1. (1) Samaan kita milifok to taneng hani? (2) Ira ko taneng wa paira to maanan a epoc no mita hani?

O TANENG ni Yihofa awaay ko tolas, cowa kaˈidi paladaˈ to taneng i misangaˈan Ningra, hato mihaenay ko sowal i Yakop 1:5: “Ano cima namo ko caay ka deng ko taneng i, ngitangiten ko Kawas. Ta mapafeli no Kawas koya tamdaw. Nawhani o halipafeliay ko Kawas i kahacecacecay a tamdaw.” Wa samaan kita milifok to taneng no Kawas hani? O cecay pakayraan i, micada to sarikec no Kawas. O taneng no Kawas wa ngaˈay midipot to waywayan ato noˈadingoan no mita maliyas ko sakapalakaw. (Taneng 2:10-12) Mihaen kita wa ngaˈay ‘materek i olah no Kawas . . . citokel midaˈoc ko ˈorip.’​—Yuta 21.

2. Cipinang to manan a demak wa padama kitanan micada to sarikec no Kawas?

² Kawraan, wa mafiyor no mararaway harateng, lalengawan anca roma lalangian, pasangar a micada to sarikec anca caka tatodong ko pinengneng to sarikec. Ano mafanaˈ kita to saka ciepoc no mita ko sarikec, o wacay to maolahay ko Kawas kitaanan, mihaen wa makahito micada to sarikec. Taneng 3:11, 12 sanay: ‘Wawaaw ako, aka manaˈay to sarikec ni Yihofa . . . samanen o kaolahan ni Yihofa a tamdaw mirikecan Ningra.’ Aka mapawan, pakayniay saka ciepoc no mita ko miharatengan ni Yihofa. (ˈOsien ko Hipray 12:5-11.) Malefotay ko kafanaˈ ni Yihofa  kitaanan, ora sarikec Ningra cowa ka pakidem, o kalimelaan no mita. Dotoc wa milengo to sepat pakayniay i sarikec a demak: (1) mafanaˈ mirikec to harateng no niyah, (2) micada to sarikec no wama wina, (3) micada to sarikec no kasakopang, ato (4) teloc no manaˈayay to sarikec a demak.

3. Tano tinakoen a mitadtad samaan ko wawa a minanam hato mafanaˈ mirikec to harateng no niyah.

³ Mirikec to harateng mahaopay mafanaˈ miˈimer to niyah, misalof to waywayan ato harateng. Cowa ka hofoc han kita mafanaˈto mirikec to harateng, pakayniay pinanam ko sakafanaˈ. Ngaˈayay tano tinakoen ita a mitadtad: Minanam ko wawa patinsiya i, saˈayaˈayaw midamaanho no wama wina. Ano mafanaˈto ko wawa miˈimer to tireng i, mihawadan midama to kapotoˈ a lalan. Ano cato ka mapolin ko wawa i, pakihater hananay tono wama wina. Mahecad onini, mamihadidi ko wama wina padotoc pahatatanam to wawa, hanaca ‘mitoor to harateng ni Yihofa a mirikec cangranan, misalof to harateng nangra,’ mafanaˈto ko wawa mirikec to harateng no niyah, matongal ko taneng.​—Ifiso 6:4.

4, 5. (1) Itini noka ‘picaˈedong to faelohay capeling,’ mafanaˈ a mirikec to harateng, hano o masaka limelaan hani? (2) Soˈlin ‘kinapito a mapolin’ kita, hano cowa ko mamatoled hani?

⁴ O mahecaday a safalod ngaˈayay saka dademaken i matoˈasay tamdaw. O roma tamdaw matoˈasto ngaˈ mafanaˈay ci Yihofaan, mafanaˈay mirikec to harateng halatek, kawra cowaho katenes i noˈadingoan. Oniya faelohay a Krisciyang wa ngaˈay pakayni ‘picaˈedong to faelohay capeling,’ mitodong to taˈarawan ni Kristo a matenes. (Ifiso 4:23, 24) Itini sapalidlidaw a matenes, mafanaˈ mirikec to harateng tada masaka limelaan, mihaen ko demak ita wa ngaˈayto ‘mifalah to cowa kangodo to Kawas a falocoˈ ato coos no hekal, itini toniya lekakawa matatodong ko harateng, moecel, mangdo to Kawas ko kaˈorip.’​—Titus 2:12.

⁵ Nikawrira, mararaway ko demak no tamdaw. (Patnakay 7:20) Ano mararaw kita, o cowa pakarikec to harateng cowa ka saan. Sowal i Taneng 24:16 sanay: “Ano [kinapito a mapolin] ko moecelay a tamdaw i, lomowadho cingra a tomireng.” O maanan ko padamaay cingranan hani? Cowa ko ˈicel no niyah, o fangcalay saocor no Kawas ko padamaay. (ˈOsien ko Filipi 4:13.) O minaroˈan no fangcalay saocor mahaopay ko pakaˈmetay to tireng, oniya capeling milingatay to mafanaˈay mirikec to harateng.

6. Sasamaan ko demak ita ngaˈ matongal ko olah a minanam to kimad no Kawas hani? (Nengnengen ko satapangan a coka.)

⁶ Iraayho ko maanan a pakayraan ngangaˈay a padama kitaanan a palahad to mafanaˈay mirikec to harateng hani? Mikifalocoˈ a mitolon, micekiw to Fangcalay Cudad a midotim. Ano pasangaran kiso a micekiw to Fangcalay Cudad, alatek o cowa kaolah miˈosi to cudad a tamdaw, sanay ko harateng iso i, wa samaanto hani? Ano makahi kiso padamaen ni Yihofa, wa padamaen Ningra kiso palahad to ‘makalimay a falocoˈ’ maolah to kimad Ningra. (1 Pitiro 2:2) Wa ngaˈay tolonen iso ci Yihofa, misaali to sadama Ningra tisowanan a mirikec to harateng no niyah, malalok a micekiw to Fangcalay Cudad. Dotocto pahecaden ko demak, satapang kamotoˈen ko toki, ikor tongalen ko toki a micekiw. Halafinto i, kalipahakanto ko micekiway a demak, hanaca wa maolah kiso to awaay ko adeses a picekiwan a toki, ngaˈay misongilaˈ a minanam to harateng ni Yihofa.​—1 Timoti 4:15.

7. Mafanaˈ mirikec to harateng hano padama kitaanan malaˈosi ko patosokan noˈadingoan hani?

⁷ Mafanaˈ mirikec to harateng wa ngaˈay padama kitaanan malaˈosi ko patosokan noˈadingoan. Haratengen ko laenoay tinakoan: O cecay wama cowato mahaen i saˈayaway a ˈifowa ko falocoˈ, mansa patirengay cingra to patosokan, malo miceriday a misakafahay. Sakalaˈosiaw ko patosokan, micekiway cingra to milingatay a lalakaw no casi, mitolonayho to Kawas, padamaay cingranan matongal ko ngaˈayay kalalaˈed ci Yihofaan. O roma, milimasmasay cingra to toki mirienang to padamaay a misakafahay. Soˈlin adihayay ko  masiˈayaway a pasangaray, cowa pisawad cingra to patosokan, ikorto malaˈosiay a malo miceriday a misakafahay cingra.

8-10. Sasamaan ko demak no wama wina ngangaˈay pakafanaˈ to wawa malo mihodopay ci Yihofaan a tamdaw hani? Sadaken ko tinakoan.

⁸ O Krisciyang wama wina iraay ko kalimelaan a ˈinorong, o papalahad to wawa, ‘tooren ko harateng ni Yihofa a mirikec cangranan, misalof to harateng nangra.’ (Ifiso 6:4) Anini, o karetengay a ˈinorong no wama wina. (2 Timoti 3:1-5) Soˈlin hofoc han ko wawa pairaanto no Kawas ko makapahay falocoˈ, kawraan cowaho ka cipinang cangra to manan ko matatodongay, manan ko mararaway, papahatatanamenho kora makapahay falocoˈ nangra. (Loma 2:14, 15) O cecay taˈarawan cudad no Fangcalay Cudad, mihongyak to “sarikec” sanay a sowal no Krisiya, milingatay to “kalomahad no kaemangay.”

⁹ Ano sidaˈit ko wama wina a mirikec to wawa, wa ira ko dipayar no wawa. Mahapinang no wawa iraay ko tolas no pasalat, hanaca o misaˈosian ato waywayan nangra papaira to—ngaˈayay anca tatiihay a teloc. Mihaenay, saalien no wama wina ci Yihofa to sakayat, tada kalimelaan. Pakayni mirikecay a demak, o pinengneng ato pakayraan no kalo a tamdaw, mafalicay a mitoor to lingad no lintad ato lalengawan. Ano tengil han no wama wina ko Kawas i, cowato ko tano niyah ato harateng no tao a palahad to wawa, mihaen o mamalaˈosi ko demak nangra.

¹⁰ Ngaˈayay tano tinakoan ni Nowa a somowal, to sasamaan ko demak no wama wina. Tiya papisangaˈen ni Yihofa ci Nowa to tamina i, cowa ko ngangaˈay ci Nowa mitiˈer to nalifetan no niyah a milaheci toniya demak, samanen na cowaho ka pisangaˈ cingra to tamina. O mamitiˈer ci Nowa ci Yihofaan, ‘midoedo to kihecod a limoˈot no Kawas a midemak.’ (Satapangan 6:22) Samaanayto ko teloc hani? Malaˈosiay ci Nowa a misangaˈ to tamina, ato milidong to ˈorip no paro no lomaˈ. O roma i, malo malaˈosiay a wama ci Nowa, pakayniay pitadiˈec ningra to taneng no Kawas. Soˈlin pasangaray a pasifanaˈ to wawa itini mariˈangay a hekal ˈayaw no lenlen, kawra malaˈosiay ko pipasifanaˈ ni Nowa to wawa, patireng to ngaˈayay taˈarawan no wawa.​—Satapangan 6:5.

11. Pakayni palahad to wawa, mitengil a mihakelong ci Yihofaan ko wama wina, hano masaka limelaan hani?

¹¹ Sasamaan ko wama wina midoedo to limoˈot no Kawas a midemak hani? Ka pitengil a mihakelong ci Yihofaan. Pakaynian Ningra i Fangcalay Cudad ato likakawa a pasifanaˈ tisowanan to sasamaan palahad to wawa. Ano mihaen ko demak iso, lomahad ko wawa mamiakoˈid kisowanan. Sanay ko sowal no cecay salikaka: “Miakoˈiday kako to nika pisamacay no wama wina pasifanaˈ a mitemer to falocoˈ ako. Saka macakat kako i noˈadingoan o nano ˈicel nangra.” Soˈliˈlin misaˈicelay ko wama wina pasifanaˈ to wawa, kawra miliyasayho ko roma a wawa ci Yihofaan. Kawraan, ano misaˈicelayto ko wama wina a paloma to kimad i falocoˈ no wawa, akato tatiihen ko harateng. Mitokel cangra a mitala, o malafelay a wawa papatikol i lomaˈ no Kawas, ano hacowa.

12, 13. (1) Ano mafalahay ko wawa i, misamaan ko demak no wama wina ngaˈ midoedoay to limasmas no Kawas hani? (2) Ano midoedo to limasmas ni Yihofa ko wama wina i, papaira to manan a haepoc to paro no lomaˈ? Patinakoen.

 ¹² Ano mafalah ko wawa i, o wama ato wina itini pihakelong to Kawas, tatahasiˈayaw cangra to taˈangayay a sapalifet. Patinakoen, mafalahay ko wawa no cecay wina, miliyasay a malinah ko wawa ningra, somowal koniya wina: “Kakilim sanay kako i mitepangan a cudad no mita, mikilim to dangoc no mifalahay a limasmas, to aaira ko hapakayraan a malalitemoh to wawa ato fofo hokira. Kawra, sidaˈitay ko faˈinay padama takowanan, cowato ko ˈinorong no mita ko wawa nohatini, aka a picapid kita toniya demak sanay.”

¹³ Ikor no pina a miheca, patikolto a macada no kasakopang koni wawa, sato ko sowal nora wina: “Nohatini, marariday patingwa a patikami ko wawa ako! Misakaretengay tamiyanan to nika pikedec niyam mihakelong to Kawas. Ngaˈayayto ko nika lalaˈed niyam ato wawa.” Ano mafalah ko wawa iso i, “sarocoden [iso] ko falocoˈ mitiˈer [ci Yihofa],” caka “pitiˈer to fanaˈ iso” han? (Taneng 3:5, 6) Wama wina, aka a mapawan ano mirikec ci Yihofa i, tohatiniay patahekalay Cingra to tadamaanay a taneng ato olah, aka a mapawan, pafeli ci Yihofa to wawa Ningra, o saki tamdamdaw ko nika pikinafalah to ˈorip, mahaopay ko wawa iso. Cowa ka olah ko Kawas a mapatay ko cecacecay a tamdaw. (ˈOsien ko 2 Pitiro 3:9.) Mihaenay haw i, o wama wina tiˈeren ko pirikec ato pikayat ni Yihofa, soˈlinto masomadan nanay kiso, toor han ko harateng ni Yihofa a midemak. Aka colien ko mirikecay a limasmas no Kawas, tooren ko limasmas ni Yihofa.

14. Pakaynian ni Yihofa to madimadiay citanengay koli mikayat kita, malifokay no mita ko manan a epoc hani?

¹⁴ Tano masasi romaay a pakayraan ci Yihofa a midimokos, midipot ato mikayat to kasakopang no Krisciyang. Patinakoen, papidimokosan ni Yihofa ko wawa ci Yis to kasakopang, ci Yisto i, minilnilan ko madimadiay citanengay koli, itini i matatodongay toki mipawsa to noˈadingoan a kakaenen. (Luka 12:42) Tano masasi romaromaay pakayraan a mipawsa, pafeli to kalimelaan a sakayat ato sarikec. Ngaˈayay licayen ko niyah: “Na matengil ako ko mikimaday anca maˈosi ko lalakaw i casi i, masemeray ko falocoˈ, hato mifalican ako ko harateng anca waywayan han?” Ano iraay ko hatiniay a nilifetan iso, ka lipahak kiso, samanen mihaen ko demak iso, o micadaay to pisalof ni Yihofa ato pirikec Ningra, macakat ko niyah.​—Taneng 2:1-5.

15, 16. (1) Mamisamaan kita milayap to epoc noni ‘saparocek a tamdaw’ hani? (2) Misamaan kita ngaˈ palipahak to malohemay malitengay a matayal hani?

¹⁵ Pafelianho ni Kristo kita to ‘saparocek a tamdaw’—o malohemay malitengay cangra, o papakaen to siri no Kawas cangra. (Ifiso 4:8, 11-13) Mamisamaan kita milayap to epoc noni kalimelaan a saparocek a tamdaw hani? Todongen ita ko pasoˈlinay falocoˈ no malohemay malitengay ato taˈarawan nangra, halo mitengil to mikitiniay i Fangcalay Cudad a sapalimoˈot. (ˈOsien ko Hipray 13:7, 17.) Maolahay kitaanan ko malohemay malitengay, mitokelay to mamacakat i noˈadingoan kita. Mankora, ano maˈaraway nangra to marariday milawa kita to saˈopo, anca cowa ka hatira i ˈayaw a ˈifowa ko falocoˈ i, o tatangsol cangra mipadama kitaanan. O mamitengil ko malohemay malitengay to kasomowal ita to nika haen ita, sidaˈitay a pakalalok kitaanan, mikitini i Fangcalay Cudad patalipaˈelal kitaanan, paˈicel kitaanan. O olah ni Yihofa i takowanan koni, sapadama no malohemay malitengay wa haen minengneng kiso han?

¹⁶ Ano mirikec ko malohemay malitengay i, soˈlinay cowa ko madoloay a demak. Patinakoen, haratengen ko falocoˈ ni Natan, ta mararaw ci Tafiti, mihimed to raraw no niyah i, o papatalasekalen ni Natan kora kihecod a demak, tada o pasangaray cingranan mihaen to demak! (2 Samuil 12:1-14) O roma i, haratengen ko falocoˈ ni  Pawlo, ya mirikec ci Pitiroan, oni tarokos, misakakinih pasayra to Yutaya salikaka i, o tatimolo ci Pawlo ngaˈ, ira ko ˈicel a mirikec cingranan. (Kalatiya 2:11-14) Wa misamaan kita milowan to ˈinorong no malohemay malitengay hani? Misapoener to falocoˈ kita makahi a micada to saparikec, halo akoˈiden ko falocoˈ. O olah no Kawas kitaanan koni sapadama no malohemay malitengay, ano han a minengneng i, o mamalifok ko epoc, halo lalipahak ko malohemay malitengay a matayal.

17. O cecay fafahiyan salikaka nai malohemay malitengay a siniˈadaay a sapadama nangra, milifokay to manan a epoc hani?

¹⁷ O cecay fafahiyan salikaka pakayni i raraw iti:yaho, pasangaray a maolah ci Yihofaan, sanay ko sowal ningra: “Ano matoled ko falocoˈ ako to malifaay ato romaroma pasangaray demak i, mafanaˈay kako to tatangsol tayra i malohemay malitengay a pasowal cangranan. Pakalalokay a paˈicel cangra takowanan, cowa ka pikapoiˈ anca milikaf takowanan. Ano matayatayal cangra, mahererek ko saˈopo i, tayniayto ko cecay malohemay malitengay a milicay takowanan. Pakayniay to iti:yaayho a nalifetan, marariday kako miharateng to cowa ka citatodong a kaolahen no Kawas. Kawra ano iraay ko hatiniay a tatiihay harateng i, ci Yihofa pakaynian i kasakopang ato malohemay malitengay miliyaw pasowal takowanan, ‘maolahay Kako tisowanan’ sanay ci Yihofa. Tolonan ako ci Yihofa a pasowal, cowa ko mamisawad kako a mihodop Cingraanan tahadaˈoc.”

18, 19. O manan ko teloc no manaˈayay to sarikec a demak? Patinakoen hena.

¹⁸ Soˈlin mararomay ko falocoˈ ano marikec, kawra ano manaˈayay to saparikec i​—o mamalifok ko tatiihay a teloc. (Hipray 12:11) Sinanoten ita ko tinakoan ni Kain ato hongti ci Citikiya. ˈIntehay ci Kain ci Apilan, hato sadak sanay ko sapipatayaw a harateng, rikecan ni Yihofa cingra: “Nawiro maketer kiso saw? Nawiro saˈosenget sa ko pising iso saw? Ano moecelay ko demak iso i, kona matawa kiso, nikawrira, tona midemak kiso to caay ko dademaken a demak saka, misaˈimerto ko raraw i fawahan iso. O mamakowan no raraw kiso, nikawrira, o sasaˈicelen iso a milowid ko raraw.” (Satapangan 4:6, 7) Cowa pisikor to saparikec ci Kain, midemak to taˈangayay a raraw, teloc pairaay to kesem ato roray i cingranan! (Satapangan 4:11, 12) Ano micada to saparikec no Kawas coko ngangaˈay ko teloc han?

¹⁹ Oya mariˈangay mapawpaway ko falocoˈ a Citikiya, ta mala hongti cingra i, o katoemanan a lintad no Yirusalim. Samaamaanen ni Yirimiya ya pairasolay mirikec ci Citikiya papiliyas to tatiihay demak, cowa ka picada to saparikec. Oraanto tada kadayayan ko teloc ningra. (Yirimiya 52:8-11) Mikitini toni tosa tinakoan maˈaraway ita, ci Yihofa cowa ka ciharateng kitanan a milifa to matiniay a roray!​—ˈOsien ko Isaya 48:17, 18.

20. Samaanay ko teloc no micadaay to sarikec no Kawas ato cowa ka picada a tamdaw?

²⁰ Anini, ˈalomanay tamdaw misakahemaway to pakarikecay to harateng no niyah ato sapirikec no tao, kawra o mahaenay a harateng, wa papaira to kadayayan a teloc. (Taneng 1:24-31) Mihaenay haw i, ‘doedoen ko sarikec, matongal ko taneng,’ o roma sai, paifalocoˈen ko sarikec no Taneng 4:13 a sinael: “Pakifalocoˈen a mararid ko minanaman iso, o nilayapan iso a sifanaˈ i, o sakaciˈorip iso.”