1. Ikor no misafelit ci Atam aci Ifa, pafelian ni Yihofa ko tamdaw to maanan a hatokel?

MARARAWTO ko tamdaw cato kalefot ikor, padotocay ci Yihofa a pakalalok to tamdaw. Ikor no misafelit ci Atam aci Ifa, tangsolay ci Yihofa pafeli to saka tanoktokaw a lalangian i teloteloc nangra. Soˈlinay iraay ko hatokel no tamdamdaw, samanen paˈayaway ko Satapangan 3:15 a somowal, oya “katelangan a ˈoner” ci Akoma Satan ato tatiihay a waywayan ningra wa maemin a mapalaˈafo.​—Paˈarawan 12:9; 1 Yohani 3:8.

2. Samaanan ni Yihofa pakalalok ci Nowa hani?

² O sikawdan ni Yihofa ci Nowa itiniay i ciraraway a hekal maˈorip, itiya ci Nowa aca ato paro no lomaˈ ko midokoay ci Yihofaan. Samanen matenakay ko mariˈangay ato malafoay a demak, ci Nowa matoleday  ko falocoˈ ningra. (Satapangan 6:4, 5, 11; Yuta 6) Kawraan, palihafan ni Yihofa ci Nowa, saka ira no timolo ni Nowa padotoc a ‘mikapot to Kawas.’ (Satapangan 6:9) Pasowalan ni Yihofa ci Nowa papalaˈafoen koya ciraraway a hekal itiya, pasowalayho cingranan midemak to maanan a madipot ko ˈorip no paro no lomaˈ. (Satapangan 6:13-18) Tada taˈangayay ko sapakalalok ni Yihofa ci Nowaan.

3. Tahacadaay ci Yosuwa to maanan a sapakalalok hani? (Nengnengen ko satapangan coka.)

³ Nengnengen ita ko roma tinakoan: Macadaay ni Yosuwa ko karetengay a ˈinorong, wa mikerid to Israil micomod i mikiˈokan a pala. Saka itiraaw i mikiˈokan a pala palomaˈ ko Israil tamdaw, oha mamilowid to ciˈicelay a finacadan itira, maedeng calemcemay ko falocoˈ ni Yosuwa. Mihaenay, palimoˈotan ni Yihofa ci Mosi: ‘Nilnilen iso ci Yosuwa, pakalaloken cingra, paˈicel cingranan, samanen wa itini ˈaˈayaw no finawlan cingra a milakec to ˈalo, mikerid cangranan micada to mitapalan iso a pala.’ (Limoˈot 3:28) Itini ˈayaw no midemak ci Yosuwa, pakalalokan ni Yihofa cingra: “Haratengen koya limoˈot Ako i tisowanan, saˈicelen, safaˈinaˈinayen ko falocoˈ iso. Aka ka talaw, aka ka toled. Nawhani ano talacowacowa kiso i, ira Kako o Tapang a Kawas iso a mikapot i tisowanan.” (Yosuwa 1:1, 9) O sapakalalok ni Yihofa maedeng misayaray to falocoˈ ni Yosuwa!

4, 5. (1) Pakalalokan ni Yihofa ko nolitengan a finawlan to maanan hani? (2) Samaanan ni Yihofa pakalalok ko wawa Ningra hani?

⁴ Cowa ko tekedan aca a sikawdan ko pakalalokan ni Yihofa, pakalalokay to polong a finawlan. Tinakoen, mafanaˈay ci Yihofa to misaaliay to sahinom ko maholiway tayra i Papilon a finawlan Ningra, paˈayaway mikiˈok cangranan: “Aka ka talaw. Ira Kako a mikapot i tamowanan. O Kawas namo Kako. O maanho ko katalawan namo saw? O papatanekteken Ako kamo a mipadama. O dadipoten Ako kamo a paˈorip.” (Isaya 41:10) Ikorto, pakalalokan ni Yihofa ko salakatay a Krisciyang, ano aniniayto a finawlan no Kawas mahecaday micada to sapakalalok.​—ˈOsien ko 2 Korinto 1:3, 4.

⁵ Pakalalokan ni Yihofa ko wawa Ningra ci Yis. Micada to inoˈ ci Yis i, matengilay ko ngiha nai kakarayan saan: “O kakaolahan Ako a wawa konini. O kakahemekan Ako cingra.” (Matay 3:17) Tiya matayal ci Yis i fafekang no sera, oniya sowal tada paˈicelay i cingranan!

6. O linkim a tinakoan samaanay pakalalok kitaanan hani?

⁶ Mitodongay ci Yis to taˈarawan no kakarayan a Wama pakalalok to tao. Somowalay ci Yis to salikoray lintad noni hekal, patinakoay to linkim, pakalalokay to madimadiay a Krisciyang. Toniya sapatinako, pasowalan no tapang ko kahacecay no madimadiay a koli: “O ngaˈayay ko demak iso. O soˈlinay a malalokay a koli kiso. Malalok kiso i mamangay a demak saka, patirengen ako kiso a papisimaw to adihayay a dafong ako. Kihatiyaen kako a lipahak.” (Matay 25:21, 23) Oniya sowal ni Yis tada pakalalokay to nisawawaan padotoc a madimadi mihodop ci Yihofaan.

7. Samaanay ci Yis pakalalok to tarokos hani? Samaanayho cingra pakalalok ci Pitiroan hani?

⁷ Soˈlin marariday malacongis ko tarokos pakayni saaroˈan, kamayan ci Yis mihadidi a pasifanaˈ cangranan, pakalalok cangranan misapoener to falocoˈ a dademak i tamdaw, ecaka pitala to tao patado cangranan a dademak. (Luka 22:24-26) Kina pinapinaay ci Pitiro pakatoled ci Yisan. (Matay 16:21-23; 26:31-35, 75) Kawraan, cowa ka sawaden ni Yis ci Pitiro, padotocay a pakalalok cingranan hanaca miocor cingranan a paˈicel to romaroma salikaka.​—Yohani 21:16.

8. Samaanay ci Hicikiya pakalalok to ˈaˈideman no sofitay ato finawlan hani?

⁸ Itini pipakalalok to tao patirengay ci Yis to mikiriwiˈay a taˈarawan. Kawra ˈayaw no tayni i hekal cingra, masinanotayto no madimadiay a sikawdan no Kawas to kalimelaan ko sapakalalokaw to tao. Tinakoen, tiya misiˈayaw ko Yutaya tamdaw to saroero no Assiriya i, misaˈopoan ni Hicikiya ko ˈaˈideman no sofitay ato finawlan pakalalok cangranan, telocto “pakayni tonini a sowal no hongti a mapaˈicel ko finawlan.”​—ˈOsien ko 2 Rayray 32:6-8.

9. Pakayni i pakalalok to tao, nai milifetan ni Yopu mananam ita ko maanan hani?

⁹ O roma tinakoan ci Yopu, misaaliay cingra to sapakalalok, kawra oya tatoloay a widang ningra patongalay to cariraw ningra. Pasowalan ni Yopu cangra sasamaan a mihinom to tamdaw, ano cingra ko mihinomay, o sapakalalok ato sahinom ko hasowal, milowan to roray nangra. (Yopu 16:1-5) Ikorto, mikitiniay ci Yopu ci Ilihuan aci Yihofaan milifok to sapakalalok.​—Yopu 33:24, 25; 36:1, 11; 42:7, 10.

10, 11. (1) O wawa ni Yifta hano misaaliay to sapakalalok hani? (2) Anini o cima ko misaaliay to sapakahemek hani?

¹⁰ Nengnengen haca ita ko cecay tinakoan, o fafahiyan wawa no kakitaan ci Yifta, o misaaliay to sapakalalok cingra. ˈAyaw no mamilood ci Yifta to Amon a tamdaw i, miketonay to sowal ci Yihofaan, ano padamaen ni Yihofa cingra milowid to Amon tamdaw, wa patafangen ningra ko sakacecay militemohay cingranan a tamdaw, pakadademaken cingra i fangcalay sefi a dademak ci Yihofaan. Ikor, malowiday no Israil ko Amon a tamdaw, ˈarawhan, o mahadakay militemoh ci Yiftaan i, oya edeng a fafahiyan wawa ningra, tada adadaay ko falocoˈ ni Yifta. Kawraan, kamayan cingra midofdof to miketonan a sowal, patayra to wawa i fangcalay sefi i Silo, hakelong no ˈorip itira a dademak ci Yihofaan.—Kakitaan 11:30-35.

¹¹ Itini toniya demak, tada masomaday ci Yifta, kawrira mikikakaay ko pasangar no fafahiyan wawa ningra a micada. Ikorto, kamayan makahi cingra a mitoor to saˈosi no wama a midemak. (Kakitaan 11:36, 37) Sawad hananay no wawa ni Yifta ko saka ciraramodaw ato saka ciwawaaw, awaayto ko pakayraan miterek to ngangan ato hafay no lalomaˈan. Mahapinangay, tada misaaliay to sapakalalok ato sahinom ko wawa ni Yifta. Sowal no Fangcalay Cudad: “Nanitiya a ira ko matiniay a pinangan no Israil: To mihecahecaan i, miliyas ko fafahiyan no Israil to lomaˈ to sepat a romiˈad, tayra cangra” a pakahemek to fafahiyan wawa no Kiliyat tamdaw ci Yifta. (Kakitaan 11:39, 40) Anini, ˈalomanay ko cowa ka ciraramod a Krisciyang misaka dademakan ko toki no niyah “matayal to saki Tapang,” citatodongay cangra micada to sapakahemek ato sapakalalok.​—1 Korinto 7:32-35.

12, 13. Samaanay ci Pitiro pakalalok to salikaka hani?

¹² ˈAyaw no kinafalah ci Yis to ˈorip a dadaya, pasowalay ci Pitiroan: “Simonaw, Simonaw, haratengen, mahayda ci Satan a milifet i tamowanan. Samatiyaen nira o pifitay to emi ko pilifet nira i tamowanan. Nikawrira, mitolon kako to saki tisowanan to sakacaaw ka lasawad no pitiˈer iso to Kawas. Saka, ano pasasiyorto ko falocoˈ iso i, o papaˈicelen iso ko falocoˈ no salikaka iso,” han ni Yis.​—Luka 22:31, 32.

¹³ O hecek no kasakopang no salakatay Krisciyang ci Pitiro. (Kalatiya 2:9) Mikitini saka 33 miheca Kocinsic misatapang, o taˈarawan to nika timolo ni Pitiro a mitosil pakalalokay to romaroma a Krisciyang. Pi:nato a miheca mihodop ci Pitiro to Kawas patikamiay to salikaka, somowalay cingra to lalangian a patikami,  sanay: “Mipadang i takowanan ci Silas o soˈlinay a salikaka a mitilid tonini a kamokoˈay a sapatilid ako i tamowanan. O pipaˈicel ato pipawacay ako i tamowanan konini to nika o soˈlinay ko siniˈada no Kawas. Saka, pakifalocoˈen konini.” (1 Pitiro 5:12) Itini pipatemer no fangcalay saocor a mitilidan ni Pitiro a tikami pakalalokay to cowa ka hecad lintad a Krisciyang. Anini, o sowal ni Pitiro kamayan pakalalok kitaanan padotoc a mitala to kaira no faelohay hekal.​—2 Pitiro 3:13.

14, 15. O maˈoningay ato tikami no tarokos ci Yohani, samaanay pakalalok to iˈayaway ato aniniay a Krisciyang hani?

¹⁴ O tarokos ci Yohani i, o hecek no kasakopang no salakatay Krisciyang. Itini ratoh cudad, matiliday ningra ko mitosilay a demak ni Yis, kasemeran kora maˈoningay, itiyaho tahanini a Krisciyang milifokay to sapakalalok. Tinakoen, edengan ci Yohani ko somowalay, misaaliay ci Yis to nisawawaan paihekal to masasiolaolahay falocoˈ.​—ˈOsien ko Yohani 13:34, 35.

¹⁵ O mitilidan ni Yohani a tolo tikami adihayay ko kalimelaan a kimad. Tinakoen, ano mararaw kita a matoled ko falocoˈ, wa ngaˈay mikitini 1 Yohani 1:7 a sinael milifok to sapakalalok, somowalay ko sinael. O remes ni Yis “mikoracay titaanan a mipalasawad to polong no raraw ita.” Ano tatiih ko falocoˈ no niyah i, maˈosi ko 1 Yohani 3:20 a sinael: “Ikakaay no falocoˈ ita ko Kawas a mafanaˈ to maamaan” sa i, coko taˈangayay ko piakoˈid ita ci Yihofaan han? O roma, edengan ci Yohani ko somowalay, “o kasadakan no olah ko Kawas,” sanay. (1 Yohani 4:8, 16) O mitilidan ni Yohani saka tosa ato saka tolo a tikami, pakahemekan ningra koya padotocay ‘midoedo to soˈlinay kimad dademak’ a Krisciyang.​—2 Yohani 4; 3 Yohani 3, 4.

16, 17. Samaanay ci Pawlo pakalalok to saka cecay hahekalan a Krisciyang hani?

¹⁶ Pakayni i pakalalok to salikaka a demak, patirengay ko tarokos ci Pawlo to ngaˈayay a taˈarawan. Tiya tomireng saho ko Kristokiyo i, ˈalomanay a tarokos itiniay i Yirusalim, o kasacefang  no mikayatay a malohemay malitengay itiraay a dademak. (Dmak 8:14; 15:2) O Yutayaay a Krisciyang pasayraay i mihakelongay to Yutayakiyo a tamdaw milasil ci Kristoan, pakasoˈlinay cangra to edengan cecayay ko Kawas. Ci Pawlo sa i, miocoran no fangcalay saocor cingra, pasayra toya midokoay to adihayay kawas a Krisiya tamdaw, ato Loma tamdaw ato ˈalafang a tamdaw mitosil.​—Kalatiya 2:7-9; 1 Timoti 2:7.

¹⁷ Itiya, tayraay ci Pawlo i roma pala a mitosil, maedeng itiniay to aniniay a Tureky, Krisiya ato Itali. Itira tora noˈalafang tamdaw a kilac patireng to kasakopang. Oniya faelohay a Krisciyang ‘mapasemsemay no finacadan no niyah’, tada misaaliay to sapakalalok cangra. (1 Tisalonika 2:14) Maedeng isaka 50 miheca, patikamiay ci Pawlo to faelohay kasakopang no Tisalonika, sanay ko sowal: “Yo mitolon kami, maharateng niyam kamo. Mararid kami a mikansiya i Kawas to saki tamowanan a mapolong. Nawhani maharateng niyam i kaˈayaw no Wama a Kawas ita ko pipatalahekal namo i demak to pitiˈer namo i Kawas ato nika roray namo a matayal to nano olah namo ato nika tanektek no pipasoˈlin namo to tapang ci Yis Kristoan.” (1 Tisalonika 1:2, 3) Palimoˈotan ni Pawlo cangra maloka pakalalolalok, saan ko sowal: “Haenento o demak namo anini ko nika sasipaˈicel namo a masasipadama.”​—1 Tisalonika 5:11.

18. Isaka cecay hahekalan, o kasacefang no mikayatay a malohemay malitengay samaanay pakalalok ci Filipan hani?

¹⁸ Isaka cecay hahekalan, mikeriday a faˈinayan salikaka ato romaroma Krisciyang, micadaay to sapakalalok no kasacefang no mikayatay a malohemay malitengay. Tinakoen, tiya milasil ci Filip to Samariya tamdaw ci Kristoan i, milifokay to sadama nangra. Ikor, miocoranho no kasacefang no mikayatay a malohemay malitengay ci Pitiro aci Yohani, tayra i Samariya tamdaw, patado to faelohay Krisciyang a mitolon, hato milifokay cangra to fangcalay saocor. (Dmak 8:5, 14-17) Ira ko sadama no kasacefang no mikayatay a malohemay malitengay, maedeng taˈangayay ko sapakalalok ci Filipan ato faelohay a salikaka!

19. Isaka cecayay hahekalan, maˈosi no Krisciyang ko tikami no kasacefang no mikayatay a malohemay malitengay, samaanay ko harateng nangra hani?

¹⁹ Ikor to, mamisaysay to cecay lacongis ko kasacefang no mikayatay a malohemay malitengay, wa mitoor to Rikec ni Mosi ko ˈalafang a Krisciyang, mahecad to Yutaya tamdaw a micada to kerit hokira? (Dmak 15:1, 2) Sakayat no fangcalay saocor ko kasacefang no mikayatay a malohemay malitengay, misalalangiay to Fangcalay Cudad a misaˈosi: Cowato ko mamicada ko Krisciyang to kerit. Mitilidan no salikaka koniya saˈosi i tikami, miocor to taypiyaw milasil to i cowacowaay a kasakopang. Telocto, “miasip cangra tonini i, mahinom ko falocoˈ nangra. Saka, salipahak sato cangra.”​—Dmak 15:27-32.

20. (1) Aniniay a Kasacefang no Mikayatay a Malohemay Malitengay samaanay pakalalok to i cowacowa pala a salikaka hani? (2) O dotoc a lalakaw wa pacaˈof to maanan a salicay hani?

²⁰ Anini, salikaka i Pitil, mikiriwiˈay misakafah i kilac ato itiniay i cowacowa pala a salikaka, micadaay to sapakalalok no Kasacefang no Mikayatay a Malohemay Malitengay i Congpo. Mahecaday kita to saka cecay hahekalan a Krisciyang, “miasip to sahinom a sowal, salipahak sato ko falocoˈ.” Isaka 2015 miheca, mitepang ko Kasacefang no Mikayatay Malohemay Malitengay to Patikol Tayni Tatihi ni Yihofa, oniya kihepicay cudad pakalalokay to ˈalomanay tamdaw. Kawraan, edeng o mikeriday a salikaka ko mamitodong ci Yihofaan a pakalalok to tao han? O dotoc a lalakaw wa pacaˈof toniya salicay.