1. Isaka cecay hahekalan, misiˈayaway ko Krisciyang to masamaanay a pakayraan?

MAEDENG isaka 62 miheca tangasa isaka 64 miheca, tarokos ci Pitiro patikamiay to “maliwasakay a maroˈ itira i Pontus, i Kalatiya, i Kapatokiya, i Aciya ato Pitiniyaay a nipiliˈan no Kawas a salikaka.” (1 Pitiro 1:1) Ora itiniay i Aciya pala a kasakopang, masasi romaay ko serangawan lalengawan nangra, misaaliay cangra to sapakalalok ato sakayat. O itiraay Krisciyang tahasiˈayaway to mahecaday “o nipitodoh no namal” a sapalifet, mipalakan mitonganganan no tamdaw. Itiniay i karorayan a lintad a maˈorip cangra, saka, mihaenay ci Pitiro a mitilid: “Mangatato ko paherekan no hekal.” Mitilid cingra toniya sowal to caho pakaala to 10 a miheca i, malaheciayto ko lekakawa no Yutaya. O maanan ko padamaay to itiyaay a Krisciyang miremo tora karorayan a lintad hani?—1 Pitiro 4:4, 7, 12.

2, 3. Misamaanay hano pakalalok ci Pitiro to Krisciyang patahekal to mihamhamay hani? (Nengnengen ko satapangan coka.)

² Pakalalokay ci Pitiro to salikaka a “kasasihamham kamo,” sanay.  (1 Pitiro 4:9) “Mihamham” sanay a Krisiya sowal, tatodong i, “mahemekay anca sidaˈitay a micada to kafahalan a tamdaw,” o sanay. Ora sasinanoten i, o salikaka ko pakalalokan ni Pitiro a “kasasi” mihamham, mankora oyaan kafanaˈanto a tamdaw no mita ko hahamhamen. Mihaen to demak iraay ko maanan a epocan hani?

³ Ano patahekal to mihamhamay o papaingid to kalalaˈed ita ato salikaka. Tikolen iso miharateng hena. Na tayraayto kiso i lomaˈ no tao a palafang, rihakeday tora kahemekan a toki han? Coko dihekoay nanay ko falocoˈ iso a miharateng a nimaan? Ano mihamham kiso to salikaka i kasakopang i, coko macakatay ko kalawidang namo han? Ano patahekal kita to mihamhamay a micada to salikaka i, edengan ko matiniay a toki to mamitongal to kafanaˈ i cangranan. Itini i lintad ni Pitiro, o pakayraan no hekal itiya tatiitatiihay, o Krisciyang oha papakedec to nika lalaˈed nangra wangaˈ. Anini, itiniay i “saikoikoray nonini a hekal” a maˈorip kita, oha mamihaen to demak.—2 Timoti 3:1.

4. Oniya lalakaw papacaˈof to maanan a salicay?

⁴ Iraay ko maanan a toki ita, ‘masasihamham’ hani? Misamaan kita mikiemel a patahekal to mihamhamay hani? Wa misamaan kita malo ngaˈayay a palafangay hani? Onini lalakaw papacaˈof toniya salicay.

5. Itini i kasaˈopoan, misamaan kita mihamham to faelohay a tamdaw?

⁵ Itini i kasaˈopoan: Militemohay kita to polong tamdaw tayni mirienang to saˈopo, kalacafay kitanan a mitangidaf to noˈadingoan a kakaenen. Hay, cima ko mitahidangay kitanan hani? Ci Yihofa ato likakawa Ningra. (Loma 15:7) Ano tayni ko tamdaw to sakina cecay a masaˈopo, ano samaanayto ko caˈedong ningra, haenen ita o cilomaˈay militemoh cingra. (Yakop 2:1-4) Ano awa ko mikiharay tora faelohay tamdaw i, wa ngaˈay pakaaroˈen ita i tatihi no mita han? O mamiakoˈid cingra to nika pakafanaˈ cingranan to samaanay ko kamok no saˈopo, halo padama cingranan mifohat to sinael. Ano mihaen i, o ‘misangaˈayay mihamham to lafang’ kita!​—Loma 12:13.

6. O cima ko tatahidangen ita tayni i lomaˈ komaen hani?

⁶ Pohayen tayni i lomaˈ komaen: Nolitengan a Israil, patahekal to mihamhamay mahaopay, mitahidang to lafang tayni i lomaˈ a komaen. (Satapangan 18:1-8; Kakitaan 13:15; Luka 24:28-30) Pohayen ko tamdaw a komaen i lomaˈ, paihekalay to sapisawidangaw cangranan, patireng to ngaˈayay noka lalaˈed. Cima ko tatahidangen ita tayni i lomaˈ hani? O salikaka i kasakopang. Samanen ano tahapades kita i, misaaliay kita to madimadiay a widang a midama kitanan. Isaka 2011 miheca, o Kasacefang no Mikayatay a Malohemay Malitengay i Congpo, mifalican ko toki to picekiwan to Mikecolay saˈopo i Pitil, naitini to dadaya 6:45 mifalic tayra i 6:15 a misatapang. Ano mihaen i, ho ngaˈay kahenay mahererek, ira ko toki no matayalay i Pitil masasihamham. O romaroma a fenpo mihaenay a mifalic, telocto i, makakedecay ko kalalaˈed no matayalay i Pitil a tamdaw.

7, 8. Misamaan kita mihamham to tayniay mikimad a salikaka?

⁷ Ano ira ko roma kasakopang a salikaka, kasakilac kantok anca taypiyaw no fenpo tayni a mikimad i, maolahay kita mihamham to matiniay a salikaka. (ˈOsien ko 3 Yohani 5-8.) Tangidafen ko kakaenen mikapot cangranan a komaen. Wa makahi kiso mihaen han?

⁸ Itini i Padaka sanay ko sowal no cecay fafahiyan salikaka: “Pinaayto miheca, kako ato faˈinay, marariday mipohay to mikimaday tayni i lomaˈ a komaen. To kinacecacecay a pakaen cangranan, lipahakay ko falocoˈ, cowa ka tawal niyam a miharateng, kalimelaan i, makowaday kami i noˈadingoan. Tada mahemekay kami mihamham cangranan!”

9, 10. (1) O cima ko misaaliay to halafinay a pilafinan? (2) Ano miming ko lomaˈ wa ngaˈay palafin cangranan han? Sadaken ko tinakoan.

⁹ Hamhamen ita ko hahalafin milafin a  tamdaw: Itini nolitengan, patahekal to mihamhamay hananay, mahaopay to papalafin to karihakedan a tamdaw. (Yopu 31:32; Filimon 22) Anini, o papatahekal kita to mihamhamay. Ano milisoˈ ko kasakilac kantok i, o lalimasmasen ko pilafinan nangra. O mirienangay to pahatatanamay to demak no likakawa no Kawas a salikaka, ato patirengay to kasaˈopoan ato pitaykayan a tamdaw, misaaliay to pilafinan. Roma i, ano mapades, awaay ko pikilomaˈan no ˈalomanay Krisciyang, ˈayaw a mapatireng ko lomaˈ nangra, misaaliay to pilafinan cangra. Kawra cowa ka ngaˈay a miharateng kita to edengan oya makapahay ko lomaˈ a salikaka ko papafeli to pilafinan no salikaka, alatek adihayayto ko micadaan nangra palafin. Ano soˈlin mimimiming ko lomaˈ, wa makahi kiso misaday to pilafinan nangra han?

¹⁰ O cecay faˈinayan salikaka i Koriya, na palafinay to mirienangay to pahatatanamay picudadan, sanay ko sowal ningra: “Isalakat samisimisiay kako to papalafin cangranan hokira, samanen raramod sanayho kako, mimingay ko lomaˈ. ˈArawhan mahapinangay ako, mihamham cangranan palipahakay tamiyanan. Tona faelohay ko kararamod, mananamay niyam i cangranan, ano makakapot ko mararamoday a midoko ci Yihofaan, malacafay a micangacang to noˈadingoan a patosokan i, tada o kalipahakan a demak.”

11. Misamaanay hano ngangaˈay kiso mihamham to faelohay a salikaka i kasakopang hani?

¹¹ Mihamham to faelohay a salikaka: Alatek iraay ko malinahay tayni i kilac iso, o niyahan harateng a tayni mipadama to mitosilay demak, o romaroma minilnilan tayni a misakafah. Alatek cowa ka nanam to—faelohay kitiraan ato kasakopang, o romaroma maminanamho to faelohay sasowalen ato cowa ka lecad a serangawan. Ngaˈayay tahidangen cangra kalacafay kitanan a komaen, mihalama, hongaˈ ira ko faelohay a widang nangra a minanam to faelohay a kitiraan.

12. Patahekal to mihamhamay hano cowa ko mamipalak to adihayay a payci? Sadaken ko tinakoan.

¹² Patahekal to mihamhamay cowa ko mamipalak to adihayay a payci. (ˈOsien ko Luka 10:41, 42.) O cecay faˈinayan salikaka milomalay, tiya misatapang mala milakowitay to riyar a mitosilay cangra, sanay ko sowal: “Itiya kako ato fafahi kaemangayho kami, awaay ko nalifetan, hanaca maˈilolay to paro no lomaˈ. To cecay a dadaya, o fafahi ako tada maˈiwilay ko niyaroˈ ningra, samaamaanen ako misayar, cowa ka sayar. Maedeng pito ira ko kalitosa no toki, iraay ko mikongkongay to fawahan. ˈArawhan o cecay a mipacekiwan, mitatoy to tolo a ˈasilo, militemoh tamiyanan. Pacomod han niyam pakamaroˈ, pafelien to nanom malacafay kami komaen to ociya ato ciyawkeli. Itiya cowaho ka fanaˈ kami tono Swahili a sowal, cowa ka fanaˈ tono Padaka a sowal cingra, nawhani oniya nalifetan, mapatirengay kono kalawidang to itiraay a salikaka, palipahakay tamiyanan koni.”

13. Patahekal to mihamhamay wa ira ko manan a haepoc?

¹³ Matalawan nanay kiso mihamham to tamdaw han? Ano mahaenay i, malahedaway iso ko toki a lipahaken ato salikaka, ato patireng to koedaway a noka lawidang cangranan. Ano mihamham kita to tao i, cowato ko mamatoˈol kita. Ano hatiraay i, hano matalaw ko roma tamdaw patahekal to mihamhamay hani? Lalengoen ita ko pina lalangian ilaeno.

14. Ano awaay ko toki ato ˈicel ita mihamham to tao anca micada to pihamham no tao, wa misamaan kita to demak ngaˈ?

¹⁴ Toki ato ˈicel: O midokoay ci Yihofaan a tamdaw matayalay ko nokaˈorip nangra, adihayay ko dademaken a demak, awaayto ko toki ato ˈicel mihamham to tao, sanay miharateng ko roma tamdaw. Ano hatiraay i, sasinanoten iso a mifalic ko pilimasmas to toki, hongaˈ ira ko toki ato ˈicel iso a mihamham to tao anca micada to  pihamham no tao. O Fangcalay Cudad pakalalokay to Krisciyang a patahekal to mihamhamay. (Hipray 13:2) Mankora, mipalak to toki mihamham to lafang tada o masaka limelaan a demak. Lowanen ita ko cowa kalimelaan a demak, hongaˈ ira ko toki mihamham to lafang.

15. O roma tamdaw sapihamhamaw to tao, kawra calemcemay to maanan?

¹⁵ Calemcem no falocoˈ: Na miharatengay kiso to mamihamham to tao, kawra cowa ko mamafilo ako, sanay han? O roma tamdaw matemoyay mafokil a miholol to lafang. O roma tamdaw awaay ko payci, cowa ka matira to romaroma salikaka a mihamham to lafang sanay. Soˈlin i, ano ecaeca ka kapah ko lomaˈ iso, ano macingkiyatto masolimetto ko lomaˈ, ngaˈayayto mahemeken ko lafang.

16, 17. Ano mihamham to lafang i, samaanen a milowan to rawraw no falocoˈ?

¹⁶ Marawrawan nanay kiso to sapihamhamaw to lafang han? Aka marawraw, iraay ko matiraay tisowanan a tamdaw. O cecay itiniay i Ikok a malohemay malitengay, sanay ko sowal: “Itini i mihamhamay a demakan, iraayto ko miming a rawraw no falocoˈ. Kawra mihamham to lafang mahecaday o midokoay ci Yihofaan, isalakat calemcemay kita alatek, salikolikor malifokay ko adihayay a sapalemed ato marenecay a falocoˈ. tahidangen ko tamdaw tayni i lomaˈ a komaen to kafi aca, malaholoholol, mahemekayto ko falocoˈ.” Ano mikifalocoˈay a mihamham to lafang i, wa cato ko mamarawraw. (Filipi 2:4) O ˈalomanay tamdaw mahemekay a milomal to nalifetan no niyah, ano makakapot kita i, o ngaˈayay a toki to masasi paladaˈ to nalifetan. Sanay ko sowal no cecay malohemay malitengay: “Tahidangen ko salikaka tayni i lomaˈ ako, iraay ko toki ako mafanaˈ ato cipinang cangranan, mangalefay mafanaˈ to kapinanam nangra to soˈlinay kimad.” Ano paihekal kita to manonoˈ falocoˈ, o lalipahak a macacawmaˈ kita.

¹⁷ O cecay misakafahay fafahiyan salikaka, mihamhamay to pahatatanamay a picudadan a salikaka, sanay ko sowal: “Isalakat calemcemay kako, samanen o kafotiˈan aca ko sapafeli ako, matelangay ko lalosidan no lomaˈ. Ikor, o sowal no fafahi no cecay a singsi no picudadan, masayaray ko falocoˈ ako. O karahekeran nangra itini i pilisoˈ i, itiraay i lomaˈ no iraay ko noˈadingoan harateng a salikaka a milafin, alatek cowa ko cihafayay cangra, kawra mahecaday ko patosokan, sapidokoaw ci Yihofaan a misadolo to nokaˈorip cangra sanay. Maharatengay ako kaemangho pasowalay ko ina ako: ‘O nika komaen to kalo dateng a masasiolaolah ko ngaˈay,’ sanay.” (Taneng 15:17) Mihaenay haw i, aka pakinali calemcem to mihamhamay to lafang, paihekal to olah i cangranan ko masaka limelaan.

18, 19. Patahekal to mihamhamay misamaanay palahedaw to tatiihay noka piharateng ita to tao?

¹⁸ Tatiihay noka piharateng to tao: Itini i kasakopang, iraay ko salikaka, to coko padetengan a midokaˈ to falocoˈ iso han? Tatiihay ko noka piharateng iso i cingranan alatek. Ano caka pisaˈicel kiso a misalof to kalalaˈed namo i, wa padotoc a tatiihen ko falocoˈ iso, cowa ko sapitahidangaw cingranan tayni i lomaˈ iso. O roma i, iraay ko namidokaˈay to falocoˈ iso a tamdaw, hato pasangaran nanay kiso mitahidang cangranan.

¹⁹ Pakalalokay ko Fangcalay Cudad kitanan patahekal to mihamhamay, mihaen o ngangaˈay a misalof to kalalaˈed ato tao, ano o ˈadato o mamala ngaˈay. (ˈOsien ko Taneng 25:21, 22.) Ano pohayen palafang ko tamdaw, ngaˈayay palahedaw to tatiihay noka piharateng cangranan, halo mamafalic ko pinengneng cangranan. Alatek o mamaˈaraw iso ko makapahay a capeling nangra, nao mihaenay ko pinengneng ni Yihofa, saka soloten Ningra cangra mitoor to soˈlinay kimad. (Yohani 6:44) Ngaˈayay kiso paihekal to olah, kiˈayawen a mitahidang, alatek o papatikol a malangaˈay kamo matira isaˈayaw. Hay, samaanen iso mihapinang to mikitiniay i olah a falocoˈ a patahekal ko niyah a mihamham to tamdaw hani?  O cecay pakayraan i, tooren ko Filipi 2:3 a midemak, sanay ko sinael: “Kao misapoeneray ko falocoˈ namo. Ikakaay no mako ko tao.” Wa ngaˈay kita misaˈicel mikilim to kaikakaan no salikaka i kitaanan, alatek​—o pakasoˈlin no falocoˈ nangra, pihadidi nangra, timolo nangra, anca romaroma makapahay a capeling nangra​—ano mihaen i, o maolahay kita cangranan, makahi nai falocoˈ a micada cangranan.

20. (1) Hano caka ngaˈay kita palasawad to satahidang no tao? (2) Misamaan kita paihekal to misakaretengay to satahidang no tao?

²⁰ Milicayay ko mitiliday to ˈOlic a Tafitian: “[Yihofaaw], cima ko mamangaˈay a micomod i fangcalay a pitaˈongan Iso?” (ˈOlic 15:1) Midotocay ci Tafiti pacaˈof tora salicay, to papaira to maanan a capeling ko mamalo lafang no Kawas, ora cecay i, mitooray to miketonan a sowal, sanay ko sinael: “O niketonan ningra a sowal, ano masiposiponho cingra i, caay ka eca ka lahecien ningra.” (ˈOlic 15:4) Mihaenay, micadaayto kita to satahidang no tao i, aka a palasawaden. Ora mitahidangay a tamdaw alatek maherekayto misaday, ano palasawaden ita i, kalimelaan ko pisaday ningra. (Matay 5:37) O roma i, o ikakaay ko nika ngaˈay no roma a satahidang saan a palasawad to saˈayaway a satahidang, mihaen to demak o ciolahay, o misakaretengay to tamdaw han? Ano o mananto ko sapataheka no tao kitaanan i, kifalocoˈen ita miakoˈid cangra. (Luka 10:7) Nikawrira, ano tahalifaay kita to maanan demak toha papalasawaden kora satahidang i, kalikien a pasowal cangra ko ngaˈay.

21. Misamaanay hano misakareteng to itiraay a pinangan papadama kitanan malo sangaˈayay a lafang?

²¹ Ano misalafang kita i, misakaretengen to itiraay a pinangan. Itini i romaroma serangawan, ano fahal sa tayra milisoˈ to tamdaw, kamayanay a patahekal to mihamhamay to cilomaˈay; kawra o roma i, paˈayawen pasowal ngaˈ tayra milisoˈ. Itini i romaroma pala, o cilomaˈay tano kadofahay a kakaenen pataheka to lafang; o roma i, mahecaday a mitaheka ko paro no lomaˈ to lafang. O roma kitiraan, miˈorongay ko lafang to kakaenen; o roma i, cowa ka olah ko cilomaˈay miˈorong to maamaan a sapatelong. O roma serangawan, mananamay ko tamdaw milalang to kinapinapina; o roma i, ano mihaen a milalang to satahidang, o tatiihay. Ano kiemelen ita mitoor ko pinangan no itiraay, o mamahemek ko mitahidangay kitanan a tamdaw.

22. Patahekalay to mihamhamay hano tada masaka limelaan?

²² O sowal ni Pitiro: “Mangatato ko paherekan no hekal,” sanay. (1 Pitiro 4:7) Ano palalinien to lintad ni Pitiro, mangalefay ko kapingata ita to pahererekan noni hekal, ikor o mamisiˈayaw kita to taˈangayay padiing to awaawaayho isaˈayaw. Tona mamatongal matongal ko pades, masasi saaliay kita to olah no salikaka. Mankora, nohatiniho mikiemel kita kalasaka dademak to sapalimoˈot ni Pitiro: “Kasasihamham kamo.” Awaay ko hererekan no patahekalay to mihamhamay, hanaca mihaen to demak, o masaka limelaan, o kalipahakan!—1 Pitiro 4:9.