1-3. (1) O kapah tamdaw mamisiˈayaw to maanan a sapalifet hani? Patinakoen hena. (Nengnengen ko satapangan coka.) (2) O kaemangay a Krisciyang misamaan ngaˈ ngaˈay malaˈosi ko hakelong nokaˈorip hani?

HARATENGEN hena, wa tayra kiso i maraayay a niyaroˈ, mirienang to kalimelaan a demak, oha halafin kiso a mikalic to faso ngaˈ tahira. Tayra sa kiso i ciyataw sapikalicaw to paliding, ˈarawhan adihayay ko tamdaw ato faso, awaayto ko pinang iso. Kawra, mafanaˈayho kiso to tatalacowa ko lingad, o maanan ko kakalicen a faso, samanen, ano patelas sa kiso a mikalic to faso i, wa cowa ko tatahira i kahiceraan.

² Anini, o kapah tamdaw mahecaday o mamikalic to faso a tamdaw. Malingad cangra a miliwko o rarakaten i hakelong no kaˈorip. Tolatekay taˈangayay ko macadaay nangra a saroero, cowa ka fanaˈ to hahacowa mimamet to toki a dademak ato sasamaan ko sasaˈosien. Kapah tamdaw, kilimen ko patosokan no niyah, mihaen ngaˈ mafanaˈ kiso a misaˈosi. Salicay i, wa pasicowa kiso a romakat hani?

³ Oniya lalakaw wa pakalalok to kapah tamdaw micangacang to cecay patosokan, o papakahemek ci Yihofaan, mihaen ko demak nangra wa mahela ko matatodongay a patosokan no kaˈorip. Kapah tamdaw, samacayen ko falocoˈ micangacang to noˈadingoan a patosokan, papikayaten ci Yihofa itini kihecod no kaˈorip iso, mahaopay ko picudadan,  katayalan ato paro no lomaˈ iso. Misarocod ko falocoˈ iso mihodop ci Yihofaan i, ngaˈay pasoˈlinen iso papalemeden ni Yihofa kiso, palaˈosi to kaˈorip iso.​—ˈOsien ko Taneng 16:3.

4. Oniya lalakaw mamilengo to maanan?

⁴ Kaemangho patireng to noˈadingoan a patosokan, hano o citanengay? Dotoc wa milengo to tolo lalangian. Saka cecay ato saka tosa lalangian wa pahapinang kitaanan, micangacang to noˈadingoan a patosokan mamatongal ko kakelec no kalalaˈed no niyah aci Yihofa. Saka tolo a lalangian wa mitadtad, ano kaemangho micangacang to noˈadingoan a patosokan, wa ira ko maanan a haepoc.

5. Misamaanay hano patireng kita to noˈadingoan a patosokan hani?

⁵ Salakat, patireng kita to noˈadingoan a patosokan, pakayniay no piakoˈid ita to paihekalan ni Yihofa a olah ato nano demak Ningra kitaanan. Sowal no mitiliday to ˈOlic: “[Yihofaaw], tada o ngaˈayay a demak ko pikansiya i Tisowanan . . . o nika tadamaan no demak Iso ko sakalipahak ako, o nika tadamaan no tayal Iso ko sakapilekal ako a romadiw.” (ˈOlic 92:1, 4) Kapah tamdaw, haratengen iraay ko maanan lalangian iso a miakoˈid ci Yihofaan. Pafelian ni Yihofa kiso to ˈorip, padama tisowanan palahad to pasoˈlinay falocoˈ, pafeli to Fangcalay Cudad ato kasakopang, pafeliayho tisowanan to makapahay hatokel. Paisalakaten iso miteli ko noˈadingoan a demak i kaˈorip, paihekalay to miakoˈiday kiso to kihecod a sapafeli no Kawas, mihaen to demak matongalayho ko piingid iso to Kawas.

6. (1) Patireng to noˈadingoan a patosokan wa samaan milingat to kalalaˈed iso aci Yihofa hani? (2) Kapah tamdaw ngaˈay patirengen to maanan a patosokan hani?

⁶ Saka tosa lalangian i, micangacang kita to noˈadingoan a patosokan, wa ngaˈay patireng to ngaˈayay ngangan i ˈaˈayaw ni Yihofa, ira ko tangongolay kalawidang Cingranan. Mikiˈokay ko tarokos ci Pawlo: “Moecelay ko demak no Kawas saka, caay ka tawal Ningra ko nano tayal namo ato nipipatalahekal namo to olah i Cingraan.” (Hipray 6:10) Mihaenay, mimingayho ko mihecaan ako, hamaan patireng to noˈadingoan a patosokan, aka ka saan. Ci Kolas 10 ko mihecaan, misaˈosiay to mamicerid miˈosi to nalifetan no madimadiay a salikaka. Ci Tomas 12 ko mihecaan patirengay to patosokan, iˈayaw no micada to inoˈ eminen miˈosi ko Fangcalay Cudad. Ci Markosimo 11 ko mihecaan ato 10 ko mihecaan a safa ci Naomi malacafayay micada to inoˈ, makalimay cangra matayal i Pitil, sapisamacayaw micangacang toniya patosokan, paketingan nangra koya sapisinsi no Pitil a lalakaw i cacafiˈan no lomaˈ. Mihaenay, wa ngaˈay kiso miharateng to iraay ko maanan kalimelaan a hapatosokan iso hokira? Wa ngaˈay kiso misaˈicel mitoor toniya patosokan han?​—ˈOsien ko Filipi 1:10, 11.

7, 8. (1) Patireng to patosokan sasamaan padama tisowanan matatodong ko misaˈosian? (2) O cecay fafahiyan a salikaka hano caka tayra ˈakawangay a picudadan hani?

⁷ Saka tolo a lalangian milingatay to sasaˈosien. O kapah tamdaw wa misaˈosi itini picudadan, katayalan ato romaroma pakayraan. Mamisaˈosi mahecaday to tahiniay kacacipaˈan no lalan, wa mipiliˈ to cecay rarakaten a lalan. Ano mafanaˈay kiso to icowaay ko kahiceraan, wa matatodong ko mipiliˈan a lalan. Mahecaday onini, ano mafanaˈay kiso to o maanan ko patosokan no niyah, wa madolo matatodong ko misaˈosian. Taneng 21:5 sanay ko sowal: “O masongilaˈay ko pisahalaka a misafaco a tamdaw i, o sakacidafong ningra.” Ano kahenay kiso a misahalaka, pasayra i patosokan misaˈicel, wa kahenay a malaˈosi. Fafahiyan salikaka ci Ramalis cipinangay tonini, itini moetep ira ko pina no mihecaan ningra wa midemak to kalimelaan a sasaˈosien.

⁸ Ci Ramalis tada mafanaˈay micudad cingra. Na ngangaˈay malifok ningra ko sapakalalok a payci no picudadan, tayra ˈakawangay picudadan miˈosi tono holic, ˈarawhan, hano tayraay  cingra i kingko a matayal hani? Sanay cingra: “Misaˈosiayto kako malo misakafahay, mansa cowa piemin to toki a matayal to demak no hekal. Ano micudiyap kako tono holic a picudadan, wa mahela ko adihayay ko lifon a katayalan, kawra papasangar mahela ko cowa piemin to toki a katayalan.” Anini, tosaayto polo miheca a misakafah ci Ramalis, samaanay ko pinengneng ningra to patosokan no niyah ato misaˈosian i kaemangho hani? Sanay cingra: “Itini i kingko a matayal, marariday a malitemoh ko pingkosi. Kawra ˈalomanay a pingkosi cowa ka olah to tayal no niyah. Ano micudaday kako itiya tono holic i, wa mahecad cangranan a mala pingkosi. Kawrira malo misakafahay kako i, padama takowanan miliyas to cariraw i katayalan. Toniya pina miheca, o misakafahay demak malifetay ako ko lipahak a dademak ci Yihofaan.”

9. Itiniay i kasakopang a kapah hano citatodongay to papakahemeken no mita hani?

⁹ Anini, o dademakay i cowacowa a kasakopang a kapah citatodongay to papakahemeken no mita. Patafangan nangra ko niyah ci Yihofaan, misarocod ko falocoˈ micangacang to noˈadingoan a patosokan. Ciepocay ko kaˈorip no hatiniay kapah, misaˈicelay mitoor to sakayat ni Yihofa a dademak, itini picudadan, katayalan, paro no lomaˈ makayatay no Kawas. Sowal no hongti ci Solomon: “Sarocoden ko falocoˈ a mitiˈer ci Yihofaan . . . i masamaamaanay a demak iso i, pasayraen i Kawas ko falocoˈ iso, ta pasifanaˈen Ningra kiso to ngaˈayay a malo lalan no falocoˈ iso.” (Taneng 3:5, 6) O pinengneng ni Yihofa, masaka limelaan ko kapah i kasakopang, tangongolay ko olah ni Yihofa cangranan, wa dipoten, kayaten ato palemeden cangra.

10. (1) O mitosilay a demak hano papaisalakaten ita i nokaˈorip? (2) O kapah tamdaw sasamaan mitongal to saka ciepoc no mitosilay demak hani?

¹⁰ Sapa kahemekaw ko kapah ci Yihofaan, wa misaˈicel mitosil i tamdaw. Somowalay ci Yis “iˈayaw nonini a demak i, caay ka eca o mamapatenak ko Ngaˈayay a Ratoh i polong no finawlan i kasakitakit.” (Marko 13:10) O macalohay ko mitosilay a demak, paisalakaten ita i nokaˈorip koniya demak. Wa ngaˈay kiso patireng to patosokan, micerid mirienang to mitosilay a demak han? Wa ngaˈay kiso malo misakafahay han? Ano cowa ka hemek kiso a mitosil, wa samaanto hani? Wa ngaˈay kiso samaan mitongal to saka ciepoc no mitosilay demak hani? Tosaay ko pakayraan to papadama tisowanan: Salakat, paˈayaw a misaday, ato aka a pisawad mitosil. Ano tooren iso a midemak mamahapinang, papaira to taˈangayay a hemek ko mitosilay!

11, 12. (1) Kapah tamdaw wa ngaˈay misamaan misaday a misawacay? (2) O cecay kapah samaanay kalasaka dademak to toki misawacay to cafay micudad?

¹¹ Ano ciharatengay kiso misawacay to cafay micudad, ngaˈayay salakat a miharateng to o maanan ko salicay nangra, ikor kilimen ko lalakaw pacaˈof cangranan, tinakoen wa milicay ko cafay micudad to hano pakasoˈlin kiso to iraay ko Kawas. Itini jw.org a wangcan adihayay ko milingatay a lalakaw ngangaˈay padama tisowanan matama ko caˈof noniya salicay. Piliˈen ko FANGCALAY CUDAD ATO KAˈORIP > KAPAH sanay a lalakaw, wa matama ko pinanaman a lalakaw, lalangian “Hano Pakasoˈlin Kako to Iraay ko Kawas Hani?” Oniya pinanaman a lalakaw wa mikayat kisowanan, ho mafanaˈ kiso to sasamaan pacaˈof to salicay no cafay micudad. Wa ngaˈay saka dademaken iso koya tolo sinael i pinanaman a lalakaw—Hipray 3:4, Loma 1:20, ˈOlic 139:14. Mitadtad to pihakelongan i cafay micudad, songilaˈen iso misaka dademak ko misadayan no likakawa a pinanaman a lalakaw, wa mafanaˈto a pacaˈof to masakenaay a salicay.​—ˈOsien ko 1 Pitiro 3:15.

¹² Ngaˈayay kalasaka dademaken iso ko toki misiwkay to cafay micudad to jw.org a wangcan. O cecay kapah ci Lika, kinacecayay malalengoay ko cafay micudad tono pihakelongan a demak, matengilay ni Lika to mararaway ko  lalakaw a milengo to Misawacayay Tamdaw ni Yihofa. Matalaway ci Lika to miming, kawra milicayay to singsi wa ngaˈay mitadtad to pihakelongan no niyah hokira, mihaiyay ko singsi. Cowa ko pitadtad aca ni Lika to pihakelongan i cafay micudad, paˈarawayho cangranan to jw.org a wangcan. Telocto papidemakan no singsi ko polong a micudaday, ano minokay i, minengneng to cecay manka: Hamaan Tano Sakemo Milowid to Mariˈangay. Tada mahemekay ci Lika ira ko ngaˈayay a pisawacay no niyah.

13. Ano mifekad ko pasangar hano aka a paisawad to patosokan hani?

¹³ Sakala ˈosiaw noˈadingoan a patosokan cowa ko madoloay nolatekay, kawra aka ka toled. (2 Timoti 4:2) Ano mifekad ko pasangaray i, aka a pisawad to patosokan iso. O cecay ci Katalina a fafahiyan salikaka, itini 17 ko mihecaan ningra patirengay to patosokan, pasayra i cecacecay cafay matayal a mitosil. O cecay cafay matayal kinapinaay misamsam cingranan, kawra cowa ka talalikor cingra. O katimolo ningra misiˈayaw to waywayan no cafay matayal mitemeray to falocoˈ ni Hans, misatapangay ci Hans miˈosi to cudad no mita, ikorto minanamay to Fangcalay Cudad ato micada to inoˈ. Kawra, cowa ka fanaˈ toniya demak, samanen malinahayto ci Katalina i roma pala. Ikor no 13 miheca, ci Katalina ato paro no lomaˈ mirienang to saˈopo i, ˈarawhan mamikimad a salikaka o ci Hans! Tada kalipahakan ni Katalina. Cowa pisawad ci Katalina to patosokan, misaˈicel misawacay to cafay matayal, tada makapahay ko minaroˈan!

14, 15. (1) Ano misiˈayaw ko kapah to saroero i, sasamaan ko demak hani? (2) O maanan a pakayraan ko ngangaˈay padama to kapah miconged to saroero no kapot?

¹⁴ Oniya lalakaw pakalalok tisowanan misaˈosi to falocoˈ, paisalakaten i kaˈorip ko pihodop ci Yihofaan, misamacay micangacang to noˈadingoan a patosokan. O roma kapah misaaretengay to halama halatek, wa mitahidang tisowanan malacafay a misalama. Mihaenay, pasifanaˈen cangra, sapilaheciaw kiso mitoor to mipiliˈan no niyah ato misaˈosian a midemak. Hamaan pakayni i saroero no kapot a makalisanga, haratengen koya tinakoan i saka cecay fatac, soˈlina hato mahemekay koya mikalicay tamdaw itini roma faso, cowa ko mamafalic ko misaˈosian no falocoˈ iso a kahiceraan.

¹⁵ Iraay ko pakayraan padama tisowanan miconged  to saroero no kapot, o cecay pakayraan i, liyasen ko sakararawaw a demak. (Taneng 22:3) Wa ngaˈay haratengen iso, malacafay to tao a mararaw, wa samaan ko teloc. (Kalatiya 6:7) O roma i, mihayi to misaaliay ko niyah to sapalimoˈot no roma tamdaw. Paihekal kiso to misapoeneray falocoˈ, wa makahi mitengil to sapaini no wama wina ato matenesay a Krisciyang.​—ˈOsien ko 1 Pitiro 5:5, 6.

16. Paihekal to misapoeneray a falocˈ ira ko maanan a epoc? Tinakoen hena.

¹⁶ O misapoeneray a capeling padamaay to salikaka ci Keristef micada to sapalimoˈot. Caka halafin micada to inoˈ cingra, tayra piontoan a kitiraan. Mitahidangay ko itiraay a kapah cingranan mirienang to kasakapot no miontoay. Pasowalan ningra ko malohemay malitengay toniya demak, ˈayaw no mirienang to kasakapot no miontoay, papiharatengan no malohemay malitengay cingra, wa ira ko maanan katalawan, mamafiyor no masasiayay a harateng hokira. Kawraan kamayan ci Keristef a mirienang. Ikor, mahapinangay ningra iraay ko mariˈangay masaka talawan a demak. Pasowalan ningra ko malohemay malitengay toniya demak, palimoˈotan no malohemay malitengay misalalangian to Fangcalay Cudad a mirikec. Sanay ko sowal ningra: “Pakaynian ni Yihofa i romaroma tamdaw palimoˈot takowanan, cowa ka tangsol kako micada, ikor mihakelongan ako ko sowal no Kawas.” Kiso i, makahi misapoener to falocoˈ micada to sapalimoˈot han?

17, 18. (1) Maolahay ci Yihofa to sasamaan ko kaˈorip no kapah tamdaw hani? (2) ˈAlomanay matoˈasay pakayniay i maanan a demak a masomad? (3) Samaan ko demak no kapah eca ko mamasomad? Patinakoen hena.

¹⁷ Sanay ko sowal no Fangcalay Cudad to kapah: “Kalipahak a maˈorip yo kalakapahanho iso, salimelaen ko kalakapahanho iso a mihecaan a lipahak, hakelong han ko kaolahan iso a midemak.” (Patnakay 11:9) Kapah tamdaw, nanay mahemek ko kaˈorip iso sanay ci Yihofa. Oniya lalakaw mitadtaday to cecay sakahemek iso a pakayraan, misamacay micangacang to noˈadingoan a patosokan, ano mihalaka i, sinanoten ko harateng ni Yihofa. Kaliki kiso mihaen to demak, wa kaliki malifet to samaanay ci Yihofa a mikayat, midipot ato palemed tisowanan. Songilaˈen a misimsim ko ciepocay a limoˈot no Fangcalay Cudad, naˈengen i falocoˈ koniya laenoay sowal: “Yo kapahho kiso i, salimelaen, haratengen ko misangaˈay tisowanan a Tapang.”​—Patnakay 12:1.

¹⁸ Kamotoˈay ko kaemangan a romiˈad, cowa ko tatahadaˈoc a kaemang ko tamdaw, kalikiay a matoˈas kiso. ˈAlomanay tamdaw mararaway ko patosokan i kaemang hato masomaday cangra, anca awaay ko patosokan a cariraw. Kawra cowa ka hecad ko misamacayay micangacang to noˈadingoan a kapah, matatodongay ko mipiliˈan nangra, matoˈasto marenecay ko kaˈorip. Mahaenay ko milifetan ni Miriyana. Kaemang cingra mafanaˈay mionto, matahidangay mirienang to Olimpik a Ontokay, kawra cowa picada cingra toniya satahidang, o mieminay to toki a misakafah ko mipiliˈan ningra. Ikor no 30 miheca, kamayan miemin to toki a mitosil ci Miriyana, malacafay to faˈinay a padama to tamdaw minanam to soˈlinay kimad. O sowal ningra: “O saaroˈan, fadangalan, hafay sahetoay cowa ka halafin, cowa ko kalimelaan. O soˈlinay ciepocay a patosokan i, tahadaˈocay mihodop to Kawas, misaˈicel a padama to tamdaw macakat i noˈadingoan,” sanay.

19. Kapah tamdaw misamacay micangacang to noˈadingoan a patosokan, wa ira ko maanan a epoc hani?

¹⁹ ˈAlomanay kapah i kasakopang pakaremoay to pasangaray, misarocod to falocoˈ mihodop ci Yihofaan, citodongay to papakahemeken no mita. Misaˈicel cangra micangacang to noˈadingoan a patosokan, paisalakat to mitosilay demak i nokaˈorip, misaˈosi ko falocoˈ eca ka fiyor noniya hekal. Kapah tamdaw, cowa ko mamalakisaw ko pisaˈicel iso, wa padotoc a ciharateng ato midama ko salikaka tisowanan. Mihaenay, patorod han [ci Yihofaan] ko polong no nisahalakaan iso a demak, hongaˈ malaˈosi ko demak iso.