1. Patorodan ni Yihofa ko wama wina to maanan a ˈinorong hani?

PAIRAAN ni Yihofa ko kalim no saka cecay a raramod mahofoc to wawa. Sowal no Fangcalay Cudad: ‘O wawa o sapafeli ni Yihofa a hafay.’ (ˈOlic 127:3) O manan ko tatodong noniya sowal hani? Haratengen hena, ano iraay ko cecay ngaˈayay a widang iso, paikenan ningra kiso to adihayay a payci, wa samaan ko harateng iso hani? Pakasoˈlinay ko widang tisowanan, maedeng o mamahemek kiso, kawra wa calemcem to sasamaan midipot toniya payci. Ci Yihofa o tada ngaˈayay a widang ita, pafelian Ningra to mikikakaay to payci a dafong ko wama wina a tamdaw, songilaˈen no wama wina midipot ko wawa, palipahaken ko wawa sanay ko tokel Ningra.

2. Oniya lalakaw wa milengo to maanan a salicay hani?

² O caciwawa hokira ko mararamoday, hacowa a ciwawa, o cima ko mamisaˈosi hani? Samaan ko demak no wama wina, ngaˈ lipahak ko wawa hani? Dotoc, nengnengen ita ko pina safalod no Fangcalay Cudad, oniya safalod papadama to mararamoday a Krisciyang inaneng ko misaˈosian.

3. (1) Caciwawa ko mararamoday hokira, o cima ko mamisaˈosi hani? (2) Haharatengen no salawina ato widang ko maanan a safalod no Fangcalay Cudad hani?

³ Itini roma a pala, kakaliki a ciwawa ko faelohay mararamoday a tamdaw sanay. O salawina ato widang miroeroay to cangaanan papihaen to demak. O cecay ci Ciyaslo a faˈinayan salikaka itiniay i Asia, sanay ko sowal: “O ciwawaay a salikaka i kasakopang miroeroay to awaay ko wawa a mararamoday  kalikien a ciwawa.” O cecay itiniay i Asia a salikaka ci Cifoli, sanay cingra: “Pasowalay ko roma tamdaw to awaay ko wawa a mararamoday, ano maliteng cangra awa ko mamidipot cangranan.” Nikawrira, saka ciwawaaw hokira oya mararamoday ko mamisaˈosi, ao cangra ko mamitamorong to ˈinorong. (Kalatiya 6:5 ato roma pihongyak.) O salawina ato widang mitokel lipahak ko kaˈorip no faelohay mararamoday, matatodongay konini. Kawra pakayni misaˈosi to caciwawa hokira, o mararamoday ko mamisaˈosi tonini.–1 Tisalonika 4:11 ato roma pihongyak.

4-5. (1) O mararamoday sasinanoten ko maanan tosa a salicay hani? (2) Hacowa malalengo toniya tosa a salicay o sangaˈayay hani?

⁴ Sakaciwawaaw ko mararamoday sinanoten ko tosa kalimlaan a salicay. Saka 1, hacowa cangra ciwawa hani? Saka 2, pina ko hahofocen a wawa hani? Anoca, hacowa malalengo ko mararamoday toniya tosa a salicay? Hano kalimlaan koniya tosa a salicay hani?

⁵ Pakayni caciwawa a demak, ˈayaw no mararamod i, malalengoto, samanen malecad ko harateng toniya salicay o masaka limlaan a demak. Roma i, haharatengen no mararamoday to papakafilo cangra mitamorong to ˈinorong no malo wamaay winaay hokira. O roma mararamoday misaˈosiay to ikor no cecay tosa miheca ngaˈ ciwawa, samanen ano hofocen ko wawa, wa adihay ko mapalakay a toki ato ˈicel midimokos. Mansa cowa ka caloh cangra a ciwawa, mihaen irato ko toki mananam to kaˈorip no mararamoday, ngaˈay ko kalalaˈed a tatosa.—Ifiso. 5:33.

6. O roma mararamoday ciharatengay to aniniay a pakayraan, mansa misaˈosiay cangra samaan ko demak hani?

⁶ O tatoloay wawa ni Nowa, mararamod cangra i cowa ka tangsol sa ciwawa, roma Krisciyang minanamay to taˈarawan nangra. (Satapangan 6:18; 9:18, 19; 10:1; 2 Pitiro 2:5) Sowal ni Yis, o lintad ita mahecaday o ‘lintad ni Nowa.’ O ‘pasangaray siˈayawen a ˈawaled’ nohatini, mansa o roma mararamoday misaˈosiay cangra akaho ka ciwawa, mihaen wa adihay ko toki matayal saki Yihofaan.—Matay 24:37; 2 Timoti 3:1.

7. O safalod no Luka 14:28, 29 ato Taneng 21:5 wa samaan padama to sakaciwawaaw a mararamoday hani?

⁷ Pakayni sakaciwawaaw hokira, o citanengay a raramod wa ‘mihalaka a miˈosi to  payci.’ (ˈOsien ko Luka 14:28, 29.) Mafanaˈay ko malo wamaay winaay, palahad to wawa adihayay ko mapalakay a payci, toki ato ˈicel. Mihaenay, sakaciwawaaw a mararamoday wa misongilaˈ a miharateng toniya laenoay salicay: “Sapisaloaw to saali no paro no lomaˈ, wa micokang a tatosa han? O maanan ko kalimlaan a saali, malecaday ko pinengneng niyam han? Ano matayal a tatosa, o cima ko mamihimaw to wawa hani? O harateng ato waywayan no wawa mamafiyor no nima hani?” Ano malalengo toniya salicay i, haratengen ko safalod no Taneng 21:5—ˈOsien.

8. (1) O sakaciwawaaw a mararamoday aisalakat a miharateng to maanan mamalifa a pasangaray no ikor hani? (2) O ciolahay a faˈinay o sasamaan ko hademak?

⁸ O wawa misaaliay to ka ciharateng no wama wina, mihaenay i, wa samacayen ko toki ato ˈicel a midimokos to wawa. Ano mahecahecad ko mihecaan no wawa i, wa matongal ko pasangar a ciharateng to kahacecay a wawa. O roma wama wina midipotay to ˈalomanay kaemangayho a wawa, tada marotayayto cangra. O wina a tamdaw ano marotayay, wa samaan misongilaˈ a mikingkiw, mitolon ato mitosil hani? Alatek wa pasangar cingra misamacay to harateng a masaˈopo. Mihaenay i, ano i kasakopang anca i lomaˈ, o ciolahay a faˈinay wa padama to fafahi mararid a midipot to wawa, ato mararid a misolimet to lomaˈ. O faˈinay wa mararid a mikayat to paro no lomaˈ i pakalomaˈay a pidoko to Kawas, halo micerid a miˈorong to paro no lomaˈ mitosil.

9-10. Sapisongilaˈaw a palahad to wawa, Sasamaan ko hademak no wama wina hani?

⁹ Wa ngaˈay ko wama wina midemak to maanan padama to wawa a maolah ci Yihofaan hani? Sasamaan ko wama wina a midipot to wawa, hoeca ka mafiyor no tatiihay a hekal cangra hani? Nengnengen ita ko pina a pakayraan.

¹⁰ Micangacang to sadama ni Yihofa. Haratengen ci Manowa ato fafahi ningra, o wama wina ni Samson cangra. Tiya mafanaˈ ci Manowa to mamahofoc cangra to cecay faˈinayan wawa i, tangsolay micangacang ci Yihofaan pasifanaˈ cangranan to sasamaan a palahad toniya wawa.

11. Masowalay i Kakitaan 13:8 ko taˈarawan ni Manowa, sasamaan a minanam ko wama wina cingranan hani?

¹¹ Mikitini i katimol Iwropa ci Nihate aci Alema, sowal nangra: “Mahecad ci Manowaan micangacang to sapasifanaˈ ni Yihofa, padama tamiyanan malo ngaˈayay a  wama wina. Pakaynian ni Yihofa i Fangcalay Cudad, ato masakenaay a mitepangan, saˈopo, ato kamok no taykay a pacaˈof to satolon niyam.”—ˈOsien ko Kakitaan 13:8.

12. Ci Yosif aci Mariya patirengay to maanan a taˈarawan no wawa hani?

¹² Tano waywayan patireng to taˈarawan. Wama wina a tamdaw, o sasowalen namo taˈangayay ko pilingat to wawa, kawra o waywayan namo mikikakaay ko pilingat. Haratengen ci Yosif aci Mariya, patirengay cangra to ngaˈayay a taˈarawan ni Yis ato roma a wawa, adihayay ko mananamay ni Yis pakayni cangraanan. Ci Yosif malalokay a micokang sapaririˈaw to paro no lomaˈ, halo padama to paro no lomaˈ misaareteng to midokoay to Kawas a demak. (Limoˈot 4:9, 10) Soˈlin cowa pisaali ko Rikec ni Mosi to mamiˈorong ko wama to paro no lomaˈ tayra i Yirusalim a misalisin to Pitaˈlifan a Lisin, kawra ci Yosif ‘tomihecahecaan’ mihaenay ko demak ningra. (Luka 2:41, 42) Itiya, o harateng no roma malo wamaay a tamdaw, mahadak ko polong no paro no lomaˈ o mipalakay to payci ato toki a demak sanay. Kawra maolahay ci Yosif mirienang to midokoay to Kawas a demak, pakalalokayho cingra to wawa mitawlik a mirienang. Roma i, ci Mariya mananamay cingra to sinael no Fangcalay Cudad, o sasowalen ato waywayan ningra maedeng padamaay to wawa a maolah to kimad no Kawas.

13. Samaanay ci Nihate aci Alema minanam to taˈarawan ni Yosif aci Mariya hani?

¹³ Masowalay i ˈayaw ci Nihate aci Alema minanamay to taˈarawan ni Yosif aci Mariya. Samaanay cangra pasifanaˈ to wawa maolah ci Yihofaan ato midoko Cingranan hani? Sowal nangra: “Patirengay kami to ngaˈayay a taˈarawan, padama to faˈinayan wawa mihapinang mitoor to safalod ni Yihofa maˈorip tada o ngaˈayay.” Sowal ni Nihate: “Tokel iso mamalo samaanay a tamdaw ko wawa i, salakat mamalo mahaenay a tamdaw ko niyah ngaˈ.”

14. Hano mamafanaˈ ko wama wina to o cima ko micawmaˈan no wawa hani?

¹⁴ Padama to wawa mipiliˈ to ciepocay a widang. O waywayan no widang taˈangayay ko pilingat to wawa, o mamafanaˈ ko wama wina to masamaanay a tamdaw ko widang no wawa ato mimaanay cangra, o masaka limlaan a demak koni. Mahawpay ko o cima ko micawmaˈan no wawa tano soci, ato milinakay cingra to cimaanan i wangcan.—1 Korinto 15:33.

15. O taˈarawan ni Cusi wa mananam no wama wina ko maanan hani?

¹⁵ Ano cowa kafanaˈ ko wama wina misaka dademak to tingnaw ato soci i, sasamaan a padama to wawa hani? O cecay malo wamaay ci Cusi itiniay i Filiping, sanay ko sowal: “Soˈlin cowa ka fanaˈ kako misaka dademak to tingnaw, kawra kamayanay kako patalipaˈelal to wawa misinanot to demak.” Cowa kafanaˈ ci Cusi misaka dademak to tingnaw, kawra cowa ka congeden ningra ko wawa misaka dademak to hatiniay a dafong, sanay cingra: “Pakalalokan ako ko wawa tanonini a mihatatanaman to roma kitakit a sowal, misaday to lalakaw no saˈopo, ato micekiw to Fangcalay Cudad to romiˈamiˈad.” Ano iraay ko wawa iso, kalacafayan iso ko wawa minengneng to wangcan no jw.org® no “Kapah” a lalakaw pakayni pasadak anca micada to lihaf no soci anca o sasing i wangcan hokira? O masowalay no lalakaw a sapaini tada matatodongay. Roma i, malacafayay kamo minengneng to Ono Tingnaw Lalosidan—O Kiso ko Miˈimeray Ha Anca Maˈimeray Nira Kiso Ha? ato Itini Picawmaˈan  a Wangcan Malo Inanengay Tamdaw * sanay a tatemikay mangka hokira? Oniya lalakaw wa ngaˈay padama tisowanan pasifanaˈ to wawa inaneng a misaka dademak to tingnaw.—Taneng 13:20.

16. Adihayay wama wina samaanay ko demak? Iraay ko maanan ngaˈayay a epoc hani? Hadaken ko tinakoan.

¹⁶ Adihayay wama wina milimasmasay to toki, pacacawmaˈ to wawa to fanekfekay misakafahay a salikaka. Ci Enteni aci Poming itiniay i Ketetiwa a mararamoday, marariday cangra micada to kasakilac kantok. Sanay ko sowal ni Enteni: “Taˈangayay ko sadama nonini to wawa niyam, ikor misatapangay cingra misakafah, nohatini o mikotayay a kasakilac kantok cingra.” Wa ngaˈay kiso mahaen ci Entenian aci Pomingan, pacacawmaˈ to wawa to ngaˈayay a taˈarawan han?

17-18. Hahacowa misatapang ko wama wina a pasifanaˈ to wawa hani?

¹⁷ Kahenayen pasifanaˈ ko wawa. Ano kahenay misatapang pasifanaˈ to wawa maolah ci Yihofaan, wa taˈangay ko haepoc. (Taneng 22:6) Ci Timoti o ngaˈayay a tinakoan, o cafay ni Pawlo itini milakowitay to riyar mitosil cingra. O wina ningra ci Iunici ato fofo ningra ci Lois, “nano kaemanganho” a pasifanaˈ to cingranan mihatatanaman to Fangcalay Cudad.—2 Timoti 1:5; 3:15.

¹⁸ O roma mararamoday i Ketetiwa ci Kelote aci Pis, aenemay ko wawa nangra. Itini pipasifanaˈ nangra, maolahay ci Yihofaan ko aenem a wawa. Hano malaˈosi cangra hani? Minanamay cangra ci Iunician aci Loisan. Sowal nangra: “Hofochan ko wawa, misaˈicelayto kami milinaˈ i falocoˈ nangra to Kimad no Kawas.”—Limoˈot 6:6, 7 ato roma pihongyak.

19. Samaan ko wama wina milinaˈ i falocoˈ no wawa ko Kimad ni Yihofa hani?

¹⁹ Sasamaan ngaˈ malinaˈ i falocoˈ no wawa ko Kimad ni Yihofa hani? Pakayni i pisaliyaliyaw a pasifanaˈ. Mihaenay, caceriden no wama wina kalacafay ko wawa. Latekay, karorayan a misaliyaliyaw patalipaˈelal to wawa, kawraan o sangaˈayay a pakayraan konini a padama to wawa cipinang  ato misaka dademak to safalod no Fangcalay Cudad.

20. Pakayni i sasamaan a pasifanaˈ to wawa, ˈOlic 127:4 pafeliay kitaanan to maanan a sadama?

²⁰ Ka cipinang to wawa. Patinakoan no ˈOlic 127 fedengan ko wawa to panaˈ. (ˈOsien ko ˈOlic 127:4.) Malecad o panaˈ cowa kalecad, o kahacecay a wawa iraay ko mikiriwiˈay. Mihaenay, haharatengen no wama wina ko sapasifanaˈ a lalakaw. Itiniay i Israil kitakit, cecay mararamoday padamaay to tatosa a wawa malo maolahay to Kawas a tamdaw, malengo ko pakayraan a pasifanaˈ i, sanay ko sowal: “Palicinowasan niyam ko wawa a milengo to Fangcalay Cudad.” Manaokaniw cowa kalecad ko pakayraan no paro no lomaˈ, o tawki no lomaˈ wa misaˈosi to sasamaan malalengo to wawa to Fangcalay Cudad.

21. Samanay ci Yihofa padama to wama wina hani?

²¹ Latekay paririˈ pasifanaˈ to wawa, tada o marorayay a inorong. Kawra o wawa o sapatelong ni Yihofa koni, makalimay Cingra padama to wama wina, mitengil to satolon nangra, pakaynianho i Fangcalay Cudad, mitepangan a cudad, ato pakayni matenesay a salikaka i kasakopang pafeli to sapaini ato sadama.

22. O maanan ko sangaˈayay a sapatelong to wawa hani?

²² Sowal no tamdaw, palahad to wawa o 20 miheca a halaka, kawra mikikakaay ko mihadakan no wama wina. O sangaˈayay a sapatelong nangra to wawa i, o olah, toki, ato mikitiniay ci Yihofaan a sapasifanaˈ nangra. Manaokaniw, pakayni sapasifanaˈ no wama wina, cowa ka lecalecad ko picada no wawa. Kawra, icowacowaay a Krisciyang a wama wina adihayay ko malaˈosiay a pasifanaˈ to wawa maolah to Kawas. O cecay ci Ciuanami a fafahiyan salikaka mihadakay to nafalocoˈan no wawa: “Tikolen miharateng ko pipasifanaˈ no wama wina takowanan, tada miakoˈiday kako cangranan palahad takowanan malo maolahay ci Yihofaan a tamdaw, cowa ko ˈorip aca ko sapafeli nangra takowanan, pafeliayho to ciepocay no kaˈorip ako.”—Taneng 23:24, 25.