Tosaay ko hapakayraan a mihongyak tano Hipray a lalekoan no sowal, kawra saka salofen i, somowalay tora lalangian ilaeno:

1. Ya misalofan a pihongyak mitooray to lalekoan no tilid ato sowal no Hipay. O kalalitingan no ˈOlic 144:12-15 to ikaˈayaway a sinael, itiraay tora saˈayaway a tilid no saka 12 a sinael, ono Hipray a tilid, o asier (asher, no Hipray) hananay. Pinaay ko hapakayraan a mihongyak tora asier sanay a tilid, tatodong ngaˈayay mitoroˈ to nisowalan ikaˈayaw a tamdaw, mankora saka 12 tangasa 14 sinael somowalay tora nisowalan ikaˈayaw a mariˈangay a tamdaw. Kawra, ora asier sanay a tilid, ngaˈayay “ˈarawhan” anca “nikawrira” han a mihongyak, somowal to teloc nora demak, mihaenan noya misalofan isaka 2013 miheca a mifalic.

2. Ora misalofan a pihongyak maroyaroyay to romaroma sinael i ˈOlic saka 144 fedengan. Masalofto mihongyak tora asier ikor, ora nisowalan a sapalemed i saka 12 tangasa 14 sinael, oyaanto moecelay tamdaw ko mitoroˈan, cangra mingitangitay to pilidong no Kawas, mitokel to sapiliyasaw to pikariˈang no tatiihay tamdaw (saka 11 sinael). Mihaen a misalof, to nika cipinang ita to saka 15 sinael a “malemeday” a tamdaw, ihekalayto ko kapinengneng, ora misowalan toni sinael a tosa “malemeday” tamdaw, o malecaday a tamdaw​—oya “mangodoay [ci Yihofaan] a pala Kawas a finawlan” ko mitoroˈan. O roma haharatengen ita i, o Hipray sinael awaay ko ‘piyaw-tin-fo-haw’ (no Kowaping), mansa o mihongyakay tamdaw o mamafanaˈ a mihapinang ngaˈ matatodong ko pihongyak, hanaca mamisinanot to lalekoan no Hipray a ˈolic, ato fafekang ato ilaenoay a milingatay a sinael.

3. O romaroma sinael i Fangcalay Cudad, somowalay to papalemeden no Kawas ko midokoay i Cingranan a tamdaw, ya masalofay a pihongyak maroyaroyay toninian. Masalofto ikor, ihekalayto mahapinang ita ko nitokelan ni Tafiti, paˈoripen no Kawas ko Israil tamdaw miliyas to ˈada ikor, o mamalifok nangra ko sapalemed ato kadofahay a sapahafay. (Lifi 26:9, 10; Limoˈot 7:13; ˈOlic 128:1-6) Mahaen o sowal i Limoˈot 28:4 sanay: “O papalemeden no Tapang kamo, ta ˈaloman ko wawa ato teloc namo, kadofah kamo to panay, malenak ko kolong ato siri namo.” Tiya pikowan no wawa ni Tafiti ci Solomon, rihakeday ko Israil to na cowaho ka lifok iti:yaho a rihaday ato kadofah, paliˈayaway pasowal to pikowan ni Misiya toni cikiw to mamasamaan ko pakayraan.​—1 Hongti 4:20, 21; ˈOlic 72:1-20.

Mihaenay haw i, masalofto a mihongyak ko ˈOlic saka 144 fedengan i, cowa ka falic ko kacipinang ita to soˈlinay kimad no Fangcalay Cudad. Kawra, masalofay a sinael isekalay a patahekal to halafinayto a misalimelaan no sikawdan no Kawas a hatokel—ta palaˈafoento no Kawas ko tatiihay tamdaw ikor, o moecelay tamdaw mamilifok to tahadaˈocay a dipayar ato kadofah.​—ˈOlic 37:10, 11.