Itiniay kako i Kanata a Kwipik a hofocen, ono Frans ko sowal no Kwipik a niyaroˈ. O wama ato wina ako ci Loi aci Celiya tada maolahay takowanan. Maomoyay ko wama, maolahay miˈosi. Kako saan maolahay mitatilid, nanay malo milosiyangay no ikor.

12 ko mihecaan ako i, o cafay no wama matayal ci Lotawfo Sosi ato widang ningra tayniay i lomaˈ niyam, o Misawacayay Tamdaw ni Yihofa cangra. Cowa ka cipinang kako to Misawacayay Tamdaw ni Yihofa itiya, cowa ka olah to pihakelongan nangra. Kawraan masemeray kako ano pacaˈof cangra to salicay i, mafanaˈay tano Fangcalay Cudad matatodong ko sapacaˈof. Cowa ka pawan ko wama wina ako tonini, mansa misetek to falocoˈ misatapang minanam to Fangcalay Cudad.

Itiya, itiniay kako no Tingsokiw a picudadan mitakci. Latekay, malalengoay kako to cafay micudad to mananamay ako a lalakaw i Fangcalay Cudad. Ikor, matengilay no singsi koniya demak. Soˈlin o simpo cingra, kawra cowa ka tano Fangcalay Cudad a misawacay to mararaway ko sowal ako. O cecay simpo itiniay ˈaˈayaw no ˈalomanay a mikapoˈi takowanan to mitowakangay sanay! Taˈangayay ko saroero noniya demak takowanan, kawra padamaay takowanan konini mihapinag to misafelitay to Fangcalay Cudad ko sapasifanaˈ no picudadan. Cowato ko papadadotoc kako materek toniya picudadan sanay ko harateng ako, mihai ko wama wina toniya saˈosi ako i, malinahayto kako a micudad.

Soˈlin padadotocay kako minanam to Fangcalay Cudad, kawra manaˈonay ko kacakat,  samanen matalaway kako pakalomalomaˈ a mitosil. Taˈangayay ko fadangalan no Tingsokiw itiya, hanaca pakidemay ko pisafelit to mitosilay a tayal no mita. O tapang no Kwipik ci Molis Topolaysi malakangaˈayay to kiyokay, itini sadama ningra, marariday ko mariˈangay tamdaw mikalisanga ato misetiˈ to Misawacayay Tamdaw ni Yihofa. Itiya, mahadak a mitosil tada misaaliay to timoloay.

O salikaka ci Yohani Li o saka 9 liyad micodiyap i Kiliyat Picudadan, taˈangayay ko sapadama ningra takowanan. Kadofahay ko milifetan ni Yohani, damsayay misapoeneray, ngaˈayay ingiden, cowa ka patodicek saan a palimoˈot takowanan, patirengay to taˈarawan. Cowa ka ngaˈay kono Frans a sowal ningra, mansa marariday kako kalacafay cingraanan a mitosil, padama to miming cingraanan. Malawidang ci Yohanian, pairaay to timolo ako malo Misawacayay Tamdaw ni Yihofa. Ikor no minanam kako to Fangcalay Cudad 10 miheca, itini 1951 miheca 5 folad 26 romiˈad micadaay to paputisem.

Soˈlin kaemingay ko kasakopang niyam, kawra ˈalomanay ko misakafahay. Mapakalalokay kako, misatapangay a micerid a misakafah. Itiya, pakalomalomaˈ kami a mitosil cowa kangaˈay misaka dademak to mitepangan a cudad, misongilaˈay misaka dademak to Fangcalay Cudad. Mihaenay, mamisaˈicel a minanam to sinael, paˈading to soˈlinay kimad. Kawraan, cowa kakahi ko ˈalomanay tamdaw miˈosi to cowa ka haydaen no kiyokay a Fangcalay Cudad.

1952 miheca, mararamoday kako to cecay madimadiay fafahiyan salikaka i kasakopang, ci Simona ko ngangan ningra. Ikor malinahay kami tayra i Mongtere, caka cecay miheca, mahofocay to fafahiyan wawa ci Risan. Soˈlin ˈayaw no mararamod kami caka halafin, paselaˈay to miceriday misakafah, kawra kako aci Simona mikantangay to kaˈorip, ho ngaˈay ko paro no lomaˈ misarocod mirienang to tayal no kasakopang.

Ikor no 10 miheca, misongilaˈay kako misimsim miliyaw to misakafahay a tayal. 1962 miheca, itini Pitil no Kanata mirienangay kako to Sapahatatanam to Ciˈinorongay a Kantok, cecayay folad koniya pihatatanam. Itiya, malacafayay kako ci Kamil to cecay kafotiˈan. Iraay ko paro no lomaˈ ningra, kawra kamayan fanekfek to mitosilay a tayal, taˈangayay ko pakalalok takowanan. Itiya, cowaho ka tahatengil to o ciwawaay a  tamdaw ngaˈayay malo misakafahay i Kwipik, kawra mihaenay ko patosokan ni Kamil a midemak. Malacafay kami i, pakalalokay cingra takowanan misimsim to pakayraan no niyah. Ikor no pina folad, mahapinangay ako wa ngaˈay miliyaw a mirienang to misakafahay. Soˈlin cowa ka inaneng ko saˈosi ako saan ko roma tamdaw, kamayan misetek ko falocoˈ ako a mihaen to demak, pakasoˈlin to papadamaen ni Yihofa kako.

1964 miheca, kako aci Simona manilnilay patikol tayra i Kwipik malo mikiriwiˈay misakafahay, halafinay kami itira a mitosil. Soˈlin itiya cowato ka taˈangay ko saroero, kawra iraayho ko tamdaw mapiliˈay tamiyanan a mitosil.

Cecay kalahokan no pieneman, marepelay no dimeng kako i Senmari a niyaˈro. Mipalitan no dimengk kako, samanen awaay ko mingkiw ako a mitosil. Ikor patayraay cangra takowanan i hankang ci Payarongan, mariˈangay ko pising ningra. O cima ko pingkosi iso sanay cingra milicay takowanan, ci Krenhaw * ko pingkosi ako saan pacaˈof kako, ˈarawhan fahal sanay cingra calemcem, sowal sa cingra: “Aya lafoto koni!” Samanen itiya cinganganay a pingkosi ci Krenhaw salikaka, timoloay cingra miˈading to fadangalan no Misawacayay Tamdaw ni Yihofa. Caka halafin cowato ka pieko ko hoing takowanan.

Samanen iraay ko misafelitay, pasangaray mahela ko matatodongay a kasaˈopoan. Itini sanay i awaay ko sapadiheko a soko no paliding a masaˈopo ko kasakopang niyam. Tada kiˈetecay ko kasienawan no Kwipik, sapitongalaw to miming a faedet, misaka dademakan no salikaka ko sapilingo a palod. Tocerid ˈayaw no masaˈopo to pina tatokian, milikotay ko ˈalomanay i palod, mihadak to pakalalokay to falocoˈ a nalifetan.

Toni pina miheca, kalikiay macowat ko mitosilay a demak, tada mikowaday to falocoˈ. Itini 1960 miheca itini Kwipik niyaro, kaˈamis ato Kapis a potipot, cowa ka hakowa ko kasakopang. Kawra anini, toniya kilac tosaayto ko kasakilac, iraayho ko makapahay a Hongti Kitakit kasaˈopoan.

1970 miheca, misatapangayto kako aci Simona milisoˈ to kasakopang, 1973 miheca misatapangayto milisoˈ to kasapala. Toya miheca adihayay ko mahatatanamay ako nai milisoˈay ko demak a salikaka, ci Rawliay Samuli * aci Tafiti Splayen *. Ano mahererek ko taykay, sapacakataw to inaneng pasifanaˈ, ci Tafiti ato kako maka mihadakay to sapaini. Kinacecayay, pasowalay ci Tafiti takowanan: “Lians, maolahay kako to salikoray a kimad iso, kawra o kaadihay no lalakaw maedeng tolo ko kimad ako ngaˈ maemin a mihadak!” Itiya adihayay ko lalakaw ako a mikimad, o kantangento ako ko kimad.

Itiya Citatodongay ko kasapala kantok  pakalalok to kasakilac kantok. Kawra ˈalomanay salikaka i Kwipik mananamay takowanan, mansa milisoˈ kako i, maoalahay cangra kalacafay takowanan a mitosil. Soˈlin lipahakay malacafay cangraanan a mitosil, kawra cangoˈotayto ko toki ako kalacafay to kasakilac kantok. Kinacecayay, o cecay kasakilac kantok damsayay a patalipaˈelal takowanan: “Mipalak kiso to toki a pakalalok to salikaka tada ngaˈayayto, kawra aka mapawan toniya lipay, adihayen ko toki a kalacafay takowanan, misaaliay kako to papakalaloken!” O limoˈot ningra adihayay ko sakaciepoc ako.

1976 miheca, pakidemay ko adada no fafahi ako, caka halafin mapatayayto, tada masomaday kako. Makahiyay cingra kinafalah, maolahayho ci Yihofaan, o tada ngaˈayay a fafahi. Miakoˈiday kako ci Yihofaan toya karorayan a tatokian padadotoc a midama takowanan, pakayniay i mitosilay a tayal ko sakangaˈay ako a miremo to kasomadan. Ikor, mararamoday kako ci Kalolinan a salikaka. O misakafahay cingra, mikitiniay no Padaka ko sowal a kilac tayni Kwipik midama to mitosilay a tayal. Madaˈmaˈay cingra micada to tamdaw, nai falocoˈay a ciharateng to tao, mangalef ko halingodoay anca matoˈolay a tamdaw. Malacafayay cingra takowanan to milisoˈay a tayal, taˈangayay ko sadama takowanan.

1978 miheca saka 1 folad, manilnilay kako malo singsi no saka 1 liyad a Sapahatatanam to Misakafahay i Kwipik, calemcemay kako, samanen cowa ka mihatatanam kako toniya sapahatatanam, mafahalay kako toniya lalakaw, kao ngaˈayay i, oya mirienangay a misakafahay adihayay ko nalifetan nangra, soˈlin o singsi kako, kawra adihayay ko mahatatanamay ako mikitira cangraanan.

1978 miheca, Mongtere Olimpik piontoan iraay ko “Pakalowiday ko Pakasoˈlinay Falocoˈ” a koksay taykay. O sakinacecay a taˈangayay  taykay i Kwipik konini, mataˈlifay ko 8 efan ko mirienagay a tamdaw. Itiniay no Sinpong a Kapot no taykay matayal kako itiya, macacawmaˈay to adihayay milosiyangay. Ikor, pinaay soˈot ko mitilidan nangra to pakayniay i taykay a safanaˈ, iraayho ko tingtay ato tilifi pasadakay to pakayniay kitaanan a pilicay, mataˈlifay ko 20 tatokian. Tada makapahayto ko pisawacay itiya!

1996 miheca, iraay aca ko taˈangayay kafalic no kaˈorip ako. Na micada kako to paputisem, sahto itini i Kwipik a matayal, toya miheca manilnilay kako tayra i Toronto milisoˈ to Padaka ko sowal a kilac. Cangoˈotay ko inaneng ako, hanaca cowa ka ngaˈay kono Padaka a sowal, matalaway kako tano Padaka a sowal mikimad. Itiya marariday kako mitolon, matongalay ko pitiˈer ci Yihofaan.

Tikolen miharateng ko katayal i Toronto to tosa miheca, tada kalipahakanto a tatokian itiya. Mihadidiay ci Kalolin a pasifanaˈ tono Padaka sowal takowanan, hato macakatay kako, midamaay ko salikaka takowanan, caka halafin adihayayto ko widang niyam.

Soˈlin ˈayaw no taykay i pilipayan adihayay ko tatayalen a misaday, kawra marariday kako itini dadaya no pilimaan mipalak to cecay toki a pakalomaˈ mitosil. Sowal no roma tamdaw: “ˈIfowaay ko tayal mitaykay, hano mitosilho hani?” Sanay. Pakayni takowanan, ngaˈay malalengo to tao to Fangcalay Cudad i pitosilan o kalipahakan a demak. Nohatini, mikowaday to harateng ako ko mitosilay a demak.

1998 miheca, kako aci Kalolin manilnilay malo mikiriwiˈay misakafahay tayra i Mongtere. O pina miheca milimasmasay kako to kaˈalomanay a pisawacayan a demak ato no sinpong a demak, pakayni palahdaw to pisakinih no tao to Misawacayay Tamdaw ni Yihofa. Nohatini kako aci Kalolin maolahay masasowal toya malinahay tayni i Kanata a tamdaw halo mitosil cangraanan, makalimay cangra cipinang to Fangcalay Cudad.

Mikitini picadaan to paputisem, 68 miheca matayal kako saki Yihofaan, tada adihayay ko malifokay a sapalemed. Matongalay ko kaolah ako to mitosilay a tayal, hanaca adihayay ko mapadamaay a tamdaw mafanaˈ to soˈlinay kimad, lipahakan nanay kako. O fafahiyan wawa ato kadafo malaˈosi ko palahad to wawa, misatapangay a malo miceriday misakafah. Maˈaraw ko wawa fanekfek to mitosilay a tayal, mahinomay ko falocoˈ ako. Kakiriwiˈen ako miakoˈid ko papina widang, o ngaˈayay taˈarawan ato citanengay a limoˈot nangra, padamaay takowanan tanektek ko kalawidang aci Yihofaan, padamaayho takowanan pakadangal to masakenaay a tayal. Mahapinangay ako, dengan mitadiˈec to fangcalay saocor ni Yihofa, ngaˈ madimadi to ˈinorong. (ˈOlic 51:11) Tada koˈiday ci Yihofa patorod takowanan a pakahemek to fangcalay ngangan Ningra!—ˈOlic 54:6.