CACEKIWEN LALAKA 7
Tangongolay ko Olah Ita to Kakarayan Wama Yihofa
Maolah kita, samanen iˈayaway ko Kawas maolah kitaanan.—1 YOHANI 4:19.
RADIW 152 Tadiˈecen ko Kawas, O Nonoˈ, O ˈIcel
KALIMLAAN NO LALAKAW *
1-2. Hano mitahidang ci Yihofa kitaanan micomod i paro no lomaˈ Ningra? Pakayni toniya demak mihadakay Cingra to maanan?
MITAHIDANGAY ci Yihofa kitaanan, micomod i paro no lomaˈ Ningra a midoko Cingraanan, oniya paro no lomaˈ a tamdaw sahto mipatafangayto ko tireng to Kawasan, pakasoˈlinay to sapatefoc ni Yis. Masalalomaˈ noniya lipahakay a paro no lomaˈ tada o kalikoanto no mita! Cowa ko ka ciepoc aca ko nokaˈorip ita anini, noikor wa itini i Lakoing anca tayra i kakarayan milifok to tahadaˈocay a ˈorip.
2 Tangongolay ko olah ni Yihofa kitaanan, mansa makahi mihadak to taˈangayay a kinafalah, hato iraay ko toki ita micomod i taˈangayay paro no lomaˈ Ningra. (Yohani 3:16) Sanay ko Fangcalay Cudad, ‘ˈatekakay ko sapicakay’ kitaanan. (1 Korinto 6:20) Pakayni i sapatefoc, padamaay ci Yihofa kitaanan ira ko ngaˈayay kalalaˈed Cingraanan. Ngaˈay palo ‘Wama’ to saˈakawangay a Tatapangan tada o kalikoan a demak, hanaca mafanaˈay kita, o sangaˈayay a Wama ci Yihofa.
3. Alatek wa ira ko maanan a harateng no mita? (Nengnengen ko sapatongal lalakaw “Wa Misinanot ci Yihofa Takowanan Han?”)
3 Alatek malecad kita to mitiliday to ˈOlic a tamdaw, mahaen ko harateng: ‘Pafeliay ci Yihofa to kihcod a sidaˈit, o maanan ko sapacoˈay ako Cingraanan hani?’ (ˈOlic 116:12) Soˈlinayto, tahadaˈocto cowa ko mamaemin ita a pacoˈay ko kakarayan Wama, kawra kamayan makalim kita mihaen to demak. Sanay ko tarokos ci Yohani: ‘Maolah kita, samanen iˈayaway ko Kawas maolah kitaanan.’ (1 Yohani 4:19) Sasamaan kita paihkal toniya olah i sidaˈitay a Wama hani?
PADADOTOC A MIINGID CI YIHOFAAN
Maolahay kita to kakarayan Wama Yihofa, mansa mararid mitolon a miingid, midofdof Cingraanan, padama to tao maolah Cingraanan (Nengnengen ko 4-14 fatac)
4. Pakayni Yakop 4:8, hano mamisaˈicel kita a miingid ci Yihofaan?
4 Makalimay ci Yihofa kitaanan miingid Cingraanan, mararid a masasowal Cingraanan. (ˈOsien ko Yakop 4:8.) Pakalalokay Cingra kitaanan ‘padadotocen a mitolon.’ (Loma 12:12) Cowa ko pakayni ka ˈifowa anca marorayay a caka pitengil to satolon no mita. Kitato i, tengilen ita ko sowal no kakarayan a Wama, miˈosi to Fangcalay Cudad ato mitepangan a cudad, itini i saˈopo i, songilaˈen a mitengil. Ano sakairaaw no ngaˈayay a kalalaˈed no wawa ato wama wina i, misaaliay to ngaˈayay a kasasowal ngaˈ ngaˈay. Mihaenay ano sapadadotocaw kita miingid ci Yihofaan, wa mararid kita masasowal Cingraanan.
Nengnengen ko 5 fatac
5. Samaan ngaˈ ira ko ngaˈayay a kasasowal aci Yihofaan?
5 Ngaˈayay ko kasasowal iso ci Yihofaan han? Makalimay ci Yihofa kitaanan itini satolon mihadak to nafalocoˈan. (ˈOlic 62:8) Mihaenay, licayen ko niyah: “O pitolon ako ono nanaman aca, malecad o milinaˈan i kato ko sowal, anca matomesay ko olah, malecad o mitilidan a tikami han?” Maedeng tangongolay ko olah iso ci Yihofaan, ciharateng to sakakelecaw ko kalalaˈed Cingraanan, mansa micerid a masasowal Cingraanan, pasowal to harateng no niyah ato kahemekan anca kasomadan a demak. Ano ira ko maanan a saali iso i, ngaˈayay rihaday ko falocoˈ micangacang to kakarayan a Wama.
6. Ano sapadadotocaw kita a miingid to kakarayan Wama, samaan ko hademak?
6 Ano sapadadotocaw kita a miingid to kakarayan Wama, pairaen ko miakoˈiday a falocoˈ Cingraanan. Mihayay kita to sowal no mitiliday to ˈOlic, sanay cingra: ‘Kawas ako Yihofaaw, hakowaay ko midemakan Iso a demak! O kasapaan a demak Iso, makapahay a harateng tamiyanan cowa ka saˈosi! Awaay ko pakaliniay Tisowanan; ano mamilengo kako to demak Iso, cowa ko mamaemin a misaˈosi.’ (ˈOlic 40:5) Cowa ko piakoˈid aca ita to kakarayan Wama, pakaynienho i sasowalen ato waywayan a paihkal. Itini ‘salikoray romiˈad,’ cowa piakoˈid ko ˈalomanay tamdaw, cowa piakoˈid to nano demak no Kawas cangraanan. (2 Timoti 3:1, 2) Aka a mahaen ko waywayan no mita!
7. Makalimay ci Yihofa samaan ko demak no wawa Ningra? Misamaanay?
7 O wama wina makalimay a masasiolah ko wawa, eca ka malacongis. Ci Yihofa maolahay rihaday ko wawa Ningra. Ano masasiolah kita to salikaka i, wa mahapinang no tao, o soˈlinay a Krisciyang kita. (Yohani 13:35) Sanay ko mitiliday to ˈOlic: ‘Nengnengen hena! Makakelec malacafay makakapot ko salikaka, tada o ngaˈayay, kahemekanto!’ (ˈOlic 133:1) Ano maolah kita to salikaka, mahecad o pasowalay ci Yihofaan maolahay kita Cingraanan. (1 Yohani 4:20) O salikaka ita, tano ‘sidaˈitay a macacada’ ato ‘tano damsayay patado a miharateng to tao,’ masalalomaˈ no mahaenay a paro no lomaˈ tada o kalipahakanto!—Ifiso 4:32.
ANO MAOLAH KITA TO KAKARAYAN WAMA WA MIDOFDOF CINGRAANAN
Nengnengen ko 8 fatac
8. Pakayni 1 Yohani 5:3, midofdof kita to Kawas sakakaay lalangian o maanan?
8 Milongocay ci Yihofa midofdof ko wawa to wama wina, malecaday Cingra milongoc kitaanan midofdof Cingraanan. (Ifiso 6:1) Cowa ko pisangaˈ aca Ningra kitaanan, midamaayho to sakaˈorip no mita, hanaca o citanengay a wama Cingra, mansa midofdof kita Cingraanan o matatodongay. Kawra, midofdof kita sakakaay lalangian pakayniay i ka olah Cingraanan. (ˈOsien ko 1 Yohani 5:3.) Soˈlin adihayay ko lalangian ita a midofdof ci Yihofaan, kawra cowa ka pacieci Cingra kitaanan. Mihaenay, maˈaraw no kakarayan Wama pakayni kaolah ita a midofdof Cingraanan, maedeng o tataˈangay ko hemek.
9-10. Cipinang ato midofdof to palinian no kakarayan Wama, hano o kalimlaan hani?
9 O wama wina a tamdaw maolahay rihaday ko wawa, mihaenay patirengay cangra to palinian a midipot to wawa. Ano dofdofen no wawa koniya palinian i, o pakasoˈlinay ato mikangodoay to wama wina. Kita i, cipinang ato midofdof to palinian no kakarayan Wama, tada o kalimlaan a demak koni. Mihaen ko demak ita o maolahay ato mikangodoay Cingraanan, hanaca o saka ciepoc no mita konini. (Isaya 48:17, 18) Ano caka pidofdof ci Yihofaan, salikor o sakadokaˈ no niyah.—Kalatiya 6:7, 8.
10 Mafanaˈay ci Yihofa, o maanan ko sangaˈayay no mita, mansa ano midofdof kita to palinian ni Yihofa a maˈorip, o mamadipot ko tireng ato falocoˈ ita, wa ngaˈay ko kalalaˈed ato Kawas. Cecay i Padakaay a salikaka ci Arora, sanay: “Midofdof ci Yihofaan, wa ira ko sangaˈayay a nokaˈorip.” Mahecaday ko harateng iso han? Midofdof kiso to palinian ni Yihofa i, milifokay to maanan a haepoc hani?
11. O satolon samaanay padama kitaanan?
11 Latekay, pakayni kaeca kalefot pasangaray kita midofdof ci Yihofaan, kawra aka a pisawad, tolonen ko Kawas, wa padamaen Ningra kita a midofdof Cingraanan. Palecaden ita ko mitiliday to ˈOlic a tamdaw, micangacang ci Yihofaan: ‘Nanay palalen iso ko makahiay midofdof a falocoˈ ako.’ (ˈOlic 51:12) Salikaka ci Tanis o misakafahay, sanay cingra: “Ano pasangaren kako a midofdof to sowal ni Yihofa a midemak i, mitolonay kako micangacang Cingraanan pafeli to ˈicel matatodong ko demak ako.” Pakasoˈlinay kita, o papacaˈofen ni Yihofa ko mahaenay a satolon.—Luka 11:9-13.
PADAMA TO TAO MAOLAH TO KAKARAYAN WAMA
12. Pakayni Ifiso 5:1, o sasamaan ko hademak no mita?
12 ˈOsien ko Ifiso 5:1. O ‘kaolahan a wawa’ kita, ka pisaˈicel a mitodong to kakarayan a Wama. Ciolahay ko falocoˈ ita a micada to tao, makahiayho misodod to tao. Maˈaraw no cowa ka fanaˈ to Kawas a tamdaw ko ngaˈayay waywayan ita, matemer ko falocoˈ ciharateng to sakafanaˈaw to Kawas alatek. (1 Pitiro 2:12) Roma i, micada ko wama wina to wawa i, misaˈicel a mitodong to ngaˈayay taˈarawan ni Yihofa, wa madolo a mahapinang no wawa o sidaˈitay a Wama ci Yihofa, makalim sapiingidaw Cingraanan.
Nengnengen ko 13 fatac
13. Ano caka timolo kita pasayra i tamdaw milengo to kakarayan a Wama, sasamaan ko hademak?
13 Tocerid masemeray ko wawa to wama no niyah, maolahay pasowal to tao to masamaanay ko wama no niyah. Ano kitato malikoay to kakarayan a Wama ci Yihofaan, makalimay mafanaˈ ko tao Cingraanan. Malecaday ko harateng ita ci Tafitian, sanay cingra: ‘Malikoay kako ci Yihofaan.’ (ˈOlic 34:2) Kawra ano matalaw kita mihaen to demak, samaanto hani? Sasamaan a timolo hani? Ngaˈayay haratengen ita, mihaen to demak o papakahemek ci Yihofaan, ngaˈayho miharateng ano mafanaˈ ko tao ci Yihofaan wa milifok to maanan a haepoc. Na padamaan ni Yihofa ko saka 1 hahekalan a Krisciyang ira ko timolo, ano aninito wa pafeli to timolo kitaanan.—1 Tisalonika 2:2.
14. Hano milasil kita to ngaˈayay lihaf i tamdaw?
14 Cowa ko misakakinihay ci Yihofa, mihaenay ano maˈaraw Ningra maolah kita to masakenaay a tamdaw o mamahemek Cingra. (Dmak 10:34, 35) O cecay pakayraan ita paihkal to olah i tamdaw i, milasil to ngaˈayay lihaf cangraanan. (Matay 28:19, 20) Wa ira ko masamaanay a minaroˈan hani? O makahiay micada to ngaˈayay lihaf a tamdaw, wa masalof ko kaˈorip anini, hanaca wa ira ko toki milifok to tahadaˈocay a ˈorip no ikor.—1 Timoti 4:16.
O MAOLAHAY TO KAKARAYAN WAMA A TAMDAW O LIPAHAKAY
15-16. O maanan a lalangian ko pakahemek kitaanan hani?
15 O sidaˈitay a Wama ci Yihofa, makalimay Cingra lipahak ko kaˈorip no wawa Ningra. (Isaya 65:14) Soˈlin tahalifa to pasangaray, adihayay ko lalangian ita a lipahak. Tinakoen, pakasoˈlinay kita to tangongolay ko olah no kakarayan Wama kitaanan. Cipinangayho kita to soˈlinay kimad no Fangcalay Cudad. (Yirimiya 15:16) Masalalomaˈay no taˈangayay paro no lomaˈ kita, o salikaka sahtoay o maolahay ci Yihofaan ato ˈakawangay a palinian Ningra, masasiolahay a maemin.—ˈOlic 106:4, 5.
16 O roma sakalipahak ita a lalangian i, iraay ko hatokel makapah ko kaˈorip no ikor. Cato ka halafin, papalahdawento ni Yihofa ko kihcod tatiihay tamdaw ato demak. Itini pikowan no Hongti Kitakit, malo Lakoing koniya cikiw. Iraayho ko tokel ita malalitemoh to mapatayay salawina, samanen o papatikolen ni Yihofa paˈorip cangra. (Yohani 5:28, 29) O tataˈangay ko lipahak ita itiya! Sakakaay sakahemek ita i, polong a coyoh ato tamdaw wa midoko to sidaˈitay a Wama i kakarayan, panokay to pikangodo ato pakahemek Cingraanan!
RADIW 112 Tadamaanay Kawas, Yihofa
^ 5段 Tangongolay ko olah no Wama ci Yihofa kitaanan, paitini kitaanan i taˈangayay paro no lomaˈ ningra kalacafay to roma tamdaw a midoko Cingraanan, mansa makalim kita tano olah a patikol to olah. Sasamaan kita paihkal toniya olah i sidaˈitay a Wama hani? Oniya lalakaw wa milengo to sasamaan ko hademak ita.
