LALOMIHECA, lalomaˈ no Misawacayay Tamdaw ni Yihofa adihayay ko manilnilay faˈinayan salikaka malo malohemay malitengay ato padamaay sikawdan. Ano masalalomaˈay kiso, maedeng mahemekay kiso ira ko faelohay a ˈinorong.

Kawra, calemcemay kiso halatek. Ci Yasen, o kaemangayho a malohemay malitengay, sanay cingra: “Tiya manilnil kako i, maharateng ko ˈinorong no niyah tada taˈangayay ko saroero.” Ya manilnil ni Yihofa ci Mosi aci Yirimiya i, cato pakaremo ko niyah sanay miharateng. (Kasadakan 4:10; Yirimiya 1:6) Ano mahaenay ko harateng iso, wa misamaan miremo to saroero padotoc a macakat hani? Nengnengen ita ko taˈarawan ni Timoti.—Dmak 16:1-3.

Tiya tahidangen no tarokos ci Pawlo ci Timoti malacafay mitosil i, maedeng 20 ko mihecaan ni Timoti. Misatapang ci Timoti to faelohay a ˈinorong i, samanen kaemangayho, cangoˈotay ko timolo a matalaw. (1 Timoti 4:11, 12; 2 Timoti 1:1, 2, 7) Kawra, ikor no 10 miheca, patikami ci Pawlo to Filipiay a kasakopang sanay ko sowal: “Ano o nafalocoˈan [ni Yis], ano maedeng kako i, kalamkamen ako a miocor ci Timoti a patayra i tamowanan . . . Deng ci Timoti ko milecaday to falocoˈ ako a soˈlin ko nika sidaˈit tamowanan.—Filipi 2:19, 20.

Ikorto hano malo tada ngaˈayay a malohemay malitengay ci Timoti hani? Patirengay cingar to maanan a taˈarawan hani? Mikitini kita i enem a pakayraan minanam.

1. Soˈliˈlin a ciharateng to tao. Pasowalan ni Pawlo ko Filipi a salikaka: ‘Soˈliˈlinay a ciharateng ci Timoti to demak namo.’ (Filipi 2:20) Ciharatengay ci Timoti to tamdaw, nai falocoˈay ko kaciharateng ningra to noˈadingoan no salikaka, maolahay cingra mipalak to toki ato ˈicel a padama to salikaka.

O malohemay malitengay ato padamaay sikawdan hamaan hatiya o parakatay to faso a tamdaw, o hahacowa tahira i ciyataw ko kaciharatengan aca nangra, cowa ka ciharateng to mikalicay a tamdaw. Ci Wiliam, o kangodoan no tamdaw a malohemay malitengay, 20 ira ko pina miheca malo malohemay malitengay cingra, painiay cingra to faelohay malohemay malitengay ato padamaay sikawdan: “Aka o pikowan aca ato kadademak no kasakopang ko haratengen, mikikakaay o kakaolahen ko salikaka, o saali nangra ko sasaaretengen a miharateng.”

2. Paisalakaten ko noˈadingoan a demak. Mitilid ci Pawlo to Filipi i Loma i, mahapinangay ko roma salikaka i Loma pakidemay ko kaciharateng to notekedan a demak, telocto makalisangaay i noˈadingoan a demak, “saheto o saki notirengan a cecay ko niharatengan no tao. Caay piharateng to saki ci Yis Kristoan a demak.” (Filipi 2:21) Cowa ka hecad ci Timoti! Ano ira ko toki ni Timoti a misawacay to ngaˈayay ratoh i, mahecaday ko waywayan ningra ci Isayaan, sanay ko sowal ni Isaya: “Kakoto! Ocoren kako!”​—Isaya 6:8.

Itini notekedan ato noˈadingoan a demak sasamaan mitafo to masadafdafay hani? Saka cecay, limasmasen ko kadadoedo no demak. Pakalalokay ci Pawlo to ‘hapinangen to o maanan ko kalimelaan a demak.’ (Filipi 1:10) Paisalakaten ko demak no Kawas i nokaˈorip. Saka tosa, doloen ko  kaˈorip. Sawaden ko mamipalak to toki ato ˈicel a demak, palimoˈotan ni Pawlo ci Timoti: “Orasaka, sawaden kono kaemanganho a ˈanof . . . Misaˈicel to moecelay a demak ato sakatanektek no pitiˈer ato sakaciolah ato sakarihaday no ˈorip.”​—2 Timoti 2:22.

3. Saˈicelen midemak to fangcalay a tayal. Patalipaˈelalan ni Pawlo ko Filipi a Krisciyang: “Mafanaˈ kamo to nika ciepoc no tayal ni Timoti. Matiya o malahakelongay a malo wama kami a matayal a mipatenak to ngaˈayay a ratoh.” (Filipi 2:22) Malalokay ci Timoti malacafay ci Pawloan a matayal, patongalay to olah i kalalaˈed nangra.

Anini adihayay ko tayal no likakawa no Kawas, oniya tayal pairaay to sakarenecaw no falocoˈ iso, matongal ko kafanaˈ to salikaka, mihaenay haw i, patirengen ko patosokan “kararid a misaˈicel to tayal [no Tapang].”​—1 Korinto 15:58.

4. Saka dademaken ko mananamay. Sowal ni Pawlo mikelecay ci Timoti a mikotod to ‘sapasifanaˈ, pakayraan maˈorip, patosokan, pasoˈlinay falocoˈ, kodaitay, olah, mihadidiay,’ sanay. (2 Timoti 3:10) Misaka dademakan ni Timoti ko mananamay, misangaˈay a mitamorong to taˈangayay a ˈinorong.​—1 Korinto 4:17.

Pasayraay kiso i matenesay i noˈadingoan a salikaka minanam han? Ano cowaho, ngaˈayay kilimen iso ko cecay ngaˈayay taˈarawan, minanam to taˈarawan ningra. Ci Takaw, o matenesay a malohemay malitengay, sanay ko sowal: “Iˈayaw o cecay adihayay ko milifetan a malohemay malitengay, tada midimokosay takowanan, ciharatengay takowanan, songilaˈay pahatatanam takowanan, marariday licayen ako cingra, micada to sapaini ningra, mansa pakaremo kako to hatayal no niyah.”

5. Padotoc a pahatatanam to niyah. Palimoˈotan ni Pawlo ci Timoti, ‘O mangodoay to Kawas ko patosokan a pahatatanam to niyah.’ (1 Timoti 4:7) O miontoay iraay ko singsi pahatatanamay cangranan, kawra wa pahatatanam cangra to niyah. Sanay ko sowal ni Pawlo ci Timotian: “O piasip to Fangcalay Cudad i kaˈayaw no salikaka ato pipakimad ato pipasifanaˈ to mitooray ko sasarocoden iso. . . . Midemak tonini ta mahapinang no ˈalomanay ko nika cakat no tayal iso.”​—1 Timoti 4:13-15.

Wa padotoc kiso pahatatanam to niyah, hamaan patelepen ko kacakat no niyah i noˈadingoan, ka cipinang to faelohay sakayat no likakawa to kasakopang. Hamaan pakidem ko pasoˈlin to niyah, sao iraay ko milifetan, eca ka pilingwa to milingatay a lalakaw a misaysay to demak. Todongen ci Timoti, “Pinaˈon to tireng iso ato pipasifanaˈ iso.”​—1 Timoti 4:16.

6. Tadiˈecen ko fangcalay saocor ni Yihofa. Masowal ni Pawlo ko mitosilay a demak ni Timoti i, sanay: ‘Tiˈeren iso ko fangcalay saocor, simawen koniya fangcalay a sapatorod.’ (2 Timoti 1:14) Sakalaˈosiaw no mitosilay demak, kalimelaan ko pitiˈer ni Timoti to fangcalay saocor no Kawas.

Ci Tonater, halafinayto malo malohemay malitengay, sanay ko sowal ningra: “O manilnilay a salikaka sasalimelaen ko kalawidang no niyah ato Kawas, mihaen cangra wa ‘matongal matongal ko ˈicel’ nangra, ano micangacang cangra to fangcalay saocor no Kawas, palahad to minaroˈan no fangcalay saocor, wa palemed to salikaka.”​—ˈOlic 84:7; 1 Pitiro 4:11.

Mahemekay kita pakaˈaraw to manilnilay a salikaka macakat i noˈadingoan. O masowalay i satapangan no lalakaw ci Yasen sanay ko sowal: “Ikor no malo malohemay malitengay, adihayay ko mananamay ako a demak, matongalay ko pasoˈlin to niyah. Tada maolahay kako to demak no niyah i kasakopang, misalimela toniya kalimelaan a toki dademak!”

Faˈinayan salikaka maemin, wa ngaˈay kamo padotoc macakat i noˈadingoan han? Saˈosien ko falocoˈ minanam ci Timotian, ano mihaen wa ngaˈay kamo a palemed to finawlan no Kawas.