1-2. Pakayni nalifetan ni Anhelite, o kahacecacecay tamdaw sasamaan ko hademak hani?

O WAMA wina iso ano o Misawacayay Tamdaw ni Yihofa i, haharatengen iso, ngaˈay ko kalalaˈed nangra aci Yihofa, o mamalo widang to ni Yihofa kiso han? Cowa ka hatira. Ano midokoto, ecato ka pidoko to Kawas ko wama wina, o mamisaˈicel kita ngaˈ mapalahad ko tangongolay kalawidang ci Yihofaan.

² O cecay faˈinayan salikaka ci Anhelite, o Misawacayay Tamdaw ni Yihofa ko paro no lomaˈ, kawra kaemangho cingra cowa ka piingid to Kawas kako sanay cingra miharateng. Sowal ningra: “Midoko kako to Kawas o sapalecadaw aca to paro no lomaˈ.” Kawra ikorto misaˈosiay ci Anhelite mipalak to toki micekiw, midotim to Fangcalay Cudad, halo miceriday a mitolon to Kawas. Samanay ko pilingat cingraanan hani? Sanay cingra: “Mahapinangay ako o niyah ko misaˈicel a mafanaˈ ci Yihofaan, ngaˈ mapalahad ko ngaˈayay kalalaˈed to kakarayan Wama.” O nalifetan ni Anhelite maharatengay ita ko tosa salicay: O kafanaˈ ci Yihofaan ato tangongol ko kafanaˈ Cingraanan, o maanan ko kasasiroma hani? Sasamaan kita ngaˈ tangongol ko kafanaˈ ci Yihofaan hani?

3. O kafanaˈ ci Yihofaan, ato tangongol ko kafanaˈ ci Yihofaan o maanan ko kasasiromaan hani?

³ Cecay tamdaw ano mafanaˈay to ngangan no Kawas, ato midemakan ato na misowalan no Kawas, o mafanaˈayto ci Yihofaan. Kawra ano sapicalepaw mafanaˈ ci Yihofaan i,  misaaliayho sapipalakaw to toki a cipinang to makapahay capeling ni Yihofa, mihaen kita i, wa palidlid sato a cipinang to hano mahaen ko sowal, ato demak Ningra, cipinangho kita to maolahay ko Kawas to harateng ita ato misaˈosian, waywayan. Ano mahapinangay ita to samanay ko pitokel ni Yihofa kitaanan i, tatangsolen ita a misaka dademak ngaˈ ngaˈay.

4. Simsimen ko tinakoan ni Mosi aci Tafiti, iraay ko maanan a sadama kitaanan hani?

⁴ Alatek malikafay ko tamdaw kitaanan midoko ci Yihofaan, misatapang to kita mirienang to saˈopo i, wa mangalef ko pisafelit nangra. Kawra ano mitiˈer kita to Kawas, cowa ko pakatoleden Ningra kita, wa tangongol ko kalalaˈed ita ato Kawas, malo ngaˈayay a widang i hakelong no kaˈorip. Wa soˈlin kita ngaˈay tangongol ko kafanaˈ ci Yihofaan han? Haratengen ko tinakoan ni Mosi aci Tafiti, cowa ko malefotay a tamdaw cangra, kawra tangongolay ko kafanaˈ nangra to Kawas. Samaanay cangra tangongol ko kafanaˈ ci Yihofaan hani? Mikitini taˈarawan nangra mamananam ita ko maanan? Nengnengen ko tinakoan nangra.

5. Mipiliˈay ci Mosi midemak to maanan hani?

⁵ Mipiliˈay ci Mosi midoko to Kawas. Maedeng 40 ko mihecaan ni Mosi, cowato ka ciharateng “mala wawa no fafahiyan a wawa no hongti no Icip,” hai sanay misawad to saaroˈan, mipiliˈ to finawlan no Kawas a micawmaˈ. (Hipray 11:24) Soˈlin ˈakawangay ko fadangalan ni Falaw i Icip, kala kawas hananay no tamdaw, kamayan misiˈayaw ci Mosi to katalawan, taraˈayaway a midama to mala koliay a Israil tamdaw i Icip. Tada kasemeran ko pakasoˈlinay falocoˈ ningra! Samanen mitadiˈecay ci Mosi ci Yihofaan, hakelong no kaˈorip ningra ngaˈayay mala widang ci Yihofaan.—Taneng 3:5.

6. Mikitini taˈarawan ni Mosi wa mananam ita ko maanan?

⁶ Mananamay ita ko maanan? Mahecad ci Mosian, kita maemin o mamisaˈosi to cecay sasaˈosien: Wa mipiliˈ kita midoko to Kawas ato macacawmaˈ to midokoay Cingraanan a tamdaw han? Pakayni pidoko to Kawas, alatek misaaliay kita to kakinafalah, anca oya cowa kafanaˈ ci Yihofaan a tamdaw mamisafelit kitaanan alatek. Kawra ano tadiˈecen ita ko kakarayan a Wama, wa padama Cingra kitaanan!

7-8. Padadotocay ci Mosi cipinang to maanan hani?

⁷ Padadotocay ci Mosi cipinang to capeling ni Yihofa padadotocayho a midofdof to araaw no Kawas. Tinakoen, tiya papilidongen no Kawas ci Mosi to Israil i, cangoˈotay ko pakasoˈlin ni Mosi, ecato pakadangar ko niyah sanay, caka kahi a micada. Siniˈadaay ko Kawas ci Mosian, mihadak to sapadama cingraanan. (Kasadakan 4:10-16) Mansa ngaˈay ci Mosi misaliyaliyaw milasil to sasawkit a lihaf ci Falawan. Ikor, mitefadan ni Yihofa ko Moetep a Pades i Icip, itini Kahngangay a Riyar palaˈafo ci Falawan ato sofitay ningra, mahapinangay ni Mosi tada taˈangayay ko ˈicel ni Yihofa.—Kasadakan 14:26-31; ˈOlic 136:15.

⁸ Pasadaken ni Mosi ko Israil tamdaw i Icip i, sangaliwngiw sanay, soˈlin mahaen, maˈaraway ni Mosi ko pihadidi ni Yihofa to finawlan no Niyah. (ˈOlic 78:40-43) Mahapinangayho ni Mosi tada misapoeneray to falocoˈ ci Yihofa, kinacecayay, maharek ci Yihofa mitengil to sowal ni Mosi i, mifalicay to harateng no Niyah.—Kasadakan 32:9-14.

9. Pakayni Hipray 11:27, hakowaay ko tangongol no kalawidang ni Mosi aci Yihofaan hani?

 ⁹ Ikor no miliyas to Icip i, matongalay ko piingid ni Mosi ci Yihofaan, hato maˈaraway to ningra ko Kawas. (ˈOsien ko Hipray 11:27.) Pakayni kalawidang ni Mosi aci Yihofaan, sanay ko sowal no Fangcalay Cudad: ‘Masasiˈayaway ci Yihofa aci Mosian a masasowal, malecad o kasasowal no tamdaw ato tamdaw.’—Kasadakan 33:11.

10. Saka tangongolaw no kafanaˈ ci Yihofaan, sasamaan ko hademak ita hani?

¹⁰ Mananamay ita ko maanan? Saka tangongolaw no kafanaˈ ci Yihofaan, cowa ko kacipinang aca ita to capeling Ningra. Anini, o araaw ni Yihofa i ‘ngaˈay malidong ko masakenaay a tamdaw, matatodong ko kafanaˈ to soˈlinay kimad.’ (1 Timoti 2:3, 4) Mihaenay, ano padama kita to tao mafanaˈ ci Yihofaan o midofdofay to araaw Ningra.

11. Ano padama kita to tao cipinang ci Yihofaan, hano mamatongal ko kafanaˈ no niyah ci Yihofaan hani?

¹¹ Ano padama kita to tao cipinang ci Yihofaan, tocerid matongalay ko kafanaˈ no niyah ci Yihofaan. Tinakoen, ano kayaten ni Yihofa kita makilim ko matatodongay ko waywayan a tamdaw i, ihkalay mahapinang ita tada siniˈadaay ci Yihofa to tamdaw. (Yohani 6:44; Dmak 13:48) Ano maˈaraw ita ko pacekiwan misawad to tatiihay nanaman a micaˈedong to faelohay capeling i, mahapinangay ita tada ciˈicelay ko Kimad no Kawas. (Kolosay 3:9, 10) Roma i, pakayni sapilidongaw to tamdaw, pafeliay ko Kawas to adihayay toki nangra a mafanaˈ Cingraanan, mahapinangay ita to iraay ko mihadidiay no Kawas.—Loma 10:13-15.

12. Mikitini Kasadakan 33:13, micangacangay ci Mosi to maanan a sapadama ni Yihofa hani? Misamaanay?

¹² Tada misalimlaay ci Mosi to kalalaˈed ci Yihofaan. Soˈlin minilnilan no Kawas cingra, adihayay ko malaˈosiay a demak, kawra sapitongalawho cingra to kafanaˈ to Kawas, mansa micangacangay cingra to sapadama ni Yihofa. (ˈOsien ko Kasadakan 33:13.) Itiya maedeng 80 ko mihecaan ni Mosi, kawra mafanaˈay cingra pakayni ciolahay a Wama i kakarayan, adihayayho ko nananamen no niyah.

13. Samaan paihkal to misaaretengay kita to kalawidang i Kawas hani?

¹³ Mananamay ita ko maanan? Ano hakowato ko halafin ita a midoko to Kawas, cowa ka ngaˈay misakahemaw to kalalaˈed no niyah i Cingraanan. Ano misaareteng kita to kalawidang i Kawas, wa micerid a mitolon Cingraanan.

14. O mitolonay hano ngaˈay padama kitaanan matongal ko kalawidang to Kawas hani?

¹⁴ O tanektekay a kalawidang kalimlaan ko ngaˈayay kasasowal, mihaenay sapiingidaw to Kawas, wa micerid kita a mitolon, mifowah to nafalocoˈan i Cingraanan. (Ifiso 6:18) O cecay itiniay i Tureki kitakit a fafahiyan salikaka ci Kelista, sanay ko sowal: “Ano mitolon kako a mifowah to nafalocoˈan i Kawas, maˈaraw to samanay Cingra a padama takowanan, matongalay ko olah ato pitadiˈec ako Cingraanan. Pacaˈofen no Kawas ko satolon ako, soˈlinayto o Wama ato widang sanay ko pinengneng ako ci Yihofaan.”

15. Somowalay ci Yihofa to masamaanay a tamdaw ci Tafiti hani?

¹⁵ Hofocen ci Tafiti i, o wama wina ato taliyokay ningra a tamdaw o midokoay ci  Yihofaan. Kawra cowa ko pikotod aca ni Tafiti to paro no lomaˈ a midoko to Kawas, misaˈicelay cingra patanektek to kalalaˈed ato Kawas, ano ci Yihofato mikiriwiˈay a maolah cingraanan, somowal to matatodongay i falocoˈ no Niyah cingra. (Dmak 13:22) Ci Tafiti hano ngaˈay ko kalalaˈed aci Yihofaan hani?

16. Mikitini misangaˈan no Kawas a maamaan mananamay ni Tafiti ko maanan hani?

¹⁶ Minanamay ci Tafiti to misangaˈan no Kawas a maamaan. Kaemangho ci Tafiti i, miceriday cingra i papotal midimokos to siri no wama, mikitiya mahapinangay ningra ko kihcod misangaˈan ni Yihofa. Tinakoen. Micaˈengaw ci Tafiti minengneng to kakarayan i, manengnengay ningra ko foˈifoˈis, hato manengnengayho ko makapahay capeling no Kawas. Matemeray ko falocoˈ ni Tafiti a pakahemek: “Pasowal ko kakarakarayan to nika tadamaan no Kawas. Mapalosiyang no tahaf no kakarayan ko nisangaˈan Ningra.” (ˈOlic 19:1, 2) Cipinangay ci Tafiti to kasapaan ko tireng no tamdaw, mahapinangay ko tadamaanay a taneng ni Yihofa. (ˈOlic 139:14) Minanam ci Tafiti to misangaˈan no Kawas a maamaan i, hato mimingayto ko niyah saan ko harateng ningra.

17. Minanam kita to kasapaan a misangaˈan no Kawas, wa ira ko maanan haepoc?

¹⁷ Mananamay ita ko maanan? Palaken ko toki a minanam ato cipinang to kasapaan a misangaˈan no Kawas, masemer to nano demak Ningra. Toromiˈamiˈad wa ngaˈay kiso minanam to masakenaay a pinaloma, pinaˈorip ato tamdaw, hapinangen wa ngaˈay kiso mikitini minanam to maanan a capeling ni Yihofa. Mihaen, wa matongal to romiˈamiˈad ko kafanaˈ iso to kakarayan a Wama, hanaca matongal ko kaolah Cingraanan.—Loma 1:20.

18. Pakayni ˈOlic 18 fedengan, mahapinangay ni Tafiti ko maanan?

¹⁸ Mahapinangay ni Tafiti padadotocay ci Yihofa a padama cingraanan. Tinakoen, sapidipotaw ci Tafiti to siri no wama, na mipatayay to layong ato tomay. Mafanaˈay cingra padamaay ci Yihofa, mansa ngaˈay mipatay to mariˈangay ˈaˈadopen. Tiya mapadik ni Tafiti ci Koliyat i, pakasoˈlinay to kalacafayan ni Yihofa cingra. (1 Samuil 17:37) Ikor no milaliw ci Tafiti to pipatay ni Sawlo i, miakoˈiday cingra to pidipot no Kawas cingraanan. (ˈOlic 18 fedengan a lalangian) O misatakalaway a tamdaw o papanokay to kasapaan i niyah alatek, kawra tada misapoeneray ko falocoˈ ni Tafiti, mahapinangay ningra to padadotocay ci Yihofa a padama cingraanan.—ˈOlic 138:6.

19. Mikitini taˈarawan ni Tafiti mananamay ita ko maanan?

¹⁹ Mananamay ita ko maanan? Tatodongen ita ci Tafiti, cowa ko pitolon aca micangacang to sadama ni Yihofa, wa misaˈicelho mihapinang to hacowaay ato tano maanan a pakayraan Cingra a padama kitaanan. Ano misapoener ko falocoˈ ita a mihai to citolasay ko ˈicel no niyah, wa ihkalto a mahapinang ko pipadama ni Yihofa to kacangoˈotan no mita, wa matongal ko kakelec no kalalaˈed ita Cingraanan. Ci Isake itiniay i Fici a kitakit, halafinayto cingra midoko ci Yihofaan, iraay ko hatiniay a kafanaˈ ningra, sanay ko sowal: “Mahapinangay ako misatapang minanam to Fangcalay Cudad tahanini, padadotocay ci Yihofa padama takowanan, mansa miingiday ci Yihofa takowanan saan ko harateng ako.”

20. Hano ngaˈayay ko kalalaˈed ni Tafiti aci Yihofaan hani?

²⁰ Mitodongay ci Tafiti to capeling ni Yihofa. Pafeliay ci Yihofa kitaanan to inaneng  a mitodong to taˈarawan Ningra. (Satapangan 1:26) Ano matongal ko kacipinang ita to kalimlaan a capeling Ningra, wa matongal ko kangaˈay a mitodong Cingraanan. Tangongolay ko kafanaˈ ni Tafiti to kakarayan a Wama, mansa mitodong ci Yihofaan a micada to tao. Nikawrira, na midemakay ci Tafiti to taˈangayay a raraw, maˈaˈodang ci Patsipaan ato pakapatay to faˈinay ningra. (2 Samuil 11:1-4, 15) Soˈlin maketeray ci Yihofa, kawraan misododan Ningra ci Tafiti, samanen ˈayaw nonini mitodongay ci Tafiti ci Yihofaan misodod to tao. Ngaˈayay ko kalalaˈed ni Tafiti ato Kawas, mansa kaolahen no Israil tamdaw, minengneng ci Yihofa ci Tafitian o ngaˈayay taˈarawan no roma hongti cingra.—1 Hongti 15:11; 2 Hongti 14:1-3.

21. Pakayni Ifiso 4:24 ato 5:1, ‘mitodong to Kawas’ wa paira to maanan haepoc hani?

²¹ Mananamay ita ko maanan? Oha ‘mamitodong to Kawas’ kita. Coko kaciepoc aca no mita, wa tangongol ko kafanaˈ to Kawas. Ano songilaˈen ita mitodong ko capeling no Kawas, wa misawacay to o wawa Ningra kita.—ˈOsien ko Ifiso 4:24; 5:1.

22-23. Ano mitodong kita to ciolahay a Wama i, wa ira ko maanan ngaˈayay minaroˈan hani?

²² Mikitini toni lalakaw mananamay ita, pakaynian ni Yihofa i masangaˈay a maamaan ato Fangcalay Cudad a padama kitaanan mafanaˈ Cingraanan. Miterekan Ningra i Fangcalay Cudad ko nalifetan ni Mosi aci Tafiti papinanam kitaanan. Pakayni sapadamaaw kitaanan tangongol ko kafanaˈ Cingraanan, adihayayto ko midemakan ni Yihofa, mihaenay o mamisaˈicel kita mitongal to kafanaˈ Cingraanan.

²³ Wa padadotoc kita mitongal to kafanaˈ to Kawas, (Patnakay 3:11) Kawra, o masaka limlaan i, cowa ko hakowaay ko pakayni Cingraanan a sifanaˈ, ao misaka dademakan ita koniya sifanaˈ. Ano songilaˈen ita misaka dademak halo mitodong to kakarayan a Wama, wa padadotoc Cingra miingid kitaanan. (Yakop 4:8) Pakaynian no Kawas i Fangcalay Cudad a mikiˈok, cowa ko mamisawad Cingra to misaˈicelay mafanaˈ Cingraanan a tamdaw.