Soˈlinay haw i, awaay ko pinang ita to samaanay ko tatirengan ato pising ni Pawlo. Itini i mitepangan a cudad ita, o coka ni Pawlo, cowa ko mikitiniay i materekay a coka no likisi a micokaay.

Kawra, pakayni i tatirengan ato pising ni Pawlo, ngaˈay minengneng to romaroma lalakaw. Patinakoen, Mikecolay no Cion, Saka 3 Folad 1, 1902 (no Padaka), sanay ko sowal: “O matiliday isaka 150 miheca a Demak ni Pawlo aci Tekela, sanay ko sowal, pakayni to tatirengan ato pising ni Pawlo: ‘Cowa ka tada ˈakawang, maˈakonalay, makiyahoray ko rakat, tanektekay ko tatirengan, malalitingay ko kalaw, koˈedaway ko ngoso,’ sanay. O matiniay pitilid nangra, mingataay to pinengneng no ˈalomanay.”

Isaka 1997 miheca mitepangan a Niwcing Kiyokay a Citing (no Padaka), somowalay toni nolitengan a matiliday: “O maˈoningay i Demak ni Pawlo aci Tekela a likisi ngaˈayay pakasoˈlinen.” Malaheci a matilid to pina soˈot a miheca ikor toni Demak ni Pawlo aci Tekela, karetengayho ko pinengneng no tamdaw tora cudad, tahanini onini cudad iraayho ko falo poloˈa tano kamayan mitilid a Krisiya sowal a materek, mihongyakan patayni masasiromaay a sasowalan. Mihaenay haw i, o micokaan no mita pakayni i tatirengan ato pising ni Pawlo, matooray ko matiliday a likisi nolitengan a lalakaw.

Pakayni to tatirengan ato pising ni Pawlo, iraayho ko romaroma ciepocay to sasasinanoten ita a demak. Tiya mitosil ci Pawlo i, milikafan no tamdaw to “o tadancaay cingra. Caay ko masamaanay ko sowal ningra,” sanay. (2 Korinto 10:10) Soˈliˈlin hatira, aka a mapawan kita, tona patahekalan ni Yis to masaka fahekaˈan a demak ko nika malo Krisciyang ni Pawlo. Haharatengenho no mita, ‘o nipiliˈan a matayalay’ ni Kristo cingra, pasayra i ˈalafang tamdaw a mitenak to ngangan ni Yis. (Dmak 9:3-5, 15; 22:6-8) O roma sai, o mipatemeran ni Yihofa papitilid ci Pawloan a Fangcalay Cudad, adihayay ko epoc i kitaanan.

Na cowa ka pasengisengi ci Pawlo to nano demak ningra ˈayawho no kala Krisciyang, cowa ka somowal to tatirengan ato pising no niyah. (Dmak 26:4, 5; Filipi 3:4-6) O sowal ningra: “O sasafaay a tarokos kako. Caay ka tatodong kako a cingangan to tarokos.” (1 Korinto 15:9) Sanayho somowal cingra: “Talacowa o sasafa:ay no polong no finawlan no Kawas kako, nikawrira, mapalemed no Kawas kako. Saka, micidek ko nipipafeli Ningra i takowanan to tayal. Onini i, o sapipatenakaw ako i roma a finacadan to caay ko mamaemin a sowalen a tadamaanay a demak ni Kristo.” (Ifiso 3:8) Paitinien toni demak ko pinengneng, wa ikakaho ko kaciepoc to pinengneng to tatirengan ato pising ni Pawlo.