1. (1) Malahdaway ni Atam aci Ifa ko maanan? (2) O saˈosi nangra mikayatay to maanan a teloc?

O CIMA ko cifadangalay misaˈosi to palinian no ngaˈayay tatiihay hani? Komaenay ci Atam aci Ifa to heci noya ‘mihapinang to ngaˈayay tatiihay a kilang’, ora saˈosi nangra paihkalay to harateng no niyah: Cowa ka kahi cangra mitiˈer ci Yihofaan ato palinian Ningra, ciharatengay o niyah saan misaˈosi to palinian no ngaˈayay ato tatiihay. (Satapangan 3:22) Teloc i, malahdaway nangra ko kalawidang ci Yihofaan, ato tahadaˈocay a ˈorip, parocokayho to raraw ato patay i teloteloc. (Loma 5:12) O saˈosi ni Atam aci Ifa mikayatay to kadayayan a teloc.

2-3. (1) Mitengil ko Iciyopiya tapang to patenakan ni Filip a soˈlinay kimad i, ikor samanayto ko demak nangra? (2) Micada to inoˈ wa milifok to maanan a sakaraheker hani? (3) Wa milengo kita to maanan a salicay hani?

² Iciyopiyaay a tapang cowa ka lecad ci Ataman aci Ifaan, tiya tosilen ni Filip cingra i, miakoˈiday cingra to nano demak ni Yihofa aci Yis i cingranan, mansa tangsol micada to inoˈ. (Dmak 8:34-38) Ano mahecad kita toniya tapang a misaˈosi, patafang to tireng halo micada to inoˈ, mahecaday o pasowalay ci Yihofaan: Miakoˈiday kita to nano demak Ningra aci Yis kitanan, ato mitiˈeray kita Cingranan, mihai to iraay ko fadangalan Ningra, patireng to palinian no ngaˈayay ato tatiihay.

³ Haratengen ko raheker a mihodop ci Yihofaan, wa micada to malahdaway ni Atam aci Ifa a kihcod, mahawpay ko tahadaˈocay a ˈorip. Samanen pakasoˈlinay kita ci Yis Kristoan,  wa sododen ni Yihofa ko raraw ita, pafeli kitanan to tingalaway a falocoˈ. (Matay 20:28; Dmak 10:43) Kita ngaˈay malo kaolahan ni Yihofa a sikawdan, i lalomaˈ no paro no lomaˈ Ningra, aira ko makapahay a hatokel. (Yohani 10:14-16; Loma 8:20, 21) Hay, adihayay ko sakaraheker ita, kawra roma tamdaw minanamay to soˈlinay kimad, cowaho pitoor to taˈarawan noya Iciyopiyaay a tapang. O maanan ko micaraay cangranan micada to inoˈ hani? Sasamaan miremo toniya saconged hani?

4-5. Ci Afori aci Hana misiˈayaway to maanan a pasangaray?

⁴ Cangoˈotay ko pakasoˈlin to niyah: O Misawacayay Tamdaw ni Yihofa ko wama wina ni Afori, o ngaˈayay a wama ato malohemay malitengay ko wama ningra. Kawra, cowa sapicadaaw to inoˈ ni Afori. Misamanay hani? Sanay cingra: “Cato ka hecad kako to wamaan a idahiyay.” Cangoˈotay ko pakasoˈlin ci Afori to niyah, calemcemay toha ˈinorong micada to inoˈ. Sanay cingra: “Matalaway kako mikayat mitolon, mikimad anca mikerid a mitosil.”

⁵ 18 ko mihecaan ni Hana, cangoˈotay ko pakasoˈlin ningra to niyah isalakat. Soˈlin mitooran no wama wina ko safalod no Fangcalay Cudad a pasifanaˈ cingranan, kawra cowaho pakasoˈlin cingra to ngangaˈay ko niyah, mitoor to palinian ni Yihofa a maˈorip. Misamanay hani? Awaay ko kapo no niyah, sanay ci Hana miharateng. Latekay, matoleday ko falocoˈ ningra, mangalef midokaˈay to niyah matongal matongal ko tatiih. Sanay ci Hana: “Cowa pasowalen ako ko tao, cowa ka fanaˈ ko wama wina. Mafanaˈay ci Yihofa to midokaˈay kako to niyah, cowa ko mamicada takowanan malo sikawdan Ningra,” sanay.

6. Ci Wanisa hano caka kahi micada to inoˈ hani?

⁶ O pifiyor no widang: 22 ko mihecaan ci Wanisa, sanay: “Na iraay ko cecay ngaˈayay widang ako, 10 miheca masasifanaˈ kami.” Kawra, cowa pidama koniya widang to patosokan ni Wanisa a micada to inoˈ, masomaday cingra a somowal: “Mafokilay kako misawidang to tao, ano liyasen ako koniya widang, cowato ko mamahela ko ngaˈay a widang alatek,” sanay.

7. Calemcemay ci Makayra to maanan? Misamaanay?

⁷ Calemcemay to mamidemak to pakidemay a raraw: Ci Makayra 5 ko mihecaan, mafalahay no kasakopang ko faˈinayan kaka ningra. Itini kalomahadan maˈaraway ningra ko waywayan no kaka, padokaˈay to falocoˈ no wama wina. Sanay ci Makayra: “Ka calemceman ako i, ano micada kako to inoˈ ikor mararaw a mafalah, wa matongal ko kasomad no wama wina,” sanay.

8. Matalaway ci Mayes to maanan hani?

 ⁸ Matalaw to pisafelit: O wama ato saka tosa wina ni Mayes o Misawacayay Tamdaw ni Yihofa, kawra o mihofocay a wina ningra cowa ko Misawacayay. Sanay cingra: “18 miheca malacafay kako to wina, matalaway kako pasowal cingranan to sapicadaaw kako to inoˈ. Tiya malo Misawacayay Tamdaw ko wama i, misafelitay ko wina, calemcemay kako mihaen a misafelit ko wina takowanan,” sanay.

9. Ano mafanaˈ kiso to mihadidiay ato tangongolay ko olah ni Yihofa, wa samaan ko demak iso hani?

⁹ Ci Atam aci Ifa caka kahi mihodop ci Yihofaan, awaay ko tangongolay a olah nangra to Kawas. Soˈlin mihaen ko saˈosi nangra, kamayan paˈoripen ni Yihofa cangra, mihofoc to wawa, hanaca o niyah ko misaˈosi sasamaan pasifanaˈ to wawa. Misaˈosi ci Atam aci Ifa eca ka picada to pikowan ni Yihofa tada mafolaay, samanen o sakakaay wawa nangra ci Kain mipatayay to safa, matomesay ko mariˈangay ato misatekeday a waywayan no lekakawa no tamdaw. (Satapangan 4:8; 6:11-13) Kawra, maharekayto ci Yihofa milimasmas to mamilidong to makahiay mihodop Cingranan a teloteloc ni Atam aci Ifa. (Yohani 6:38-40, 57, 58) Ano minanam kiso to adihayay a sifanaˈ ni Yihofa, mafanaˈ iraay ko mihadidiay ato olah Ningra, wa matongal ko olah iso Cingranan. Cowa ko mamitodong kiso to waywayan ni Atam aci Ifa, wa misaˈosi a patafang to tireng ci Yihofaan.

10. Midotim to ˈOlic 19:7 hano papadama kitanan misongilaˈ a matayal saki Yihofaan?

¹⁰ Ka tongalen ko kafanaˈ ci Yihofaan: Ano matongal ko kafanaˈ iso ci Yihofaan, wa misongilaˈ a matayal saki Yihofaan. Sanay ci Afori: “Micekiw ato midotim kako to ˈOlic 19:7 a sinael, matongalay ko pakasoˈlin to niyah.” (ˈOsien.) Mahapinangay ningra o soˈlinay ko sowal ni Yihofa, matongalay ko olah ningra to Kawas. Mihaenay, o kaolah to Kawas ngaˈayay padama to tamdaw pakasoˈlin to niyah. Roma i, ano maolah to Kawas wa midemak to kahemekan Ningra a demak. Sanay ci Hana: “Miˈosi ato micekiw to Fangcalay  Cudad ato lalakaw, pakacipinangay takowanan, midokaˈ to niyah pasomaday to falocoˈ ni Yihofa.” (1 Pitiro 5:7) Misaˈicelay cingra ‘misaka dademak to fangcalay sowal’. (Yakop 1:22) Samanayto ko minaroˈan? Sanay cingra: “Mahapinangay ako ko epoc midoedo ci Yihofaan, matongalay ko olah ako Cingranan. Nohatini, pakasoˈlinay kako ano misaali kako to sadama i, wa mikayat ci Yihofa takowanan to matatodongay lalan.” Ikor, maremoay ni Hana ko sapidokaˈaw to niyah a harateng, patafang to tireng a micada to inoˈ.

11. (1) Samaanay ci Wanisa mahela ko soˈlinay widang? (2) Oniya tinakoan mamananam ita ko maanan?

¹¹ Citaneng a mipiliˈ to widang: Salikor mahapinangay ni Wanisa o micongeday ko widang ningra a mihodop ci Yihofaan. Mihaenay, cowato picawmaˈ cingranan. Cowa ka hatini aca, misaˈicelay cingra, itini kasakopang micawmaˈ to faelohay widang. Mikitini i paro no lomaˈ ni Nowa, milifokay to sapakalalok cingranan. Sanay ci Wanisa: “Itiya sahtoay cowa ka olah ci Yihofaan ko taliyokay a tamdaw, kawra makelecay ko kalalaˈed nangra.” Ikorto micada to inoˈ cingra malo misakafahay, sanay cingra: “Malo misakafahay adihayay ko ngaˈayay widang i kasakopang, mafanaˈayho to romaroma salikaka i kasakopang.” Mahecad ci Wanisaan, ano misarocod kiso a matayal i patorodan ni Yihofa tisowanan a saaroˈan, wa adihay ko micawmaˈan a ngaˈayay a widang.​—Matay 24:14.

12. Awaay ko maanan a wayway ni Atam aci Ifa? Samaanay ko teloc nangra?

¹² Kangodoen a mikatalaw ci Yihofa: Matalaw to maanan a demak cowa ko tatiihay. Tinakoen, o kakangodoen a mikatalaw ci Yihofa, mipakahemek Cingranan. (ˈOlic 111:10) Ci Atam aci Ifa ano iraay ko mikangodoay a mikatalaw ci Yihofaan, eca to ka pisafelit cangra ci Yihofaan. Ikor no misafelit cangra to Kawas i, o ngaˈayay falocoˈ nangra, pahapinangay to mararaway ko niyah. O paparocoken nangra ko raraw ato patay i teloteloc. Cipinangay ci Atam aci Ifa misafelitay ko niyah to limoˈot no Kawas, mangodoay to nika wacay no niyah, mansa tano papah a mitahepo to tireng.​—Satapangan 3:7, 21.

13-14. (1) O sowal i saka 1 Pitiro 3:21, hano hamaan a pakidem ko katalaw ita to patay? (2) Iraay ko maanan lalangian ita a maolah ci Yihofaan?

 ¹³ Misaaliay kita mikangodo a mikatalaw ci Yihofaan, kawra hamaan pakidem a matalaw to patay. Milimasmasay ci Yihofa wa ngaˈay tahadaˈoc a maˈorip kita. Ikor no mararaw, ano soˈlin a pasasiyor kita, wa sododen ni Yihofa kita. Pakayni pakasoˈlin ita to patafangan ni Yis a sapatefoc ko sapisodod ni Yihofa to raraw no mita. O kalimlaan a pakayraan ita paihkal to pakasoˈlin, patafangen ko tireng i Kawas micada to inoˈ.​—ˈOsien ko 1 Pitiro 3:21.

¹⁴ Adihayay ko lalangian ita a maolah ci Yihofaan, pafeliay Cingra to adihayay makapahay a dafong to romiˈamiˈad, padamaayho kitanan mafanaˈ Cingranan ato araaw Ningra. (Yohani 8:31, 32) Pafeliay Cingra to kasakopang no Krisciyang, malifok ita ko sakayat ato sapadama. Padamaayho Cingra kitanan miremo to pasangaray, paira to hatokel ita patatikol a malefot, tahadaˈoc a maˈorip. (ˈOlic 68:19; Paˈarawan 21:3, 4) Midotim kita to paihkalan ni Yihofa a olah kitanan, ato nano demak Ningra kitanan, wa matongal ko kaolah ita Cingranan. Ano maolah kita ci Yihofaan wa mikangodo a matalaw Cingranan, makalim pakahemek Cingranan.

15. Hano cowato ka pakidem ko calemcem ni Makayra?

¹⁵ Ci Makayra cipinangay to o makahiay a misodod to tamdaw a Kawas ci Yihofa i, cowato ka pakidem ko calemcem. Sanay cingra: “Cipinangay kako cowa ko malefotay ko tamdaw, iraay ko raraw. Kawra mafanaˈay kako maolahay ci Yihofa kitanan, wa misalalangi to sapatefoc a misodod kitanan.” Maolahay ci Makayra ci Yihofaan, ikor patafang to tireng a micada to inoˈ.

16. Samanay ci Mayes a miremo to kaciˈangian?

¹⁶ Masowalay isalakat ci Mayes matalaway to wina mamiconged cingranan a micada to inoˈ, mitahidangan ningra ko kasakilac kantok mipaini cingranan. Sanay ci Mayes: “Pasowalay ko kasakilac kantok, cowa ko Misawacayay Tamdaw ni Yihofa ko wina ningra. Padamaay cingra takowanan sasamaan ko pitadtad to winaan, fanaˈen cingra o niyah a saˈosi micada to inoˈ, cowa ka pacieci ko wama takowanan.” Kawra, padotocay milalang ko wina. Ikor, malinahay ci Mayes, cowato kala cafay to wina mikilomaˈ. Kawra, cowa pisawad cingra, misaˈosi ko falocoˈ a micada to inoˈ. Sanay ci Mayes: “Cipinang to adihayay ko nano demak ni Yihofa takowanan, mitemeray ko falocoˈ ako. Midotim to kinafalah ni Yis a malo sapatefoc i, cipinang to soˈlinay maolah ci Yihofa takowanan. Mahapinang konini, misaˈosiayto kako patafang to tireng ci Yihofaan a micada to inoˈ.”

17. Kita maemin iraay ko toki paihkal to maanan?

¹⁷ Itini Itin i, cowa pidoedo ci Ifa to limoˈot  no kakarayan a Wama, komaenay to heci noya ‘mihapinang to ngaˈayay tatiihay a kilang’. Mahecaday to fafahi ko saˈosi ni Atam, paihkalay cingra to cowa piakoˈid to nano demak ni Yihofa cingranan. Kita cecacecay tamdaw ngaˈayay paihkal to, cowa ko mamalecad kita ci Ataman aci Ifaan. Pakasoˈlinay kita edengan ci Yihofa citatodongay a misaˈosi to palinian no ngaˈayay tatiihay, mansa micada kita to inoˈ, misawacay to olah ita to kakarayan Wama ci Yihofaan, halo misarocod a mitiˈer Cingranan.

18. Sasamaan kiso ngaˈ malaˈosi ko pihodop ci Yihofaan hani?

¹⁸ Ikor no micada kita to inoˈ wa misiˈayaw to maanan sapalifet hani? To romiˈamiˈad oha mamitoor to palinian ni Yihofa a maˈorip, cowa kono niyah a palinian. Ano padotoc kiso mitongal to kafanaˈ to Fangcalay Cudad, ato mararid a micawmaˈ to salikaka, halo fanekfekay a padama to tao mafanaˈ to sidaˈitay a Wama i kakarayan i, wa ngaˈay mahecad to pinaay soˈot ˈofad a Krisciyang, mitoor to palinian ni Yihofa a maˈorip. (Hipray 10:24, 25) Ano mamisaˈosi kiso i, doedoen ko pakaynian ni Yihofa i Fangcalay Cudad ato likakawa Ningra a sapatalipaˈelal tisowanan. (Isaya 30:21) Ano mihaen ko demak iso, wa malaˈosi ko kihcod a demak.—Taneng 16:3, 20.

19. O mamahapinang ita ko maanan? Misamanay?

¹⁹ Ano mahapinang iso adihayay ko malifokay iso a epoc nai sapasifanaˈ ni Yihofa, wa matongal ko olah Cingranan ato palinian Ningra. Mihaen, ano samaanto ko pikayhid ni Satan kisowanan, cowa ko papakasolot kisowanan a miliyas ci Yihofaan. Haratengen hena, ikor no comaˈol miheca, wa maliko kiso to sangaˈayay ko misaˈosian no niyah isalakat, micada to inoˈ matayal saki Kawas!