1-2. (1) Samaanay a pakahemek ko Fangcalay Cudad ci Mosian? O maanan ko midemakan ningra hani? (2) Hano papalahad kita to madaˈmaˈay a capeling hani?

SOWAL no Fangcalay Cudad: “Itini i polong no tamdamdaw i, awaay ko milecaday to [madaˈmaˈay] ni Mosi.” (Saˈosi 12:3) O malonayay ci Mosi, awaay ko pinangan a misaˈosi, misiˈayaw to pisafelit o talalikoray a tamdaw cingra han? Harateng no roma tamdaw, o mahaenay ko madaˈmaˈay tamdaw sanay, kawra cowa ka tatodong konini. Soˈlinay i, o tanektekay ci Mosi, tangsolay misaˈosi, hanaca timoloay a madimadi to Kawas. Padamaay ci Yihofa cingraanan, cowa ka ciˈangi to mikowanay no Icip, mikerid to 300 ˈofad a Israil tamdaw milakowit to tafotafokan, halo padama cangranan pakalowid to ˈada.

² Soˈlin cowa ka hecad kita ci Mosian, kawra misiˈayaway to pasangaray to romiˈamiˈad, misaaliay kita mitafo to madaˈmaˈay. Hano palahad kita toniya capeling, samanen mikiˈokay ci Yihofa, ‘mamilifok ko madaˈmaˈay tamdaw toniya sera.’ (ˈOlic 37:11) O madaˈmaˈay tamdaw kiso han? Minengneng ko tao, o madaˈmaˈay tamdaw kiso han? ˈAyaw no pacaˈof toniya salicay, salakatho kita cipinang to tatodong no madaˈmaˈay.

3-4. (1) O madaˈmaˈay mahecad to maanan? (2) Ano malo madaˈmaˈay a tamdaw i, o papalahad kita to maanan sepatay capeling hani? Misamaanay?

³ O madaˈmaˈay * mahecaday o makapahay a coka. Hano hatira  hani? Ano sapilaheciaw to cecay coka, misaaliay to masakenaay a makapahay kodong. Mamalo madaˈmaˈay a tamdaw kita, papalahad to pina makapahay a capeling, tinakoen o misapoeneray, midoedoay, damsayay, timoloay. Ira ko mahaenay a capeling ita, wa ngaˈay pakahemek ci Yihofaan. Misamanay?

⁴ Ira ko misapoeneray a capeling ngaˈ mamakahi midoedo to saali no Kawas, misaaliay ko Kawas to finawlan Ningra damsayen ko waywayan. (Matay 5:5; Kalatiya 5:23) Mitoor kita to saali no Kawas a dademak, tada mangolaway ci Satan. Soˈlin o misapoeneray a tamdaw kita, damsayay a micada tono hekal a tamdaw, kamayanay a ˈinteh kitaanan. (Yohani 15:18, 19) Ano sapilowidaw kita ci Satanan, misaaliayho to timolo.

5-6. (1) Hano ˈintehay ci Satan to madaˈmaˈay a tamdaw? (2) Wa milengo kita to maanan a salicay?

⁵ O misatakaraway a tamdaw, cowa ko madaˈmaˈay, cowa pakaˈmet to keter, cowa ka pidoedo ci Yihofaan, marocekay ni Satan koniya pinangan. Mansa ˈintehay cingra to madaˈmaˈay a tamdaw! Pafafidaˈay cangra to sahalaka ni Satan, cowa ka hatiniay aca, misawacayho cangra to samangah ningra, ano o maananto ko sowal ato midemakan ningra, cowa ko pakaconged to madaˈmaˈay tamdaw a midoko ci Yihofaan.​—Yopu 2:3-5.

⁶ Malo o madaˈmaˈay tamdaw hano pasangaray hani? Hano padotocen ita mitafo to madaˈmaˈay hani? Minanam kita to taˈarawan no madimadiay sikawdan, wa mahela ko caˈof. Dotocto wa minengneng to maˈoningay ni Mosi, ato maholiway tayra i Papilon a tatoloay Hipray kapah, aci Yis.

7-8. Cowa ka ngodoen no tao ci Mosi, samaanay ko demak ni Mosi?

⁷ Cifadangalay: O cifadangalay a tamdaw mitafo to madaˈmaˈay, latekay pasangaray, ano caka ngodo ko tao anca cisasa to misaˈosian nangra i, cowa ko madoloay. Tahalifaay kiso to hatiniay a demak han? Ano cowa ka ngodo ko paro no lomaˈ tisowanan, wa samaan ko harateng iso hani? Sinanoten ko taˈarawan ni Mosi.

⁸ Minilnilan ni Yihofa ci Mosi malaˈaˈideman no Israil, papitilidanho to rikec no Israil. Soˈliˈlin midamaan ni Yihofa ci Mosi, nikawrira, misafelitay ko kaka ningra ci Miriam aci Aron  cingraanan, malikaf to mipiliˈan ningra a fafahi. Alatek mamaketer ci Mosi, sapicoˈayaw to tao, kawra cowa pihaen cingra. Cowa ka ranikay a maketer cingra, mingitangitayho ci Yihofaan aka pitefoc ci Miriaman. (Saˈosi 12:1-13) Hano ngaˈay ci Mosi mitafo to madaˈmaˈay hani?

9-10. (1) Padamaay ci Yihofa ci Mosian mihapinang to maanan? (2) O tawki no lomaˈ ato malohemay malitengay ngaˈay mitodong ci Mosian to maanan?

⁹ Makahiay ci Mosi micada to pahatatanaman ni Yihofa. ˈAyaw no 40 miheca, itiniay i lomaˈ no hongti no Icip, cowa ko madaˈmaˈay cingra itiya. Ya ranikayay a maketer cingra, mipatayay to misamsamay to tao a tamdaw. Misatakaraway ci Mosi itiya, wa mihayda ko Kawas to demak ningra sanay. Ikor, padamaan ni Yihofa cingra 40 miheca, cowa ko tano ˈicel aca ko pikerid to Israil tamdaw; misaaliayho to madaˈmaˈay a capeling. Malo madaˈmaˈay tamdaw, pairaen ko misapoeneray, midoedoay, damsayay a capeling. Micadaay ci Mosi to pahatatanaman no Kawas, malo tadamaanay a kantok.—Kasadakan 2:11, 12; Dmak 7:21-30, 36.

¹⁰ O tawki no lomaˈ ato malohemay malitengay, ngaˈay mitodong ci Mosian, ano caka ngodo ko tao i, hamaan ranikay a maketer, misapoener a mihai to mararaway ko niyah. (Patnakay 7:9, 20) Ano misaysay to pasangaray i, doedoen ko sakayat ni Yihofa, damsay a pacaˈof to tao. (Taneng 15:1) Ano mihaen ko demak no tawki no lomaˈ ato malohemay malitengay, wa pakahemek ci Yihofaan, matongal ko rihaday a kacacawmaˈ, patireng to madaˈmaˈay a taˈarawan.

11-13. Patirengay ko tatoloay Hipray kapah to maanan a taˈarawan hani?

¹¹ Sapalak: Nano litengan tahanini, romaroma mikowanay misamsamay to finawlan no Kawas. O pakayraan mahawpay ko pikokot kitaanan, samanen, ‘tatooren niyam ko Kawas, cowa ko tatooren ko tamdawˈ. (Dmak 5:29) Alatek malikaf, mapalit kita, anca masaloyaˈ to tireng. Kawra, padamaay ci Yihofa kitaanan, caka tano tatiihay ko pacoˈay to tatiihay, soˈlin tahalifaay to sapalifet, kamayan mitafo to damsayay.

¹² Nengnengen ita ko tatoloay a Hipray kapah—ci Hananiya, Misali aci Acariya. * Maholiway cangra tayra i Papilon, papitaˈongan no hongti cangra to samiyay. Damsayay cangra a mitadtad to lalangian, eca ka pitaˈong to samiyay. Soˈlin patalaw ko hongti to cacefongen i marengrengay ko namal a parod, kamayanay cangra midoedo to Kawas, cowa pitiˈer to ˈicel no niyah. Tangsolay ci Yihofa milidong  cangranan, soˈlin cowa ka fanaˈ cangra mamihaen ko demak ni Yihofa. Ano ecato ka pilidong ci Yihofa i, makahiay cangra midoedo Cingraanan tangasa i patay. (Taniil 3:1, 8-28) Soˈliˈlin, iraay ko taˈangayay a ˈicel i falocoˈ no madaˈmaˈay tamdaw, saka timoloayto tahalifa to sapalifet. Awaay ko manan a fadangalan, pipatalaw ato pisamsam ngaˈayay miconged to madaˈmaˈay tamdaw, ‘misacecay a maolah’ ci Yihofaan.​—Kasadakan 20:4, 5.

¹³ Ano tahalifaay kita to sapalifet i, sasamaan kita mitodong to taˈarawan no tatoloay Hipray kapah a madimadi ci Yihofaan hani? Sapoeneren ko falocoˈ, pasoˈlin to Kawas mamidama kitaanan a midemak to matatodongay a demak. (ˈOlic 118:6, 7) Ano mapakokot no tao i, tano damsayay, mikangodoay a waywayan pacaˈof cangraanan ngaˈ ngaˈay. (1 Pitiro 3:15) Aka a papipalaken ko maanan a demak to kalalaˈed no niyah ato kakarayan Wama.

14-15. (1) Ano misiˈayaw kita to saroero i, wa samaan aki? (2) Itini i saroeroan, samaanay ci Yis patireng to taˈarawan, mitafo to madaˈmaˈay? Tadtaden. (Isaya 53:7, 10)

¹⁴ Saroero: Ano misiˈayaw to maanan a pasangaray i, wa ira ko taˈangay saroero ita alatek, patinakoen mamisaday to sasikingen, sapilaheciaw to tayal, anca misimsim to o maanan ko sapiadah hokira. Ano ira ko saroero i, mitafo to madaˈmaˈay, cowa ko madoloay. Ya mimingay a demak na cowa ka keter kiso, kawra mikalisangaay tisowanan nohatini. Alatek o sowal ita cicekayto, cowato ka ngodo to tao. Ano mihaen i, sasinanoten ko taˈarawan ni Yis.

¹⁵ Salikorayto pina folad ci Yis i hekal, misiˈayaw to taˈangayay a saroero. Mafanaˈay cingra wa misemsem ko niyah, ikor patayen. (Yohani 3:14, 15; Kalatiya 3:13) ˈAyaw no kinafalah to ˈorip cingra pina folad, tada malotayay ko niyah sanay cingra. (Luka 12:50) ˈAyaw no patafang to ˈorip pina romiˈad, sanay cingra: “Marawraw ko falocoˈ ako.” Mitolonay cingra mihadak to nafalocoˈan i Kawas, sanay ko sowal: “Wamaaw, paliyasen kako imatini naitini tonini a demak. Nikawrira, onini ko patosokan ako a tayni i hekal. Wamaaw, patalahkalen ko nika tadamaan Iso!” (Yohani 12:27, 28) O satolon ni Yis mahapinangay ita to misapoeneray cingra, midoedoay to Kawas. Timoloay cingra misiˈayaw to ˈada. ˈArawhan tano pakangodoay, misamsamay a pakayraan ko pipatay nangra ci Yisan. Nikawrira, hakowato ko macadaay ni Yis a saroero ato adada, kamayan midofdof to araaw no Kawas a midemak. Tada o sangaˈayay a taˈarawan ita ci Yis, soˈlin misemsem cingra kamayan mitafo to madaˈmaˈay.​—ˈOsien ko Isaya 53:7, 10.

16-17. (1) Midemakay ko tarokos to maanan a demak, hato pasangaray ci Yis mitafo to madaˈmaˈay? (2) Samaanen ita mitodong ci Yis hani?

¹⁶ ˈAyaw no patay ni Yis, o sangaˈayay a widang ningra miliyawho a macacoli. Pasangarayto ci Yis a mitafo to damsayay. Toya dadaya, iraay ko taˈangayay a saroero ningra, kawra mafanaˈay cingra, edengan madimadi patafang to ˈorip, wa ngaˈay malifok no tamdaw ko tahadaˈocay a ˈorip. (Loma 5:18, 19) Mafanaˈayho ci Yis, o waywayan ningra malingatay ko paˈdil to Wama. (Yopu 2:4) Oya salikoray a lafi, macacoliayho ko tarokos to ‘o cima ko satadamaanay’, ato ‘malacongisay’ cangra. Soˈlin ˈayaw noya dadaya, misaliyaliyaway ci Yis patalipaˈelal cangraanan! Kawra, cowa ka ngolaw ci Yis. Miliyawayho cingra tano siniˈadaay, tanoktokay a pakayraan, damsayay a pasifanaˈ cangranan, to samaanen misalof to tatiihay a waywayan, ikor pakahemekay ci Yis to nisawawaan madimadiay midama cingraanan.​—Luka 22:24-28; Yohani 13:1-5, 12-15.

¹⁷ Ano misiˈayaw to hatiniay a pakayraan i,  sasamaanen iso midemak hani? Ngaˈay todongen ci Yis, soˈlin ira ko saroero, mitafoayho to madaˈmaˈay a waywayan. Makalim kita mitoor to sapalimoˈot ni Yihofa, ‘tano olah a masasodosodod’. (Kolosay 3:13) Haratengen, o sowal ato midemakan ita alatek pakararaway to tao, ano mihaen ko harateng ita i, wa madoloto a midoedo to limoˈot ni Yihofa. (Taneng 12:18; Yakop 3:2, 5) Kita i, parariden pakahemek to kangaˈayan no tao.​—Ifiso 4:29.

18. Samaanen ni Yihofa padama ko madaˈmaˈay a tamdaw matatodong ko misaˈosian? Kawra sasamaan ko hademak ita hani?

¹⁸ Ano madaˈmaˈay a tamdaw mitafo to misapoeneray, wa ira ko sangaˈayay a misaˈosian. Ano mafokil to sasamaan koha demak i, wa padama ci Yihofa kitaanan matatodong ko misaˈosian, samanen mikiˈokay Cingra, ‘mamitengil to satolon no madaˈmaˈay tamdaw.’ (ˈOlic 10:17) Hanaca cowa ko pitengil aca to satolon ita, “keriden Ningra ko [madaˈmaˈay] a tamdaw a papidoedo to moecelay a lalan.” (ˈOlic 25:9) Pakaynian ni Yihofa i Fangcalay Cudad a mikayat kita, pakayniayho i mitepangan no ‘madimadiay citanengay a koli’ a cudad *, ika ato saˈopo a mikayat kitaanan. (Matay 24:45-47) Sapoeneren ko falocoˈ ita micada to sadama ni Yihofa, micekiw to noˈadingoan a lalakaw, ato misaka dademak to minanaman i nokaˈorip ita.

19-21. (1) Itini i Katis, mararaway ci Mosi to maanan? (2) Wa mananam ita ko maanan?

¹⁹ Ano mitafo to madaˈmaˈ kita, ngaˈay maliyas ko sakararawaw. Nengnengen ko nalifetan ni Mosi. Halafinay madaˈmaˈ cingra, misaˈicel a midoedo ci Yihofaan. Nikawrira, mataˈlif ko 40 miheca, tahirato salikoray no kalafel no Israil i kohkohan i, cowa padotoc ci Mosi a mitafo to madaˈmaˈay. Itiya, o kaka ni Mosi ci Miriam—na milidongay cingraanan i Icip—patay sanayho, mitademan i Katis. Ikor, miliyawayho ko Israil tamdaw a somowal to cowa ka ngaˈayay ko pidimokos, sanay cangra. “Paculi ci Mosian” cangra, “awaay haca ko nanom” saan a ngaliwngiw. Ci Yihofa papidemakenho ci Mosian to adihayay a kafahkaˈan, halo cowa pisateked ci Mosi a mikayat to finawlan, kamayan cangra a ngaliwngiw. Ngaliwngiway cangra to cangoˈotay ko nanom, mirorohay ci Mosian, hano pataynien cangra  i hatiniay a kohkohan sanay.​—Saˈosi 20:1-5, 9-11.

²⁰ Tada mangolaway ci Mosi, cowa pitafo to damsayay. Cowa pidoedo cingra to limoˈot ni Yihofa a “pasowal toya ˈongcoy”, ao mirikecay a mapoˈi to finawlan, wa midemak to kafahkaˈan ko niyah, sanay ci Mosi. Dotoc i, kinatosa a misetiˈ toya ˈongcoy a papipasadak to nanom. ˈArawhan misatakaraway ato maketer cingra a mararaw ko demak. (ˈOlic 106:32, 33) Ka adayayan i, samanen cowa pitafo to madaˈmaˈay ci Mosi, cowato ka ngaˈay a micomod i mikiˈokan a pala.​—Saˈosi 20:11, 12.

²¹ Mikitini i nalifetan ni Mosi, mananamay ita ko kalimlaan a sapasifanaˈ. Saka cecay, padotocen ita a mitafo to madaˈmaˈay. Ano misakahmaw kita toniya capeling, wa mala takaraway tamdaw alatek, teloc i, mararaw ko sowal ato waywayan. Saka tosa, pakalonayay ko saroero to tamdaw, mihaenay ano ira ko saroero, mamisaˈicel kita a mitafo to madaˈmaˈay.

22-23. Hano papadotoc kita a mitafo to madaˈmaˈay?

²² Ano mala madaˈmaˈay a tamdaw kita, wa milifok to sadipot. Cato ka halafin, palahdawento ni Yihofa ko tatiihay a tamdaw, edengan o madaˈmaˈay a tamdaw ko mamaterek, wa dipayal ko cikiw. (ˈOlic 37:10, 11) Wa mala madaˈmaˈay a tamdaw kiso han? Ano doedoen iso ko sowal ni Yihofa, wa ngaˈay mikapot to lalomaˈ no madaˈmaˈay tamdaw, tahadaˈoc a materek itini i Lakoing.​—ˈOsien ko Cifaniya 2:3. *

²³ Hano pasowal ko Cifaniya 2:3, ‘Alatek ngaˈay madipot kamo’? Ci Yihofa cowa ko mamidipot to kaolahan Ningra a tamdaw? Cowa ka saan. O tatodong i, ano mitafo kita to madaˈmaˈay tangasa i tolas, wa ngaˈay milifok to sadipot no Kawas. Saˈicelen ita micangacang to madaˈmaˈay, ato pakahemek ci Yihofaan, mamilakowit to ‘kangolawan ni Yihofa a romiˈad’, tahadaˈoc a maˈorip.