1. Samaanay pasowal ko Fangcalay Cudad to sarikec hani?

MATENGIL ko “sarikec” i, wa maharateng iso ko manan? Kaliki a maharateng iso ko satefoc alatek, kawra iraayho ko roma tatodong no pirikec. Sowal no Fangcalay Cudad iraay ko epoc no sarikec i tamdaw, latekay milingatay to sifanaˈ, taneng, olah ato ˈorip. (Taneng 1:2-7; 4:11-13) Mirikec ko Kawas kitanan samanen maolahay Cingra kitanan, nanay milifok kita to tahadaˈocay a ˈorip. (Hipray 12:6) O pirikec ni Yihofa latekay mahaopay ko satefoc, kawraan o mitefoc sanay cowa ko kariˈang a pakidem. Soˈlinay i, o tatodong no “sarikec” milingatay to sapasifanaˈ, mahecad o pasifanaˈno wama wina to wawa.

2, 3. O pirikec hano mahaopay ko sifanaˈato pitefoc? (Nengnengen ko satapangan coka.)

² Haratengen koniya pakayraan: O cecay ci Kating ko ngangan a faˈinayan wawa mimaliay i lomaˈ, pasowalan no wina cingra: “Katingaw, pasowalanto ako kiso, aka pimali i lomaˈ, maˈari ano sawni ko dafong.” Kawra, cowa pitengil ci Kating to sowal no wina, padotocay mimali, telocto, maˈarito ko talid. Samananto no wina mirikec cingra hani? Sapasifanaˈaw ci Katingan, miliyawan no wina pasowal to hano mararaw  ko demak ningra. Harateng no wina nanay cipinang ci Kating, ano midoedo to wama wina o sakangaˈay ningra, hanaca misaˈosian no wama wina a rikec, o matatodongay. Sapadamaaw ci Katingan a minanam to sapasifanaˈ, o pirikec no wina cowa ko pasifanaˈaca, mahaopay ko matatodongay a pitefoc, cowato kangaˈay ci Kating mihalama to mali, mihaen wa maharateng ni Kating, ano caka pidoedo to wama wina, wa samaan ko hateloc ningra.

³ O malo Krisciyangay, masalalomaˈay no paro no lomaˈno Kawas kita. (1 Timoti 3:15) Cipinangay kita iraay ko fadangalan ni Yihofa patireng to sarikec, hanaca ano misafelit kita to palinian Ningra i, iraay ko fadangalan Ningra sidaˈit a mirikec kitanan. Mangalef ano mararaw kita tatiih ko teloc i, o pirikec ni Yihofa wa patalipaˈelal kitanan, tada kalimelaan ko pihakelong to kakarayan a Wama. (Kalatiya 6:7) Tada ciharatengay ko Kawas kitanan, samanen cowa kaolah Cingra pakayni kararaw ita a micada to taˈangayay a roray.​—1 Pitiro 5:6, 7.

4. (1) Ano mirikec kita i, samaan ko demak wa micada to sadama ni Yihofa hani? (2) Oniya lalakaw wa milengo to manan a salicay?

⁴ Tooren ita ko Fangcalay Cudad a mirikec, wa ngaˈay padama to wawa ato pacekiwan malaˈosi ko patosokan malo Krisciyang. Pasifanaˈkita to tamdaw ano saka dademaken ko kimad no Kawas, wa ngaˈay ‘tano moecelay a mirikec,’ pacipinang cangranan a midofdof to kihecod a limoˈot ni Yis. (2 Timoti 3:16; Matay 28:19, 20) Wa palemeden ni Yihofa kita, ho mafanaˈkita samaan pahatatanam to pacekiwan a padama to ˈalomanay tamdaw malo Krisciyang. (ˈOsien ko Titus 2:11-14.) Dotoc wa milengo kita to tolo kalimelaan a salicay: (1) Mikitini pirikec no Kawas samaan a mahapinang ita to maolahay Cingra kitaanan? (2) O roma tamdaw na mirikecan no Kawas, mikitira milifetan nangra wa mananam ita ko maanan? (3) Ano ira ko fadangalan ita a mirikec, wa ngaˈay kita misamaan mitodong ci Yihofaan aci Yisan?

5. Sarikec no Kawas hano o paihekalay to olah Ningra kitanan hani?

⁵ Mikitiniay i olah ci Yihofa a misalof, pasifanaˈato pahatatanam kitanan, padama kitanan materek i olah Ningra, padotoc romakat i saka tahadaˈoc no ˈorip a lalan. (1 Yohani 4:16) Cowa pisakahemaw ato pakangodo ko Kawas kitanan, ho eca ka piharateng to awaay ko kapo no niyah. (Taneng 12:18) Soˈlinay i, pafelian ni Yihofa kita to sakaseneng, misaaretengay Cingra to makapahay a capeling ato pasalatay a harateng no mita. O macadaay ita a sarikec i, ano naitiraay i Fangcalay Cudad, mitepangan cudad, nai Krisciyang a wama wina anca nai malohemay malitengay i, o mamahapinang ita koniya sarikec, o sapaihekal no Kawas to olah kitanan han? Ano cowa ka hapinang ita ko ‘kapolin’ i noˈadingoan i, o malohemay malitengay wa mitodong to olah ni Yihofa, tano sidaˈitay siniˈadaay a misalof kitanan.​—Kalatiya 6:1.

6. Micada to pirikec a malasawad ko ˈinorong a dademak i kasakopang i, hano kamayanay o olah no Kawas kitanan konini?

⁶ Latekay cowa ko no sowal aca a pirikec, ano pakidem ko raraw no tamdaw, ora micadaan ningra a pirikec alatek malasawad ko ˈinorong ningra i kasakopang. Soˈlin mahaen, oniya pirikec kamayanayho a paihekal to maolahay ko Kawas kitanan. Awato ko ˈinorong no mararaway a tamdaw dademak, wa padama cingranan cipinang to o mamisamacay a micekiw, midotim ato mitolon tada kalimelaan, samanen oniya demak wa matongal ko ngaˈayay kalalaˈed ningra ato Kawas. (ˈOlic 19:7) Ikorto i, o mararaway a tamdaw alatek wa miliyaw ira ko ˈinorong i kasakopang. O roma i, mifalahay a limasmas o sidaˈit ni Yihofa, oha mamadipot ko kasakopang eca ka denga no tatiihay a pifiyor. (1 Korinto 5:6, 7, 11) Matatodongay ko pirikec ni Yihofa, mansa o mifalahay a limasmas wa papiharateng to mararaway tamdaw to karetengay ko raraw ningra, ngaˈay micoroh cingranan a pasasiyor.​—Dmak 3:19.

7. O cima ci Sipna? Na paihekalay cingra to masamaanay a waywayan hani?

⁷ Sapihapinangaw to kalimelaan ko sarikec, nengnengen ita ko tosa tinakoan: O cecay ci Sipna, itiniay lintad ni Hicikiya, o roma, o salikaka ci Kolaham. Ci Sipna, ‘o ˈaˈideman i lomaˈno hongti’​—patadoay ci Hicikiyaan a dademak—​Iraay ko fadangalan ni Sipna. (Isaya 22:15) Ka adayayan i, ikor misatakaraway cingra, micangacangay to ˈdil no niyah. Misadayayho to kadofahay a hatadem no niyah, hanaca iraay ko ‘makapahay a paliding no efa’!​—Isaya 22:16-18.

8. Samaanay ko pirikec ni Yihofa ci Sipnaan? Iraay ko manan a pilingat ci Sipnaan hani?

⁸ Micangacangay ci Sipna to ˈdil no niyah, mansa pakotayan no Kawas ci Iliyakim to saaroˈan ningra. (Isaya 22:19-21) Oniya demak itiniay pilood no hongti no Asiriya ci Sinakirip to Yirusalim a mifekad. Caka halafin, miocoran no hongti no Asiriya ko taypiyaw mikerid to sofitay tayra i Yirusalim, pakayniay sapitoledaw to harateng no Yutaya tamdaw, ho matapiˈci Hicikiya sanay. (2 Hongti 18:17-25) Miocoran ci Iliyakim masasoˈaraw to taypiyaw no Asiriya, miˈorongay cingra to tatosa a hacafay, o cecay i, o mitiliday to demak a Sipnaan. Ano nengnengen i paihekalay ci Sipna to misapoeneray falocoˈ, micada to sasafaay a saaroˈan, cowa ka keter cingra. Mikitini malifaay ni Sipna wa ngaˈay mananam ita ko maanan hani? Nengnengen ita ko tolo ciepocay a ngaˈayay nanamen a kalimelaan.

9-11. (1) Mikitini i nalifetan ni Sipna wangaˈay mananam ita ko maanan? (2) Mikitini i demak ni Yihofa ci Sipnaan, o manan ko mananamay no miso?

⁹ Salakat, malasawaday ko saaroˈan ni Sipna. Oniya milifetan ningra maharatengay ita ko limoˈot no Fangcalay Cudad: “Pasayra i katekopan ko rakat no malataˈangay a tamdaw, o isatakaraway a tamdaw i, caay ka eca ka tefad.” (Taneng 16:18) Itini kasakopang ano iraay ko ˈinorong iso a dademak, misakaretengan no tamdaw minengneng, wa misaˈicel kiso paihekal to misapoeneray falocoˈ, matatodong ko pinengneng to niyah han? Pafelian ni Yihofa kiso to inaneng, padama tisowanan milaheci to demak, panokayan iso ko ˈdil ci Yihofaan hokira? (1 Korinto 4:7) Sanay ko sowal no tarokos ci Pawlo: “Sapasowal ako i kahacecacecay namo. Aka pilakowit ko harateng namo a misatakaraw.” Patalipaˈelalay cingra to Krisciyang tano matatodongay a harateng ko pinengneng to niyah.​—Loma 12:3.

¹⁰ Dotocto, soˈlin pakidemay ko pirikec ni Yihofa ci Sipnaan, kawra paihekalay koni to pasoˈlinay Cingra to mamafalic ci Sipna. (Taneng 3:11, 12) O malasawaday ko ˈinorong a Krisciyang, ngaˈay mikitini a milifok to sapakalalok! O micadaay to sarikec a tamdaw hamaan maketer a ngaliwngiw, tooren ko pakayraan ato ˈicel  no niyah padotoc a mihodop to Kawas, oniya sarikec o wacay to maolahay ko Kawas tisowanan han ko pinengneng. Hamaan mapawan, wangaˈayho malidong sanay ko Kawas minengneng to tamdaw, ano paihekal kita to misapoeneray falocoˈ, wa palemeden Ningra kita. (ˈOsien ko 1 Pitiro 5:6, 7.) Mikitiniay i olah no Kawas a pirikec, o sapisalof Ningra kitaanan a pakayraan, mihaenay mahecad kita o konayiˈay a ditaˈ, micada to pisalof no Kawas.

¹¹ Saikoray, mihaen ko demak ni Yihofa ci Sipnaan, o ngangaˈay todongen no cifadangalay mirikec a tamdaw, tinakoen o Krisciyang wama wina ato malohemay malitengay no kasakopang. Mirikec ci Yihofa paihekalay to ˈintehay Cingra to tatiihay demak, kawra ciharatengay Cingra to mararaway a tamdaw. Ano mamirikec ko Krisciyang wama wina anca malohemay malitengay, wa ngaˈay kiso todongen ci Yihofa a ˈinteh to raraw, hanaca sasinanoten ko kangaˈayan no wawa ato mararaway a tamdaw han?​—Yuta 22, 23.

12-14. (1) Pakayni mirikecay samaanay ko harateng no roma tamdaw? (2) O Fangcalay Cudad samaanay padama to cecay salikaka mifalic to harateng ningra? Ikor samaanayto hani?

¹² Ka adayayan i, micada to sarikec ko roma Krisciyang, pakidemay ko somad hato liyas sanay to Kawas ato salikaka. (Hipray 3:12, 13) O mahaenay tamdaw cowato ko mamalidong han? Nengnengen ko milifetan ni Kolaham, na mafalahay no kasakopang cingra, mataˈlif ko cecay liyad miliyaway cadaen no kasakopang. Kawra ikorto cowa pirienang to saˈopo ato mitosil ci Kolaham. Mataˈlif ko pina miheca, tahidangan ni Kolaham ko cecay kangaˈayan ningra a malohemay malitengay malalengo cingranan to Fangcalay Cudad.

¹³ Sowal noniya malohemay malitengay: “O dangoc ni Kolaham i misatakaraway. Tada mapiliˈay cingra toya mifalahay cingranan a malohemay malitengay. Kinapina a malalengo to Fangcalay Cudad, malacafay kami a minengneng to samanay ko sowal no Fangcalay Cudad to misatakaraway, ato tatiihay a pilingat no misatakaraway. Mikitini Fangcalay Cudad mahapinangay ni Kolaham ko dangoc no niyah, mahecaday o dadingoan, maˈaraw ko soˈlinay a pising no niyah! Tada ciˈicelayto ko kimad no Kawas! Cipinangay to ci Kolaham to iraay ko “mifalatay a kilang” i mata no niyah, o misatakaraway ato hinalikafay a waywayan, soˈlin oniniyan ko dangoc ningra. Misaˈosiay cingra misalof to tatiihay a waywayan no niyah, misatapangayto mirienang to saˈopo, malalok a micekiw to Fangcalay Cudad. Mitolon to romiˈamiˈad, mitamoronagay to noˈadingoan a ˈinorong, tada mahemekayto ko fafahi ato wawa ningra.”​—Luka 6:41, 42; Yakop 1:23-25.

¹⁴ Padotocay koniya malohemay malitengay a somowal: “O cecay romiˈad, pasowalay ci Kolaham takowanan, tada mitemeray to falocoˈako. Sanay cingra: ‘Halafinay kako mafanaˈto soˈlinay kimad, misakafahayho kako itiyaho. Kawra, tahanini ngaˈnaifalocoˈkako a pasowal to tada maolahay kako ci Yihofaan.’ Caka halafin, misatapangay cingra palayap to mayko i kasakopang—tada limelaay cingra toniya ˈinorong. O malifetay ni Kolaham mananamay ako, ano misapoener ko falocoˈita a micada to sarikec no Kawas, wa paira to taˈangayay a sapalemed no Kawas!”

15. Ano sapadamaaw to tao micada to sifanaˈato sasalof, sasamaan ko demak no cifadangalay mirikec a tamdaw hani?

¹⁵ Ano mamalo ngaˈayay a singsi kita, isalakat malo malalokay a micudaday. (1 Timoti 4:15, 16) Mahecaday, saka tatodongaw ko pirikec, kalimelaan ko padotoc a micada to sakayat ni Yihofa. Iraay ko fadangalan mirikec a tamdaw ano paihekal to misapoeneray falocoˈ, wa kangodoen no tao cingra, makahi micada to pasifanaˈanca sasalof ningra. Nengnengen ita ko taˈarawan ni Yis.

16. Pakayni i matatodongay a pirikec ato ciepocay a pasifanaˈ, mikitini taˈarawan ni Yis mananamay ita ko maanan?

¹⁶ Maolahay ci Yis midoedo to sowal no kakarayan  Wama, ano pasangarto ko pakayraan kamayan cingra midoedo ci Yihofaan. (Matay 26:39) Mifanaˈan ningra ko tamdaw, o sapasifanaˈato taneng ningra saeto nai kakarayan a Wama. (Yohani 5:19, 30) Misapoeneray a midoedo ci Yis, o moecelay ko falocoˈa tamdaw maenepay cingranan, oniya capeling padamaay cingranan malo sidaˈitay ato siniˈadaay a singsi. (ˈOsien ko Luka 4:22.) O roma tamdaw mahecaday, ‘o mapaekelay a ˈaredo’ ato ‘mamalanto a keliw,’ matengil nangra ko sidaˈitay a sowal ni Yis matemeray ko falocoˈ. (Matay 12:20) Itini caka dolo paihekal to mihadidiay a pakayraan, kamayan sidaˈit ci Yis micada to tamdaw. Tinakoen, paihekal ko nisawawaan to maˈanofay falocoˈato misatekeday a harateng i, mihadidiay ci Yis a misalof cangranan.​—Marko 9:33-37; Luka 22:24-27.

17. Sasamaan ko demak no malohemay malitengay wa masongilaˈa madimokos ko siri no Kawas?

¹⁷ O malohemay malitengay wa mitodong to taˈarawan ni Kristo, mitoor to palinian no Fangcalay Cudad a mirikec. Mihaen ko demak no malohemay malitengay, paihekalay to makalimay ko niyah micada to sakayat ni Yihofa aci Yis. Sanay ko sowal ni Pitiro: “Dipoten ko nipatorodan no Kawas i tamowanan a masafelaway a siri Ningra. Aka kao nipaciecian. Toor han ko nafalocoˈan no Kawas a milonok a midipot cangraan. Aka kao milifonay ko harateng namo a midipot. Kao naifalocoˈay ko nika tayal namo tonini. Aka pipaekel a mikowan to nipatorodan i tamowanan a siri. Kao malopiˈarawan no masafelaway a siri kamo.” (1 Pitiro 5:2-4) Makahi ko malohemay malitengay midoedo to Kawas ato ˈaˈideman no kasakopang, ci Kristo wa paira to saka ciepoc no niyah ato salikaka i kasakopang.​—Isaya 32:1, 2, 17, 18.

18. (1) Milongocay ci Yihofa to sasamaan ko demak no wama wina hani? (2) Samaanan ni Yihofa padama ko wama wina mitamorong to pasifanaˈay to wawa a ˈinorong hani?

¹⁸ Ano pasifanaˈato mirikec ko tawki no lomaˈto wawa mamitodong ci Kristoan. Palimoˈotay ko Fangcalay Cudad to tawki no lomaˈ: “Kiso o mama i, aka pakaketeren ko wawa iso. Kao nano [ni Yihofa] a pasifanaˈato palimoˈot ko sapalatamdawaw iso to wawa iso.” (Ifiso 6:4) Kalimelaan ko pihaen no tawki no lomaˈhan? Sowal i Taneng 19:18: “Yo kaemangho ko mihecaan no wawa i, tangsolen a pasifanaˈa palatamdamdaw, nikawrira, aka pakinalien ko demak to sakaecaaw ka tekop nangra.” Ano caka songilaˈen no Krisciyang wama wina mirikec ko wawa, wa ciˈinorong cangra ci Yihofaan. (1 Samuil 3:12-14) Ano misapoener ko falocoˈno Krisciyang wama wina a mitolon, micekiw to Fangcalay Cudad hanaca micangacang to sakayat no fangcalay saocor ni Yihofa, wa pafelien ni Yihofa cangra to taneng ato ˈicel a pasifanaˈto wawa.​—ˈOsien ko Yakop 1:5.

19, 20. (1) Ano micada to saparikec no Kawas wa paira to maanan a sapalemed? (2) Dotoc a lalakaw mamilengo to maanan?

¹⁹ Micada kita to sarikec ni Yihofa anca mitodong ci Yihofaan aci Yisan a mirikec, wa milifok to adihayay sapalemed. Mihaen ko demak ita, paro no lomaˈato kasakopang wa ira ko rihaday. O kalimelaan ko niyah wa saan ko cecacecay tamdaw, malifet ko olah ato dipayar, hatiniay pakayraan mahecaday to itiniay i lakoing a maˈorip. (ˈOlic 72:7) Pakafanaˈay ko sarikec ni Yihofa kitanan, itini sadipot no kakarayan Wama, tahadaˈoc mahaen to paro no lomaˈrihaday malacafay to salikaka. (ˈOsien ko Isaya 11:9.) Ano matatodong ko pinengneng ita to pirikec no Kawas, wa makahi a micada to saparikec, hanaca o pirikec no Kawas o wacay to maolahay kitanan.

²⁰ Dotoc a lalakaw wa milengo, itini lomaˈato kasakopang micada to saparikec, samaan minanam to pakaˈmetay to tireng ato samaan maliyas ko tatiihay a teloc ano caka picada to saparikec.