1, 2. (1) Itini i lintad ni Pawlo, hano ciharateng ko ˈalomanay tamdaw to lekakawa no koli ato pasalat hani? (2) Sapilifokaw to soˈlinay pasalat, palimoˈotay ci Pawlo to tamdaw mitapal cimaanan hani?

O LALITENGAN a Krisciyang maˈorip i hekal no Loma, pakayni holic, misawkitay a lekakawa no Loma ato pasalat no finawlan malikoay ko ˈalomanay tamdaw. Kawra, o malifokay no Loma a fadangalan ato ˈdil patirengan i lekakawa no koli. O finawlan no Loma maedeng 30% [tolo poloˈ pesento] ko mala koliay, ano haratengen, o lekakawa no koli ato pasalat, o kaciharatengan no kalo a tamdaw itiya, mahaopay ko Krisciyang.

² O mitilidan ni Pawlo a tikami kinapinaay somowal to pasalat. Soˈlin milongocay ko ˈalomanay tamdaw to sapisalofaw to lekakawa ato milikecay, kawra o mitosilay a demak ni Pawlo cowa konini ko araaw. Cowa picangacang ci Pawlo to pasalat pasayra i milikecay, misaˈicelay ato romaroma Krisciyang padama to tamdaw mitapal to pafeliay to pasalat a Kawas. Itini saka tosa a tikami ningra to Korintoay kasakopang,  sanay ko sowal ningra: ‘O ˈadingo ci Yihofa, icowaay ko fangcalay saocor ni Yihofa, itiraay ko pasalat,’ sanay.​—2 Korinto 3:17.

3, 4. (1) ˈAyaw no milengo ci Pawlo to 2 Korinto 3:17 a pasalat i, isalakatay pasowal to maanan hani? (2) Ano sapilifokaw to sapafeli ni Yihofa a pasalat i, isalakatho kita misamaan to demak hani?

³ ˈAyaw no milengo ci Pawlo to pasalat i, salakat somowalay to tayraay ci Mosi i Sinay Lotok. Malikelon ci Mosi i, mapaˈodingaray no ˈdil ni Yihofa ko pising ni Mosi. Maˈaraw no Israil ci Mosi matalaway, hato mitahepoan ni Mosi to pahok ko pising. (Kasadakan 34:29, 30, 33; 2 Korinto 3:7, 13) Kawra, padotocay ci Pawlo a pasowal: ‘Ano mitadiˈec ci Yihofaan ko tamdaw i, mafohat ko tapodo ningra,’ saan. (2 Korinto 3:16) O maanan ko tatodong noniya sowal ni Pawlo hani?

⁴ Itini i kaˈayaway lalakaw mananamay ita, edengan misangaˈay to kihecod a Yihofa awaay ko tolas no pasalat. Mihaenay ano icowaay ci Yihofa ato fangcalay saocor Ningra, iraay itira ko pasalat. Mihaenay, sapilifokaw to sapafeli ni Yihofa a pasalat ato haepoc, kalimelaan ko ‘pitadiˈec ci Yihofaan,’ tatodong nonini wa patirengen ita ko kalawidang ci Yihofaan. Itiyaho itini i kohkoh, awaay ko noˈadingoan a harateng no Israil tamdaw. ˈArawhan maliyas nangra ko kalakoli i Icip, ˈatekakay ko falocoˈ nangra, mapohaway ko harateng nangra, o maharatengay sahetoay sapisaloaw to coos no niyah.—Hipray 3:8-10.

5. (1) O fangcalay saocor ni Yihofa papaira to masamaanay a pasalat? (2) Soˈlin mapalit ko tamdaw, hano ngaˈayho milifok to sapafeli no Kawas a pasalat hani? (3) Wa milengo kita to maanan a salicay?

⁵ O pairaan no fangcalay saocor ni Yihofa a pasalat, mikikakaay ko kangaˈay to pilyas no tamdaw i kalakoli a pasalat. O fangcalay saocor ni Yihofa padamaay to tamdaw miliyas to kalakoli no raraw ato patay, padamaayho to tamdaw miliyas to safakec no mararaway pihakelongan, o hatiniay a pasalat cowa ko no tamdaw a ˈicel ko sakalifok. (Loma 6:23; 8:2) Tada makapahay ko sapafeli no Kawas a pasalat! Soˈlin o koli anca mapalit ko tamdaw, wa ngaˈayho milifok to sapafeli no Kawas a pasalat. (Satapangan 39:20-23) O malifetay no salikaka ci Yuen Nansi aci King Haro ngaˈayay misawacay tonini, pakayni pihakelongan pinaay miheca mihadidi i kapalitan. Wa ngaˈay kiso itini JW tilifi maˈaraw ko pilicay cangranan. (ˈArawen ko MALICAYAY ATO NALIFETAN > HADIDIEN KO PASANGARAY.) Kawraan, wa samaan kita paihekal to misalimelaay ko niyah to sapafeli no Kawas a pasalat hani? Wa samaan kita inaneng misaka dademak to pasalat hani?

6. Pafelian ni Yihofa ko Israil tamdaw to pasalat, kawra samaanay ko waywayan nangra hani?

⁶ Ano mafanaˈ kita toniya sapatelong tada pasangaray, wa mikoˈid to patelongay a tamdaw. Milidongan ni Yihofa ko Israil tamdaw miliyas to Icip, kawra cowa piakoˈid cangra to sapafeli no Kawas a pasalat. Ikor no pina a folad, misatapangay ko Israil tamdaw maˈiwil to kakaenen i Icip, ngaliwngiw to sapafeli ni Yihofa a kakaenen, sapinokayaw tayra i Icip. Haratengen hena, o pinengneng no Israil tamdaw to ‘foting, fidaol, kacawas, kenaw, nila a kenaw ato kafsoay a kenaw’ no Icip, mikikakaay ko kalimela to sapafeli no Kawas a pasalat, coko mamangolaw ci Yihofa cangranan han? (Saˈosi 11:5, 6, 10; 14:3, 4) Tada o patalipaˈelalay kitaanan a maˈoningay koni!

7. (1) O waywayan ato sasowalan ni Pawlo samaanay palecad to salimoˈot no 2 Korinto 6:1? (2) Samaan ko demak ita o mitodongay ci Pawloan hani?

⁷ Palimoˈotay ci Pawlo to Krisciyang, o sidaˈitay a Kawas ci Yihofa pakayni i wawa Ningra ci Yis Kristoan, pafeli to pasalat i tamdaw, aka saloyaˈen a minengneng. (ˈOsien ko 2 Korinto  6:1.) Milengoay ci Pawlo mapalit no raraw ato patay ko niyah, tahalifaay to roray ato cariraw no tingalaway falocoˈ. Kawra, sanay ko sowal ni Pawlo: ‘Miakoˈiday to Kawas pakayni tapang ita ci Yis Kristo a milidong takowanan!’ Mitadtaday cingra i Krisciyang: “Nawhani o pafeliay to ˈorip a [fangcalay saocor] pakayni i nika lacecay ita aci Kristo Yis ko mitedalay titaanan nai sapalit no raraw ato patay.” (Loma 7:24, 25; 8:2) O sapafeli no Kawas a pasalat padamaay kitanan miliyas to pipalit no raraw ato patay, pahecaden ita ci Pawloan, cowa ko sasaloyaˈen ko sapafeli no Kawas a pasalat. Pakayni sapatefoc a limasmas, wa ngaˈay lipahak ato tingalaw ko falocoˈ ita a mihodop to Kawas.—ˈOlic 40:8.

8, 9. (1) Patalipaˈelalay ci Pitiro to Krisciyang pakayni misaka dademak to pasalat misinanot to maanan? (2) Anini misiˈayaway kita to maanan a sakayhid?

⁸ Papaihekal kita to piakoˈid i Kawas ato sakaretengen ko pinengneng to kalimelaan a pasalat. Palimoˈotay ko tarokos ci Pitiro kitanan, hamaan sapisaloaw to coos notekedan a mikasimaan misaka dademak to sapafeli no Kawas a pasalat. (ˈOsien ko 1 Pitiro 2:16.) O salimoˈot ni Pitiro coko papiharatengay kitanan to mifekaday a demak no Israil tamdaw i kohkoh han? Anini, wa mahecad ko raraw ita halatek, misiˈayaway to adihayay a sakayhid. O sakayhid noniya hekal ni Satan, mahaopay ko kakaenen, pilafa to caˈedong, halama ato romaroma a demak. O kowangkaw no misasingdiay misaka dademakay to haiyo a pacakay to dafong, mifekaday ko kalim no tamdaw sapiˈacaaw tora dafong, ˈarawhan cowa ko kalimelaan. Ano caka talipaˈelal kita, wa marefong i talakal, mikasimaan misaka dademak to kalimelaan a pasalat.

⁹ O mihadakan ni Pitiro a limoˈot ngaˈayay saka dademaken i roma kalimelaan a demak i nokaˈorip, tinakoen o picudadan ato katayalan. Anini, itini picudadan taˈangayay ko masiˈayaway no kaemangay a saroero, milongocay ko singsi cangranan padotoc to ˈakawangay a picudadan. Wa pakasoˈlin ko kaemangay halatek, micada to ˈakawangay picudadan ngaˈay mahela ko adihayay ko lifon ato sanengsengay a tayal. O roma safanaˈ pakasoˈlinay ko kaemangay, micudiyapay i ˈakawangay picudadan mikikakaay ko lifon to itiniay i kalo a picudadan a tamdaw. Misiˈayaw ko kaemangay to mamifiyor to hakelong no kaˈorip a papiliˈen, makalimay sapicangacangaw to ˈakawangay a picudadan. O kaemangay tamdaw ato wama wina nangra oha mamisinanot to maanan hani?

10. Ano misaka dademak kita to pasalat a misaˈosi, haharatengen ko maanan?

¹⁰ Harateng no roma tamdaw o notekedan a papiliˈen koniya demak, ano mihai ko tingalaway falocoˈ, wa ngaˈayto ko niyah a misaˈosi to sasamaan ko demak sanay. Saka ira ko mahaenay harateng nangra, samaanen milengoay ci Pawlo to kakaenen itini kasakopang no Korinto, sanay ko sowal ningra: ‘O pasalat ako hano masawkit no falocoˈ no tao hani?’ (1 Korinto 10:29) Soˈlinay o ngangaˈay kita misaka dademak to pasalat misaˈosi to picudadan ato katayalan. Kawraan, haratengen ita, ora pasalat ita iraay ko tolas, o misaˈosian ita iraay ko pifiyor to tao. Mihaenay, patalipaˈelalay ci Pawlo to Krisciyang: ‘Maamaan ngaˈayay a midemak, kawra cowa ka saheto sa o ciepocay. Maamaan ngaˈayay midemak, kawra cowa ko papaˈicel to tamdaw ko kihecod.’ (1 Korinto 10:23) Patalipaˈelalay koniya limoˈot kitaanan, misaka dademak to pasalat i kaˈorip i, cowa ko sakakaay kalimelaan ko kaolahan no niyah.

11. Misamaanay hano padamaen ni Yihofa kita mihepol to raraw ato patay?

¹¹ Cowa ko patalipaˈelal aca ni Pitiro to Krisciyang, aka pikasimaan misaka dademak to pasalat,  somowalay to sasamaan matatodong ko pisaka dademak to pasalat. Pakalalokan ningra ko Krisciyang misaka dademak to pasalat ‘mala koli no Kawas.’ Pakaynian ni Yihofa ci Yisan padama kita a mihepol to raraw ato patay, pakayniay sakangaˈayaw ita misaka dademak to ˈorip a mihodop Cingraanan.

12. O paro no lomaˈ ni Nowa patirengay to masamaanay a taˈarawan no mita?

¹² Sakaecaaw kita a mikasimaan a misaka dademak to pasalat, sangaˈayay pakayraan i misarocod to falocoˈ, mirienang to noˈadingoan a demak, mihaen kita ecato ka fiyor no pinangan no hekal a micangacang to notekedan a saaroˈan. (Kalatiya 5:16) Tinakoen, itini i lintad ni Nowa ato paro no lomaˈ ningra, matomesay ko mariˈangay ato malafoay a demak, kawra cowa ka hecad cangra to taliyokay a tamdaw, misamacay micangacang to notekedan a patosokan ato coos. O paro no lomaˈ ni Nowa samaanay eca ka fiyor no hekal tamdaw hani? Misamacayay cangra to patorodan ni Yihofa a demak. Patirengay cangra to tamina, misaday to kakaenen no niyah ato ˈaˈadopen, mirikecayho to romaroma tamdaw. Itini Satapangan 6:22 sanay: ‘Mihaenay ko demak ni Nowa, kihecod limoˈot no Kawas cingranan, mitooran ningra a midemak.’ Telocto, milakowitay ci Nowa ato paro no lomaˈ to Taˈangayay Lenlen.—Hipray 11:7.

13. Palimoˈotay ci Yihofa ci Yisan ato mihakelongay cingranan midemak to maanan?

¹³ Anini, palimoˈotay ci Yihofa kitaanan midemak to maanan hani? Malo nisawawaan ni Yis, ihekalay mafanaˈ kita to limoˈot no Kawas papitosil kitaanan. (ˈOsien ko Luka 4:18-19.) ˈAlomanay tamdaw anini maapohay no kawas noniya lekakawa, cowa kafanaˈ to mapalitay no mararaway pihakelongan, kicay ato lekakawa ko niyah. (2 Korinto 4:4) Malikoay kita a mihakelong to taˈarawan ni Yis, padama to tamdaw mafanaˈ ci Yihofaan, midoko to pafeliay to pasalat a Kawas. (Matay 28:19, 20) Kawrira, adihayay ko malifaay a sapalifet i pitosilan. Itini roma kitakit, cowa kaolah ko tamdaw to mitosilan a ratoh, paihekalay ko roma tamdaw to tatiihay waywayan. Kawra, ano palimoˈotay ci  Yihofa kitaanan mitosil to tamdaw, lalicayen ita ko niyah: “Wa ngaˈay kako misaka dademak to pasalat, mitongal to demak no Hongti Kitakit han?”

14, 15. Mahapinang no finawlan no Kawas ko saali no mitosilay a tayal, midemakay cangra to maanan? (Nengnengen ko satapangan coka.)

¹⁴ Mafanaˈay ko ˈalomanay finawlan ni Yihofa to cowato ka hakowa ko toki noniya lekakawa, hato midoloay to kaˈorip a mirienang to misakafahay demak. (1 Korinto 9:19, 23) O roma misakafahay itiniay niyaroˈ no niyah a mitosil, o roma malinahay i misaaliay to mitosilay a kilac dademak. Lalomaˈ no 5 mihecaan, mataˈlifay ko 25 ˈofad a tamdaw misatapangay misakafah, polong no hekal mataˈlifay ko 110 ˈofad tamdaw ko misakafahay anini. Tada mahemekay kita pakaˈaraw to adihayay tamdaw ngaˈay ko pisaka dademak to pasalat a dademak ci Yihofaan!—ˈOlic 110:3.

¹⁵ O maanan ko padamaay toniya salikaka ngaˈay ko pisaka dademak to pasalat hani? Nengnengen ko tinakoan ni Yohani aci Cutis. Itini 30 mihecaan, tayraay icowacowa a kitakit a mitosil cangra. Maharatengay nangra itini 1977 miheca a Sapahatatanam to Misakafahay, pakalalokay to minanamay malinah tayra misaaliay to mitosilay a kilac. Ci Yohani aci Cutis patirengay to hatiniay a patosokan, sapidoloaw to kaˈorip, adihayay ko mifalican ni Yohani a katayalan. Ikor, ngaˈayayto cangra tayra roma kitakit a dademak. Mitadiˈec ci Yihofaan ato satolon padamaay ci Yohanian aci Cutisan, miremo to adihayay pasangaray, mahaopay ko pinanam to faelohay sowal, minanam to faelohay serangawan ato caka hecad a romiˈad. O demak nangra toniya pina miheca samaanay ko harateng nangra hani? Milengo ci Yohani to mirienangan no niyah a demak, mikikakaay to kihecod a demak no hekal, sanay ko sowal ningra: “Mahecaday o sidaˈitay a Wama ci Yihofa, pakayni takowanan o soˈlinay Cingra, nohatini matongalay ko kafanaˈ ako to sowal no Yakop 4:8 sanay: ‘Ka piingid kamo to Kawas, wa ingiden no Kawas kamo.’ Na mikakilimay kako to marenecay a kaˈorip, mahelaayto ako nohatini.”

16. ˈAlomanay cowa ka ngaˈay halafin miemin to toki dademak a salikaka samaanay a ngaˈay ko pisaka dademak to pasalat?

¹⁶ O pakayraan no roma salikaka cowa ka hecad ci Yohanian aci Cutisan, cecayay aca liyad cangra mirienang to mieminay to toki a demak. Soˈlin hatira, mimametay to toki ko ˈalomanay mirienang to patirengay a demak i cowacowa. Tinakoen, maedeng 2 ˈofad 7 patek ko salikaka mikitiniay i cowacowa pala tayra i Niwyok Worwik, mirienang to patirengay to Congpo, o kadademakan nangra a toki o roma tosaay lipay, o roma cecayay miheca anca halafinay a toki. ˈAlomanay tamdaw sapirienangaw toniya demak, sawad sanayho to salakatay a kaˈorip. Tada ngaˈayay ko patirengan noniya salikaka a taˈarawan, ngaˈayay ko pisaka dademak nangra to sapafeli no Kawas a pasalat, pakahemek ato paˈdil to pafeliay to pasalat a Kawas.

17. Anini o ngaˈayay ko pisaka dademak to pasalat a tamdaw wa milifok to maanan hani?

¹⁷ Tada mahemekay kita mafanaˈ ci Yihofaan, hanaca milifok to pairaan no matatodongay pidoko a pasalat. Nanay tano waywayan ita a paihekal to misalimelaay ko niyah to sapafeli no Kawas a pasalat. Aka a kasimaan han ita misaka dademak ko pasalat, o sasangaˈayen a misaka dademak ko pasalat, mimamet to toki misaˈicel mihodop ci Yihofaan. Sowal i Loma 8:21 sanay: “Ano hakowaay i, caayto ko mamaponiˈ cangra o masangaˈay. O mamikapotto cangra to tadamaanay a ˈorip no wawa no Kawas a mapakonira.” Hinatalaay kita malaˈosi koniya sapairasol, maraod ko toki o finawlan no Kawas wa milifok to sapafeli ni Yihofa a masakenaay a sapalemed.