KITA maemin maolahay ao ngaˈayay a tamdaw han no tao minengneng kita. Nikawrira, patalahkal to “ngaˈayay”, cowa ko madoloay, samanen ˈalomanay tamdaw “o maˈosiay to ngaˈayay a demak.” (2 Timoti 3:3) Tano niyahan a palinian misaˈosi to ngaˈayay ato tatiihay, ˈarawhan cangra i, “o caay ka fanaˈ a mihapinang to ngaˈayay ato tatiihay.” (Isaya 5:20) Hanaca pakayni to nika cowa ka lefot ato iˈayaway a nalifetan, micongeday kitanan patalahkal to ngaˈayay. Alatek hatiraay ko harateng iso ci Annian, * soˈlin pinaayto miheca midoko ci Yihofaan, kawra sanayho ko sowal ningra: “Pasangaray kako pasoˈlin to mamalo ngaˈayay a tamdaw kako.”

Kahemekan i, o caciˈicel kita palahad to matiniay ngaˈayay hananay a capeling. O heci no fangcalay saocor ko ngaˈayay a capeling, ano ira ko sadama no fangcalay saocor, cowa ito ko mamafiyor no hekal a tamdaw kita, hanaca o papakaremo to cowa ka lefot a pinangan no mita. Dotoc tongalen ita ko nika fanaˈ toni ngaˈayay hananay a capeling, halo minanam misamaan masaheci ko nika patalahkal tonini a capeling.

O ngaˈayay hananay a capeling o fangcalay, o makapahay, cowa ka pilingat to manaholay ato tatiihay. Iraay ko ngaˈayay hananay a capeling a tamdaw, o mamidemak to ciepocay to tamdaw a demak. O mahaenay tamdaw maolahay patalahkal i waywayan, makalimay padama to tao.

Halatek na maˈaraway iso ko tamdaw to makalimay padama to paro no lomaˈ ato widawidang. Kawra, mihaen to demak cangra, o iraay ko ngaˈayay hananay a capeling, wa saan ci Yihofa han? Ano awa ko sapadama ni Yihofa, awaay ko pakayraan no tamdaw a masaheci a patalahkal to ngaˈayay hananay a capeling, samanen cowa ka lefot ko tamdamdaw, matira o sowal no Fangcalay Cudad: “Itini i hekal i, awaay ko marariday a mangaˈay ko demak a tamdaw, awaay ko cowa ka patelac a cowa ka ciraraw a tamdaw.” (Patnakay 7:20) Ano ci Pawloto mihayay to nika caka dolo ko niyah patalahkal to ngaˈayay hananay a capeling, sowal sa cingra: “Mafanaˈ kako, awaay i takowanan ko ngaˈayay.” (Loma 7:18) Tona o sakakaay a taˈarawan no ngaˈayay hananay capeling ci Yihofa, ano sapalahadaw kita to matiniay a capeling, kilimen ita ko sapadama Ningra wa ngaˈ.

Patirengay ci Yihofa to ngaˈayay tatiihay a palinian, somowal ko Fangcalay Cudad pakayni ci Yihofaan i, sanay ko sowal: “O tada ngaˈayay, o tada siniˈadaay Kiso, nanay pasifanaˈen kako to limoˈot Iso.” (ˈOlic 119:68) Pakayni to nika o ngaˈayay ci Yihofa, oniya sinael somowalay to tosa, sanay yaca nengnengen ita.

Ci Yihofa o ngaˈayay. Ci Yihofa o sakakaay a taˈarawan no ngaˈayay, o romaroma capeling Ningra makedecay a malalingat to ngaˈayay hananay a capeling Ningra. Nengnengen ko nalifetan ni Mosi, sanay pasowal ci Yihofa ci Mosian: “Ci Yihofa Kako, o Tapang, o adayayay o siniˈadaay a Kawas, o caay ka ranikay a maketer, tadamaanay ko olah ato nika soˈlin Ako. Midaˈocay ko olah Ako tangasa i pinapina a patek no kadadoedo no teloc no tamdaw. Hepolen Ako ko tatiih ato raraw nangra. Nikawrira, ano o tatefocen i, caay ko sasamadahen Ako a mitefoc.” (Kasadakan  33:19; 34:6, 7) Mahapinangay ita itini, ci Yihofa i kihcod a demakan patalahkalay to ngaˈayay ko Niyah. Ta itiniho i sera ci Yis i, soˈlin o makapahay a taˈarawan i ngaˈayay hananay a capeling, kawra sanayho ko sowal ningra: “Awaay ko ngaˈayay a tamdaw. Deng o Kawas a cecay ko ngaˈayay.”—Luka 18:19.

O kihcod a demak ni Yihofa sahtoay o ngaˈayay. O nidemakan no Kawas patalahkalay to ngaˈayay hananay a capeling. ˈOlic 145:9 sanay: “O sidaˈitay Cingra to tamdamdaw, miledef i polong no nisangaˈan Ningra ko siniˈada Ningra.” Cowa pisakakinih ci Yihofa, pafeliay to ˈorip i polong a tamdaw, hanaca pafeliayho to saka padadotocaw no ˈorip no tamdaw a maamaan. (Dmak 14:17) O iraay ko ngaˈayay a capeling Ningra, mankora makahiyay a misodod to tamdaw. ˈOlic 86:5 sanay ko sowal: “O ngaˈayay Kiso o maolahay a misolol to raraw.” Papasoˈlinen ita ci Yihofa “caay ka ˈidi Cingra a pafeli to ngaˈayay a maamaan i moecelay ko demak a tamdaw.”—ˈOlic 84:11.

Miringiay kita to Kawas a sangaˈen, mankora mamafanaˈ kita patalahkal to ngaˈayay hananay a capeling. (Satapangan 1:27) Palimoˈotay ko Kawas to sikawdan, “pinanam kamo to ngaˈayay a demak” sanay. (Isaya 1:17) Misamaan kita palahad to matiniay makapahay a capeling hani? Dademaken ita kora ilaenoay a tolo a demak.

Saka 1, tolonen misaali to fangcalay saocor. Papadama ko fangcalay saocor to Krisciyang malo iraay ko ngaˈayay hananay a capeling a tamdaw. (Kalatiya 5:22) Fangcalay saocor no Kawas papadama kitanan maolah to ngaˈayay, ˈinteh to tatiihay a demak. (Loma 12:9) Ci Yihofa papadama a “patanektek to falocoˈ namo to sakangaˈayaw no polong no demak ato sowal namo.”—2 Tisalonika 2:16, 17.

Saka 2, micekiw to Kimad no Kawas. Ano mihaen to demak kita, mamacada ko pipasifanaˈ ni Yihofa, hongaˈ “mafanaˈto kamo to nika o maan ko ngaˈayay a dademaken namo,” misaday a “midemak to masamaamaanay a ngaˈayay a demak.” (Taneng 2:9; 2 Timoti 3:17) Ano micekiw ato midotim kita to Fangcalay Cudad i, mamararid a maharateng no falocoˈ ko Kawas ato araaw Ningra. Mihaen to demak kita, mahecaday minaˈangay to odoˈ, ano ira sato ko saali i, mamahela a matama.—Luka 6:45; Ifiso 5:9.

Saka 3, “kao ngaˈayay a demak ko tatodongen.” (3 Yohani 11) Ci Yihofa aci Yis patirengay to fangcalay taˈarawan no mita, kawra iraayho ko madimadiay taˈarawan i Fangcalay Cudad patalahkalay to ngaˈayay hananay a capeling, ilalomaˈ nangra o ci Tapita aci Parnapas. (Dmak 9:36; 11:22-24) Adihayay ko mamananam ita naitira cangranan, nengnengen ita to misamaanay mipadang cangra to tao, hanaca saharateratengen misamaan kiso talaˈayaw a padama to paro no lomaˈ ato salikaka. Ci Tapita aci Parnapas pakayniay i ngaˈayay demak nangra ira ko makapahay a ngangan, kiso ano midemak to ngaˈayay demak o caciepoc to niyahan.

 Anini, ilalomaˈ no salikaka ita ˈalomanay ko misaˈicelay a mangaˈay ko demak, o fangcalay a taˈarawan no mita. Patinakoen, o malohemay malitengay i kasakopang kiemelay a matayal “o maolahay to ngaˈayay” cangra, o ˈalomanay madimadiay fafahiyan salikaka pakayniay i sasowalen waywayan ‘pasifanaˈ to tamdaw mafanaˈ to ngaˈayay a demak.’ (Titus 1:8; 2:3) O cecay ci Roslin hananay fafahiyan salikaka sanay ko sowal: “O widang ako misaˈicelay padama ato pakalalok to kasakopang a salikaka. Ciharatengay to tamdaw cingra, marariday pafeli to mimingay a sapakaolah anca mipadang cangranan. O ngaˈayay a tamdaw cingra sanay kako.”

Palimoˈotan ni Yihofa ko tamdaw Ningra “kao ngaˈayay ko demak namo”, sanay. (Amos 5:14) Ano tengilen ita koni sapalimoˈot i, papadama kitanan maolah to palinian ni Yihofa, halo patanoktok to falocoˈ ita a midemak to ngaˈayay a demak.

Tataˈang ko nidemakan anca pafeli to matekesay dafong wa ngaˈ o ngaˈayay a demak aka saan ko falocoˈ. Haratengen hena, o micokaay ano micoka to tamdaw i, kina cecay kina tosa aca ko pikonis i kalidokap maherekayto han? Tohati:niay adihayay ko pikonis wa ngaˈ malaheciay ko micokaan. Malecaday tora, adihay ko mimingay a demak a mipadang to tamdaw, wa ngaˈ o patalahkalay to ngaˈayay hananay a capeling.

Sowal no Fangcalay Cudad, o Krisciyang “ta lonok” saan a ‘misaday’ a matayal to ngaˈayay a demak sanay. (2 Timoti 2:21; Titus 3:1) Ano ciharateng kita to tao, o mamafanaˈ to mamisamaan ko demak, “palipahak to salikaka to sakaciepoc ato sakatanektek no falocoˈ nangra.” (Loma 15:2) Paladaˈen ita ko tao to iraay no mita. (Taneng 3:27) Patinakoen, pohayen tayra i lomaˈ komaen, masasi pakowakowad. Ano ira ko adadaay, patikamien cangra, tayra milisoˈ anca patingwaen a mihinom. Ano macacawmaˈ kita to tamdaw i, adihayay ko toki ita pasowal to ‘paˈicelay to tamdaw a sowal, ciepoc ko mitengilay a tamdaw.’—Ifiso 4:29.

Sapitodongaw kita ci Yihofaan, kiemel a midemak to ngaˈayay i tamdaw, mansa sadafdafen ita micada ko tamdamdaw. Cowa pisakakinih to tamdaw a cecay pakayraan i, tosilen to ngaˈayay lihaf no Hongti Kitakit ko masakenakenaay tamdaw. Tooren ita ko sapalimoˈot ni Yis, soˈlin ˈinteh kitanan, misaˈicelho kita midemak to ngaˈayay i cangranan. (Luka 6:27) Sidaˈit kita to tamdaw, mangaˈay i cangranan, samanen “o matiniay a demak i, awaay ko milalangay a rikec.” (Kalatiya 5:22, 23) Soˈlin tahasiˈayaw to sapalifet anca sacoli, kamayan patalahkal to ngaˈayay hananay a capeling, mihaen to demak, alatek mamasolot ko romaroma tamdaw micada to kimad, paˈdil to Kawas.—1 Pitiro 3:16, 17.

O sowal no Taneng 14:14, sanay: “O moecelay a tamdaw i, o mamilayap to tatodong no ngaˈayay a demak ningra.” Ano midemak to ngaˈayay kita, alatek mamisangaˈay micada kitanan. (Taneng 14:22) Soˈlinto cowa pisangaˈay kitanan, papadotoc midemak to ngaˈayay kita, latek mafalic ko nika picada nangra kitanan.—Loma 12:20.

O nalifetan no ˈalomanay tamdaw misawacayay, midemak to ngaˈayay cato pidemak to tatiihay i, ciepocay to niyahan. Somowalay ci Nansi to nalifetan ningra, sowal sa: “Itiyaho, o mafirangay a tamdaw kako, ˈamelas ko kaˈorip. Kawra, minanamto kako to Fangcalay Cudad midoedo to palinian no Kawas a maˈorip i, mahemekayto kako. Nohatini o masenengayto a tamdaw kako.”

O sakakaay lalangian ita palahad to ngaˈayay hananay capeling i, samanen mahemekay ci Yihofa a mihaen to demak kita. Soˈlin cowa ka ˈaraw no tao ko ngaˈayay a demak ita, maˈaraway ni Yihofa, mahapinangay Ningra ko falocoˈ ato waywayan ita. (Ifiso 6:7, 8) Wa misamaan palifon kitanan Cingra hani? Taneng 12:2 sanay ko sowal: “Maolah [ci Yihofa] to moecelay a tamdaw.” Orasaka, padadotoc kita palahad to ngaˈayay hananay a capeling, samanen mikiˈokay ci Yihofa, “o ngaˈayay ko demak a tamdaw a maemin i, o mamala tadamaanay, o cacirihaday cangra.”—Loma 2:10.