1, 2. (1) ˈAlomanay tamdaw misaˈicelay a micangacang to pasalat, hano mafanaˈ kita? (2) Mihaen ko demak nangra, iraay ko maanan a teloc?

ANINI, maolahay ko tamdaw milengo to pakayniay malalenay, pasalatay, notekedan fadangalan a misaˈosi. Itini i paro no kakarayan, sapiliyasaw ko tamdaw to saroero, masamsam ato nika nikaw, micangacangay to pasalat a misadak to sowal ato pasalat a mipiliˈ, misaniyah ko pisaˈosi to demak. Ano nengnengen, maolahay ko tamdaw sano niyahan saan a dademak, anca sano niyhan saan a maˈorip.

² Nikawrira, to sapisaloaw to nisahalakan no tamdaw, cowa ko madoloay a demak. O roma tamdaw to sapicangacangaw to pasalat itini i mikowanay demak, tayniay i lalan romakat a micoli, o roma sapifarikowataw to kitakit, mifekad to lalood. ˈArawhan, cowa ka madangar ko nitalaan nangra a teloc, nawhani, pairaay to kadayayan a teloc, taha patapatayay ko roma tamdaw. Oniniya kihecod miwacayay to nao sowal ni Solomon, sowal sa cingra: “O roma a tamdaw i, cisakowan, o roma a tamdaw i, makowan nangra a mapasemsem.”–Patnakay 8:9.

3. Misamaan kita ngaˈ malifok ko soˈlinay a hemek ato sakasaloaw hani?

³ Misamaan ngaˈ, malifok ko soˈlinay hemek ato sakasaloaw  hani? Sanay ci Yakop pasowal: “Nikawrira, o tamdaw ano misongilaˈay a minengneng toya pasalatay malefotay a rikec, halo milaheci a mitoor i . . . o mamalemed to nika pisaka dademak.” (Yakop 1:25) Oya pafeliay to malefotay rikec a Yihofaan, mafanaˈay to maanan ko papahemek ato masalo ko tamdaw, mankora, pafelian Ningra ci Atam aci Ifa to kihecod, hongaˈ mahemek ko kaˈorip nangra—mahaopay ko soˈlinay a pasalat.

4. Itiyaho ci Atam aci Ifa malifokay ko masamaanay a pasalat? (Nengnengen ko satapangan coka.)

⁴ Maˈosiay ita itini salakat a tosa fedengan no Satapangan a cudad, oya malifokay a pasalat ni Atam aci Ifa, o misahalakaan no ˈalomanay tamdaw anini, samanen sapiliyasaw cangra to nikaw, kokiˈ ato saroero. Pasalatay ko kaˈorip na Atam aci Ifa, cowa ko cacalemcem to kakaenen, katayalan, adada ato patay. (Satapangan 1:27-29; 2:8, 9, 15) Paihekalay koni to awaay ko tolas no pasalat nangra han?

5. O maanan ko soˈlinay a pasalat hananay?

⁵ O ˈalomanay miharateng, ano ngangaˈay cangra midemak to maamaan a demak, caka piharateng to teloc, o soˈlinay a pasalat sanay cangra. Kawra, o maanan ko “pasalat” hananay hani? Nohekal Cudad a Citing (no Padaka) somowalay o pasalat hananay i, “iraay ko ˈicel a mipiliˈ ato midemak” sanay. Tora citing somowalay, ano kitinien i holic ko pinengneng, edeng ano awaay ko misakakinihay, awaay ko cowa ka tatodong saparikec ngaˈ, ngaˈay a malifok no tamdaw ko pasalat sanay. Mahapinangay itini, ira ko maˈimeray a tolas, ngaˈ malifok no tamdamdaw ko pasalat sanay. Kawra, cima ko cifadangalay to mamisaˈosi to malalenay citatodongay a saˈosi hani?

6. (1) Hano edengan ci Yihofa iraay ko malefotay a pasalat hani? (2) O tamdaw iraay ko masamaanay a pasalat hani? Tadtaden hena.

⁶ Haharatengen ita, edengan ci Yihofa ko iraay ko caka citolas a pasalat, samanen o malefotay ko ˈicel Ningra, o nisangaˈay to maamaan Tatapangan, o satakaraway i paro no kakarayan. (1 Timoti 1:17; Paˈarawan 4:11) Tano fangcalay tilid ci Tafiti a miˈolic, edengan ci Yihofa ko citatodongay to tadamaanay a ˈakawangay a saaroˈan sanay. (ˈOsien ko 1 Rayray 29:11, 12.) Palalinien to pasalat ni Yihofa, o coyoh ato iseraay a tamdaw citolasay ko pasalat nangra, edengan ci Yihofa iraay ko fadangalan misaˈosi to malalenay, matatodongay a saˈosi. Ta misangaˈ ci Yihofa ci Ataman aci Ifaan i, pafelian cangra to matiniay a saˈosi.

7. Soˈliˈlin iraay ko rikec no tireng no tamdaw, hano mahemekayho ko ˈorip no mita?

⁷ Ci Atam aci Ifa adihayay ko pasalat nangra, kawra iraay ko tolas, patinakoen, iraay ko rikec no tireng no tamdaw, ano sakaˈoripaw cangra i, pasaselaˈ, kakomaen ato mamafotiˈ cangra wangaˈ. Tona mihaen cangra malahedaway ko pasalat han? Cowa. Mafanaˈay ci Yihofa, soˈlin midemak cangra to hatiniay demak to romiˈamiˈad, o mamarenec ko ˈorip nangra. (ˈOlic 104:14, 15; Patnakay 3:12, 13) Haratengen hena, ano paselaˈ kiso to makoracay a fali i, coko satalifak saan ko tireng iso han? Ano komaen kiso to kaolahan a kakaenen i, coko mahemekay ko falocoˈ iso han? Anca ngaˈay ko fotiˈ to dadaya, lomowad kiso coko ciˈicelay nanay kiso han? Ci Atam aci Ifa maedeng mahaenay ko falocoˈ.

8. O maanan ko sapalimoˈot ni Yihofa ci Ataman aci Ifaan? O maanan ko araaw Ningra hani?

⁸ Palimoˈotan ni Yihofa ci Atam aci  Ifa malenak to wawa, mikowan to sera. (Satapangan 1:28) Oniniya sapalimoˈot miˈafasay to pasalat nangra han? Cowa! ˈArawhan ngaˈayay cangra palenak to tamdamdaw miledef toni sera—tatahadaˈoc a maˈorip i lakoing, nao araaw no Kawas koni. (Isaya 45:18) Anini, o tamdaw cowa ko caciraramod anca cowa ko caciwawa, caay pisafelit to araaw ni Yihofa. Pakayni to ˈalomanay tamdaw, ano ciraramodto anca ciwawato cangra, tatahasiˈayaw to pasangar, kawra mihaenayho ko pipiliˈ nangra. (1 Korinto 7:36-38) Misamaanay hani? Samanen ciraromd anca ciwawa ko tamdaw, lipahakay ato marenecay ko ˈorip. (ˈOlic 127:3) Soˈlinay haw i, ci Atam aci Ifa nao ngangaˈay midaˈoc rihaday ko raramod ato noka ˈorip no paro no lomaˈ.

9. O sapalimoˈot no Kawas i Satapangan 2:17, hano o masadafdafay ato matatodongay hani?

⁹ Pafelianho ni Yihofa ci Atam aci Ifa to roma a sapalimoˈot, halo pasowal cangranan ano misafelit cangra, wa ira ko maanan a teloc, sanay ko sowal no Kawas: “Deng o heci noya sakafanaˈ a mihapinang to ngaˈayay ato tatiihay a kilang i, aka ka komaen kiso, ano komaen kiso i, caay ka eca ka patay kiso toya romiˈad.” (Satapangan 2:17) Oniniya saˈosi cowa ka sadafdaf cowa ko kalimelan han? Oniya sapalimoˈot malahedaway ko pasalat na Atam aci Ifa han? Soˈlinay haw i, o mikakingkiway to Fangcalay Cudad a tamdaw, somowalay o matatodongay a saˈosi koni sanay. O cecay mikakingkiway pakayni toni sapalimoˈot i Satapangan 2:16, 17 sanay ko sowal: “Edengan o Kawas ngaˈayay mafanaˈ to maanan ko matatodongay maanan ko tatiihay. Sakaciepocaw ko tamdaw to ‘matatodongay’ a demak i, o mamitiˈer ato mihakelong Cingranan ngaˈ. Ano caka pihakelong ko tamdaw to Kawas i, wa sao niyah saan misaˈosi to maanan ko matatodongay maanan ko tatiihay.” Tada o karetengay a ˈinorong to tamdaw koni, samanen awaay ko sifanaˈ ato taneng no tamdaw misaˈosi to malefotay matatodongay a pisaˈosi.

10. Ano ira ko pasalat a mipiliˈ hano cowa ko aira ko fadangalan misaˈosi to palinian no ngaˈayay ato tatiihay hani?

¹⁰ Anini, halatek miharateng ko ˈalomanay tamdaw, oniya sapalimoˈot ni Yihofa, awaay ko pasalat ni Atam midemak to niharatengan no niyah. Saka mahaen ko harateng nangra, samanen cowa ka ˈaraw nangra, ira ko pasalat a mipiliˈ ato ira ko fadangalan misaˈosi to palinian no ngaˈayay ato tatiihay, o tosaay a demak kora. Iraay ko pasalat ni Atam aci Ifa mipiliˈ to cowa ko mamidofdof to Kawas, kawra edengan ci Yihofa ko cifadangalay misaˈosi to palinian no ngaˈayay ato tatiihay, oya “mihapinang to ngaˈayay ato tatiihay a kilang”, mitaypiyaway to fadangalan ni Yihofa. (Satapangan 2:9) Hahayien no mita, cowa ka paliˈayaw kita mafanaˈ to teloc no mipiliˈan ita, ato sahetoay o ngaˈayay kora teloc. Marariday maˈaraw ita, nao ngaˈayay ko harateng no tamdaw a misaˈosi alatek, ˈarawhan pairaay to roray ato kadayayan a teloc. (Taneng 14:12) Samanen citolasay ko tamdaw. O ciolahay ci Yihofa, pakaynian Ningra sapalimoˈot pasifanaˈ ci Atam aci Ifa, misamaan kalasaka dademak to iraay a pasalat nangra. Nikawrira, samaanay ko harateng ni Atam aci Ifa hani?

11, 12. O saˈosi ni Atam aci Ifa misamaanay hano kadayayan ko teloc? Tano tinakoen a mitadtad.

¹¹ Mipiliˈay ci Atam aci Ifa misafelit to Kawas. Haen hananay ni Satan misaˈfit ci Ifa: “Mafawahto ko mata namo, o mamatiya o  Kawas kamo, maedeng kamo a mihapinang to ngaˈayay ato tatiihay.” (Satapangan 3:5) Telocto, malipalaway ni Satan ci Ifa. Mihaen ci Atam aci Ifa malifokay ko pasalat han? Cowa. Awaay ko maamaan kangaˈayan nangra, ˈarawhan tona caka pidofdof to sapalimoˈot no Kawas kadayayan ko teloc. (Satapangan 3:16-19) Mananamay ita ko maanan hani? Tiya misangaˈ ci Yihofa to tamdaw i, cowa pafelien to ˈicel ko tamdaw misaˈosi to ngaˈayay ato tatiihay.​—ˈOsien ko Taneng 20:24; Yirimiya 10:23.

¹² Ngaˈayay tano tinakoen ita mitadtad: O miongtingay to hikoki doedoen ko misaˈosian a karomakatan no hikoki ngaˈ, dipayal a tangasa i katayraan. Kalasaka dademaken nangra ko sapikayat a kikay, halo mararid a mararinnak to mikeriday to hikoki i hikociyo. Kawra, ano caka pisikor to sakayat no mikeriday, sao niyahan sa maefer i, mamafekad ko taˈangayay a pades. Ci Atam aci Ifa mahaenay tora cowa pitengil a miongtingay to hikoki a tamdaw. Toor hananay nangra ko falocoˈ, cowa ka kahi a mitengil to sakayat no Kawas, teloc malahedawayto ko hano ikoran nangra, marefong i raraw ato patay ko niyah ato teloteloc nangra, mihaenay a malahedaw ko soˈlinay a pasalat no tamdamdaw. (Loma 5:12) Misahalaka ci Atam aci Ifa to pasalat misaˈosi to ngaˈayay ato tatiihay, ˈarawhan mihaenay a malahedaw ko soˈlinay a pasalat.

13, 14. Samaan kita milifok to soˈlinay a pasalat?

¹³ Miharateng ko ˈalomanay tamdaw, ano adihay ko pasalat adihay ko hemek sanay. Manaokaniw, ira ko pasalat pairaay to adihayay a epoc, kawra haratengen hena, ano awa ko tolas no pasalat no tamdaw, o masaka talawanto koni hekal. Nohekal Cudad a Citing (no Padaka) somowalay: “O patirengan a lekakawa no holic noni hekal masasifoday, patosokan nangra, sapikilimaw to karoyaroyan.” Tora cudad “masasifoday” sa kora sowal, tada matatodongay, samanen adihayay ko patirengan no tamdaw a holic ato saˈosi, teloc i, misaaliay to ˈalomanay a pingkosi ato hangkang a mitadtad ato midemak.

 ¹⁴ Somowalay ci Yis Kristo, ano sapilifokaw ko tamdaw to soˈlinay pasalat i, ihekalay ko hapakayraan. Sanay cingra: ‘Ano mararid kamo mitoor to sowal ako i, o soˈlinay a nisawawaan ako kamo. O mamafanaˈ kamo to soˈlinay a kimad, o papasalaten no soˈlinay kimad kamo.’ (Yohani 8:31, 32) Mitadtaday ci Yis, ano sapilifokaw to pasalat tosaay ko saali: Saka cecay i, micada to sapasifanaˈ ningra, saka tosa i, mala nisawawaan ningra, mihaen to demak mamalifok ko soˈlinay a pasalat. Hay, wa mamalifok ita ko masamaanay a pasalat hani? Padotocay ci Yis a pasowal: ‘O mararawayho a tamdaw, o koli no raraw . . . Ano pasalaten no wawa kamo i, o soˈlinayto a mapasalat kamo.’​—Yohani 8:34, 36.

15. Mikiˈokan ni Yis a pasalat hano o “soˈlinay a pasalat” hani?

¹⁵ O mikiˈokan ni Yis a pasalat, o sangaˈayay a pasalat, mikikakaay to micangacangan no ˈalomanay to saka pasalataw i mikowanay demak. Sowal ni Yis: ‘Ano pasalaten no wawa kamo i, o soˈlinayto a mapasalat kamo.’ Tatodong nora sowal ni Yis, cowato ko ‘mamala koli no raraw’, mamatedal nai sataˈangayay mipaekelay ato miroeroay a noka koli o sanay. Ano mafalod no raraw kita, o mamadolo a mararaw ko demak, nolatekay, miharatengay kita to saka tatodongaw ko demak, anoca iraay ko ˈicel a midemak, ˈarawhan tona mafiyoray no raraw, cowato ka pidemak kita. Mankora, mala koliay no raraw kita, pairaay to somad, roray ato patay ko teloc. (Loma 6:23) Ano ci Pawloto matinakoay ko roray to noka ciraraw. (ˈOsien ko Loma 7:21-25.) Edeng ano maliyas ita ko nika pifalod no raraw ngaˈ, ngaˈay a malifok ko salakatay a milifokan ni Atam aci Ifa a soˈlinay pasalat.

16. Sasamaan ko demak ita ngaˈ ira ko soˈlinay a pasalat?

¹⁶ Sowal ni Yis, ‘ano mararid kamo mitoor to sowal ako’ sa i, tatodong noni sowal, ano sapilifokaw ko tamdaw to pasalat, mitoor to patirengan ningra a saˈosi, o sanay. O patafangayto to tireng a Krisciyang kita, awaayto ko fadangalan a miˈimer to tireng no niyah, halo mamakahi a midofdof to sapalimoˈot ni Kristo a maˈorip wangaˈ. (Matay 16:24) Mikiˈokan ni Yis, ano mihaen to demak kita i, mamicada to pakaynian ni Yihofa i sapatefoc a soˈlinay pasalat.

17. (1) Ano sapisaloaw ko kaˈorip ita, misamaan to demak ngaˈ? (2) Ilaenoay lalakaw mamilengo to maanan?

¹⁷ Ano sapisaloaw ko kaˈorip ita i, mitengil a mihakelong to sifanaˈ ni Yis. Mihaen to demak kita, o ngangaˈayto a pakaliyas to raraw ato patay, milifok to soˈlinay pasalat. (ˈOsien ko Loma 8:1, 2, 20, 21.) Ilaenoay lalakaw mamilengo, misamaan kita misangaˈay a kalasaka dademak to pasalat, hongaˈ tahadaˈoc a paˈodingar toya pasalatay kitaanan a Kawas Yihofa.