1. ˈAyaw no mamicada to inoˈko wawa, o Krisciyang a wama wina pakasoˈlinayto to maanan a demak hani?

CI POLOSOM POLANTE milomalay to mifekaday a demak tiya mamicada to inoˈcingra, sanay ko sowal: “Pinaayto folad pasowal kako to wama wina mamicada kako to inoˈ, marariday cangra milengo takowanan toniya demak, ihekalay pasifanaˈcangra takowanan, o sasaaretengen a saˈosi konini. 1934 miheca 12 folad 31 romiˈad, maraodayto ko kalimelaan a romiˈad i kaˈorip ako.” Anini, o Krisciyang a wama wina makalimay sapadamaaw to wawa citaneng ko misaˈosian. Soˈlinay ano awaay ko lalangian, panayar han ko picada no wawa to inoˈ, wa malifa no wawa ko adihayay a pasangaray i noˈadingoan. (Yakop 4:17) Kawraan, o citanengay a wama wina mitokelay to wawa, ˈayaw no mamicada to inoˈi, maherekayto cangra misaday to mamitamorong to ˈinorong no Krisciyang.

2. (1) O roma kasakilac kantok calemcemay to maanan a pakayraan hani? (2) Oniya lalakaw mamilengo to maanan hani?

² Mahapinangay no kasakilac kantok, o wawa no Krisciyang tangasato  20 ko mihecaan, cowaho picada to inoˈ, tada o kacalemceman a demak. Onini a kaemangay mirienangayto to saˈopo ato mitosilay, mihaiyay to Misawacayay Tamdaw ni Yihofa ko niyah. Kawra, cowaho patafang to tireng ci Yihofaan a micada to inoˈ. O manan ko lalangian hani? Halatek o wama wina nangra iraayho ko sasa no harateng, cowa ka ciharateng a kaliki ko wawa micada to inoˈ. Oniya lalakaw mamilengo to sepat kacisasaan no wama wina a lalangian.

3. O wama wina ni Polosom calemcemay to maanan hani?

³ Mahaen o masowalay i saka 1 fatac, o wama wina ni Polosom calemcemay to kaemangayho ko mihecaan no wawa nangra, cowaho ka cipinang to karetengay ato masaka limelaan ko micadaay to inoˈa demak. Anini, o wama wina misamaan mafanaˈto ngaˈayayto ko wawa patafang to tireng i ci Yihofaan hani?

4. Haratengen no wama wina ko sapalimoˈot no Matay 28:19, 20, misamaanay hano padama to wama wina itini pipasifanaˈto wawa hani?

⁴ ˈOsien ko Matay 28:19, 20. I fafekangay lalakaw mananamay ita, cowa ka somowal ko Fangcalay Cudad hakowa ko mihecaan ngaˈngaˈay micada to inoˈko tamdaw. Kawra, haratengen no wama wina, pala nisawawaan to tamdaw hananay o maanan ko tatodong, o papadama to wama wina koninian. Itini Matay 28:19 pala nisawawaan to tamdaw sa i, tatodong no Krisiya sowal, “pala nisawawaan to tamdaw ko patosokan a mipasifanaˈcangranan,” sanay. O malo nisawawaan a tamdaw, paihekalay to mananamayto ato cipinangayto cingra to sapasifanaˈni Yis, misaˈosi to falocoˈmidofdof toniya limoˈot. Mihaenay o Krisciyang a wama wina mikitini ˈengaengaho ko wawa i, o sapadamaaw to wawa micada to inoˈa malo Krisciyang, misaˈicel pasifanaˈcangranan. Soˈlinay, awaay ko tatodong no ˈengaenga micada to inoˈ, kawra o maˈoningay i Fangcalay Cudad, soˈlin kaemangho ko mihecaan no wawa cipinangayto ato maolahayto to soˈlinay kimad.

5, 6. (1) Mikitini picada ni Timoti to inoˈ, mananamay no wama wina ko maanan a demak hani? (2) Ano ira ko ngaˈayay sapihapinang a ˈicel no wama wina, wa samaan a padama to wawa macakat hani?

⁵ Kaemangho ci Timoti misaˈosiayto falocoˈmihodop ci Yihofaan, malo Krisciyang. Sowal no tarokos ci Pawlo, mikitini ˈengaenga ci Timoti a minanam to Fangcalay Cudad. O wama ni Timoti cowa ko midokoay to Kawas a tamdaw, o wina ato fofo ningra ko pasifanaˈay cingranan, padama cingranan palahad to kaolah to kimad no Kawas, mihaenay a patireng ci Timoti to tanektekay a pasoˈlin no falocoˈ. (2 Timoti 1:5; 3:14, 15) Maedeng 20 ko mihecaan ni Timoti citatodongayto dademak i kasakopang, milifokayho to mikiriwiˈay a ˈinorong.​—Dmak 16:1-3.

⁶ Cowa ka hecad ko pakayraan no cecacecay wawa, mihaenay o katenes no falocoˈcowa ka hecad ko mihecaan. O roma kaemangho ko mihecaan misaˈosiayto micada to inoˈ, o roma taˈangayto ngaˈitiyaay mihaen to demak. Mankora, ira ko sapihapinang a ˈicel no wama wina, cowa ko papacieci to wawa micada to inoˈ, wa mitoor to kalomahad ato kacakat no wawa a padama cangranan malaˈosi ko noˈadingoan a patosokan. Wa mahemek ko wama wina ano paifalocoˈen no wawa ko Taneng 27:11. (ˈOsien.) Haratengen no wama wina, o patosokan nangra papadama to wawa malo nisawawaan ni Kristo. Ira ko hatiniay a patosokan no wama wina ikor, ngaˈayay licayen ko niyah: “Cipinangayto ko wawa to taˈeneran a kimad no Fangcalay Cudad, wa ngaˈayto patafang to tireng a micada to inoˈhan?”

7. O sapicadaaw to inoˈa tamdaw, hano cowa ko cacipinang to polong a sifanaˈno Fangcalay Cudad hani?

⁷ O singsi no Fangcalay Cudad no wawa ko wama wina, mitokelay to wawa itini sifanaˈ no Fangcalay Cudad patireng to tanoktokay a kola, ikor ngaˈpatafang to tireng ci Yihofaan. Nikawrira, patafang to tireng a micada to inoˈ, cowa pisaali to cacipinang to polong a sifanaˈno Fangcalay Cudad, samanen maherek micada to inoˈko Krisciyang, wa padadotocho mitongal to matatodongay a sifanaˈno Fangcalay Cudad. (ˈOsien ko Kolosay 1:9, 10.) Hatiraay, wa hakowa ko mananamay a sifanaˈno tamdaw ngaˈ, ngaˈay micada to inoˈhani?

8, 9. Mikitini i pipasifanaˈni Pawlo to misimaway to kapalitan, mananamay ita ko maanan?

⁸ Mikitini malifetay no cecay paro no lomaˈiti:yaho, wa malifok no wama wina ko sadama. (Dmak 16:25-33) Maedeng isaka 50 miheca, sakinatosa ni Pawlo mitaliyokay a mitosil tayraayto i Filipi. Ci Pawlo aci Silas mapakokotay itira, telocto mapalitay. Tahira lafii, mafekaday ko taˈangayay ˈatoray, mangiyangiay ko kola no kapalitan, fohat sanay ko fawahan. Milaliwayto ko mapalitay sanay koya misimaway to kapalitan, sakinasoˈotaw cingra. Kawra, micongedan ni Pawlo cingra. Dotoc, misawacayan ni Pawlo aci Silas ko paro no lomaˈnoya misimaway to kapalitan. Mafanaˈto koya misimaway to kapalitan ato paro no lomaˈto pakayniay ci Yisan a soˈlinay kimad ikor. O nika olah to soˈlinay kimad a folocoˈmicorohay cangranan midemak to maanan hani? Tangsolay cangra micada to inoˈ. Mikitini toniya maˈoningay mananamay ita ko maanan hani?

⁹ Oniya misimaway to kapalitan o sofitay no Loma isalakat, mansa cowa ka cipinang to kimad no Kawas. Ano sapatirengaw to tanoktokay a kola i soˈlinay kimad, wa minanam cingra to taˈeneran a kimad no Fangcalay Cudad, wa cipinangho to o maanan ko saali no Kawas to midokoay Cingranan a tamdaw, hanaca makahi a midofdof to sapasifanaˈni Yis. Soˈlin cowa ka hakowa ko toki, kawra o kacipinang ato kaolah to soˈlinay kimad ningra, micorohay cingranan a micada to inoˈ, ikor no picada to inoˈciharatengay sapadotocaw mitongal to kafanaˈto soˈlinay kimad. Mihaenay, ano paihekalay ko wawa to soˈlinay maolah to minanaman a kimad no Fangcalay Cudad, cipinangho to tatodong ato masaka limelaan ko picada to inoˈ, wa samaan ko hademak no wama wina hani? Ngaˈay pakalaloken no wama wina ko wawa papipasowal to malohemay malitengay to harateng nangra, wa lengoen no malohemay malitengay kora wawa toha tatodong a micada to inoˈ. * Ano maherek ko wawa micada to inoˈmahecaday to romaroma Krisciyang, padotoc a minanam to araaw ni Yihofa, tahira i daˈoc.​—Loma 11:33, 34.

10, 11. (1) Pakayni noikoran no wawa, samaanay ko harateng no romaroma wama wina? (2) Sakakaay a haharatengen no wama wina, o maanan hani?

¹⁰ Harateng no romaroma wama wina, maherek ko wawa micudad to kawcong padotocho to ˈakawangay picudadan, hongaˈira ko ngaˈayay a katayalan, ikorto ngaˈmicada to inoˈ. Hay, o ngaˈayay a harateng no wama wina konini, kawraan wa soˈlin a padama to wawa a malaˈosi han? Sakakaay i, o hatiniay harateng matatodongay i Fangcalay Cudad han? Milongocay ci Yihofa kitaanan samaan misaka dademak to kaˈorip hani?​—ˈOsien ko Patnakay 12:1.

¹¹ Haharatengen ita, oniya hekal ato nohekal a demak masasongtolay to araaw ato harateng ni Yihofa. (Yakop 4:7, 8; 1 Yohani 2:15-17; 5:19) Ira ko tangongolay a no kalawidang no wawa aci Yihofaan, ngaˈpakacoˈay ci Satanan ato niniya hekal, caka fiyor no mararaway a harateng. Ano papisalakaten no wama wina ko wawa, micangacang  to picudadan ato katayalan i, cowato pakahapinang ko wawa mihodop to Kawas o masaka limelaan, hanaca mamipalak to kalalaˈed ningra ato Kawas. O sidaˈitay a wama wina cowa kaolah a mafiyor no hekal ko wawa, mararaw ko piharateng to maanan ko malaˈosiay hananay. Edeng ano paisalakaten ci Yihofa i kaˈorip, ngaˈira ko soˈliˈlinay a kalaˈosi ato lipahak.​—ˈOsien ko ˈOlic 1:2, 3.

12. O romaroma wama wina cowa kaolah kahenay ko wawa micada to inoˈ, misamaanay hani?

¹² O cecay wina cowa kaolah kahenay ko fafahiyan wawa micada to inoˈ, misamanay hani? Mangodoay cingra pasowal: “Ano micada to inoˈko wawa mataraway kako to mamafalah cingra.” O roma Krisciyang wama wina mahecaday ko harateng toniya salikaka, taˈangayto ko wawa matenes ko harateng cato kararaw, itiya sato micada to inoˈsanay. (Satapangan 8:21; Taneng 22:15) Alatek, o harateng nangra: “Ano caho picada to inoˈko wawa, cowa ko mamafalah,” sanay. Hano mararaway ko hatiniay a harateng hani?​—Yakop 1:22.

13. Ano caho ka picada to inoˈi, wa awa ko ˈinorong ci Yihofaan han? Tadtaden hena.

¹³ O harateng no Krisciyang wama wina, ano matenesto ko falocoˈno wawa i, ngaˈngaˈay miketon to mihaydaan no Kawas a patafang to tireng, itiya sato micada to inoˈ. Kawra, ano caho picada to inoˈko wawa, awaay ko ˈinorong ci Yihofaan, ano saan ko harateng no wama wina, o mararaway a harateng, samanen o kaciˈinorong ci Yihofaan, cowa ko picada to inoˈko piˈarawan, ano mafanaˈayto ko wawa to o maanan ko matatodongay ato mararaway i pinengneng ni Yihofa, iraayto ko ˈinorong nangra i Kawas. (ˈOsien ko Yakop 4:17.) Mihaenay, o citanengay a wama wina cowa ko maminayar to wawa micada to inoˈ, oha mamisaˈicel cangra patireng to ngaˈayay a taˈarawan, nai kaemingho ko wawa i, padamaento cangra soˈlin a maolah to ˈakawangay a palinian ni Yihofa. (Luka 6:40) Maolah ko wawa to sarikec ni Yihofa, wa makahi a mitoor to moecelay a palinian no Kawas a maˈorip, edeng mihaen ko demak nangra wa milifok to soˈlinay a sadipot.​—Isaya 35:8.

14. Sapadamaaw to wama wina pakalalok to wawa macakat i noˈadingoan, sasamaan ko demak no malohemay malitengay?

¹⁴ O malohemay malitengay no kasakopang, wa ngaˈay padama to wama wina pakalalok to wawa a macakat. O malohemay malitengay o noˈadingoan a pakaenay, tano tawlikay a sowal milengo to ngangaˈay patireng to maanan a patosokan dademak ci Yihofaan. O cecay fafahiyan salikaka milomal to noka sasowal aci Cares Losoan i enemho ko mihecaan, sanay: “Palakan ningra ko 15 ehon masasowal takowanan to noˈadingoan a patosokan ako.” Ora kasasowal samaanay ko pitemer toniya fafahiyan salikaka hani? Ikorto mataˈlifay ko 70 miheca a misakafah cingra. Mihaenay, tawlikay a sasowalen ato pakalalokay a sowal tangongolay ko pitemer to cecay tamdaw. (Taneng 25:11) Wa ngaˈay papirienangen no malohemay malitengay ko wama wina malacafay to wawa to patirengay to kasaˈopoan a tayal, tooren ko mihecaan ato ˈicel no wawa palilam to tayal cangraanan.

15. Ilalomaˈay no kasakopang a salikaka, sasamaan ciharateng to kaemangay a tamdaw hani?

¹⁵ O romaroma salikaka i kasakopang, wa ngaˈay misamaan ciharateng to kaemangay tamdaw, macakat i noˈadingoan hani? Mahapinangay iso ko kaemangay i kasakopang, miceriday misongilaˈa micekiw, hato ngaˈayay pacaˈof to salicay i kasaˈopoan, ato mirieneng to mitosilay ato kaˈorip a saˈopo han? Ano mapalifet cangra mitafoay to madimadi ato misaka  dademak to toki a misawacay i picudadan hokira? Ano maˈaraw iso ko ngaˈayay a waywayan no kaemangay, tangsolen a pakahemek cangra. Ngaˈayay patirengen ita ko patosokan, iˈayaw ato hererek no saˈopo masasowal to kaemangay, kifalocoˈa ciharateng cangranan. Ano mihaen ko demak ita, o masalalomaˈay no kasakopang ko niyah wasaan ko kaemangay miharateng.​—ˈOlic 35:18.

16, 17. (1) Micada to inoˈato hatokel noikoran iraay ko maanan a kalaliting? (2) Mitokelay ko Krisciyang a wama wina to maanan? (Nengnengen ko satapangan coka.)

¹⁶ Hakelong nokaˈorip no Krisciyang a wama wina, o taˈangayay a ˈinorong, ‘tooren ko harateng ni Yihofa pasifanaˈto wawa,’ misalof to harateng nangra, palahad cangranan. (Ifiso 6:4; ˈOlic 127:3) Aniniay a wawa, cowa ka hecad to iti:yaay a Israil a tamdaw, hofoc han o patafangayto to tireng ci Yihofaan, hanaca, o maolahay to Kawas ato soˈlinay kimad a falocoˈno wama wina, cowa parocok i wawa. Mihaenay i, mikitini ka hofocan no wawa a romiˈad misatapang, o patosokan no wama wina papasifanaˈto wawa, mamala Krisciyang cangra, padama cangraanan ira ko tatodong a patafang to tireng micada to inoˈ. Mihaen to demak, iraay ko kalimelaan a lalangian, patafang to tireng micada to inoˈko tamdaw, tahatolas madimadi to Kawas, wa ngaˈay milifok to saka ˈorip a tahapinangan i taˈangayay padiing.​—Matay 24:13.

¹⁷ Masowalay itini saka cecay fatac ci Polosom Polante misaˈosi micada to inoˈi, sakafanaˈaw ko wama wina to maherekayto cingra misaday toniya kalimelaan a demak i kaˈorip. Awato ko sasa no wama wina ni Polosom, misarocoday a midama to saˈosi no fafahiyan wawa. Milomal ci Polosom to nano demak no wama i ˈayaw no mamicada to inoˈa dadaya, sanay: “Papitorosan ningra ko paro no lomaˈa mitolon. Pasowalan ningra ci Yihofa, misaˈosi ko fafahiyan wawa ningra patafang to tireng, tada mahemekay cingra.” Micada to inoˈmataˈlifayto ko 60 miheca, sanay ko sowal ni Polosom: “Cowa ko mamapawan kako toya dadaya!” Maˈaraw no wama wina ko wawa patafang to tireng micada to inoˈ, malo mihodopay ci Yihofaan a tamdaw, oha mamarenec a mahemek ko falocoˈ.