1. Samanay ko pinengneng no tamdaw to tayal hani?

ITINI niyaroˈ iso, samanay ko pinengneng no tamdaw to tayal hani? Itini adihayay kitakit, koˈdaway ko katayalan a toki no tamdaw, marotayay a matayal. Samanen ˈifowaay, mansa awaay ko toki no tamdaw pahanhan, kalacafay to paro no lomaˈ, awaay ko toki a mafanaˈ to Kawas. (Patnakay 2:23) O roma tamdaw mikilimay to lalangian caka kahi matayal.—Taneng 26:13, 14.

2-3. Pakayni i tayal, ci Yihofa aci Yis patirengay to maanan a taˈarawan hani?

² Pakinaliay ko pinengneng no hekal tamdaw to tayal, samanay ko pinengneng ni Yihofa aci Yis hani? O sowal ni Yis: ‘Padadotocay ko Wama ako a matayal tahanini, ano kakoto padadotocay a matayal.’ (Yohani 5:17) Misangaˈan ni Yihofa ko masawalwalay a coyoh, kakahaday a dohaw, misangaˈayho to kasapaan a maamaan i cikiw, mansa mihaen ko sowal no mitiliday to ˈOlic: ‘Yihofaaw, tada kadofahay ko misangaˈan Iso! Oniya kihcod sahtoay tano tanengan Iso a misangaˈ. O misangaˈan Iso a maamaan miedefay toniya sera.’—ˈOlic 104:24.

³ Ci Yis malecaday to Wama maolah matayal. Mitaypiyaway cingra to taneng, tiya patireng ko Kawas to kakarayan i, i tihiay no Kawas a ‘ngaˈayay sayho’ cingra. (Taneng 8:27-31) Ikor tayni ci Yis i fafekang no sera i, midemakay to ciepocay a demak. Midemak to tayal no Kawas malecaday o kakaenen sanay ko harateng ni Yis, hanaca o malaˈosiay ningra a demak paihkalay to miocoran no Kawas cingra.—Yohani 4:34; 5:36; 14:10.

4. Pakayni i pipahanhan, mikitini ci Yihofaan aci Yisan mananam ita ko maanan hani?

 ⁴ Padadotocay ci Yihofa aci Yis a matayal, tatodong nonini wa padadotoc kita a matayal, caka ngaˈay a pahanhan han? Cowa ka hatira. Cowa ka maroray ci Yihofa, mansa cowa pisaali to papahanhan, kawra sanay ko sowal no Fangcalay Cudad, maharek Cingra misangaˈ to kakarayan ato sera i, ‘paselaˈay a matayal.’ (Kasadakan 31:17) Tatodong no sinael i, sawad sanay ci Yihofa to cecay liyad a matayal, mikitini minaroˈan no tayal milifok to taˈangayay karenec. Itini fafekang no sera ci Yis malalokay a matayal, kawra mikilimay cingra to toki a pahanhan, malacafay to widang a komaen.—Matay 14:13; Luka 7:34.

5. O roma Krisciyang iraay ko maanan a pasangar hani?

⁵ Pakalalokay ko Fangcalay Cudad to finawlan no Kawas malalok a matayal, aka matoka. (Taneng 15:19) Alatek mawmahay kiso paririˈ to paro no lomaˈ, kawra iraay ko ˈinorong no Krisciyang milasil to ngaˈayay lihaf, mihaenay i, misaaliay kita to matatodongay a pipahanhan. Misilsil to tayal, mitosilay ato pipahanhan a toki, pasangaray sanay kiso a miharateng han? O hahakowa ko toki matayal ato pipahanhan hani?

6. Pakayni i Marko 6:30-34, hano mafanaˈ kita to matatodongay ko pinengneng ni Yis to tayal ato pahanhanay hani?

⁶ Patatodongen ita ko tayal, ato pipahanhan. Sanay ko sowal ni Solomon: ‘Ano o maananto a demakan, iraay ko masaˈosiay a toki.’ Dotoc somowalay to paloma, patireng, tomangic, matawa, makeroay a demak. (Patnakay 3:1-8) Mahapinangay ita, itini kaˈorip no mita, masaka limlaan ko tayal ato pipahanhan. Matatodongay ko pinengneng ni Yis to tayal ato pipahanhan. Kina cecayay, ˈifowaay ko tarokos a mitosil, ‘awaayto ko toki a komaen,’ sowal sa ci Yis ‘tata, tayra kita i awaay ko adeses a kitiraan pahanhan.’ (ˈOsien ko Marko 6:30-34.) Soˈlin cowa ka songilaˈ ko pipahanhan ni Yis ato tarokos, kawra mafanaˈay ci Yis mikilim ko toki a pahanhan o masaka limlaan.

7. Cipinang to saˈosi no Paselaˈan Romiˈad papadama kitaanan to maanan hani?

⁷ Latekay, misaaliay kita to sapahanhanaw anca mifalic to pakayraan a maˈorip. Mikitini nolitengan Israil tamdaw midofdof to Paselaˈan Romiˈad, mahapinangay ita o masaka limlaan ko pahanhanay. Soˈlin cowato ko mamidofdof kita to Rikec ni Mosi, wa ngaˈay mikitini saˈosi no Paselaˈan Romiˈad a minanam, oniya lalakaw papadama kitaanan mikinsa to pinengneng no niyah to tayal ato pahanhanay a demak.

8. Pakayni Kasadakan 31:12-15, hano patireng ko Kawas to Paselaˈan Romiˈad hani?

⁸ Pakayni maˈoniay i Fangcalay Cudad, mataˈelif ko enem pisangaˈan romiˈad i, sawad sanayho to cecay liyad ci Yihofa misangaˈ to maamaan i cikiw. (Satapangan 2:2) Kawra, maolahay ci Yihofa a matayal, mikitini roma pakayraan kamayan Cingra ‘padadotoc a matayal.’ (Yohani 5:17) Ikor no matayal ci Yihofa to enem romiˈad, itini ‘saka pito romiˈad’ a pahanhan, malecaday i, palimoˈotan Ningra ko Israil tamdaw ikor no matayal to enem romiˈad, wa itini saka pito romiˈad midoedo to Paselaˈan Romiˈad. O kataterekan no Kawas ato Israil tamdaw ko Paselaˈan Romiˈad, o ‘fangcalay romiˈad ni Yihofa konini,’ toya romiˈad o ‘mamisongilaˈ a pahanhan’ ko Israil tamdaw. (ˈOsien ko Kasadakan 31:12-15.) Mihaenay, o polong a tamdaw anca o wawa, koli, pakaenan a pinaˈorip, cowa ka ngaˈay matayal  toya romiˈad. (Kasadakan 20:10) Oniya limasmas padamaay to Israil tamdaw misamacay to midokoay to Kawas a demak.

9. Itini romiˈad ni Yis, pakayni Paselaˈan Romiˈad, o ˈaˈideman no pihakelongan iraay ko maanan pakinaliay a saˈosi hani?

⁹ O Paselaˈan Romiˈad na o ciepocay a limasmas i finawlan no Kawas, kawra itini romiˈad ni Yis, pakinaliay ko saˈosi no ˈaˈideman no pihakelongan pakayni Paselaˈan Romiˈad. Tinakoen, ano mipitpit to emi anca miadah to adadaay tamdaw, o misafelitay to rikec i Paselaˈan Romiˈad sanay ko harateng nangra. (Marko 2:23-27; 3:2-5) Kawraan, paihkalan ni Yis ko ˈalomanay, cowa kahaen ko pinengneng ni Yihofa.

10. Pakayni i Matay 12:9-12 maˈoningay, samanay ko pinengneng ni Yis to Paselaˈan Romiˈad hani?

¹⁰ Ci Yis ato Yutaya a nisawawaan midofdofay to saˈosi no Paselaˈan Romiˈad, samanen o mamidofdofho cangra to Rikec ni Mosi. * Kawra, mikitini sowal ato waywayan ni Yis mahapinangay ita, itini pidofdof to Paselaˈan Romiˈad matatodongay ko harateng ningra, sanay ko sowal: ‘Itini Paselaˈan Romiˈad midemak to ngaˈayay demak cowa ko mararaway.’ (ˈOsien ko Matay 12:9-12.) Harateng ni Yis sidaˈit a padama to tao cowa pisafelit to saˈosi no Paselaˈan Romiˈad. O araaw no Kawas patireng to Paselaˈan Romiˈad, o tamdaw wa itini Paselaˈan Romiˈad misawad to tayal, ngaˈ misamacay midoko to Kawas ato kahemekan no Kawas a demak, mansa o midemakan ni Yis matatodongay  to araaw no Kawas. Itini i Nacali ci Yis a mitosil i, ‘mitooray to nanaman micomod i sefi, tomireng a miˈosi to Fangcalay Cudad,’ itini kalomahadan ningra, cingra ato paro no lomaˈ misaka dademakay to Paselaˈan Romiˈad a miingid to Kawas.—Luka 4:15-19.

11. O cima ko taˈarawan ni Yis i malalokay matayal hani?

¹¹ Oya palahaday ci Yisan a wama ci Yosif cowa ko pasifanaˈ aca ci Yisan misasayho, maedeng padamaay cingranan cipinang to pinengneng no Kawas to tayal. (Matay 13:55, 56) Kaemangho ci Yis i, maˈaraway ci Yosif malalokay a matayal, midimokos to sakaˈorip no paro no lomaˈ. Pasowalan ni Yis ko nisawawaan: ‘Milifok ko mawmahay to lifon o matatodongay.’ (Luka 10:7) Mihaenay, cipinangay ci Yis samanay ko malalokay a matayal.

12. Pakayni malalok a matayal, iraay ko maanan a tinakoan no Fangcalay Cudad hani?

¹² O malalokay a tamdaw ko tarokos ci Pawlo, soˈlin patenak to ngaˈayay lihaf ato misawacay to ngangan ni Yis o sakakaay a demak ningra, kawra pakayni sakaˈorip no niyah matayalay cingra. Pasowalan ni Pawlo ko Tisalonika a tamdaw, ‘marorayay a malalok cingra a mitayal to romiˈad ato dadaya,’ cowa ka “pakaroray” to salikaka. (2 Tisalonika 3:8; Dmak 20:34, 35) Alatek o misangaˈay to kopang a tayal ko mitoroˈan ni Pawlo. Itini i Korinto ci Pawlo i, malacafaay ci Akuila aci Priskila ‘mikilomaˈ, matayal, samanen o tayal nangra mahecaday o misangaˈay to kopang a tayal.’ Kawra ‘matayal to romiˈad ato dadaya’ ci Pawlo, pahanhanay cingra. Itini i Paselaˈan Romiˈad misawaday cingra misangaˈ to kopang, toniya romiˈad misawacayay to Yutaya a tamdaw, samanen o Yutaya tamdaw pahanhanay i Paselaˈan Romiˈad, cowa ka tayal cangra.—Dmak 13:14-16, 42-44; 16:13; 18:1-4.

13. Mikitini taˈarawan ni Pawlo mananamay ita ko maanan hani?

¹³ Pakayni malalok a matayal, patirengay ko tarokos ci Pawlo to ngaˈayay taˈarawan. Itini sakayat no Kawas sanay ko sowal ningra: ‘O cima caka kahi matayal, caka ngaˈay a komaen.’ (2 Tisalonika 3:10) Mansa misaˈicelay ci Pawlo a matayal to sakaˈorip. Kawra, miceriday cingra ‘dademak to fangcalay a tayal, milasil to ngaˈayay lihaf no Kawas.’ (Loma 15:16; 2 Korinto 11:23) Pakalalokan ni Pawlo ko roma Krisciyang micerid a mitosil. Tinokoen ci Akuila aci Priskila malacafayay cangra ci Pawloan ‘matayal saki Yisan.’ (Loma 12:11; 16:3) Palimoˈotan ni Pawlo ko Korintoay Krisciyang ‘kararid misaˈicel to tayal no Kawas.’—1 Korinto 15:58; 2 Korinto 9:8.

14. O sowal ni Yis i Yohani 14:12, o manan ko tatodong hani?

¹⁴ Itiniay kita i salikorayto a romiˈad maˈorip, o sakakaay a tayal i, o mitosilay ato padama to tamdaw malo Krisciyang. Paliˈayaway ci Yis, o tayal no nisawawaan ningra wa mikikaka ko taˈangay to tayal ningra. (ˈOsien ko Yohani 14:12.) Tatodong ni Yis, cowa ko mamalecad cingranan a midemak kita to kasapaan a demak, o mitosilan a kirac wa ikaka ko kakahad, o malitemohay a tamdaw wa ikaka ko ˈaloman, o pitosil a toki wa ikaka ko adihay.

15. Ngaˈay licayen ita ko niyah to maanan a salicy hani? Misamanay?

¹⁵ Ano misaaliay kiso to tayal sakaˈorip, licayen ko niyah: “Pinengneng no tao, o malalokay kako a mawmahay han? Misarocoday kako i misaˈosian a toki milahci to tayal han?” Ano masaˈosiay ko caˈof iso i, o ngaˈayay pakasoˈlinen kiso wa sa ko harateng no tawki, o cafay iso a matayal wa makahi  mitengil to paladaˈan iso a ngaˈayay lihaf alatek. Roma i, ngaˈayay haratengen iso samanay ko mitosilay a tayal no niyah, licayen ko niyah: “Piharateng no tao, o fanekfekay kako a mitosil han? Misongilaˈay kako misaday to salakatay a pilisoˈ han? Kalikiay kako miliyaw milisoˈ to saka cipinangaw to Fangcalay Cudad a tamdaw han? Miceriday kako mirienang to masasiromaay a pitosil han?” Ano masaˈosiay ko caˈof iso, o kalipahakan ko mitosilay a demak wa saan ko piharateng iso.

16. Pakayni pipahanhanan o pinengneng ni Yis ato tarokos, samanay masasiroma to aniniay a tamdaw hani?

¹⁶ Mafanaˈay ci Yis, o niyah ato tarokos misaaliay to pipahanhan, ano itiyato anca anini, o harateng no ˈalomanay malecaday o patinakoan ni Yis a cihafayay tamdaw, sowal nora tamdaw: “Akato ka roray ko harateng. Kakomaen. Kaacangto kiso, saan.” (Luka 12:19; 2 Timoti 3:4) O maharatengay noya cihafayay o sapahanhanaw aca ato lawla, ci Yis ato tarokos, cowa ka paisalakaten nangra minengneng ko lawla i kaˈorip.

17. Sasamaan kita misaka dademak to cowa ko katayalan a toki hani?

¹⁷ Wa misaˈicel kita a mitodong ci Yisan, ano caka tayal, cowa ko pisongilaˈ aca pahanhan, misawacayho to tamdaw ato mirienang to saˈopo. Kalimlaan ko mitosilay ato masaˈopo, mansa wa misaˈicel kita mirienang. (Hipray 10:24, 25) Ano miliwko kita i, kakamayan a mitoor to nanaman mirienang to saˈopo tora pala, wa mikilim to toki malalengo to Fangcalay Cudad i malitemohay a tamdaw.—2 Timoti 4:2.

18. Tokel ni Yis Kristo kitaanan, sasamaan ko hademak hani?

¹⁸ Sidaˈitay ko Hongti ci Yis Kristo kitaanan, padamaay kitaanan matatodong ko pinengneng to tayal ato pahanhanan, tada miakoˈiday kita cingranan. (Hipray 4:15) Mitokelay cingra matatodong ko pipahanhan ita, mitokelayho kitaanan malalok a matayal to sakaˈorip, ato mirienang to pakahemekay to tamdaw a mitosilay demak. O dotoc a lalakaw wa milengo, samanay ci Yis milidong kitaanan pasadak nai ka adayayan a pakayraan.