1, 2. (1) Ano mafanaˈ ko Krisciyang a wama wina to sapicadaaw to inoˈ ko wawa i, wa maharateng ko maanan alatek? (2) O mamicada to inoˈ a tamdaw hano papacaˈof to salicay no mikimaday hani? (Nengnengen ko satapangan coka.)

O CECAY kaemangay fafahiyan ci Maliya, nengnengen no wama wina cingra malacafay to mamicada to inoˈ a tomireng. Mihadakay to tosa salicay ko mikimaday pasayra i mamicada to inoˈ a tamdaw, ihekalay a maˈesol ko caˈof ni Maliya. Dotoc micadaayto cingra to inoˈ.

² Maˈaraw ko wawa misaˈosi a patafang to tireng ci Yihofaan a micada to inoˈ, tada mahemekay ko wama wina ni Maliya. Kawra, iˈayaw calemcemay ko wina ni Maliya, harateng ningra: “Micada ci Maliya to inoˈ nohatini masaka kaemangay hokira? Soˈlinay a cipinang cingra to kalimelaan a saˈosi ko micadaay to inoˈ han? Anca taˈangayto ko mihecaan ngaˈ itiya a misaˈosi toniya demak hokira?” ˈAlomanay sidaˈitay a wama wina miharatengay to hatiniay salicay. (Patnakay 5:5) Samanen mafanaˈay ko wama wina, patafang to tireng a  micada to inoˈ, o kalimelaan a saˈosi i kaˈorip no Krisciyang.—Nengnengen ko sapatongal lalakaw, “ Maherekayto Kiso Patafang to Tireng ci Yihofaan Han?”

3, 4. (1) Samaanay mitadtad ci Pitiro to kalimelaan ko picada to inoˈ hani? (2) O misangaˈan ni Nowa a tamina ato picada to inoˈ iraay ko manan a kahecadan hani?

³ Palalinian ni Pitiro ko micadaay to inoˈ ato misangaˈan ni Nowa a tamina, sanay cingra: “Onini a nanom i, o todongto no paˈoripay tamowanan a inoˈ.” (ˈOsien ko 1 Pitiro 3:20, 21.) O maˈaraway a dafong ko tamina, o ihekalay a wacay, misawacayay to misarocoday ko falocoˈ ni Nowa a midofdof to araaw no Kawas. Madimadiay ci Nowa milaheci to patorodan ni Yihofa cingranan a demak, tano waywayan ko paihekal ningra to pasoˈlin no falocoˈ no niyah, hato ngaˈayay maˈorip ko niyah ato paro no lomaˈ i Taˈangayay Lenlen. Mihaenay, oniya sowal ni Pitiro wa mitadtad to maanan a kalimelaan hani?

⁴ O misangaˈan ni Nowa a tamina, o wacay no pasoˈlinay falocoˈ, micada to inoˈ ko cecay tamdaw i ˈaˈayaw no ˈalomanay, o maˈaraway a wacay. Paihekalay koniya wacay to pasoˈlinay cingra to patikolay maˈorip a Kristo, mansa patafang to niyah ci Yihofaan. O patafangayto to tireng a Krisciyang mahecaday ci Nowaan, midofdof to Kawas a milaheci to patorodan Ningra a demak. Iti:yaho, milidongan ni Yihofa ci Nowa milakowit to Taˈangayay Lenlen, ano malaˈafo koniya ciraraway hekal noikor i, wa lidongen ni Yihofa ko micadaay to inoˈ a madimadiay Krisciyang. (Marko 13:10; Paˈarawan 7:9, 10) Mahapinangay iso to kalimelaan ko patafang to tireng micada to inoˈ han? Ano minayar ko tamdaw eca ka kahi micada to inoˈ, wa malahedaw ko tokel a tahadaˈoc maˈorip.

5. Oniya lalakaw mamilengo to maanan a salicay?

⁵ Cipinangto kita to kalimelaan ko picada to inoˈ i, wa mafanaˈho to caˈof no tolo a salicay: Pakayni  picada to inoˈ, samaanay ko sowal no Fangcalay Cudad? Itini ˈayaw no micada ko tamdaw to inoˈ wa salakat midemak to maanan a demak hani? Ano pasifanaˈ ko Krisciyang to wawa anca pacekiwan a tamdaw i, hano haharatengen ko kalimelaan no picada to inoˈ?

6, 7. (1) Micada to pipainoˈ ni Yohani mitaypiyaway to manan? (2) O painoˈan ni Yohani a tamdaw, o cima ko mikiriwiˈay hani?

⁶ Sakinacecay milengo ko Fangcalay Cudad to picada to inoˈ, o pipainoˈ no painoˈay a Yohanian to tamdaw. (Matay 3:1-6) Tayraay ko tamdaw ci Yohanian micada to inoˈ, samanen mihaiyay cangra to misafelitay ko niyah to Sarikec ni Mosi, sapasasiyoraw to raraw no niyah. Kawraan, na painoˈan ni Yohani ko cecay tamdaw, o sakakaay kalimelaan a painoˈan ningra, micada to inoˈ koniya tamdaw cowa ko pakayniay ka ciraraw no niyah. Oya malefotay a Yisan, o wawa no Kawas cingra. (Matay 3:13-17) Cowa ka mararaw ci Yis, cowa ko papasasiyor cingra. (1 Pitiro 2:22) Micada ci Yis to inoˈ, mitaypiyaway to patafangay to niyah i Kawas, midofdof to araaw no Kawas.​—Hipray 10:7.

⁷ Itiya mitosil ci Yis i, painoˈay ko nisawawaan to tamdaw. (Yohani 3:22; 4:1, 2) Mahecad o pipainoˈ ni Yohani, o pipainoˈ no nisawawaan mitaypiyaway to mihaiyay to misafelitay ko niyah to Sarikec ni Mosi, pasasiyor to raraw no niyah. Kawraan, patikolto maˈorip ci Yis, o picada to inoˈ no makalimay malo Krisciyang a tamdaw, cowato ka hecad ko tatodong.

8. (1) Patikolto maˈorip ci Yis palimoˈotay to nisawawaan to manan? (2) Ano ciharatengay ko tamdaw malo Krisciyang hano micadaˈ to inoˈ wangaˈ?

⁸ Itini saka 33 miheca, patikolayto maˈorip a Yisan paˈaraway to 500 a tamdaw, lalomaˈ nangra iraay ko faˈinayan fafahiyan, halatek mahaopay ko kaemangay. Itiraay ci Yis pasowal cangranan: “Katayra kamo a palanisawawaan ako to polong no kasafinawlan. Ta pakaynien i ngangan no Wama ato wawa ato [fangcalay saocor] ko nipipainoˈ i cangraan. O romasato, pasifanaˈen cangra a papiˈimer toya nipalimoˈotan ako i tamowanan a maemin.” (Matay 28:19, 20; 1 Korinto 15:6) ˈAlomanay ko pakatengilay toniya limoˈot a nisawawaan, to papadama cangra to tamdaw malo Krisciyang. Mitadtaday ci Yis, ano makalim ko tamdaw malo Krisciyang, mitamorong to sapaˈorong ningra i, wa micada to inoˈ ngaˈ ngaˈay. (Matay 11:29, 30) O roma, ano sapihodopaw ko tamdaw a cadaen no Kawas i, wa ihekal cingra a cipinang to saaroˈan ni Yis itini araaw no Kawas. Ikorto, ngaˈayto koniya tamdaw micada to inoˈ, o hatiniay a picada to inoˈ, o kahemekan no Kawas. Adihayay a maˈoningay no Fangcalay Cudad misawacayay tonini, sakacecay hahekalan a Krisciyang cipinangay to kalimelaan ko picada to inoˈ, hanaca cowa pinayar cangra a eca picada to inoˈ.—Dmak 2:41; 9:18; 16:14, 15, 32, 33.

9, 10. Mikitini i milifetan noya mihakelongay a Iciyopiya tamdaw ato tarokos ci Pawlo mananamay ita ko manan?

⁹ ˈOsien ko Dmak 8:35, 36. Haratengen ko cecay tinakoan, o cecay mihakelongay a Iciyopiya tamdaw, ikor no midoko to Kawas i Yirusalim i, malitemohay ci Filip i fatad no pinokayan lalan. Mikayatan no coyoh ci Filipan, tayra i ˈaˈayaw noniya Iciyopiya tamdaw, ‘milasil to ngaˈayay ratoh ni Yis cingranan.’ Samaanay ko demak noniya Iciyopiya tamdaw hani? Tada maolahay cingra to soˈlinay kimad, sapitooraw to limasmas ni Yihofa a midemak, mansa tangsolay cingra micada to inoˈ.

¹⁰ O roma a tinakoan oya miroeroay to Krisciyang a Yutaya faˈinayan, itiniay i patafangay to Kawas a kakitakitan a hofocen cingra. Nikawrira, polong no Yutaya kitakit malahedawayto ko ngaˈayay kalalaˈed aci Yihofa. Oniya faˈinayan ˈifowaay ko falocoˈ to litengan no Yutaya, ikorto  mafalicay ko pakayraan. Mikitiniay cingra i patikolayto maˈorip a Yisan milifok to wacay, ikor samanay ko harateng ningra hani? Makahiyay cingra micada to sadama no Krisciyang, ci Ananiyas. Sowal no Fangcalay Cudad, macada noniya Yutaya faˈinayan ko sadama i, “lowad sato cingra ta mapainoˈ.” (Dmak 9:17, 18; Kalatiya 1:14) Oya kafanaˈanto ita a tarokos ci Pawlo. Cipinang ci Pawlo to saaroˈan ni Yis i araaw no Kawas, tangsolay micada cingra to inoˈ, cowa ka pinayar.—ˈOsien ko Dmak 22:12-16.

11. (1) Misamaanay hano sapatafangaw to tireng a micada to inoˈ ko pacekiwan hani? (2) Maˈaraw ko pacekiwan micada to inoˈ iraay ko manan harateng no mita hani?

¹¹ ˈAlomanay pacekiwan mahecaday oniya tosa tinakoan, ano hakowaayto ko mihecaan nangra, pakayniay i pakasoˈlin ato misalimela to mananamay a kimad makalimay sapatafangaw to tireng a micada to inoˈ. Oya mamicada to inoˈ a tamdaw, hinatalaay cangra mitengil to painoˈay kimad i pitaykayan. Mahemekay ko Misawacayay Tamdaw ni Yihofa pakaˈaraw to pacekiwan micada to soˈlinay kimad, ira ko tatodong a micada to inoˈ. Maˈaraw no Krisciyang wama wina ko wawa no niyah masalalomaˈ no mamicada to inoˈ a tamdaw, tada lipahakay ko falocoˈ nangra. Itini 2017 katayalan miheca, mataˈlifay ko 28 ˈofad 4,000 a ‘citatodongay milifok to tahadaˈocay ˈorip’ a tamdaw, pakayni picada to inoˈ a paihekal to patafangay to tireng ci Yihofaan ko niyah. (Dmak 13:48) Cipinangay cangra, micadaay to inoˈ, o tatooren no Krisciyang a palinian. Mihaenay, ˈayaw no mamicada to inoˈ ko tamdaw wa isalakatho midemak to maanan hani?

12. ˈAyaw no mamicada to inoˈ ko pacekiwan wa isalakatho midemak to maanan hani?

¹² ˈAyaw no citatodong ko pacekiwan a micada to inoˈ, wa isalakat palahad to pasoˈlinay falocoˈ, sapalahadaw to pasoˈlinay falocoˈ kalimelaan ko matatodongay a sifanaˈ to Kawas, araaw Ningra ato milidong to tamdaw a limasmas Ningra. (1 Timoti 2:3-6) Ira ko hatiniay pasoˈlin no pacekiwan, cowato ko mamidemak to kapiliˈan no Kawas a demak, wa midofdof to moecelay a palinian ni Yihofa. (Dmak 3:19) O midemakan no tamdaw ano kaˈintehan no Kawas, ora miketonan ningra a pipatafang itini pinengneng no Kawas awaay ko kapo. (1 Korinto 6:9, 10) Cowa ko pitoor aca to ˈakawangay palinian no Kawas, sapatafangaw to tireng ci Yihofaan a tamdaw mirienangho to saˈopo, fanekfek a mitosil ato padama to tamdaw malo Krisciyang. Sowal ni Yis, o ˈinorong no mihakelongay cingranan ko mitosilay a demak sanay. (Dmak 1:8) Matoor no pacekiwan koniya pina demak, ngaˈ ira ko tatodong i satolon patafang to tireng ci Yihofaan, ngaˈayto micada to inoˈ.

13. Pasifanaˈ to pacekiwan to Fangcalay Cudad i, hano sasakaretengen ita ko kalimelaan no picada to inoˈ?

¹³ Ano padama kita to wawa anca pacekiwan midemak toniya kalimelaan a demak i, haharatengen ko cecay a demak: Ciharatengay ko tamdaw malo Krisciyang, micada to inoˈ ngaˈ ngaˈay. Ano misakaretengay kita to kalimelaan no picada to inoˈ, wa timolo a malalengo to pacekiwan toniya demak, itini matatodongay a toki. Makalimay kita pakaˈaraw to wawa ato pacekiwan padotoc a macakat, hanaca micada to inoˈ.

14. Hano caka ngaˈay kita pacieci to tamdaw micada to inoˈ hani?

¹⁴ Kawriraan, o wama wina, o pacekiway a singsi ato salikaka i kasakopang, cowa ko ngangaˈay miroero to tamdaw papicada to inoˈ, samanen cowa ka pacieci ci Yihofa to tamdaw mihodop Cingranan. (1 Yohani 4:8) Mihaenay, ano pasifanaˈ kita to tamdaw i, pacipinangen cangra, kalimelaan ko pipatireng to kalawidang to Kawas. O harateng no pacekiwan micada to  inoˈ, o nai falocoˈay a maolah to soˈlinay kimad, ciharateng sapitamorongaw to ˈinorong ni Kristo, malo nisawawaan ningra.​—2 Korinto 5:14, 15.

15, 16. (1) O tamdaw tahirato i masaˈosiay a mihecaan ngaˈ ngaˈay micada to inoˈ han? (2) Ano na micadaay to inoˈ i kiyokay ko pacekiwan i, hano mamiliyawho micada to inoˈ ngaˈ ngaˈay malo Misawacaay Tamdaw ni Yihofa hani?

¹⁵ Tahirato i masaˈosiay a mihecaan ngaˈ ngaˈay micada to inoˈ, cowa ka saan. O kacakat no cecacecay pacekiwan i noˈadingoan, cowa ka hecad. O roma tamdaw kaemangho micadaayto to inoˈ, hanaca padotocay madimadi ci Yihofaan. O roma matoˈasay mataˈlifayto ko 100 mihecaan nanam sanayho to soˈlinay kimad! Cipinangto cangra to soˈlinay kimad patafangay to tireng a micada to inoˈ.

¹⁶ O cecay matoˈasay a pacekiwan milicayay to pasifanaˈay cingranan a singsi: “ˈAyaw no pi:na miheca micadaayto kako to inoˈ i roma kiyokay, wa miliyawho a micada to inoˈ han?” Paˈarawan no pacekiway cingranan to caˈof no Fangcalay Cudad. Soˈlin mangataayto 80 ko mihecaan noniya micekiway, kawra cipinangto cingra to pinengneng no Fangcalay Cudad i, caka halafin micadaayto to inoˈ. Pakayni araaw no Kawas ira ko matatodongay a kafanaˈ no tamdaw, ora micadaan nangra a inoˈ, ngaˈ mahemeken ci Yihofa. Mihaenay, soˈlin micada ko tamdaw to inoˈ i kiyokay, wa miliyawho a micada to inoˈ ngaˈ ngaˈay malo Misawacayay Tamdaw ni Yihofa.​—ˈOsien ko Dmak 19:3-5.

17. Toya picadaan to inoˈ a romiˈad, mamicada to inoˈ a tamdaw misongilaˈ a misimsim to manan hani?

¹⁷ O picadaan to inoˈ a romiˈad o kalipahakan a romiˈad, patalipaˈelalen ko mamicada to inoˈ a tamdaw misongilaˈ a misimsim to haˈinorong no picada to inoˈ. Wa misadak to ˈicel ngaˈ madofdof ko miketonan a patafang to tireng, mansa patinakoen ni Yis to taloˈodan ko ˈinorong no Krisciyang. O malo Krisciyangay, “o sakacaawto pidoedo no tamdaw tono tirengan a harateng. O sakapidoedoaw nangra to falocoˈ noya mipatodongay cangraan a mapatay a lomowaday a maˈorip nai patay.”​—2 Korinto 5:15; Matay 16:24.

18. Dotoc a lalakaw wa milengo to manan?

¹⁸ Masowalay i saka cecay fatac, o wina ni Maliya calemcemay to picada no wawa to inoˈ. O Krisciyang a wama wina wa mihaen a miharateng alatek: “Maherekayto ko wawa ako misaday to mamicada to inoˈ han? Iraayto ko matatodongay a sifanaˈ no wawa, ngaˈay a miketon to kahemekan no Kawas a pipatafang to tireng han? Wa salakatho milaheci to picudadan ato katayalan a patosokan ngaˈ micada to inoˈ hokira? Micadato ko wawa to inoˈ ano pakidem ko raraw wa samaanto hani?” Dotoc a lalakaw wa milengo tonini a demak, ato sasamaan ko Krisciyang a wama wina matatodong ko pinengneng to micadaay to inoˈ a demak.