1. O tatoloay a Misawacayay Tamdaw ni Yihofa, samaanay cangra madimadi ci Yihofaan hani?

HARATENGEN ko ilaenoay malifaay no tatoloay a Misawacayay Tamdaw ni Yihofa. (1) Itini i picudadan, misaaliay ko singsi misalisin a maemin, mafanaˈay ko cecay kaying salikaka, ano misalisin i, cowa ko mamahemek ci Yihofa, mansa songilaˈay cingra pasowal to singsi, cowa ko mamirienang toniya pisalisin. (2) Itini i pitosilan, pakalomalomaˈ a milisoˈ ko cecay maomoyay kapah salikaka, mafanaˈay cingra wa malitemoh ko cafacafay alatek. Na malikafay koniya cafay micudad isaˈayaw. Nikawrira, kamayan cingra a mikongkong to fawahan no lomaˈ noniya cafay micudad. (3) Itini i katayalan, mitokelay ko tawki to cecay faˈinayan salikaka, midemak to cowa ka moecel ato milipalaway a demak. Ano eca ka tooren ko saali no tawki wa mafalah ko tayal, kawra, kamayanay cingra mitadtad to sapi tooraw cingra to palinian no Kawas, malo moecelay a tamdaw.—Loma 13:1-4; Hipray 13:18.

2. Wa malalengo kita to maanan a salicay? Misamaanay?

² Oniya tatoloay a salikaka paihkalay to maanan a capeling hani? Alatek mahapinangay iso ko timoloay ato soˈliˈlinay a capeling. Kawra, iraayho ko marocekay a madimadi nangra. Madimadiay cangra ci Yihofaan, cowa pisafelit to palinian Ningra, samanen marocekay madimadi cangra to Kawas. Maedeng malikoay ci Yihofa toniya tatoloay salikaka, mitokelay kita maliko ko kakarayan Wama kitaanan. Mihaenay malalengo kita to ilaenoay salicay: “O maanan ko ‘marocekay a madimadi’? Hano pairaen ita koniya capeling? Sasamaan kita misetek to falocoˈ, itini i pasangaray siˈayawen a ˈawaled, mitafo to marocekay a madimadi?”

3. (1) Pakaynien i mihodopay to Kawas a tamdaw, o manan ko marocekay a madimadi hani? (2) Samaanay a tinakoan ngaˈay padama kitaanan cipinang to tatodong no marocekay a midimadi?

³ Pakaynien i mihodopay to Kawas a tamdaw, “marocekay a madimadi”, o misarocoday ko falocoˈ maolah ci Yihofaan, tanektekay a madimadi Cingraanan, ˈayaw no mamisaˈosi salakatho, mamiharateng to araaw ni Yihofa. Hano haenen ko sowal hani? Itini Fangcalay Cudad, o tatodong no “marocekay a madimadi”, awaay ko patelac, awaay ko samoˈ, masongilaˈay, sanay ko tatodong. Tinakoen, saˈosi no Sarikec ni Mosi, patoˈaya ko Israil tamdaw ci Yihofaan i, o awaay ko samoˈ a ˈaˈadopen ko patoˈayaen. * (Lifi 22:21, 22) Cowa ka ngaˈay patafang to masamoˈay ato adadaay a ˈaˈadopen. Misaaretengay ci Yihofa to tanoktokay ato masongilaˈay a sapatoˈaya. (Malaki 1:6-9) Misamaanay hani? Ngaˈayay tano tinakoen a mitadtad: Ano micakay kita to dafong i, o losay, o cudad anca lalosidan, cowa ka olah kita to cidangocay, anca cangoˈot ko keskes, oyaan awaay ko dangoc a dafong ko kaolahan ita. Mahecaday ko pinengneng ni Yihofa kitaanan, paihkal to olah ato madimadi ita, wa o marocekay, masongilaˈay.

4. Hano cowa ko malefotay aca a tamdaw ko ngaˈay mitafo to marocekay a madimadi hani?

⁴ Alatek adihayay ko dangoc no niyah, marariday a mararaw. Mihaenay edengan o malefotay tamdaw ko ngangaˈay mitafo to marocekay a madimadi han? Cowa. Tosaay ko lalangian parihaday to falocoˈ ita. Saka cecay, cowa ko dangoc aca ko minengnengan ni Yihofa. ˈOlic 130:3 sanay: “Ano nitilidan Iso ko raraw niyam i, cima ko mamaedeng a miliyas to pitefoc Iso saw?” Mafanaˈay ci Yihofa to cowa ko malefotay kita, mararaway ko demak, kawra makahiay Cingra misodod kitaanan. (ˈOlic 86:5) Saka tosa, citolasay ko ˈicel ita, cowa pisaali ci Yihofa midemak to mataˈlifay ko ˈicel ita a demak. (ˈOsien ko ˈOlic 103:12-14.) Itini pinengneng ni Yihofa, samaan kita ngaˈ, o marocekay, awaay ko samoˈ, masongilaˈay hani?

5. Mitafo to marocekay a madimadi, hano sakakaay ko olah hani?

⁵ Ano sapitafoaw to marocekay a madimadi, o olah ko sakakaay. Pakayni i olah ato madimadi to kakarayan Wama, cowa ko cidangocay, o masongilaˈay. Ano misiˈayaw kita to sapalifet i, kamayanay misarocod maolah ci Yihofaan, mahaen wa ngaˈay kita mitafo to marocekay a madimadi. (1 Rayray 28:9; Matay 22:37) Haratengen ko isatapang a tinakoan. Oniya tatoloay salikaka hano mihaen cangra a misaˈosi hani? Coko sakahemekaw koya kaying salikaka i picudadan han? Maolahay koya kapah salikaka itira i fawahan a malikaf no cafay micudad han? Oya tawki no paro no lomaˈ maolahay cingra malahdaw ko tayal han? Cowa ka hatira. Samanen, mafanaˈay cangra to moecelay palinian ni Yihofa, hanaca o harateng nangra sahtoay o, samaanen pakahemek ko kakarayan a Wama. Samanen oya tatoloay salikaka maolahay ci Yihofaan, mansa, ˈayaw no misaˈosi isalakatay miharateng Cingraanan. Mikitini saˈosi nangra, mahapinangay ita, o waywayan nangra sahtoay o marocekay a madimadi.

6. (1) Hano pairaen ita ko marocekay a madimadi a capeling hani? (2) Ci Atam aci Ifa hano caka pitafo to madimadi hani?

⁶ Hano pairaen ita ko marocekay a madimadi hani? Cisasaay ci Satan ci Yihofaan, cisasaay cingra to araaw ita midoko to Kawas. Misafelitay cingra to Kawas, mansa ci Satan han ko ngangan, tatodong o ‘Misaˈadaay.’ Pakaditay cingra to ngangan ni Yihofa, mitonganganay Cingraanan, o mariˈangay a mikowanay  Cingra, misatekeday ato misamangahay, sanay. Ka adayayan i, mirienangay ci Atam aci Ifa to kapot ni Satan, misafelit ci Yihofaan. (Satapangan 3:1-6) Ngaˈayay ci Atam aci Ifa mitongal to olah ci Yihofaan, kawra misiˈayaw to hinapec ni Satan i, cowa ka marocek ato masongilaˈ ko olah nangra. Mihaenay, wa ira ko tamdaw ngaˈay paihkal to marocekay a madimadi ci Yihofaan hokira? Aira ko tamdaw mitafo to madimadi han? O hatiniay a hinapec, mafekaday i tireng ni Yopu.

7. Pakayni marocekay a madimadi ni Yopu, samaanay ko pinengneng ni Yihofa aci Satan?

⁷ Maˈoripho ci Yopu i, malakoliay ko Israil tamdaw i Icip. Itiya, o samadimadiay ci Yihofaan ci Yopu. Mahecaday cingra kitaanan cowa ka lefot, mararaway ko demak, kawra marocekay a madimadi ci Yopu, hato maolahay ci Yihofa cingraanan. ˈAyaw ni Yopu, maedeng na malikafayto ci Satan ci Yihofaan, awaay ko tamdaw madimadi Cingraanan sanay. Mihaenay, papisinanotan ni Yihofa ci Satan ci Yopuan, samanen o waywayan ningra wa ngaˈay misawacay to misamangahay ci Satan. Sapalifetaw ci Satan to madimadi ni Yopu, mihaian ni Yihofa mifekad koniya demak, pakasoˈlinay Cingra ci Yopuan wa mitafo to marocekay a madimadi.​—ˈOsien ko Yopu 1:8-11.

8. Samaanay ci Satan miˈodis ci Yopuan?

⁸ Tada mariˈangay ci Satan, mipatayay to tamdaw. Palahdawan ko hafay ato sikawdan ni Yopu, mitonganganayho cingra. Miˈodisan ni Satan ko paro no lomaˈ ni Yopu, mipatay to ˈorip no 10 a wawa ningra. Midokaˈayho to tireng ningra, mikitini fongoh tahira saripaˈ, manoˈnoˈay ko dokaˈ, tada adadaay. Pakidemay ko somad no fafahi ningra, singki sanayto, papisawad ci Yopuan a madimadi to Kawas, kapatay  ko ngaˈay. Soˈlin sakapatayaw ci Yopu, kawra kamayan a mitafo to marocekay a madimadi. Ikor, o roma a pakayraan ko sapiˈodis ni Satan ci Yopuan. Saka dademakan ni Satan ko tatoloay widang ni Yopu a misetiˈ cingraanan, oniya tatoloay pinaay romiˈad malacafay cingraanan, awaay ko sahinom cingraanan. Awaay ko siniˈada nangra a mirikec ato milikaf cingraanan, somowal to o Kawas ko pairaay to roray ni Yopu, cowa ka ciharateng ko Kawas to pitafo ni Yopu to marocekay a madimadi ningra sanay. Somowalayho to tatiihay a tamdaw ci Yopu, mansa micada to hatiniay a sayfang sanay.​—Yopu 1:13-22; 2:7-11; 15:4, 5; 22:3-6; 25:4-6.

9. Soˈlin misiˈayaw to sapalifet ci Yopu kamayan misamaan to demak cingra hani ?

⁹ Samaanay ci Yopu misiˈayaw to tatiihay a pakayraan hani? Haratengen ita to cowa ko malefotay cingra, mansa mapoˈi cingra toya tatoloay a cowa pihinom a widang, halo macalohay a somowal to tatiihay a sowal. Sapi sawacayaw cingra to moecelay ko niyah, cowa piharateng to moecelay ni Yihofa. (Yopu 6:3; 13:4, 5; 32:2; 34:5) Nikawrira, itini i kadayayan a pakayraan, kamayan ci Yopu madimadi ci Yihofaan, cowa pakasoˈlin to mangah noya widang. Sanay ci Yopu: ‘Cowa pihai kako to o moecelay tamdaw kamo, tahira i patay cowa ko mamifalah kako to marocekay a madimadi!’ (Yopu 27:5) Mahapinangay ita, soˈlin tahalifa to masamaamaanay a sapalifet, kamayan ci Yopu tanektek a mitafo to marocekay a madimadi. Ano mafiloay ni Yopu i, wa pakafilo kita.

10. O sapakokot ni Satan, samaanay ko pilingat tisowanan hani?

¹⁰ O sapakokot ni Satan, samaanay ko pilingat tisowanan hani? Cisasaay ci Satan, cowa ko soˈlinay a maolah ci Yihofa tisowanan, somowalayho cingra, wa mipiliˈ kiso milidong to ˈorip no niyah, eca ka pidoko to Kawas, cowa ko mamadimadi kiso ci Yihofaan sanay! (Yopu 2:4, 5; Paˈarawan 12:10) Mihaen a pakokot ci Satan tisowanan, mamasomad kiso hokira? Haratengen hena: Pakasoˈlinay ci Yihofa tisowanan, mansa mihai papilifet ci Satan tisowanan, ngaˈayay paihkal kiso to marocekay a madimadi, ngaˈay misawacay to mararaway ci Satan. Mikiˈokayho ci Yihofa papadama tisowanan mitafo to madimadi. (Hipray 13:6) O satadamaanay a Tatapangan pakasoˈlin tisowanan, tada o kalikoanto! Nohatini mafanaˈayto kiso hano masakalimlaan ko marocekay a madimadi han? Ano marocekay a madimadi kita to Kawas, wa ngaˈay milowid to saeko ni Satan, ngaˈayho midipot to fangcalay ngangan no Wama, halo midopo to sapikowan Ningra. Ano o kalimlaan ko marocekay a madimadi, sasamaan kita a mitafo hani?

11. Mikitini ci Yopuan ngaˈay kita minanam to maanan?

¹¹ Toniya matomesay ko pasangaray “salikoray a ˈawaled”, matongalay ko piˈodis ni Satan kitaanan. (2 Timoti 3:1) Itini toniya pasangaray a pakayraan, sasamaan kita misetek to falocoˈ mitafo to marocekay a madimadi hani? Ngaˈay kita minanam ci Yopuan. Misiˈayaw cingra to sasa ni Satan i, padotocay a madimadi to Kawas. Dotoc, wa milengo kita to toloay pakayraan ni Yopu a marocek a madimadi.

12. (1) Samaanay ci Yopu palahad to mangodoay ci Yihofaan a falocoˈ hani? (2) Samaan kita mitodong ci Yopuan hani?

¹² Palahadan ni Yopu ko mangodoay ci Yihofaan a falocoˈ, padamaay cingraanan matongal ko kaolah to Kawas. Miceriday ci Yopu miharateng to misangaˈan ni Yihofa a maamaan. (ˈOsien ko Yopu 26:7, 8, 14.) Mihayay ci Yopu citolasay ko kafanaˈ to serayan, ano maharateng ningra ko sera, ˈoˈol, kakereng i, nai falocoˈay a mangodo to Kawas. Misaaretengay cingra to sowal no Kawas, sanay:  “Mararid kako a maˈimer to limoˈot Ningra.” (Yopu 23:12) Nai falocoˈay a mangodo ci Yopu to kasapaan a demak ni Yihofa. Mangodoay ato maolah cingra to kakarayan Wama sapakahemekaw Cingraanan. Mihaenay matongalay ko sapitafoaw to marocekay a madimadi. Ngaˈayay nanamen ita ko taˈarawan ningra. Mikikakaay ko adihay no kafanaˈan ita to kasapaan a masangaˈay, ngaˈayay kita miˈosi to polong a Fangcalay Cudad, tangongol ko kafanaˈ ci Yihofaan. O mananamay ita a kihcod, ngaˈayay padama to niyah tangongol ko pikangodo ci Yihofaan. Ano mangodo kita to Kawas, misaareteng to araaw Ningra, wa matongal ko olah Cingraanan, makalimay a midoedo Cingraanan, misetek to falocoˈ mitafo to marocekay a madimadi.—Yopu 28:28.

13-14. Itini maanan a pakayraan midoedo ci Yopu ci Yihofaan hani? Samaan kita minanam to taˈarawan ningra hani?

¹³ Kihcod a demak midoedoay ci Yopu to Kawas, padama cingraanan mitafo to marocekay a madimadi. Mafanaˈay ci Yopu sapitafoaw to marocekay a madimadi, kalimlaan ko pidoedo ci Yihofaan. Ano misaliyaliyaw a midoedo to Kawas, sapitafoaw to madimadi a falocoˈ wa tanektek. Misaˈicelay ci Yopu itini kaˈorip a midoedo to Kawas. Tinakoen, minaˈonay cingra malacafay to fafahiyan. (ˈOsien ko Yopu 31:1.) Ciraramodayto ci Yopu, mansa mafanaˈayto cowato ka ngaˈay makalim ko falocoˈ to potalay a fafahiyan. Anini, matomesay ko sakayhid to madadiˈiyay noniya hekal. Wa mahecad kita ci Yopuan, aka makalim to potalay a fafahiyan anca faˈinayan han? Wa manaˈay kita minengneng to kaackan a sasing han? (Matay 5:28) Ano misaˈicel kita miˈimer to tireng, wa tanektekto a mitafo to marocekay a madimadi.

¹⁴ Itiniayho i maanan a pakayraan midoedo ci Yopu ci Yihofaan hani? Ira ko matatodongay pinengneng to hafay. Mafanaˈay ci Yopu ano mitiˈer to dafong no niyah, aretengayto ko raraw ningra, mamicada to sasayfang. (Yopu  31:24, 25, 28) Oniya lekakawa misaaretengay to pakadafongay, ano tooren ita ko safalod no Fangcalay Cudad, matatodong ko pinengneng to hafay ato dafong, wa ngaˈay ciˈicel misetek ko falocoˈ, mitafo to marocekay a madimadi.​—Taneng 30:8, 9; Matay 6:19-21.

15. (1) Misarocoday ci Yopu to maanan, padama cingraanan padotoc marocekay a madimadi? (2) Itini tinakoan ni Yopu, mananam ita ko maanan?

¹⁵ Misarocoday ci Yopu to sapalifon ni Yihofa, padama cingraanan padotoc marocek a madimadi. Mafanaˈay cingra, misinanotay ko Kawas cingraanan madimadiay hokira. (Yopu 31:6) Soˈlin tahalifaay to sapalifet, pakasoˈlinay ci Yopu wa palifonen ni Yihofa noikor. Mihaenay ngaˈay cingra mitafo to marocekay a madimadi. Maˈaraway ni Yihofa tada mahemekayto, mansa pafelian Ningra ko cowaho ka lefot a Yopu to kadofahay a sapalifon! (Yopu 42:12-17; Yakop 5:11) Noikor, wa malifokho ni Yopu ko adihayay a raheker. Pakasoˈlinay kiso, wa pafeli ci Yihofa to sapalifon pakayni i marocekay a madimadi no miso han? Sowal no Fangcalay Cudad, cowa ka falic ci Yihofa. (Malaki 3:6) Haratengen ita, papalifonen ni Yihofa koya marocekay a madimadi a tamdaw, wa misaˈicel kita mitafot to marocekay a madimadi, ato milifok to fangcalay a noikoran.​—1 Tisalonika 5:8, 9.

16. Misetek kita to falocoˈ midemak to maanan hani?

¹⁶ Misetek ko falocoˈ ita, tahadaˈoc a marocek ko madimadi to Kawas. Nolatekay, edengan ko niyah aca ko misaˈicelay a mitafo to marocekay a madimadi, sanay ko harateng iso. Kawra, aka matawal, iraay ko pina soˈot a ˈofad a tamdaw, mahecaday tisowanan marocekay a madimadi to Kawas. Ano mihaen i, o mitodongay to madimadiay a sikawdan nolitengan, pakasoˈlinay cangra to Kawas, soˈlin misiˈayaw to saroero no patay, kamayan mitafo to marocekay a madimadi. (Hipray 11:36-38; 12:1) Mitokel kita mahecad ko harateng ci Yopuan, ‘tahira i patay cowa ko mamifalah kako to marocekay a madimadi!’ Nanay o marocekay a madimadi ita tahadaˈoc a paˈdil ci Yihofaan!