying, haratengay sanay a midemak. Ikorto samaanay ko harateng ningra hani? Masaloay a lipahak cingra han? Paihkalay ci Solomon to harateng no niyah, sanay ko sowal: “Nikawrira, harateng sa kako a minengneng to nilahecian ato nikarorayan ako a matayal i, mahapinangto ako ko nika o horac konini a maemin, matiya o mirepetay to fali, awaay ko epoc to polong no demak i hekal.” (Patnakay 2:11) Mikitini i nalifetan ni Solomon adihayay ko mananamay ita, ngaˈay sarocoden a misimsim.

15. (1) Hano misaali kiso to pakasoˈlinay falocoˈ? (2) Pakayni ˈOlic 32:8, palahad to pakasoˈlinay falocoˈ iraay ko maanan a epoc hani?

¹⁵ Cowa ka ciharateng ci Yihofa, madokaˈto ngaˈ mananam iso ko sapasifanaˈ, tokel Ningra tisowanan midofdof Cingranan, misaareteng to araaw Ningra, kawra ira ko pakasoˈlinay falocoˈ iso, ngaˈ maremo koniya demak. O kalimlaan a capeling ko pakasoˈlinay, hanaca cowa ko mamatoled ko pakasoˈlinay a tamdaw, caay ka tawal Ningra ko nano tayal namo ato ‘nipipatalahkal namo to olah i Cingraan.’ (Hipray 6:10) Mihaenay, saˈicelen a palahad ko tanektekay a pakasoˈlin, wa mahapinang iso, mafanaˈay ko kakarayan Wama to o maanan ko sangaˈayay tisowanan.—ˈOsien ko ˈOlic 32:8.

16. Hano sasalimlaen ita ato matatodong ko pisaka dademak to pasalat?

¹⁶ Sowal ni Pawlo: ‘Icowaay ko fangcalay saocor ni Yihofa, iraay ko pasalat itira.’ (2 Korinto 3:17) Maolahay ci Yihofa to pasalat, o maolahay to pasalat ko pisangaˈ Ningra tisowanan. Kawra, tokel Ningra tisowanan matatodong ko pisaka dademak to pasalat, hongaˈay madipot ko niyah. Mafanaˈay kiso to roma a kapah, minengnengay cangra to kaackan a lalakaw, patelas madadiˈi to tao,  mirienang to katalawan a onto, haliepahay, miselip to etok. Toyanan mahemekay cangra, ikorto ka adayayan ko teloc nangra, madengaay no adada, mahiyanay no epah ato etok, anca mapatayay. (Kalatiya 6:7, 8) Mahapinangay, ora misowalan nangra a “psalat”, milipalaway to niyah, mikayatay to ka adayayan a teloc.—Titus 3:3.

17, 18. (1) Midofdof to Kawas hano ngaˈay pasalat ko tamdaw hani? (2) O pasalat ni Atam aci Ifa i Itin, hano mikikakaay to pasalat no mita hani?

¹⁷ Midofdof ci Yihofaan o saka ciepoc no mita, wa ngaˈay tanoktok ko tireng, ngaˈayho ira ko pasalat no mita. (ˈOlic 19:7-11) Cowa ka hatini aca, matatodong ko pisaka dademak iso to pasalat, mitoor to malefotay a sarikec ato safalod no Kawas a dademak, mihaen wa pakasoˈlin ko Kawas ato wama wina tisowanan, wa matongal ko sapafeli nangra a pasalat iso. O araaw no Kawas o papafeli to malefotay a pasalat i madimadiay a sikawdan Ningra, milengo ko Fangcalay Cudad to hatiniay a pasalat, ‘o ˈodingaray a pasalat no wawa no Kawas,’ sanay.—Loma 8:21.

¹⁸ Na milifokay ci Atam aci Ifa to hatiniay a pasalat. Itini cangra i Itin i, hakowaay ko limoˈot no Kawas cangranan hani? Cecayay, o heci no ceay kilang cowa ka ngaˈay kaenen. (Satapangan 2:9, 17) Pakidemay ko limoˈot no Kawas, o miroeroay cangraanan han? Cowa ka hatira! Haratengen, adihayay ko patirengan no tamdaw a saˈosi, pacieciayho to tao a midofdof, kawra cecayay aca ko salimoˈot ni Yihofa ci Ataman aci Ifaan!

19. Samaan ko pasifanaˈ ni Yihofa aci Yis kitaanan, ho ngaˈay milifok to pasalat?

¹⁹ Citanengay ko pakayraan ni Yihofa a pasifanaˈ to sikawdan Ningra, cowa ka pafeli Cingra to adihayay sarikec kitaanan, mihadidiay a pasifanaˈ kitaanan midofdof tono olah a sarikec. Tokel Ningra kitaanan mitoor to safalod Ningra a maˈorip, ˈinteh to tatiihay a demak. (Loma 12:9) Itini toniya demak, o Pasifanaˈ i Lotok ni Yis o mikiriwiˈay a tinakoan, oniya kimad mitadtaday to soˈlinay lalangian no tamdaw a midemak to tatiihay demak. (Matay 5:27, 28) Ano irato ko faelohay hekal, no Hongti Kitakit no Kawas a hongti ci Kristo, wa padotoc a pasifanaˈ kitaanan, padama kitaanan mahecad cingraanan ko pinengneng to moecelay ato mararaway a demak. (Hipray 1:9) Wa palefoten ni Kristo ko tireng ato falocoˈ no mita. Haratengen hena, cowato ko aira ko mararaway a harateng ita itiya, cowa ko mamafiyor no raraw a malotay. Saikor, wa milifok kita to mikiˈokan ni Yihofa kitaanan a ‘ˈodingaray a pasalat’.

20. (1) Samaanay ci Yihofa misaka dademak to pasalat? (2) Samaan kiso mitodong ci Yihofaan?

²⁰ Iraay ko tolas no pasalat ita, o mamicada to sakayat no maolahay to Kawas ato maolahay to tao a falocoˈ. Misaaliay ci Yihofa kitaanan mitodong Cingraanan, soˈlin awaay ko tolas no pasalat Ningra, kawra tano olahay ko pidemak, mahawpay ko pakayraan Ningra a micada kitaanan. (1 Yohani 4:7, 8) Mihaenay, o tatodongen ita ko olah no Kawas, mihaen ngaˈ ira ko soˈlinay a pasalat.

21. (1) Iraay ko samaanay a hrateng ni Tafiti ci Yihofaan hani? (2) Dotoc lalakaw wa milengo to maanan?

²¹ Miakoˈiday kiso ci Yihofaan pafeli to adihayay ‘makapahay dafong’ tisowanan, mahawp ko kadofahay noˈadingoan kakaenen, ngaˈayay widang, ciepocay a patosokan, malefotay a pasalat no ikor hokira? (ˈOlic 103:5) Ano miakoˈiday kiso to Kawas, wa mahecad ko harateng iso ci Tafitian, sanay ko sowal ningra: “O pahapinangay Kiso i takowanan to sakaciˈorip a lalan. Ano i kaˈayaw Iso kako i, tadalipahak kako, ano i tatihi Iso kako i, ira ko midaˈocay a sakalemed ako.” (ˈOlic 16:11) Dotoc lalakaw wa milengo to roma odoˈ noˈadingoan i ˈOlic saka 16 fedengan, wa padama konini matongal ko kacipinang ita to sasamaan masalo a marenec ko kaˈorip.