1, 2. Pakayni i lakoing, iraay ko maanan cowa ka hecad a sowal no tamdaw hani?

ITINI i Koriya Soel, miliyas ko taypiyaw no roma kitakit i pitaykayan i, itiraay a salikaka masaˈopoay pasayra i cangranan mikawih a pasowal: “Masasoˈaraw i Lakoing!” Tada kasemeranto! Kawra, o maanan kora misowalan nangra a “Lakoing”?

² Pakayni i “Lakoing”, cowa ka hecahecad ko sowal no tamdaw. O miharatengan aca ko “Lakoing” sanay ko tamdaw. O roma i, ano lipahak ko kaˈorip i, sahtoay o lakoing sanay. Pakayni i tada macahiway a tamdaw, komaen to kaesoˈay a kakaenen, mahecaday i lakoing sanay. Isaka 19 hahekalan, o cecay miliwkoay, maˈaraway ko adihayay a hana i fideloan no Padaka, masemeray a pasowal: “Watah! O lakoingto konini!” Ano kiso i, o maanan ko “Lakoing” hani? Makalimay kiso maˈorip i Lakoing han?

3. Salakat milengo ko Fangcalay Cudad to lakoing, samaanay ko sowal hani?

³ Masowalay no Fangcalay Cudad, na iraay ko Lakoing i sera iti:yaho, somowalayho wa miliyaw ira ko Lakoing no ikor. Itini i Satapangan 2:8 milengoay to Lakoing, tinakoen o cecay Fangcalay Cudad no Tingsokiw * (no Padaka), sanay ko sowal: ‘O Tapang misangaˈay  to mahemekay a koing i kawali, mitelian koya misangaˈan Ningra a [Atam] i lalomaˈ.’ O Hipray sowal noniya sinael masowalay ko “koing no Itin”, o tatodong no “Itin”, o “Mahemekay” sanay. O makapahay a kitiraan ato iraay ko kadofahay a kakaenen, ngaˈayho misalama ko tamdaw to ˈaˈadopen, tada kahemekanto koniya pala.—Satapangan 1:29-31.

4. Hano o Lakoing ko Itin hani?

⁴ No Hipray sowal a “koing”, mihongyak ko Krisiya, o “paratisos” (pa·raʹdei·sos). Itini cecay kakak cudad *, mitadtad to tatodong no “paratisos”: “Pakayni miliwkoay no Krisiya, miharateng cangra o kakahaday a koing konini, i lalomaˈ no koing cowa ko aira ko midokaˈay. Adihayay ko ˈakawangay a kilang, o roma kilang paloma i lawac no tingalaway a ˈalo, adihayay ko heci no kilang. I lawac no ˈalo, masaˈopoay ko ngafol ato lopayˈay siri.”—Nengnengen ko Satapangan 2:15, 16.

5, 6. (1) Misamaanay hano malahdaw no tamdaw ko Lakoing? (2) O roma tamdaw iraay ko maanan salicay alatek?

⁵ Paˈoripen no Kawas ci Atam aci Ifa i Lakoing, kawra cowa pidoedo cangra to Kawas, telocto milaplapan cangra nai Lakoing. Ikor, ci Atam aci Ifa ato teloteloc nangra malahdawayto ko Lakoing. (Satapangan 3:23, 24) Soˈliˈlin, awato ko tamdaw i Lakoing, kawra tangasa i romiˈad ni Nowa a Lenlen, itiyaayto a malahdaw ko Lakoing.

⁶ Alatek sanay ko harateng no roma tamdaw: ‘Wa ira ko Lakoing i sera a noikoran han?’ Pakayni toninian, mafanaˈ kita to maanan? Ano mitokel kiso malacafay to salawina ato widang maˈorip i Lakoing, iraay ko maanan a wacay paihkal to wa malaˈosi koniya hatokel hokira? Wa samaan kiso mitadtad to mamalaˈosi ko Lakoing i sera han?

7, 8. (1) Mikiˈokay ko Kawas ci Aprahaman to maanan? (2) Pakayni sakiˈok no Kawas, o maanan ko maharatengay ni Apraham hani?

⁷ Ano sakafanaˈaw to caˈof noniya salicay, ngaˈay kiso micekiw to Fangcalay Cudad, samanen patemeray ko Kawas to tamdaw, mitilid to misangaˈay to Lakoing a maamaan. Mikiˈokan no Kawas ko widang Ningra ci Apraham, o teloteloc ningra wa matongal, hato “tafok i riyar” ko adihay, sanayho pasowal: “Polong no kasakitakit a milongoc to pipalemed Ako cangraan, matiya o pipalemed Ako to teloc iso. Nawhani, midoedo kiso to limoˈot Ako.” (Satapangan 22:17, 18) Ikor, miliyawayho ko Kawas toniya sakiˈok i wawa ato fofo ni Apraham.—ˈOsien ko Satapangan 26:4; 28:14.

⁸ Itini i Fangcalay Cudad mahapinangay ita to, cowa piharateng ci Apraham to aitini kakarayan ko tamdaw milifok to sapalemed no Kawas, mansa masowal no Kawas ko “polong no kasakitakit” i, edengan itiniay i sera sanay ko piharateng ni Apraham. Oniya sakiˈok ano mikitiniay i Kawas, oha papafelien Ningra ko “polong no kasakitakit” to makapahay a kitiraan. Ikor, o roma sikawdan no Kawas mitilidan a sowal, paihkalay to mahecaday a harateng han?

9, 10. Iraayho ko maanan a wacay, ngaˈay kita pakasoˈlin to wa miliyaw ira ko Lakoing i sera hani?

⁹ Pairasolay ko fofo ni Apraham ci Tafiti, wa malaˈafo ko “tatiihay a tamdaw” ato “tatiihay ko demak a tamdaw”, itiya ‘awaayto ko mariˈangay a tamdaw’. (ˈOlic 37:1, 2, 10) Kawra, “o poeneray ko falocoˈ a tamdaw i, marihaday ko aroˈ nangra tonini a sera, o rarihaday cangra a malemed ko ˈorip.” Mapatemeray no fangcalay saocor ci Tafiti, sanay cingra: “O cacisera ko moecelay a tamdaw, o rarihaday ko kasarayray nangra maroˈ tonini a sera [tahadaˈoc].” (ˈOlic 37:11, 29; 2 Samuil 23:2) Oniya sakiˈok samaanay milingat to midofdofay  to araaw no Kawas a tamdaw hani? Pakasoˈlinay cangra to, sahtoay o moecelay a tamdaw ko itiniay i sera noikor, oniya cikiw papatikol mahecad o Itinay a lakoing.

¹⁰ Ikor, misafelitay ci Yihofaan ko Israil tamdaw, cowato pidama to matatodongay a pihakelongan. Mansa, pakiyadi sa ko Kawas to Papilon miˈodis ato palaˈafo to finawlan Ningra, miholiw tayra i Papilon. (2 Rayray 36:15-21; Yirimiya 4:22-27) Kawra, paˈayaway ko pairasolay no Kawas, ikor no 70 miheca, o finawlan Ningra wa patikol i nalacolan, oniya sapairasol malaˈosiay maemin. Milingatay kitaanan koniya sapairasol. Dotoc wa minengneng kita to pina a sapairasol, sinanoten iraay ko maanan kalaliting to lakoing i sera noikor.

11. O maanan no Isaya 11:6-9 ko malaˈosiayto hani? Iraayho ko maanan a salicay to papacaˈofen hani?

¹¹ ˈOsien ko Isaya 11:6-9. Pakaynian no Kawas ci Isayaan a paliˈayaw, ano patikol i nalacolan ko finawlan Ningra cowa ko mamisiˈayaw to katalawan a pakayraan, cowa ko cacalemcem to maˈodis no ˈaˈadopen ato mariˈangay a tamdaw, wa rihaday maemin cangra. O hatiniay a kitiraan coko mahecaday o Itin han? (Isaya 51:3) Masowalayho no sapairasol ni Isaya “o mamatiya o nika kakahad no riyar ko nika tenak no fanaˈ no tamdamdaw to pakayniay i [Yihofa] itini i polong no hekal,” mihaenay o hatiniay a pakayraan, cowa ko itini aca i Israil tamdaw. Wa hacowa a malaˈosi koniya sapairasol hani?

12. (1) Malifokay no patikolay i nalacolan a Israil tamdaw ko maanan a lemed hani? (2) Hano mafanaˈ kita wa miliyawho a malaˈosi ko sapairasol ni Isaya 35:5-10 hani?

¹² ˈOsien ko Isaya 35:5-10. Miliyaway ci Isaya pasowal to patikolay i nalacolan a Israil tamdaw, hamaan matalaw to ˈaˈadopen ato mariˈangay a tamdaw. Roma i, samanen kadofahay to nanom, wa kadofah ko mipanayan, mahecaday o Itin. (Satapangan 2:10-14; Yirimiya 31:12) Malaheciayto a malaˈosi ko sapairasol han? Cowaho, samanen cowa ka pidemak ko Kawas to kafahkaˈan a miadah to adada no Israil tamdaw itiya, tinakoen, cowa pakaˈaraw ko mapohaway. Mihaenay, ano ikor wa malaˈosi ko Kawas toniya sapairasol ato adahen Ningra ko adada no tamdaw.

13, 14. O maanan no Isaya 65:21-23 ko malaˈosiayto i Yutaya tamdaw hani? Iraayho ko maanan a sapairasol cowaho ka laˈosi hani? (Nengnengen ko satapangan coka.)

¹³ ˈOsien ko Isaya 65:21-23. Patikol ko Yutaya tamdaw i nalacolan, cowa ka tangsol a maroˈ i sinowayay a lomaˈ, awaay ko ngaˈayay lidongen a omah ato fadisoˈsoˈ. Kawra o sapalemed no Kawas, wa ngaˈay ko pakayraan. Ano o Yutaya tamdaw ngaˈay maˈorip i patirengan no niyah a lomaˈ, ngaˈay paloma to pinaloma milifok to ˈaredetay kakaenen, maedeng o mamasalo ko falocoˈ nangra.

¹⁴ Haratengen ko cecay kalimlaan no sapairasol. O ˈorip ita wa mahecad ko “kakayaˈ no ˈorip no kilang”. O roma kilang pina:ay patek ko ˈorip, ano hahatira ko ˈorip no tamdaw, wa tanoktok ko tireng wangaˈ. Mihaenay ano ngaˈay maˈorip i pairasolan ni Isaya a pala, mahecaday i lakoing. Cowa ko sowal aca, samanen wa malaˈosi ko sapairasol ni Isaya.

15. Milengoay ko Isaya to maanan noikoran a lemed hani?

¹⁵ I sawni milengoan a sapairasol ato lakoing no ikor, iraay ko maanan kalaliting hani? Mahapinangay ita, wa milifok ko polong a tamdaw to sapalemd no Kawas noikor. Cowato ko mamatalaw to ˈaˈadopen ato mariˈangay tamdaw. O mapohaway, madoˈengay ato cisamoˈay wa maadahayto. O tamdaw papatireng to niyah a lomaˈ, komaen to cihaleday a kakaenen. Ano o ˈorip i, wa ikaka ko halafin to kilang. Paihkalay ko adihayay a sinael, oniya makapahay a hatokel mangataayto malaˈosi. Nikawrira, harateng no roma tamdaw pakidemay ko pitadtad toniya sapairasol sanay, sasamaan ko hacaˈof iso hani? Hano pakasoˈlin kiso to mamiliyaw ira ko lakoing  i sera hani? O kasapaan a tamdaw ci Yis wa pacaˈof toniya salicay.

16, 17. I masamaanay pakayraan a pasowal ci Yis to Lakoing?

¹⁶ Ci Yis cowa ka raraw, kawra misawkitan to ciraraway halo pakafitan i hecek a mipatay. Itiya, tatihi ningra iraay ko tatosa Yutaya a mararaway. ˈAyaw no mapatay, o cecay mihaiay to o hongti ci Yis, micangacang ci Yisan: ‘Yisaw, ano micada kiso to fadangalan no hongti i, nanay haratengen kako.’ (Luka 23:39-42) O sapacaˈof ni Yis matiliday i Luka 23:43, oniya kasasowal milingatay to hanoikor ita. O roma mikingkiway sanay mihongyak toniya sowal: “Soˈlinen ako a somowal kiso, anini a romiˈad malakapot kita i [Lakoing].” Masowal ni Yis ko “anini”, o maanan ko mitoroˈan hani? Cowa ka lecalecad ko pinengneng no mikingkiway.

¹⁷ Anini adihayay a sasowalen tano piyawtin(,) a pahapinang ko tamdaw to tatodong no sowal, kawra, nolitengan a Krisiya sowal mitilidan, awaay ko piyawtin ilalomaˈ no lalakaw. Mihaenay, o sowal ni Yis, “soˈlinen ako a somowal kiso, anini a romiˈad malakapot kita i Lakoing”, sanayha, anca “soˈlinen ako a somowal kiso anini a romiˈad, malakapot kita i Lakoing”, sanay hokira? Alatek toor hananay no mihongyakay ko kacipinang no niyah a mitongal to piyawtin, mihapinang to sowal ni Yis. Mihaenay, o roma mihongyakan a Fangcalay Cudad, oniya tosa pihongyak marariday masadak.

18, 19. O pasowalan ni Yis toya mararaway a sowal, samaanen mihongyak ngaˈ, o matatodongay hani? Misamaanay hano mihaen?

¹⁸ ˈAyaw no kinafalah ci Yis to ˈorip, na pasowalay to nisawawaan, o wawa no tamdaw “tolo a romiˈad, tolo a dadaya i lalomaˈ no sera.” Sanayho ko sowal ningra: “O mamapatorod i tamdaw kako. O papatayen nangra kako. Nikawrira, saka tolo a romiˈad i, o lalomowad kako a maˈorip nai patay.” (Matay 12:40; 16:21; 17:22, 23; Marko 10:34) Ikorto, misawacayay ci Pitiro toniya demak. (Dmak 10:39, 40) Mihaenay, tiya patayen ci Yis atoya mararaway tamdaw a romiˈad, cowa ka tayra i Lakoing. Ci Yis itiniay “i kaitiraan no mapatayay”, to pina romiˈad, ikor patikolen no Kawas a paˈorip cingra.—Dmak 2:31, 32. *

¹⁹ Mihaenay, oya sowal ni Yis toya mararaway hahaenen a mihongyak: “Soˈlinen ako pasowal kiso anini.” O hatiniay a somowal marariday maˈaraw i lintad ni Mosi, tinakoen o sowal ni Mosi: “Pakifalocoˈen ko nisowalan ako i tamowanan anini a limoˈot.”—Limoˈot 6:6; 7:11; 8:1, 19; 30:15.

20. Iraayho ko maanan a wacay paihkal to sowal ni Yis i, “soˈlinen ako pasowal kiso anini” hani?

²⁰ Pakayni nano sowal ni Yis toya mararaway, o cecay naitiraay i pala no kaˈoripan ni Yis a mihongyakay, sanay ko sowal: “O kalimlaan noniya sowal o ‘anini’ sanay, mansa o sowal ni Yis: ‘Soˈlinen ako pasowal kiso anini, wa kalacafay kiso takowanan i Lakoing.’ O mikiˈokan ni Yis itiya, mamalaˈosi konini noikor. O hatiniay a pakayraan a somowal, o nanaman no kakawalian a tamdaw, sapaihkalaw to o mikiˈokan no tamdaw anini, wa malaˈosi i cecay romiˈad.” O cecay iˈayaw no 1,600 miheca no Siriya a Fangcalay Cudad, mihaenay a mihongyak: “Amin, pasowalen ako kiso anini, wa kalacafay kiso takowanan i Itin.” Mikitini i sowal ni Yis wa ngaˈay micada kita to sapakalalok.

21. Iraay ko maanan a hatokel noya mipatayan a mararaway tamdaw hani? Misamaanay hani?

²¹ Cowa ka fanaˈ koya papatayen a mararaway to makakiˈokay ci Yis to madimadiay a tarokos, patayra cangraanan i kakarayan  a Hongti Kitakit. (Luka 22:29) Roma i, oya mararaway tamdaw cowa ka picada to inoˈ. (Yohani 3:3-6, 12) Mihaenay, o misowalan ni Yis toya mararaway, o itiniay i sera a lakoing. Ikor no pina poloˈ miheca, masowalay no tarokos ci Pawlo ko cecay mapolosi, iraay ko cecay tamdaw “mapatayra i [lakoing]”. (2 Korinto 12:1-4) Ci Pawlo ato roma madimadiay a tarokos, mipiliˈan to mamalacafay ci Yisan mala hongti i kakarayan, o tokel nangra cowa ka lecad toya mararaway tamdaw, kawra masowalay ni Pawlo i sinael to aira ko “lakoing” noikor. * Itiniay i sera koni a lakoing han? Wa itira kiso han?

22, 23. Mitokelay kiso to maanan hani?

²² Haratengen hena, masowalay ni Tafiti “o cacisera ko moecelay a tamdaw.” (ˈOlic 37:29; 2 Pitiro 3:13) O misowalan ni Tafiti o noikoran a romiˈad, wa mitoor ko tamdamdaw to moecelay a palinian no Kawas maˈorip i sera. (ˈOlic 104:5) Paˈayaway ko Isaya 65:22: “O mamatiya o nika kakayaˈ no ˈorip no kilang ko nika kakayaˈ no ˈorip no finawlan Ako.” Paihkalay konini to hahalafin ko ˈorip no tamdaw. Wa ira ko makapahay no ikoran iso han? Hatirato, samanen o sowal i Paˈarawan 21:1-4 sanay, o dadimokosen no Kawas ko finawlan Ningra, palemed cangraanan, o cecay a lemed wa itini moecelay faelohay hekal “caayto ko mamapatay,” sanay.

²³ Malahdaway ni Atam aci Ifa ko Lakoing, kawra iraayho ko tokel ita maˈorip itira. Cipinang kita to o maanan ko tokel noikor, mikiˈokay ko Kawas to papalemed to polong a tamdaw, patemeran Ningra ci Tafiti paˈayaw to mamilifok to sera ko misapoeneray ato moecelay tamdaw, tahadaˈoc maroˈ i sera. Pakaynianho no Kawas ci Isayaan paˈaraw kitaanan to makapahay hanoikor, milongoc kita to saka laˈosiaw no hatokel. Hacowa a malaˈosi hani? Itiya kalaˈosian no sakiˈok ni Yis toya mararaway a romiˈad. Wa ngaˈay kiso maˈorip i Lakoing! Itiya, oya sowal no salikaka: “Masasoˈaraw i Lakoing” wa soˈlinto a malaˈosi!