1-2. (1) Itini roma kitakit, maacangay ko tamdaw to maanan hani? (Nengnengen ko sapatongal lalakaw “O Maanan ko Kalipahakan a Mihecaan no Israil Tamdaw?”) (2) Itini Luka 4:16-18, milengoay ci Yis to maanan?

ITINI roma kitakit, saka 50 miheca mala hongti ko tamdaw iraay ko kaacangan a demak. Alatek cecay romiˈad a maacang, cecay lipay anca halafinay a tatokian. Ano hakowato ko halafin, mahererekay koniya kaacangan, kahenayay matawal no tamdaw koniya demak.

² Nolitengan Israil tamdaw 50 miheca misalisinay to Kalipahakan a Mihecaan, kawra oniya lalakaw wa milengo to ikakaay ko ngaˈay a limasmas. Itini Kalipahakan a Mihecaan milifokay ko nolitengan Israil to pasalat, patalipaˈelalay konini kitaanan, iraay ko makapahay a limasmas ni Yihofa, cowa ko anini aca, wa ngaˈay kita milifok to tahadaˈocay a pasalat, masowalay ni Yis ko hatiniay a pasalat.—ˈOsien ko Luka 4:16-18.

3. Pakayni Lifi 25:8-12, wa milifok to maanan a epoc ko Israil tamdaw mikitini Kalipahakan a Mihecaan hani?

³ Saka cipinangaw to misowalan ni Yis a pasalat, wa salakatho kita a cipinang to limasmas no Kawas to nolitengan Israil a Kalipahakan a Mihecaan. Pasowalan ni Yihofa ko Israil tamdaw: ‘Saˈosien namo ko saka 50 miheca to fangcalay a mihecaan, lasilen namo ko polong a finawlan pasalatayto. O kalipahakan a Mihecaan namo konini, o mamalifok ko hafay no niyah, o kahacecay tamdaw maminokay i lalomaˈan no niyah.’ (ˈOsien ko Lifi 25:8-12.) Itini kaˈayaway a lalakaw, mananamay ita samanay ko Israil tamdaw mikitini Paselaˈan  Romiˈad milifok to epoc. Pakayni Kalipahakan a Mihecaan wa milifok to maanan a epoc ko Israil tamdaw hani? O cecay cikiyamay a Israil tamdaw, ano sapatikolaw cingra to kiyam i, wa paliwalen ko sera no niyah. Tahini Kalipahakan a Mihecaan i, oya sera wa patikolen cingra. Mihaenay, wa ‘malifokto ko hafay no niyah,’ o teloteloc ningra wa ngaˈay micada to hafay no lalomaˈan. O roma tamdaw paliwalen ko niyah anca wawa no niyah malo koli. Tahini Kalipahakan a Mihecaan i, wa ‘minokay i lalomaˈan no niyah,’ mihaenay awaayto ko tahadaˈocay malo koli a tamdaw. Tada o sidaˈitay a Kawas ci Yihofa!

4-5. Hano cacipinang kita to limasmas no Kalipahakan a Mihecaan hani?

⁴ O limasmas no Kalipahakan a Mihecaan, pairaayho to maanan a epoc no Israil tamdaw hani? O sowal ni Yihofa: ‘I lalomaˈ namo cowa ka ngaˈay ira ko manikaway a tamdaw, samanen itini pafelian ni Yihofa tisowanan a hafay, wa parahekeren ni Yihofa kiso.’ (Limoˈot 15:4) Kawra, o pakayraan no hekal anini, cihafayay a tamdaw mangalefay ko hafay, o manikaway tamdaw mangalefay ko kanikaw!

⁵ Itini Kalipahakan a Mihecaan i, wa patedalen no Israil ko koli, palahdawen ko kiyam ato patikolen ko hafay no tao. Anini o Krisciyang cowato ka midofdof to Rikec ni Mosi. Kawra cipinang to Kalipahakan a Mihecaan wa ira ko haepoc no mita (Loma 7:4; 10:4; Ifiso 2:15) Misamaanay hani? Oniya limasmas patalipaˈelalay kitaanan, wa milidong ci Yihofa kitaanan miliyas to kalakoli no raraw.

6. Hano misaaliay ko tamdaw to pasalat hani?

⁶ Misaaliay kita to pasalat, kita maemin malo koliay no raraw, tada ka adayayanto. Malo ciraraway a tamdaw, wa maliteng kita, adadaay ato mapatayay. Ano midingo, paising, anca matoled ko falocoˈ ano mararaw i, maharatengay ko kaeca kalefot no niyah. Mihayay ko tarokos ci Pawlo to ‘makowanay no rikec no ciraraway a tireng’ ko niyah. Sanay cingra: ‘Tada marorayay kako! O cima ko mamilidong takowanan  paliyas toniya mamapatay a tireng hani?’—Loma 7:23, 24.

7. Pakayni pasalat i, o sapairasol ni Isaya milengoay to maanan?

⁷ Tada mahemekay kita maharekayto ko Kawas midemak to sapilidong a limasmas, ho ngaˈay kita matedal i kala koli no raraw. Ano sapilifokaw kita to pasalat, ci Yis o masakalimlaan a tamdaw. Itini ˈayaw ni Yis to 8 hahekalan, paˈayaway ci Isaya to mamilifok kita to taˈangayay pasalat noikor, o hatiniay a pasalat mikikakaay ko kangaˈay to malifokay no Israil i Kalipahakan a Mihecaan. Sanay cingra: ‘O fangcalay ˈicel no Tatapangan ci Yihofa itiniay i tireng ako, samanen minilnilan ni Yihofa kako, papilasil to ngaˈayay lihaf i misapoeneray ko falocoˈ a tamdaw, miocor takowanan mitafo to dokaˈ no masomaday a tamdaw, milasil to mamatedal ko mapalitay a tamdaw.’ (Isaya 61:1) Wa samaan a malaˈosi koniya sinael hani?

8. Cima ko palaˈosiay to sapairasol ni Isaya hani?

⁸ Mitosil ci Yis i, misatapangay a malaˈosi ko sapairasol ni Isaya. Itini i kasaˈopoan no Nacali ci Yis, pasayraay i Yutaya tamdaw miˈosi toniya sowal ni Isaya, halo pisaka dademak toniya sowal i tireng no niyah, sanay cingra: ‘O fangcalay ˈicel ni Yihofa itiniay i tireng ako, samanen minilnilan ni Yihofa kako, papilasil takowanan to ngaˈayay lihaf i manikaway tamdaw, miocor takowanan milasil to mamatedal ko mapalitay, pakaˈaraw ko mapohaway, milifok to pasalat ko maroeroay, halo milasil to sidaˈitay a mihecaan ni Yihofa.’ (Luka 4:16-19) Sasamaan ci Yis palaˈosi toniya sapairasol hani?

9. Itiya lintad ni Yis, ˈalomanay tamdaw milongocay milifok to maanan a pasalat hani?

⁹ Itini saka 1 hahekalan, misatapangay ko Kawas pafeli to na paˈayawan ni Isaya a pasalat. Maharek ci Yis miˈosi to sapairasol ni Isaya i, pasowalayho cingra: ‘Isawni matengilay namo a sinael, malaˈosiayto anini.’ (Luka 4:21) Kawra, itiraay a tamdaw milongocay sapilifokaw to pasalat miliyas to pikowan no Loma. O tatosaay nisawawaan ni Yis iraay ko mahaenay a harateng, sanay ko sowal nangra: ‘Tatokel han ita to mamilidong cingra to Israil a tamdaw.’ (Luka 24:13, 21) Mafanaˈay kita, ci Yis cowa ka sapitowakangaw to sarikec no Loma, ao pasifanaˈ cangranan to ‘oni Kaysa i, pafelien ci Kaysaan,’ sanay cingra. (Matay 22:21) Itiya, itini i maanan a pakayraan paira ci Yis to pasalat no tamdaw hani?

10. Itini i maanan a pakayraan padama ci Yis to tamdaw milifok to pasalat hani?

 ¹⁰ Tosaay ko pakayraan ni Yis padama to tamdaw milifok to pasalat. Saka 1, padamaan ni Yis ko tamdaw cato ka malipalaw no ˈaˈideman no pihakelongan. Itiya ˈalomanay Yutaya tamdaw malo koliay nolitengan a nanaman ato mararaway a kimad, tada marorayay ko kaˈorip. (Matay 5:31-37; 15:1-11) Nao papasifanaˈ ko ˈaˈideman no pihakelongan to tamdaw mafanaˈ to Kawas, kawra hato mapohaway a tamdaw cangra cowa pakahapinang ci Yisan to ci Misiya cingra, cowa ka picada to sapasifanaˈ ni Yis, telocto i, awaay ko pinang nangra a mafanaˈ to Kawas, o raraw nangra cowato ko mamasodod. (Yohani 9:1, 14-16, 35-41) Kawra pakayni pasifanaˈ to tamdaw to soˈlinay kimad ato patireng to ngaˈayay a taˈarawan, ci Yis padamaay to misapoeneray ko falocoˈ a tamdaw matedal to kalakoli i mararaway kimad.—Marko 1:22; 2:23–3:5.

11. Itiniayho i maanan a pakayraan padama ci Yis to tamdaw milifok to pasalat hani?

¹¹ Saka 2, padamaan ni Yis ko tamdaw matedal i kala koli no raraw. Pakayni patafangan ni Yis a sapatefoc, makahiay ko Kawas misodod to pakasoˈlinay to sapatefoc a tamdaw. (Hipray 10:12-18) Sowal ni Yis: ‘Ano pasalaten no wawa kamo, wa soˈlinto a pasalat kamo.’ (Yohani 8:36) O hatiniay a pasalat mikikakaay ko kangaˈay to malifokay no Israil i Kalipahakan a Mihecaan! Samanen soˈlin milifok ko tamdaw to pasalat i Kalipahakan a Mihecaan, wa miliyawho a mala koli alatek, hanaca salikor o mamapatay.

12. Cima ko isalakatay milifok to milasilan ni Yis a pasalat hani?

¹² Itini saka 33 miheca Kocinsic, tano fangcalay ˈicel ci Yihofa a minilnil to tarokos ato roma madimadiay faˈinayan fafahiyan, micada cangranan malo wawa, padama cangranan ira ko tokel patikol maˈorip tayra kakarayan malacafay ci Yisan a mikowan. (Loma 8:2, 15-17) Orato, oniya Krisciyang malo isalakatay milifok to milasilan ni Yis i kasaˈopoan no Nacali a pasalat. Matedalay cangra nai mararaway kimad ato nanaman no litengan, matedalay i raraw ato patay sanay ko pinengneng no Kawas. Mihaenay i, mikitini i saka 33 mihecaan Kocinsic tahira kahererekan no Pikowan ni Kristo to Comaˈol Miheca, iraay ko malecaday to ‘Kalipahakan a Mihecaan’ a tatokian, ngaˈay ko tamdaw milifok to pasalat. Ano maharerek koniya  tatokian i, wa ira ko maanan makapahay a demak hani?

13-14. Iraayho ko cima mamilifok to milasilan ni Yis a pasalat hani?

¹³ Anini, pinaay soˈot emang maolahay to soˈlinay kimad a tamdaw malo ‘roma lopayˈay siri.’ (Yohani 10:16) Soˈlin cowa ka piliˈen no Kawas cangra tayra i kakarayan malacafay ci Yisan a mikowan, kawra iraay ko tokel nangra tahadaˈoc maˈorip i fafekang no sera. O hatokel iso konini han?

¹⁴ O mamalifok no tatayra i kakarayan a Krisciyang a sakaraheker, o ngangaˈay a malifok iso. Ano iraay ko pakasoˈlinay falocoˈ iso to kinafalahan ni Yis a ˈirang, wa ngaˈay rihadayen ko falocoˈ a micangacang to Kawas a misodod to raraw iso, milifok to pihayda Ningra, ira ko rihadayay a falocoˈ. (Ifiso 1:7; Paˈarawan 7:14, 15) Roma i, haratengen ko malifokay iso a sakaraheker pakayni piliyas to mararaway kimad. Sanay ci Yis: ‘Wa mafanaˈ kamo to soˈlinay kimad, wa pasalaten no soˈlinay kimad kamo.’ (Yohani 8:32) Milifok to hatiniay a pasalat coko lipahakay ko falocoˈ iso han!

15. Noikor, wa milifok kita to maanan a pasalat ato raheker hani?

¹⁵ Noikor, wa milifokho kiso to taˈangayay a pasalat. Cato ka halafin, wa palahdawento ni Yis ko mararaway pihakelongan ato manaholay a mikowanay no hekal. Wa  dipoten no Kawas ko midokoay Cingranan a ‘taˈangayay ˈopo a tamdaw,’ mitongal to sakalipahak nangra i fafekang no sera a Lakoing. (Paˈarawan 7:9, 14) Noikor wa patikol maˈorip ko ˈalomanay tamdaw, ira ko toki milifok to pasalat, masongilaˈ ko piliyas to kalakoli no raraw.—Dmak 24:15.

16. Salikor wa milifok ko tamdaw to samaanay a pasalat hani?

¹⁶ Itini Pikowan ni Kristo to Comaˈol Miheca, cingra ato salikaka ningra wa padama to tamdaw patikol a tanoktok ko tireng, ira ko sangaˈayay a kalalaˈed to Kawas. O malecad o Kalipahakan a Mihecaan no Israil tamdaw, ngaˈay milifok to pasalat. Mahererek ko Comaˈol Pikowan i, o madimadiay matayal saki Yihofaan a tamdaw wa patikol a malefot, awato ko raraw.

17. Itini Isaya 65:21-23 paˈayaway to sasamaan ko kaˈorip no finawlan no Kawas hani? (Nengnengen ko papotal coka.)

¹⁷ Itini Isaya 65:21-23 (ˈOsien.) Paˈayaway to sasamaan ko kaˈorip no tamdaw i fafekang no sera noikor. Sowal no sinael adihayay ko hademak no tamdaw i Lakoing, wa dademak to ciepocay misaloay to falocoˈ a tayal. Mahererek ko Pikowan ni Kristo to Comaˈol Miheca, ngaˈay pakasoˈlin kita ‘mamatedal ko maˈoripay, cowato ka mahaen o koli mapalit no mamanahol a tireng, wa milifok to ciˈdilay a pasalat no wawa no Kawas.’—Loma 8:21.

18. Hano ngaˈay kita pakasoˈlin wa makapah ko noka ˈorip noikor hani?

¹⁸ Iti:yaho, padamaan ni Yihofa ko Israil tamdaw matatodong ko pinengneng to tayal ato pahanhanay, itini Pikowan ni Kristo to Comaˈol Miheca, o papadamaen no Kawas ko finawlan Ningra mihaen ko demak. Edeng midoko ko tamdaw to Kawas ngaˈ lipahak ko kaˈorip, mihaenay i, itini Lakoing o mamilimasmas ko tamdaw to toki mirienang to midokoay to Kawas a demak. Ngaˈay pakasoˈlin kita itini Pikowan ni Kristo to Comaˈol Miheca, o lalipahak ko tamdamdaw, samanen o mamidoko kita maemin to Kawas, ira ko misaloay to falocoˈ a tayal.