ITINIAY i Krac no Austria a lomahad kako. Pito ko mihecaan ako i, patayraan i picudadan, mihatatanam tono Kiyokay a demak. Itira maˈaraway ako maˈodangay ko simpo ato siwni, tada macekokay kako. Mankora caka pakaala to cecay miheca, papiliyasan no wina kako tora picudadan.

Ikor, tayraay kako to iraay ko pilafinan a picudadan. Tona malalooday ko kitakit mikowangan no hikoki ko Krac, to cecay dadaya tayraay ko wama miala takowanan, tayrato kami i Selateming a milimek. Tahira kami, mitaˈlifay to cecay kayakay, ikor mapakohacay koya kayakay. Kina cecayay, pasayraay ko hikoki i papotal no lomaˈ mikowang takowanan ato fofo. Mansa mahererekto ko lalood i, matoleday ko falocoˈ niyam to mikowanay no kitakit ato kiyokay.

Isaka 1950 a miheca, mitosilan no cecay Misawacayay Tamdaw ni Yihofa ko wina ako. Marariday kako mitengil to kasasowal nangra, nolatekay pacafayan ako ko wina mirienang to saˈopo. Palidlid sato ko wina pakasoˈlin to soˈlinay kimad ko sapasifanaˈ no Misawacayay Tamdaw ni Yihofa, saka micadaay to inoˈ cingra isaka 1952 a miheca.

Itiya, miharateng kako hato o saˈopo no matoˈasay fafahiyan. Nikawrira, tayrato kako mirienang to roma a kasakopang i, ˈalomanay ko kaemangay itira. Patikolto i Krac kako i, misatapangayto mirienang to polong a saˈopo, kalikiay mahapinang to soˈlinay a kimad kora mananamay ako. Malifetay ako to midamaay ci Yihofa to sikawdan Ningra, soˈliˈlin haratengen hato cecayay ko niyah misiˈayaw to pasangaray a remoen a sapalifet, kawra iraayto ci Yihofa a midama kitaanan.​—ˈOlic 3:5, 6.

Makalimay kako pasowal to soˈlinay kimad i tao, itiniay kako i salikaka ako a misatapang pasowal. Sasepatay ko fafahiyan a kaka mala singsiay i picudadan, soˈlin itiniay i cowa ka lecad a niyaroˈ cangra, tayraay haca kako mikilim, pakalalok cangranan papinanam to Fangcalay Cudad.  Ikor, o salikaka ako maemin, mala Misawacayay Tamdaw ni Yihofa cangra.

Toya saka tosa lipay a misatapang a mitosil kako, malitemohay ko cecay 30 ko mihecaan a fafahiyan, pacekiwan ako cingra, ikor micadaay to inoˈ. To cecay a liyad, o faˈinay ningra ato tatosa faˈinayan wawa micadaay to inoˈ. Pasifanaˈ cingranan patanoktokay to nika pasoˈlin no falocoˈ ako, misamaanay hani? Samanen awaay ko misongilaˈay pasifanaˈ to Fangcalay Cudad i takowanan, mankora ˈayaw no malalengo kami, inanengay kako misaday. Tatodong nora, isalakatan ako pasifanaˈ ko niyah, hongaˈ pasifanaˈan cangra, mihaen to demak mitongalay to kacipinang ako to soˈlinay kimad. Isaka 1954 miheca ka sepatan folad, patafangay kako to tireng ci Yihofaan, micada to inoˈ a mala Misawacayay Tamdaw ni Yihofa.

Isaka 1955 miheca, tayraay kako i Towic, Frans, Ikok a mirienang to koksay taykay. Tiya i Lonton malitemohay ci Aipote Selawte. O singsi no Kiliyat a Picudadan, ikor mala Malohemay Malitengay i Congpo cingra. Tiya milisoˈ kami to Ikok a patelian to katelangay a kitiraan i, paˈarawan ningra kami to tano kamayan mitilid a Fangcalay Cudad, iraay ko ngangan no Kawas (no Hipray tilid YHWH), mitadtad cingra to nika masaka limelaan ko ngangan no Kawas. Mitongalay to nika olah ako ci Yihofaan ato soˈlinay kimad Ningra, padama takowanan misetek to falocoˈ sapilasilaw to Kimad no Kawas.

Isaka 1956 miheca ka cecayan folad saka cecay romiˈad, misatapangay kako mala misakafahay. Ikor no 4 folad, tahidangan kako tayra i Misterpek no Austria mala mikiriwiˈay a misakafahay, awaay ko Misawacayay Tamdaw ni Yihofa itira. Nikawrira, tahasiˈayaway kako to pasangar, kako ato cafay cowa ka lecad ko nanaman. Itiya i, 19 ko mihecaan ako, cingra i, 25 ko mihecaan. Itiniay i maci ko aroˈ ako, cingra itiniay i inaka; cowa ka pacelem lomowad kako, pacelemay cingra lomowad; lafii ngaˈ mafotiˈay kako, cingra i, kahenayay mafotiˈ. Soˈliˈlin hatira i, kalasaka dademakan niyam ko safalod no Fangcalay Cudad, hato ngaˈayay a masasi solol kami to nika sasiroma, malo ngaˈayay a cafay kami a milifok to hemek no misakafahay.

Misiˈayawayho kami to roma pakidemay a pakayraan, miememay to saroero, kawra “caay ka rarima kami.” (2 Korinto 4:7-9) Kina cecayay, tayraay kami i niyaroˈ a mitosil, pasadakan nangra ko waco, alikotento no waco kami, sangocedis sa miˈawˈaw. Makakitingay kami a mitolon: “Yihofaaw, ano mikalat kora waco i, tangsol han kami a mipatay!” Mangatangata mikorahot tamiyanan i, fahar sanay a tomelep, miˈiwaˈiw to wikor a miliyas. O sadipotto ni Yihofa sanay a miharateng kami! Ikorto, maedefay niyam patosil to ngaˈayay lihaf i niyaroˈ. ˈAlomanay ko makahiyay a mitengil. Tona cowa pikalat ko waco tamiyanan a fahekaˈen cangra alatek, anca maˈaraw to pihadidi niyam a mitosil alatek, o romaroma a tamdaw ikorto mala Misawacayay Tamdaw ni Yihofa.

Iraayho ko roma katalawan a demak. To cecay a romiˈad, malasangay ko tawki no lomaˈ niyam, tahalomaˈ cingra i, patalaway to papatayen kami, samanen mikalisangaˈay kamo to fiyafiyaw sanay, sayasayaren no fafahi cowa ka tomelep. Matengilayho niyam ifafekang ko caciyaw nangra, oranto, mialaan niyam ko ˈaxnan a mitokang to fawahan, misatapangto a mitafo to rikorikoˈ. Ikor, mifawah  kami to fawahan i, ira tomireng i papotal koya tawki, mitatoy to fonos. Tangsol sato pasilalikor a fawahan a milaliw kami, mitaˈlif to ko ˈedaway a lalan no palafalan, miamet to dafong cato ka pisikosikor a minengneng.

Tayrato i liwkang kami milafin, cecayay miheca itira kami, ˈarawhan taˈangayay ko pipadama to mitosil a demak niyam. Samanen itiniay i tenok no maci kora liwkang, maolahay ko mipacekiwan tayra tamiyanan a milengo to Fangcalay Cudad. Caho ka halafin, misatapangto kami i liwkang a misikay to ciwsinci ato Mikecolay a saˈopo, maedeng 15 tamdaw ko mirienangay.

Mataˈlifay to cecay miheca kami itini i Mistepah. Tayniayto kako i Filtepah, i katimolan no Krac. Iraay ko faelohay a misakafahay cafay ako, kawra itiraayho i awaay ko kasakopang a kilac mitosil. Itiniay i saka tosa tingroh no tano kilangan a misangaˈ a lomaˈ, mimingay ko kafotiˈan, micomodayho ko fali i ngalaˈ no patih, hato tano kalidokap han niyam a mipoet ko ngalaˈ. Cowa koninian aca, tayraayho i tefon kami a miladom. Kawra ciepocay noka roray niyam. Ikor no pina a folad, mapatirengayto ko kasakapot itira. Cecay a taˈangayay paro no lomaˈ, milengoay to Fangcalay Cudad i tamiyanan, ikor, ilalomaˈ nangra 30 ko micadaay to soˈlinay kimad!

O matiniay a nalifetan tada miakoˈiday kako ci Yihofaan, miakoˈid to nika padotoc Ningra a midama to isalakatay a micangacang to Hongti Kitakit a tamdaw. Mahapinangay ako ano awaawa ko cimacima mipadang tamiyanan, o papadamaen ni Yihofa kami a mitaˈlif to pasangar.​—ˈOlic 121:1-3.

Isaka 1958 miheca, itiniay i Yanki a ontociw no Niwyok misikay to koksay taykay. Misinsiay kako tayra a mirienang, licay han no fenpo no Austria kako to mamakahi a mirienang to saka 32 liyad a Kiliyat a picudadan hokira. Mana ngaˈay a lawaen ako saw koni mikiriwiˈay a ˈinorong, tangsolan ako pacaˈof: “Makahiyay kako!”

Itini i picudadan no Kiliyat i, iraringiday ni Matin Posinke kako a maroˈ, na itiniay i pitepengan a tapalitan no Naci cingra a misemsem. Ikor, malo Mikayatay Malohemay Malitengay i Congpo cingra. Itini i picudadan, kinapinapinaay mihawhaw takowanan a milicay: “Arika, o manan sanay ko tatodong no Towic a sowal hani?”

Tahira i kalitosa no picudad i, salikaka ci Nolo  tayraay pasowal tamiyanan to tatalacowa kami a matayal. Mapatayraay kako i Parakoy, kawra tona tosaayho poloˈ ko mihecaan no mako, mihayi ko wama ako ngaˈ ngaˈay a micomod tora kitakit. Mihayito ko wama i, tangasaayto kako i Parakoy isaka 1959 a miheca to katoloan a folad. Kako ato faelohay a cafay tayrato kami i Asenson, itiraay i lomaˈ no milakowitay to riyar ko kitiraan niyam.

Caka halafin, masasoˈarawayto kako aci Walte Polayte, o saka 30 liyad no Kiliyat a milakowitay to riyar cingra. Ikor, mararamoday kami, malacafayto tatosa a misiˈayaw to kihecod a pasangar. Ano tahacada kami to sapalifet i, minengnengay kami to Isaya 41:10 a sakiˈok ni Yihofa, sanay kora sinael: “Aka ka talaw. Ira Kako a mikapot i tamowanan. O Kawas namo Kako. O maanho ko katalawan namo saw? O papatanekteken Ako kamo a mipadama. O dadipoten Ako kamo a paˈorip.” Mikiˈokay ci Yihofa, ano misaˈicel kita madimadi i Cingranan, isalakat a micangacang to Hongti Kitakit i, cowa ko papatoleden Ningra kita.

Ikorto, patayraan kami i salawac no Pracil a mitosil. Miowingan no misasingsiay no kiyokay ko kaemangay mitekol to fakeloh i lomaˈ no milakowitay to riyar, cowato ka tada ngaˈay kora lomaˈ, mamapilipiliwto. Ikor nora, pacekiwan ni Walte ko cecay ˈaˈideman no dimeng. Mikiˈokay kora ˈaˈideman to mamidipot tamiyanan, hato caayto ka pikalisanga cangra tamiyanan. Ikorto, milakowitay kami to salawacan no Pracil mahelaay ko ngaˈayay a kitiraan. Taˈangayay ko pipadama to mitosilay demak, samanen ngaˈayay kami mihatosa itini i Parakoy ato Pracil a misikay to saˈopo. Miliyasto kami tora pala i, tosaayto ko mapatirengay a mimingay kasakopang.

Cowa ko caciwawa kiso sanay ko ising takowanan, ˈarawhan mapoyapoy kako isaka 1962 a miheca, macekokay kami tatosa! Ikor malinahay kami tayra i Folorita i ngata no Holiot, cowa ka maraay ko paro no lomaˈ ni Walte. Pinaay a miheca, midimokosay kami to paro no lomaˈ, awaay ko pakayraan a misakafah. Soˈliˈlin hatira, kamayanay kami padadotoc a paisalakat to Hongti Kitakit i nokaˈorip niyam.—Matay 6:33.

Tangasa kami i Folorita ka 11 folad no saka 1962 miheca, maˈaraway to cowa ka matateko ko kohecalay ato kohetingay tamdaw, ano mitosil ato masaˈopo i, masasiwatikay cangra, tada macekokay kami. Kawrira mahecaday ko pinengneng ni Yihofa to caay ka lecad a finacadan, mansa mifalicanto ko limasmas no kasakopang, hongaˈ ngaˈay a matateko ko masasi romaay a salikaka makakapot a midoko ci Yihofaan. Mahapinangay niyam oni Yihofa a sakayat koni. Nohatini, ˈalomanayto ko kasakopang itira tora pala.

Tada masomaday ko falocoˈ ako, mapatayay ci Walte tona ciadadaay to ekang no ponoˈ. To kararamodan niyam to 55 a miheca, o ngaˈayay a faˈinay cingra, tangongolay ko olah ningra ci Yihofaan, padamaay to ˈalomanay a salikaka. Hinatalaay kako ano patikolto cingra maˈorip i, o tanoktokay ko tireng ningra a malalitemoh kami.​—Dmak 24:15.

Tada mahemekay kako a mihaemin to toki matayal ci Yihofaan to 40 a miheca, matinakoay ako ko adihayay a lipahak ato sapalemed, mapadamaay niyam ko 136 a mipacekiwan micada to inoˈ. Manaokaniw tahasiˈayaway kami to pasangar, kawra cowa ka pisawad kami to Kawas, nawhani misaˈicelay kami patireng to tangongolay a noka lawidang Cingranan, pakasoˈlin to aitini i misaˈosian a toki, tano Ningra a pakayraan a misalof to pasangar, cowacowa ka patoled to falocoˈ niyam!​—2 Timoti 4:16, 17.

Maˈiwilayho kako ci Waltean, kawra misakafahay demak milowanay to somad no falocoˈ. Mahapinangay ako ano pasifanaˈ to soˈlinay kimad i tamdaw, mangalefay ano pasowalen ako cangra to hatokel to papatikol maˈorip ko mapatayay i, taˈangayay ko pipadama i takowanan. Tikolen a minengneng ko naikolan i, cowacowa ka patoled ci Yihfofa takowanan. Matira tona pikiˈok Ningra, mikapotay takowanan, paˈicel takowanan tano ciˈicelay a kamay Ningra a midama takowanan.​—Isaya 41:10.