1. Mikitini i saka 1 Pitiro 3:8, hano maolah kita cicafay to ciharatengay kitanan a tamdaw hani?

MAOLAHAY kita cicafay to ciharatengay kitanan a tamdaw, samanen patadoay cangra kitanan a miharateng, halo cipinang to harateng ato nafalocoˈan no mita. Latekay, ˈayaw no misaali kita to sapadama nangra i, maharekayto cangra a miharateng to saali ita a misadak to sadama. Tada miakoˈiday kita to siniˈadaay * kitanan a tamdaw.—ˈOsien ko 1 Pitiro 3:8.

2. Paihkal to siniˈada to tao hano cowa ko madoloay?

² Kita o malo Krisciyangay, makalimay paihkal to siniˈada ato pahecad ko harateng to tao. Soˈliˈlin i, pasangaray mihaen to demak. O cecay lalangian i, coko malefotay kita. (Loma 3:23) Coˈayen ita ko misatekeday a pinangan. O roma tamdaw a kalomahadan ato nalifetan, mifiyoray cangranan pasangar paihkal to siniˈada. Hanaca, itiniay kita i salikoray romiˈad maˈorip, i taliyokay ˈalomanay tamdaw o ‘misatekeday maolah to niyah’, eca ka ciharateng to tao, o mamafiyor no waywayan nangra kita alatek. (2 Timoti 3:1, 2) Wa samaan kita miwanik to hatiniay saconged, paihkal to siniˈada i tamdaw hani?

3. (1) Itini kasiniˈada to tamdaw, wa samaan kita a macakat? (2) Oniya lalakaw wa milengo to maanan?

³ Itini kasiniˈada to tamdaw, wa samaan kita a macakat hani? Nanamen ita ko taˈarawan ni Yihofa ato Wawa Ningra ci Yis Kristo. Ciolahay ci Yihofa, siniˈadaay, ciharatengay to tamdaw, o sangaˈayay a taˈarawan. (1 Yohani 4:8) Malefotay ko pitodong ni Yis to Wama, paihkal to mahecaday a capeling. (Yohani 14:9) Itiniho ci Yis i sera patirengay to taˈarawan, padama kitanan to sasamaan paihkal to mahecaday a  capeling. Oniya lalakaw wa milengo samanay ci Yihofa aci Yis siniˈada to tao, ato sasamaan kita mitodong to taˈarawan Nangra.

4. Mikitini i Isaya 63:7-9, samaan kita mafanaˈ to ciharatengay ci Yihofa to nafalocoˈan no finawlan Ningra?

⁴ Mifanaˈay ko Fangcalay Cudad kitanan, ciharatengay ci Yihofa to nafalocoˈan no finawlan Ningra. Nengnengen ita tahalifa to sapalifet ko nolitengan Israil i, samaanay ko harateng ni Yihofa. Sanay ko Fangcalay Cudad: ‘Tahapades cangra i, masomaday Cingra.’ (ˈOsien ko Isaya 63:7-9.) * Pakaynian Ningra i pairasolay ci Cikariya a pasowal: ‘O mikamaay tamowanan i, mahecaday o mikamaay to ˈamamosa Ako.’ (Cikariya 2:8) Ano ira ko misamsamay to finawlan no Kawas i, mahecaday o misamsamay Cingraan. Oniya sapatinako pahapinangay to tamdaw, tada ciharatengay ci Yihofa to finawlan Ningra!

5. Tinakoen mitadtad samaanay ci Yihofa palahdaw to roray no finawlan.

⁵ Cowa ko siniˈada aca ni Yihofa to malifaay no finawlan, midemakayho Cingra a padama cangranan. Tinakoen, malakoli ko Israil tamdaw i Icip i, cipinangay ci Yihofa to roray nangra, sapalahdawaw to pades nangra. Pasowalan ni Yihofa ci Mosi: “Maˈaraw Ako ko nika lakoli no finawlan Ako i Icip. Matengilto Ako ko tangic nangra to nano nipisamsam no misimaway i cangraan. Mafanaˈayto Kako to nipisemsem nangra. O sakatayni Ako i, o sapaˈoripaw i cangraan a paliyas nai pisamsam no Icip a tamdaw.” (Kasadakan 3:7, 8) Matomesay ko siniˈadaay ni Yihofa to finawlan Ningra, paliyas cangranan nai kalakolian, milifok to pasalat. Ikor no pina soˈot miheca, maˈodis no ˈada ko Israil tamdaw i Mikiˈokan Pala, samanay ko demak ni Yihofa hani? Sanay ko Fangcalay Cudad, maˈaraw ni Yihofa ko Israil tamdaw, “o nika adayay no [Kawas] i cangraan to nano nipisemsem ato nika samsam nangra.” Siniˈadaay  cangranan. Sapadamaaw cangranan, hato minilnilay to kakitaan a milidong cangranan.—Kakitaan 2:16, 18.

6. Cowa ka tatodong ko harateng no finawlan no Kawas, kamayan ci Yihofa samaan a siniˈada cangranan? Tinakoen mitadtad.

⁶ Latekay, cowa ka tatodong ko harateng no finawlan no Kawas, kamayan a siniˈada ci Yihofa cangranan. Haratengen ko tinakoan ni Yona, miocoran no Kawas cingra tayra i Ninifi a milasil to sasawkit a lihaf, ikor pasasiyoray ko Ninifi tamdaw, hato misododan no Kawas cangra. Oniya minaroˈan cowa ka hemek ci Yona, ‘mangolaway’ cingra, samanen cowa kala ˈosi ko sapairasol ningra. Kawra, mihadidiay ci Yihofa cingranan, padama cingranan a misalof to harateng. (Yona 3:10–4:11) Saikor, mananamay ni Yona ko sapasifanaˈ, misaka dademakan ni Yihofa cingra mitilid toniya malifetay, saka ciepoc no mita.—Loma 15:4. *

7. O pakayraan ni Yihofa micada to finawlan Ningra ngaˈay pakasoˈlin kita to maanan?

⁷ O pakayraan ni Yihofa micada to finawlan Ningra ngaˈay pakasoˈlin kita, siniˈadaay Cingra to midokoay Cingranan a tamdaw. Mafanaˈay Cingra to macadaay ita a roray. ‘Pafeselay i falocoˈ’ ko pinengneng ni Yihofa. (2 Rayray 6:30) Cipinangay Cingra to kihcod harateng ato nafalocoˈan no mita, mafanaˈay to citolasay ko ˈicel ita, “caay palitemoh Cingra tamowanan to caay ko mamahadidi namo a salifet.” (1 Korinto 10:13) Tada misayaray to tamdaw konini!

8-10. Hano ngaˈay ci Yis ciharateng to tao hani? Hadaken ko tolo lalangian.

⁸ Itiniho i sera ci Yis i, ciharatengay to tao. Hano ngaˈay mademak ningra hani? Toloay ko lalangian. Saka 1, malefotay ko paihkal ni Yis to capeling no kakarayan Wama. Mahecaday ci Yis to Wama ningra tangongolay ko olah to tamdaw. Midamaay cingra to misangaˈay a tayal, maolahay to masangaˈay a pinaˈorip, mikiriwiˈay a maolah to “tamdamdaw.” (Taneng 8:31) Maolahay ci Yis to tamdaw, mansa ciharateng to nafalocoˈan nangra.

⁹ Saka 2, mahecaday ci Yis ci Yihofaan ngaˈayay mihapinang to nafalocoˈan no tamdaw. Mafanaˈay cingra to araaw ato harateng no tamdaw. (Matay 9:4; Yohani 13:10, 11) Mihaenay, ano masomad ko cecay tamdaw i, makalimay ci Yis siniˈada ato mihinom cingranan.—Isaya 61:1, 2; Luka 4:17-21.

¹⁰ Saka 3, tahalifaay ci Yis to masiˈayaway ita a sapalifet. Tinakoen, lomahaday ci Yis itiniay i manikaway a lomaˈ. Minanamay cingra i midipotay a wama ci Yosifan to aretengay tayal. (Matay 13:55; Marko 6:3) ˈAyaw no misatapang ci Yis a mitosil, maedeng mapatayayto ci Yosif, mafanaˈay ci Yis to kasomad no malahdaway ko salawina a demak. Mafanaˈayho ci Yis, eca ka lecad ko pihakelongan no paro no lomaˈ, samaanay ko pakayraan. (Yohani 7:5) Tahalifaay ci Yis toniya demak, mansa ngaˈayay mihapinang to pisiˈayaw ita to sapalifet ato harateng no mita.

11. Mikitini maanan a midemakan ni Yis, ngaˈay mahapinang ita to siniˈadaay cingra to tamdaw hani? (Nengnengen ko papotalay coka.)

¹¹ Mikitini midemakan ni Yis a kafahkaˈan a demak, mahapinang ita to siniˈadaay ci Yis to tamdaw. Coko pakayniay ˈinorong ko pidemak to kafahkaˈan, o pakayniay “sasiniˈada sa ci Yis i cangraan.” (Matay 20:29-34; Marko 1:40-42) Tinakoen, na paliyasan ningra ko cecay madoˈengay i ˈalomanay tamdaw a miadah, na patikolan ningra paˈorip ko edengan wawa no cecay maponengay. (Marko 7:32-35; Luka 7:12-15) Cisiniˈadaay  ci Yis to taharorayay a tamdaw, makalimay sapadamaaw cangranan.

12. Mikitini i Yohani 11:32-35, samaanay ci Yis siniˈada ci Martaan aci Mariyaan?

¹² Haratengen ko roma tinakoan to siniˈada ni Yis to tamdaw. Pakayni kapatay ni Lacarus pakidemay ko kasomad ni Marta aci Mariya, maˈaraw ni Yis ko kasomad nangra, ‘teraˈ sanay ko losaˈ ningra.’ (ˈOsien ko Yohani 11:32-35.) Ano papatikolen ni Yis paˈorip ci Lacarus i, o kacilosaˈ ningra cowa ko pakayniay kalahdaw no widang, o kacipinang to adada no falocoˈ ni Marta aci Mariya.

13. Mafanaˈ to siniˈadaay ci Yis to tamdaw, hano tada misayaray kitanan hani?

¹³ Mafanaˈ to siniˈadaay ci Yis to tamdaw, tada misayaray kitanan, hato maolahay kita cingranan. (1 Pitiro 1:8) Mahemekay kita mala hongtiayto ci Yis i Hongti Kitakit no Kawas, caka halafin wa palahdawento ningra ko kihcod a pades. O lekakawa no tamdaw itini pikowanan ni Satan manaholayto, ano tahalifetay ci Yis to kaˈorip no tamdaw, iraay ko tatodong ningra a milidong to tamdaw pasadak i karorayan. Mafanaˈay ci Yis siniˈadaay to kalonay no mita, ira ko mahaenay a hongti tada lipahakayto!—Hipray 2:17, 18; 4:15, 16.

14. Misimsim kiso to taˈarawan ni Yihofa aci Yis, sasamaan ko demak hani?

¹⁴ Songilaˈen ita misimsim ko taˈarawan ni Yihofa aci Yis, mamatongal ko kasiniˈada to tao. (ˈOsien ko Ifiso 5:1, 2.) Soˈlin caka hecad kita ci Yihofaan aci Yisan pafesel ko pinengneng to falocoˈ no tamdaw, kawra wa ngaˈay kita misaˈicel a cipinang to nafalocoˈan no tao, misinanot to saali nangra. (2 Korinto 11:29) Cowa ka lecad kita to hekal tamdaw a misateked, “aka kao demak no tireng a cecay ko haharatengen. Halo notaoen a demak a miharateng.”—Filipi 2:4.

15. O cima ko mamikiriwiˈ a siniˈada to tao?

¹⁵ Mikiriwiˈay ko malohemay malitengay no kasakopang a siniˈada to tao. Mapatoroday cangra midimokos to siri no Kawas, iraay ko ˈinorong pasowal to Kawas. (Hipray 13:17) Sapadamaaw ko malohemay malitengay to salikaka, cacipinang to pakayraan nangra. Sasamaan ko demak no malohemay malitengay hani?

16. Ira ko siniˈada no malohemay malitengay, wa samaan ko demak hani? Mihaen to demak hano masakalimlaan hani?

¹⁶ Ano cisiniˈadaay ko malohemay malitengay i, wa mipalak to toki a ciharateng to salikaka. Wa milicay cingra to pakayraan no tao, ikor misongilaˈ mihadidi a mitengil to sowal no tao. Latekay, roma Krisciyang sapihadakaw to nafalocoˈan a demak, kawra cowa ka fanaˈ to sasamaan paihkal, paihkal ko malohemay malitengay to mihadidiay tada kalimlaan. (Taneng 20:5) Makahi ko malohemay malitengay mihadak to toki no niyah, wa matongal ko olah no salikaka cangranan, pakasoˈlin cangranan, mamatongalto ko kalawidang i kalalaˈed.—Dmak 20:37.

17. Pakaynien i salikaka, ira ko maanan a waywayan no malohemay malitengay tada kalimlaan hani? Tinakoen hena.

¹⁷ Pakaynien i salikaka, ira ko siniˈada no malohemay malitengay tada kalimlaan. O cecay fafahiyan salikaka ci Aterayte, sanay: “Mahaen ko waywayan no malohemay malitengay, rihadayay kako mihadak to nafalocoˈan a sowal, mafanaˈ to patadoay cangra miharateng to pakayraan ako. Mikitini caˈof nangra ngaˈayay mahapinang patadoay cangra to tamdaw a miharateng.” O roma faˈinayan salikaka maharatengay ko ngaˈayay demak no malohemay malitengay cingranan, miakoˈiday a pasowal: “Maharek  kako pasowal to malohemay malitengay to pakayraan ako, cilosaˈay ko mata ningra, co:wa ko mamapawan ako koya maˈaraway itiya.”—Loma 12:15.

18. Samaan kita ciharateng to nafalocoˈan no tao hani?

¹⁸ Cowa ko malohemay malitengay aca ko sasiniˈada to tamdaw, kita maemin o caciharateng to nafalocoˈan no tao. Sasamaan ko hademak ita hani? Saˈicelen ita a cipinang to o manan ko malifaay no paro no lomaˈ ato salikaka a pasangaray, ciharatengho to kaemangay tamdaw, matoˈasay, adadaay ato malahdaway ko salawina a tamdaw i kasakopang. Ngaˈayay licayen ita samanay ko pakayraan nangra, ano mihadak cangra to nafalocoˈan a sowal i, songilaˈen a mitengil ko sowal nangra. Fanaˈen cangra, soˈlinay kita a patado miharateng to pasangar nangra, misaˈicel a padama cangranan. Mihaen ko demak ita, o tano waywayan a paihkal to maolahay to salikaka.—1 Yohani 3:18.

19. Ano padama kita to tao i, hano tooren ko pakayraan no tao a misalof?

¹⁹ Ano padama kita to tao i, tooren ko pakayraan no tao a misalof, samanen cowa ka hecahecad ko harateng no tamdaw ano tahalifa to pasangaray, o roma tamdaw makahiay pasowal to pasangaray no niyah, o roma tamdaw cowa ka kahi a pasowal. Soˈlin sapadamaaw kita cangranan, kawra cowa ka ngaˈay kita miniknik a milicay to notekedan a demak nangra. (1 Tisalonika 4:11) Latekay pasowalay cangra to nafalocoˈan a harateng, cowa ko mamihai kita to harateng ningra, kawra cacadaen ita o ningra a harateng konini. Salakaten ita mitengil ko sowal ningra, hamaan macaloh pasowal to harateng no niyah.—Matay 7:1; Yakop 1:19.

20. O laenoay lalakaw wa pacaˈof to maanan salicay?

²⁰ Cowa ko siniˈada aca ita to salikaka, papatadoen ko cilomaˈay i pitosilan a miharateng. Sasamaan kita i pitosilan paihkal to siniˈada hani? O laenoay lalakaw wa pacaˈof toniya salicay.