ˈO Moecelay Tamdaw, Pakayniay ci Yihofaan a Lipahak’
80 ko mihecaan ni Tayanna, dadotoc sanay mapatay ko faˈinay ato tatosa faˈinayan a wawa. ˈAyaw no mapatay ko faˈinay ningra, misemsemay to Acehaymocen a adada, pinaay miheca i piniwingan. Cowa ko pihadidi aca ni Tayanna to kapatay no salawina, miremoayho to ekang no coco. Nikawrira, ano maˈaraw no salikaka ci Tayanna i kasaˈopoan ato pitosilan i, kamayan a lipahak cingra.
Ci Yohani milisoˈ to kasakopang mataˈlifay ko 43 a miheca, maolahay ci Yohani toniya tayal, misarocoday cingra midemak toniya tayal! Ikor pakayni pidipot to paro no lomaˈ i, tomerepay cingra to milisoˈay to kasakopang a tayal, itira sanay i kasakopang a padama to salikaka. Kawra ano malitemoh no mafanaˈay ci Yohanian a salikaka i kasakilac anca kasapala a taykay i, ci Yohani cowa ka falic, kamayan a mahemek cingra.
Hano kamayanay ci Tayanna aci Yohani a mahemek hani? O mapadesay a tamdaw ato malahdaw ko kalimlaan a tayal a tamdaw, hano cowa ka lahdaw ko hemek nangra hani? Pasowalay ko Fangcalay Cudad kitaanan to kalimlaan a lalangian: ‘O moecelay tamdaw, pakayniay ci Yihofaan a lipahak.’ (ˈOlic 64:10) Ano saka cipinangaw toniya kalimlaan a kimad i, salakat folfolen ita o maan ko lalangian no tamdaw milifok to soˈlin a lipahak.
CECAY A LIYAD KO HEMEK
O roma a demak papakahemek to tamdaw. Tinakoen, o makakaolahay a faˈinayan ato fafahiyan misaˈosiay mararamod, anca malo wama wina, hanaca macada ko kalimlaan a tayal no Kawas. Soˈlin oniya demak pakahemekay to tamdaw, samanen, o kahemekan a demak sahtoay o sapafeli ni Yihofa. Patirengay ci Yihofa to raramod, ngaˈay ciwawa ko tamdaw, pafelian ko tamdaw malacafay to Kawas mitayal i likakawa Ningra.—Satapangan 2:18, 22; ˈOlic 127:3; 1 Timoti 3:1.
Nikawrira, oniya pakahemekay a demak alatek cecay aca a liyad. Tinakoen, mapatayay ko raramod anca maˈodangay. (Icikil 24:18; Hosiya 3:1) Micoliay ko wawa to malitengay, manaˈay midoko to Kawas, mangalef mafalahay no kasakopang. O wawa ni Samuil cowa ka tano mihaydaan ni Yihofa a pakayraan mihodop ci Yihofaan, o raraw ni Tafiti pairaay to pades i paro no lomaˈ. (1 Samuil 8:1-3; 2 Samuil 12:11) Oniya demak miˈafasay to lipahak no tamdaw, pairaay to mararomay ato adada no falocoˈ.
Mahecaday, o roma a finawlan no Kawas alatek tatiihay ko tireng, ˈinorong no paro no lomaˈ, anca mafalic ko tayal i likakawa no Kawas. Oya tahalifaay to kafalic a tamdaw, maˈilolay cangra to lipahak no iˈayaway a tayal.
Mahapinangay ita, o lipahak no roma demak cowa ka halafin. Ano hatiraay i, o maanan ko papaira to tahaceremay a lipahak no tamdaw hani? Itini tatiihay a pakayraan, o maanan ko papadama to tamdaw padotoc a lipahak hani? O milifetan ni Samuil aci Tafiti ato roma tamdaw paihkalay, itini tatiihay a pakayraan wa ngaˈay padotoc a lipahak.
TAHACEREMAY A LIPAHAK
Mafanaˈay ci Yis o maanan ko papaira to soˈlinay a lipahak. ˈAyaw no tayni i hekal cingra, “mararid i kaˈayaw [ni Yihofa] a lipahak.” (Taneng 8:30) Kawra, itini i sera ci Yis misiˈayaway to pakidemay a sapalifet. Soˈlin hatira, kamayan cingra pakayni pidofdof to araaw no kakarayan Wama a lipahak. (Yohani 4:34) Sowal no Fangcalay Cudad, tiya karorayan ni Yis iˈayaw no mapatay, ‘pakayni sakalipahak i ˈaˈayaw . . . hadidi han ningra ko nika pacek ningra i hecek.’ (Hipray 12:2) Hano ngaˈay ci Yis padotoc a lipahak hani? Sinanoten ita ko tosa nano sowal ni Yis.
Kinacecayay, maharek no 70 nisawawaan ko mitosilay ˈinorong tayraay ci Yisan, pakayni ka ngaˈay nangra midemak to kafahkaˈan, milaplap to palafoay, tada lipahakay. Kawra hananay ni Yis a pasowal cangra: “Nikawrira, ano mihakelokelong ko palafoay to sowal namo i, aka ka lipahak kamo tonini. Deng o nika tilid no ngangan namo i kakarayan ko kakalipahaken namo,” sanay. (Luka 10:1-9, 17, 20) Hatiraayto, milifok to pihayda ni Yihofa ikakaay ko kalimlaan to cecay ˈinorong. Maharatengay ni Yihofa ko madimadiay a sikawdan Ningra, mafanaˈ tonini pairaay to lipahak no mita.
Roma toki, pasayra ci Yis i ˈalomanay pasowal i, somowalay ko cecay Yutaya fafahiyan to lipahakay ko wina ni Yis, samanen i mikiriwiˈay a singsi ko wawa ningra. Misalofan ni Yis koya fafahiyan: “Caay, ora mitengilay midoedoay to sowal no Kawas ko malemeday,” sanay. (Luka 11:) Manaokaniw mahemekay ko malitengay to kalaˈosi no wawa, kawra midofdof ato miingid ci Yihofaan mikakaay ko lipahak no tamdaw. 27, 28
Mahapinangay, o tamdaw ano sapadotocaw a lipahak ko falocoˈ, itiniay i kafanaˈ to mihaydaan ni Yihofa ko niyah. Soˈlin tahacada to sapalifet cowa ko kahemekan a demak, kawra cowa ko mamiˈafas ko sapalifet to lipahakay a falocoˈ no tamdaw. Ano mitafo ko tamdaw to madimadiay, eca ka ngiyangi, wa matomes ko lipahak no falocoˈ. (Loma 5:3-5) Cowa konini aca, pafelienho ni Yihofa ko mitiˈeray Cingranan a tamdaw to fangcalay saocor, o minaroˈan no fangcalay saocor ko lipahak. (Kalatiya 5:22) Mansa mihaen ko sowal i ˈOlic 64:10: ‘O moecelay tamdaw, pakayniay ci Yihofaan a lipahak.’
Hano ngaˈay a lipahak ko falocoˈ ni Yohani hani?
Mafanaˈayto kita to lalangian, hano padotoc mahemek ci Tayanna aci Yohani! Mahapinangay ni Tayanna to misalimlaan no Kawas cingra, sowal ningra: “O pikiˈadingan ako ci Yihofa, miingid Cingraanan hato wawa miingid to wama wina. Iraay ko sapafeli ni Yihofa a raheker takowanan, mansa marariday kako matawa a mitosil.” Mahererek ko milisoˈay a tayal ni Yohani, kamayan tawlik cingra mirienang to mitosilay a tayal, ano licayen cingra, o maanan ko padamaay cingraanan ˈifowa to tayal no Kawas, caˈof ningra: “1998 miheca, manilnilay kako malo singsi no MTS, itiya, songilaˈay kako micekiw to Fangcalay Cudad, mihaenay padama takowanan ato fafahi ako misalof to harateng padotoc a tawlik ko harateng. Ano icowaay ko tayal niyam, ˈifowaay matayal saki Yihofaan mihaen ko demak rahekeray ko falocoˈ.”
Tahatanamay ko ˈalomanay tamdaw to soˈlinay ko sowal i ˈOlic 64:10. Tinakoen, o cecay mararamoday 30 miheca matayal i Pitil no Padaka, ikor manilnilay cangra malo mikiriwiˈay misakafahay. Sanay ko sowal nangra: “Ano malahdaw ko kaolahan iso a dafong i, masomaday ko falocoˈ, kawra aka sasomad saan ko harateng.” Oniya mararamoday tahira i minilnilan a kilac, tangsolay mirienang to mitosilay a demak no kasakopang, sanay cangra: “Ihkalay ko saali niyam i satolon to Kawas. Teloc i, caka halafin malinah tayni, iraayto ko misatapangay misakafah i kasakopang, iraayho ko tatosa macakatay a pacekiwan to Fangcalay Cudad. Mahapinangay niyam palemeday ci Yihofa tamiyanan, ato mitengilay to satolon niyam, tada palipahakay koni tamiyanan.”
‘TAHADAˈOCAY A LIPAHAK’
Manaokaniw tahalifaay ko tamdaw to pades, padotoc a lipahak cowa ko madoloay. Kawra, pakaynian ni Yihofa i ˈOlic 64:10 a mikiˈok kitaanan, ano madimadi kita to Kawas, misawacay to “o moecelay tamdaw” ko niyah, soˈlin itini pasangaray a pakayraan wa ‘pakayni ci Yihofaan a lipahak’. Roma i, wa ngaˈayho mitokel kita, mitala to kaira no mikiˈokan ni Yihofa ‘faelohay kakarayan faelohay sera.’ Itiya, wa palahdawen no Kawas ko kihcod cowa ka lefot a demak, wa madipot ko finawlan Ningra, hanaca pakayni misangaˈan Ningra ‘tahadaˈoc a lipahak.’—Isaya 65:17, 18.
Haratengen hakowaay ko lipahak noikoran a kaˈorip! Wa malefot ko tireng iso, talifak to romiˈamiˈad. Ano samanayto ko kadokaˈ no falocoˈ i salakat, cowato ko mamaharateng ko hatiraay a roray. Mikiˈokay ko Fangcalay Cudad, “o mamatawalto ko iˈaya:way a demak a maemin.” Tiya patikolen ni Yis paˈorip koya 12 ko mihecaan a fafahiyan i, o wama wina ato taliyokay a tamdaw, “safahkaˈ sato cangra itiya.” (Marko 5:42) Ano malalitemoh ko pinaay soˈot emang a tamdaw toya patikolay maˈorip a salawina i, wa fahkaˈ a mahemek cangra! Itiya, polong maroˈay i cikiw a tamdaw sahtoay o misowalan no Fangcalay Cudad a “moecelay tamdaw,” hanaca wa tahadaˈoc cangra ‘pakayni ci Yihofaan a lipahak!’