1-2. Misamaanay tada masomad ci Yis hani?

ITINI ˈayaw no kinafalah ci Yis to ˈorip, tada masomaday ko falocoˈ. Mafanaˈay cingra wa pasemsemen ato patayen no mariˈangay tamdaw cingra. Kawra cowa konini aca, tangongolay ko olah ni Yis to Wama, sapahemekaw to Wama, mafanaˈay cingra ano itini sapalifet padotoc madimadi i, wa paˈading to ngangan ni Yihofa. Tangongolay ko olah ni Yis to tamdaw, ano tahira i patay a madimadi cingra i, wa ira ko tokel no tamdaw tahadaˈoc maˈorip.

² Soˈlin taˈangayay ko macadaay ni Yis a saroero, kamayanho rihaday ko falocoˈ. Pasowalanho ni Yis ko tarokos, wa pafelien ningra to rihaday cangranan. (Yohani 14:27) Ngaˈayay ko kalalaˈed ni Yis aci Yihofa, mansa milifok to sapafeli no Kawas a rihaday, o hatiniay a rihaday padamaay ci Yisan rihaday ko harateng ato falocoˈ.​—Filipi 4:6, 7. 

3. Oniya lalakaw wa milengo to maanan?

³ Soˈlin cowa ka hecad kita ci Yisan miemem to taˈangayay saroero, kawra o Krisciyang kita, wa tahalifa to sapalifet. (2 Timoti 3:12; Yohani 15:20) Latekay, mahecaday kita ci Yisan a masomad. Samaan ko demak ita ngaˈ caka tapiˈ no cariraw a malahdaw ko rihaday no falocoˈ hani? Dotoc milengo kita to midemakan ni Yis tolo a demak i pitosilan, ano misiˈayaw to sapalifet sasamaan kita mitodong cingranan.

4. Mikitini saka 1 Tisalonika 5:17, patinakoen hena, iˈayaw no kinafalah ci Yis to ˈorip i, samanay cingra padadotoc a mitolon to Kawas.

⁴ ˈOsien ko 1 Tisalonika 5:17. ˈAyaw no kinafalah ci Yis to ˈorip padadotocay mitolon to Kawas. Tinakoen, patireng ci Yis to Lafi no Tapang, ˈayaw no komaen to epang ato epah i mitolonay cingra. (1 Korinto 11:23-25) Maharek ci Yis ato tarokos komaen to lafi no Pitaˈlifan a Lisin, ˈayaw no miliyas malacafayay a mitolon. (Yohani 17:1-26) Toya dadaya, malacafay ci Yis to nisawawaan tayra i Olif a Lotok, kinapinaay a mitolon. (Matay 26:36-39, 42, 44) ˈAyaw no malafot ko selaˈ ni Yis i, mitolonayho to Kawas. (Luka 23:46) ˈAyaw no kinafalah ci Yis to ˈorip, kihcod mifekaday demak toya romiˈad i, pakaynian i satolon pasowalan ci Yihofa.

5. Hano malahdaw ko timolo no tarokos hani?

⁵ Padadotocay ci Yis mitolon, mitiˈer ci Yihofaan, mansa ngaˈay miemem to sapalifet. O tarokos saan cowa ka padadotoc a mitolon, ira sato ko sapalifet, awaayto ko timolo a misiˈayaw. (Matay 26:40, 41, 43, 45, 56) Haenen ita ci Yisan ‘padadotoc a mitolon’ ngaˈ, madimadi i sapalifet. O manan ko cacangacangen ita hani?

6. Ano ira ko pasoˈlinay falocoˈ ita i, hano ngaˈayto rihadayay ko harateng ato falocoˈ hani?

⁶ Ngaˈayay cangacangen ita ci Yihofa ‘paˈicel to pasoˈlinay falocoˈ ita.’ (Luka 17:5; Yohani 14:1) Misaaliay kita to pasoˈlinay falocoˈ, samanen miˈodisay ci Satan to mikotoday ci Kristoan a tamdaw. (Luka 22:31) Ano misiˈayaw kita to madadotocay a pasangaray i, wa samaan padama ko pasoˈlinay falocoˈ kitanan padadotoc a rihaday hani? Ano ira ko pasoˈlinay falocoˈ ita  i, ikor no misaˈicel miremo to pasangaray, wa patorod hanto ko demak ci Yihofaan, samanen pasoˈlinay kita Cingranan wa tano sangaˈayay pakayraan misaysay to pasangaray. Mihaen ngaˈayto rihaday ko harateng ato falocoˈ no mita.​—1 Pitiro 5:6, 7.

7. Mikitini i nalifetan ni Lopote, mananamay iso ko maanan?

⁷ Mitolon kita to Kawas, itini masakenaay a pasangaray wa ngaˈay padotoc a rihaday ko falocoˈ. Nengnengen ko tinakoan ni Lopote, 80 ko mihecaan ningra, o madimadiay a malohemay malitengay. Sanay cingra: “Mikitini sapatalipaˈelal no Filipi 4:6, 7, maremoay ako ko adihayay pasangaray i nokaˈorip. Tinakoen, awaay ko payci ako, na malahdaway ko ˈinorong malo malohemay malitengay.” Hano ngaˈay ci Lopote padadotoc a rihaday ko falocoˈ hani? Sanay cingra: “Ano cariraw kako tangsolay mitolon, pasoˈlinay kako ano padotoc mitolon ngaˈayayto a rihaday ko falocoˈ.”

8. Mikitini Yohani 8:29, hano ngaˈay padotoc ci Yis rihaday ko falocoˈ hani?

⁸ ˈOsien ko Yohani 8:29. Tahalifa ci Yis to sapalak kamayan padotoc rihaday ko falocoˈ, samanen mafanaˈay cingra ano madimadi i, o papakahemek to Wama. Soˈlin pasangar ko pakayraan, kamayan midofdof ci Yis ci Yihofaan. Maolahay cingra to Wama, misaareteng to mihodopay ci Yihofaan i nokaˈorip. ˈAyaw no tayni i sera ci Yis, ‘o ngaˈayay sayho’ i tihi no Kawas. Taynito i sera cingra, fanekfekay pasifanaˈ to tamdaw mafanaˈ to Wama. (Taneng  8:30; Matay 6:9; Yohani 5:17) Midofdof to araaw ni Yihofa palipahakay ci Yisan.​—Yohani 4:34-36.

9. Misamaanay misarocod a mitosil wa parihaday to falocoˈ hani?

⁹ Todongen ita ci Yis midofdof ci Yihofaan, ‘kararid misaˈicel to tayal no Kawas.’ (1 Korinto 15:58) ‘Misarocod patenak to fangcalay kimad,’ mihaen cato pisamacay to pasangaray no niyah. (Dmak 18:5) Tocerid ikakaay ko pasangaray no mitosilan a tamdaw, kawra ano misatapang cangra maolah ci Yihofaan ato mitoor to sowal Ningra a midemak, wa matongalay ko lipahak, taˈangayay ko kangaˈay no kaˈorip. Maˈaraw ita ko kafalic nangra, matongalay ko pasoˈlin to papadamaen ni Yihofa kita, o hatiniay pasoˈlin padamaay kitanan padotoc a rihaday ko falocoˈ. O cecay salikaka halafinay awaay ko kapo no niyah sanay miharateng, miremoayho to matoleday falocoˈ, sanay cingra: “Ano fanekfek kako mitosil, rihadayayto ko falocoˈ, matongalay ko lipahak. Edengan mitosil o ngaˈayay a piingid ako ci Yihofaan.”

10. Mikitini i nalifetan ni Poranta, mananamay iso ko maanan hani?

¹⁰ O cecay salikaka ci Poranta, cingra ato fafahiyan wawa ciadadaay to koicaway ko tireng. Tano cikalilengay kamaroˈan ko saka dademak ningra, tada malonayay ko tireng. Latekay paka lomalomaˈay cingra mitosil, sakakaay i tano patikamiyay a misawacay. Sanay ci Poranta: “Mafanaˈay kako ˈayaw no ira ko Lakoing cowa ko tatanoktok ko tireng ako, mihai tonini padamaay takowanan misamacay to mitosilay demak. Soˈliˈlin, o maharatengay ako sahtoay o sapadamaaw to i kilacay a tamdaw, cowa ko cariraw no niyah. Mitosilay demak padamaay takowanan mararid miharateng to hatokel no ikor.”

11-13. (1) O tarokos ato roma tamdaw samanay padama ci Yisan hani? (2) Samanay ko harateng ni Yis to sadama no widang cingranan hani?

¹¹ Mitosil ci Yis adihayay ko malifaay a sapalifet, kawra iraay ko madimadiay a tarokos i tihi ningra, mahecaday o masowalay i Taneng 18:24, ‘O roma widang ikakaay ko ngaˈay to malikakaay.’ Misalimlaay ci Yis to hatiniay widang. Misamanay hani? Itiniho ci Yis i sera, cowa pihakelong ko safa ningra. (Yohani 7:3-5) O masingkiay ci Yis sanay ko salawina ningra. (Marko 3:21) Cowa ka hecad ko madimadiay tarokos toya cowa pasoˈlin a salawina, mansa itini ˈayaw no kinafalah ci Yis to ˈorip a dadaya, sanay pasowal to tarokos: ‘Tahalifa kako to sapalifet i, cowa piliyas kamo takowanan.’​—Luka 22:28.

¹² Soˈlin latekay patoleday ko tarokos ci Yisan, kawra misinanotan ni Yis ko pakasoˈlinay falocoˈ nangra, cowa ko raraw nangra. (Matay 26:40; Marko 10:13, 14; Yohani 6:66-69) Itini ˈayaw no papatayen ci Yis a dadaya pasowalay to madimadiay a tarokos: ‘Kala widangento ako kamo, nawhani o matengilay ako nai Wamaan mapakafanaˈto ako kamo maemin.’ (Yohani 15:15) Oniya widang ni Yis taˈangayay ko sapakalalok cingranan. Midamaay cangra ci Yisan i pitosilan, palipahak cingranan.​—Luka 10:17, 21.

¹³ Cowa ko tarokos aca, iraayho ko roma widang ni Yis, itini mitosilay tayal ato roma demak padama ci Yisan. Tinakoen, o roma tamdaw mitooray ci Yisan mitosil, hanaca tano dafong a midama cingranan. (Luka 10:38-42; Yohani 12:1, 2) O roma tamdaw mitahidangay ci Yisan tayra i lomaˈ komaen. (Luka 8:3) Ira ko adihayay widang ni Yis samanen misangaˈayay  cingra to tamdaw. Padama ci Yis to widang, cowa ka ˈakawang ko saali cangranan. Soˈlin cowa ko malefotay ko widang ni Yis, makahiayho a micada to sadama no widang, halo miakoˈid cangranan, o hatiniay widang maedeng parihadayay to falocoˈ ningra.

14-15. (1) Misamaan kita ngaˈ ira ko ngaˈayay a widang hani? (2) O ngaˈayay a widang sasamaan padama kitanan hani?

¹⁴ Ngaˈayay widang wa padama kitanan madimadi ci Yihofaan. Ano sapicawmaˈaw kita to ngaˈayay widang, salakatho kita misangaˈay to tao. (Matay 7:12) Pakalalokay ko Fangcalay Cudad kitanan padama to tao, mangalef ko ‘manikaway a tamdaw.’ (Ifiso 4:28) Saharateratengen, o cima ko papadamaen iso i kasakopang. Iraay ko cowa ka ngaˈay masadak a tamdaw, misaaliay to papadamaen miˈaca to dafong hokira? Iraay ko salikaka awaay ko sakaˈorip a payci, wa ngaˈay tahidangen cangra a komaen hokira? Ano mafanaˈay kiso misaka dademak to wangcan no jw.org^® anca JW Library^® (app) mikilim to lalakaw, wa ngaˈay pasifanaˈen ko roma salikaka han? Ano fanekfek kita padama to tao, wa lipahak ko niyah.​—Dmak 20:35.

¹⁵ Ano tahasiˈayaw kita to sapalifet i, wa midama ko widang padama kitanan rihaday ko falocoˈ. Mahecad ci Ilihuan misongilaˈay cingra mitengil to pilomal ni Yopu to pasangaray no niyah, anini o widang ita wa mahecad ci Ilihuan mihadidi mitengil to nafalocoˈan ita. (Yopu 32:4) Manaokaniw, cowa ko mamisaali kita to widang patado a misaˈosi, kawra wa cadaen ita ko nai Fangcalay Cudad sapaini no widang. (Taneng  15:22) Mahecad to Hongti ci Tafitian misapoener ko falocoˈ micada to sadama no widang, pahecaden ita cingranan, misapoener ko falocoˈ a micada to sadama no widang. (2 Samuil 17:27-29) O soˈlinay widang tada o sapatelong ni Yihofa!—Yakop 1:17.

16. Ya sowal i Filipi 4:6, 7, samaan kita ngaˈ malifok ko rihadayay a falocoˈ hani? Tadtaden hena.

¹⁶ ˈOsien ko Filipi 4:6, 7. Hano somowal ko Fangcalay Cudad, ‘pakayni ci Yis Kristoan’ ngaˈ milifok kita to rihaday hani? O cacipinang kita to saaroˈan ni Yis halo pakasoˈlin cingranan, mihaen ngaˈ rihaday ko harateng ato falocoˈ ita. Tinakoen, pakayni sapatefoc ni Yis, masododay no Kawas ko raraw ita. (1 Yohani 2:12) Pakayni kitanan o taˈangayay sahinom konini! Roma i, o hongti no Hongti Kitakit no Kawas ci Yis, papalahdawen ningra ko pifiyor ni Satan ato ciraraway a hekal. (Isaya 65:17; 1 Yohani 3:8; Paˈarawan 21:3, 4) Tada makapahay a hatokel konini! Soˈlin patorod ci Yis kitanan to pasangaray ˈinorong, kawra o mamikapot cingra kitanan, hanaca midama kitanan tahira ka hererekan noniya lekakawa. (Matay 28:19, 20) Oniya sakiˈok pafeliay kitanan to taˈangayay a timolo! Sahinom, tokel, ato timolo mahecad o tanoktokay a kora, paˈicel to falocoˈ ita, padama kitanan rihaday ko falocoˈ.

17. (1) Samaan ko demak ita ngaˈ padotoc a rihaday ko falocoˈ hani? (2) Mikitini Yohani 16:33, wa pakalowid kita to maanan?

¹⁷ Itini pakidemay sapalifet, samaan kita ngaˈ padotoc a rihaday ko falocoˈ hani? Nanamen ita ko taˈarawan ni Yis: Saka 1, padotoc a mitolon. Saka 2, dofdofen ci Yihofa fanekfek a mitosil, soˈlin pasangar ko pakayraan kamayanayho mihaen to demak. Saka 3, milongoc to sadama no widang. Mihaen, o sapafeli no Kawas a rihaday wa misimaw to harateng ato falocoˈ no mita, wa mahecad kita ci Yisan pakalowid to kihcod a sapalifet.​—ˈOsien ko Yohani 16:33.