Cowa ka hatira. O tatodong ni Satan soˈlin mapatay ci Ifa tiya komaen to micogedan a losay, o cowa ka ˈaraw i lalomaˈ no tireng a dafong, wa padadotoc materek i roma pala cowa ka saan. Pakaynian ni Satan i ˈoner pasowal ci Ifa, ano kaenen ningra ko losay noya kilang, ‘cowa ko mamapatay,’ sanay. O tatahadaˈoc ci Ifa maˈorip i fafekang no sera, hamaan midofdof to palinian no Kawas, kamayan a lipahak ko kaˈorip o sanay ci Satan.—Satapangan 2:17; 3:3-5.

O materekay tahanini pakayniay saloˈafang a mararaway kimad, ano cowa ko mikitiniay i Itin a masadak i, o hacowaay a mifekad hani? Awaay ko pinang ita, kawraan ngaˈayay pakasoˈlin kita itiniay i ikor no Lenlen i romiˈad ni Nowa, kihcod a mararaway pihakelongan malahedaway itiya, samanen edengan o paro no lomaˈ ni Nowa ko malafadocay itiya.

Mihaenay, o pakasoˈlinan no ˈalomanay tamdaw, cowa ka patay ko saloˈafang a kimad itiniay ikor no Lenlen a mifekad. Ikor no sasifoden no Kawas ko sowal i Papil i, ‘maliwasakay tayra i cowacowa’ ko tamdaw, miˈorongan koniya mararaway a harateng tayra i cowacowa a pala. (Satapangan 11:8, 9) Ano hacowaayto a mifekad koniya mararaway a kimad, oyaan ‘wama no mangah’ ci Akoma Satan ko miowingay i lalikor. Mapatenak i cowacowa pala koniya mararaway a kimad, maedeng mahemekay ci Satan.—Yohani 8:44.