1-2. (1) Ci Satan tano maanan a pakayraan milipalaw to tamdaw hani? (2) Oniya lalakaw wa milengo to maanan?

MIKITINI lintad ni Atam aci Ifa tahanini, ‘o wama no misamangahay’ ci Satan padotocay milipalaw to tamdaw. (Yohani 8:44) O mangah ningra mahawpay ko milingatay to patay a mararaway kimad. O kafanaˈan no ˈalomanay tamdaw a nanaman ato paysin mikitiniay a masadak. Telocto, o salikaka ita ano mapatay ko paro no lomaˈ ato salawina i, pakayni sapiˈadingaw to pihakelongan wa ‘misaˈicel a milood.’​—Yuta 3.

² Ano tahasiˈayaw kiso to hatiniay sapalifet, o manan ko papadama tisowanan tanektek a midopo to soˈlinay kimad hani? (Ifiso 6:11) Ano tahacada ko salikaka to saroero mirienang to kapiliˈan no Kawas a nanaman i, wa samaan kita a misayar, paˈicel to pakasoˈlinay falocoˈ nangra hani? Oniya lalakaw wa milengo to mikitiniay ci Yihofaan a sapatalipaˈelal. Salakat, nengnengen ita samanay ko Fangcalay Cudad mitadtad to pakayraan no mapatayay.

3. O sakacecay a mangah ni Satan, mikayatay to maanan a teloc hani?

³ Misangaˈ ko Kawas to tamdaw i, cowa ko mamapatay ko tamdaw. Kawra, saka tahadaˈocaw maˈorip ci Atam aci Ifa, oha mamidofdof to sapafeli ni Yihofa cangranan a limoˈot, sanay ci Yihofa: ‘O heci no mihapinang to ngaˈayay ato tatiihay a kilang, cowa ka ngaˈay kaenen, samanen ano kaenen iso, toya romiˈad wa mapatay kiso.’ (Satapangan 2:16, 17) Kawra pakaynian ni Satan i cecay ˈoner pasowal ci Ifa: ‘Cowa ko mamapatay kamo.’ Ka adayayan i, pasoˈlinay ci Ifa toniya mangah, komaen to losay, komaenay ko faˈinay ningra. (Satapangan 3: 4, 6) O misaˈosian nangra mikayatay to sakaciraraw no polong a tamdaw, saikor mapatayay.​—Loma 5:12.

4-5. Samaanayho ci Satan milipalaw to tamdaw hani?

⁴ O teloc ni Atam aci Ifa malecaday o nano sowal no Kawas, saikor mapatayay, padotocayho ci Satan misakaniw, misangaˈayho cingra to roma mangah: Ano mapatay ko tamdaw, o tireng aca ko mapatayay, lalomaˈ no tireng iraayho ko maˈoripay a saloˈafang sanay. O hatiniay a mangah malipalaway ko ˈalomanay a tamdaw.—1 Timoti 4:1.

⁵ Hano ˈaloman ko malipalaway a tamdaw hani? Misangaˈ ko Kawas to tamdaw i, pairaan ko kalim no tamdaw tahadaˈoc a maˈorip sanay a harateng. (Patnakay 3:11) Mafanaˈay ci Satan to awaay ko sakapatayaw a tamdaw, samanen o ˈada no tamdaw ko patay, mansa saka dademaken ningra konini a misangaˈ to adihayay a mangah.​—1 Korinto 15:26.

6-7. (1) Mihimedan ni Satan ko pakayraan no mapatayay han? Tadtaden. (2) O Fangcalay Cudad samaanay padama kitaanan eca ka matalaw to mapatayay hani?

⁶ Soˈlin padotoc ci Satan misakaniw, kawra o pakayraan no mapatayay cowa ka mahimed. Anini ˈalomanayto ko mafanaˈay to samanay ko mapatayay, mitooray cangra to Fangcalay Cudad pasowal to tamdaw to pakayraan no mapatayay ato hatokel no mapatayay. (Patnakay 9:5, 10; Dmak 24:15) O soˈlinay kimad ngaˈayay mihinom to tamdaw, ecato pakidem ko kaciˈangi a calemcem to patay. Cowato ka talaw kita to mapatayay, cowa ko papatado to mapatayay a calemcem. Mafanaˈay kita cowa ka talacowa ko mapatayay, cowa ko mamidokaˈ to tamdaw. O mapatayay malecaday o maeholay a tamdaw. (Yohani 11:11-14) Mafanaˈayho kita cowa ka fanaˈ ko mapatayay to mataˈlifay a toki. Ano ikor, patikolay maˈorip a tamdaw hato pacalinaˈay ko toki, ano oya to halafinay mapatay a tamdaw malecaday ko harateng.

⁷ Mioratay to tamdaw ko mangah ni Satan, palinien to mangah ningra, coko ihkalay ko pitadtad no Fangcalay Cudad to pakayraan no mapatayay han? O mangah ni Satan cowa ko piorat aca to tamdaw, paorafayho to misangaˈay a Tatapangan. Sapitongalaw cipinang to pairaan ni Satan a tatiihay, wa milengo kita to—O mangah ni Satan samanay paoraf ci Yihofaan? O mangah ningra samanay papiharateng to tamdaw to cowa pisaali ko niyah to sapatefoc ni Yis? O mangah ningra samanay mitongal to somad, ato pisemsem no tamdaw?

8. O mangah ni Satan hano paorafay ci Yihofaan hani? (Yirimiya 19:5)

⁸ O mangah ni Satan paorafay ci Yihofaan. O mangah ni Satan wa misemsem i malenglengay a namal ko mapatayay sanay, o hatiniay kimad tada pakangodoay to Kawas! Misamanay hani? Samanen o malecaday ko sidaˈitay a Kawas ci Akomaan a maˈedes mariˈangay sanay. (1 Yohani 4:8) Cipinang tonini, samanay ko harateng iso? Samanay ko harateng ni Yihofa hani? Sowal no Fangcalay Cudad, ˈitehay ci Yihofa to masakenaay a maˈedesay a demak.​—ˈOsien ko Yirimiya 19:5.

9. O mangah ni Satan hano palahdaway to epoc no sapatefoc hani?

⁹ O mangah ni Satan cowa pisaali ko tamdaw to sapatefoc ni Yis. (Matay 20:28) O roma a mangah ningra, o mapatayay a tamdaw materekayho ko saloˈafang sanay. Ano tatahadaˈoc ko tamdaw maˈorip, cowato ko kalimlaan ko sapatefoc ni Kristo paira to tahadaˈocay ˈorip no tamdaw. Nikawrira, pakaynian no Kawas i sapatefoc ni Kristo paihkal to kasapaan a olah kitanan. (ˈOsien ko Yohani 3:16; 15:13.) O mangah ni Satan palahdaway to epoc no sapatefoc, wa samaan ko piharateng ni Yihofa aci Yis hani?

10. O mangah ni Satan samaanay patongal to somad ato semsem no tamdaw hani?

¹⁰ O mangah ni Satan mitongalay to somad, ato pisemsem no tamdaw. Tinakoen, ira ko pasowalay to mapatayay ko wawa a wama wina, miˈorongan no Kawas ko wawa nangra, malo kaemingay coyoh i kakarayan. Oniya mangah ni Satan milowanay anca mitongalay to somad no wama wina hokira? Roma i, misakadademakan no tamdaw ko cinamalay cikok, sanay a mararaway kimad a misayfang to tamdaw, tinakoen mifalodan ko misafelitay to kiyokay a tamdaw i hecek a mitodoh. Cecay no Sipanya pisayfangan to roma ko pihakelongan a cudad milengoay, o harateng no mirienangay to hatiniay pisayfang a tamdaw, o “sapatanam aca to samanay ko cinamalay cikok” toya maliyangay tamdaw, mihaen ˈayaw no mapatay cingra pasasiyor, ho ecato ka tayra i cikok misemsem sanay. Anini, adihayay kitakit, mitaˈongay ko tamdaw tono litengan a mapatayay, mikangodo cangranan ho milifok to sapalemed nangra. O roma finacadan ciharatengay mihinom to mapatayay, ho eca ka sayfang nangra. Ka adayayan i, oniya mikitiniay i mangah ni Satan a pihakelongan, cowa ka soˈlin mihinom to tamdaw, matongalay ko calemcem ato kaciˈangi no tamdaw.

11. O salawina ita alatek tano samanay a pakayraan a miowing kitanan misafelit to palinian no Kawas hani?

¹¹ O salawina ano miowing kitanan mirienang to misafelitay to Fangcalay Cudad a pisiki to mapatayay ato nanaman, ano maolahay kita to Kawas ato Kimad Ningra wa misetek to falocoˈ a midofdof ci Yihofaan. Latekay, ano eca pirienang kita, o cowa ka olah ato cowa ka ngodo to mapatayay sanay, mihaen ko demak no salawina o papakangodo kitanan. Mihaenho ko sowal, ano caka pirienang kita to nanaman wa palafo to roma tamdaw madokaˈ no mapatayay. Misiˈayaw to hatiniay pakayraan, sasamaan kita midopo to Fangcalay Cudad hani? Nengnengen ita sasamaan misakadademak to safalod no Fangcalay Cudad.

12. O manan milingatay to mapatayay a nanaman, cowa ko mikitiniay i Fangcalay Cudad hani?

¹² Seteken ko falocoˈ “miliyas” to misafelitay to Fangcalay Cudad a pihakelongan ato nanaman. (2 Korinto 6:17) Itini taliyok no Kalepi Riyar a kitakit, ˈalomanay tamdaw pakasoˈlinay, mapatay ko tamdaw itiniay taliyok mirarakat, hanaca wa miˈodis to mariˈangay  cingranan a tamdaw. O cecay lalakaw sanay, “o saloˈafang no mapatayay wa midokaˈ to niyaroˈay a tamdaw.” Itini roma pala no Aforika, mitahpoan ko dadingoan i lomaˈ no mapatayay, pasayraan i cafeng ko sasing no mapatayay a miliyoc, hamaan paˈarawen koya mapatayay to niyah sanay. O sikawdan no Kawas cowa ko mamapaysin anca mirienang to miowingay to mangah ni Satan a nanaman!​—1 Korinto 10:21, 22.

13. Ano caka cipinang kiso to cecay nanaman o misafelitay to palinian no Fangcalay Cudad, sasamanen iso midemak hani?

¹³ Ano caka cipinang kiso to cecay demak anca nanaman o misafelitay to palinian no Fangcalay Cudad hokira, tolonen ci Yihofa, pakasoˈlin micangacang Cingranan pafeli to taneng tisowanan. (ˈOsien ko Yakop 1:5.) Dotoc, mikitini cudad no Fangcalay Cudad mikilim to milingatay a lalakaw, ano misaaliay kiso to roma sadama, tahidangen ko malohemay malitengay padama tisowanan. Soˈlin cowa ko papasowal cangra tisowanan to sasamaan ko demak, kawra wa ngaˈay cangra pasowal to milingatay a safalod no Fangcalay Cudad, tinakoen o malengoay noniya lalakaw. Mihaen ko demak iso, o pahatatanamay to ‘sapihapinang a inaneng,’ o hatiniay a inaneng wa padama tisowanan ‘pafafidaˈ to ngaˈayay tatiihay.’—Hipray 5:14.

14. Samaan ko hademak ita, ho caka pakapolin to tao hani?

¹⁴ Kao sapaˈdil to Kawas ko pidemak to kihcod, aka malo sakasetol no tao a fakeloh. (1 Korinto 10:31, 32) ˈAyaw no misaˈosi to mamirienang to cecay nanaman anca nolitengan pisiki, o mamiharateng kita o saˈosi ita wa samaan milingat to ngaˈayay falocoˈ no tao, mangalef ko salikaka. Cowa ka ciharateng kita malo sakasetol no tao a fakeloh! (Marko 9:42) Roma i, hamaan pakararawen ko cowa pihakelong a tamdaw. Ano iraay ko olah ita o mangodoay a pakayraan pasowal cangranan, mihaen ko demak ngaˈ paˈdil ci Yihofaan. Hamaan malacongis to tao anca milikaf to pihakelongan nangra. Aka mapawan tada ciˈicelay ko olah! Paihkal kita to olah, patado to tao miharateng, mikangodo cangranan, mitemer to falocoˈ nangra, alatek ecato pisafelit kitanan.

15-16. (1) Pasifanaˈen ko tao to pihakelongan no mita, hano o inanengay a pakayraan? Tinakoen. (2) Wa samaan kita misakadademak to sowal ni Pawlo i Loma 1:16 hani?

¹⁵ Pasifanaˈen ko niyaroˈay tamdaw to Misawacayay Tamdaw ni Yihofa kiso. (Isaya  43:10) O salawina ato fiyaw iso ano mafanaˈ to midokoay kiso ci Yihofaan, wa madoloto kiso a misaysay to karawraw no kalalaˈed. Itiniay i Mosanpike kitakit, ci Forangsiske sanay: “Ikor no minanam kako ato fafahi ci Karolina to Fangcalay Cudad, pasowalan ko paro no lomaˈ cowato ko mamitaˈong kami to mapatayay. Tiya mapatay ko kaka ni Karolina i, misiˈayaway to sapalifet. O nanaman no itiniay misiki to mapatayay, misawsawan ko tireng no mapatayay, o salawina no mapatayay wa mafotiˈ i pisawsawan tora tireng to tolo dadaya. O hatiniay a nanaman milingatay to mihinomay to saloˈafang no mapatayay, harateng no paro no lomaˈ ni Karolina wa itira cingra a mafotiˈ sanay.”

¹⁶ Ci Forangsiske ato fafahi samanay misaysay toniya pakayraan hani? Sanay cingra: “Maolahay kami ci Yihofaan sapahemekaw Cingranan, mansa cowa pirienang kami to nanaman a misiki. Tada maketeray ko paro no lomaˈ ni Karolina, mirikecay cangra tamiyanan cowa ka ngodo to mapatayay sanay, somowalayho cowato ko mamicawmaˈ tamiyanan, cowa ko papadama tamiyanan. Samanen maharekayto kami mitadtad isaˈayaw to pihakelongan no niyah, tiya maketerho cangra i, cowato pilengo kami to nanaman a demak. Nikawrira o roma salawina patadoay tamiyanan a somowal, maharekayto kami mitadtad to saaroˈan. Ikor, cowato ka tada maketer ko paro no lomaˈ ni Karolina, rihadayayto kami malacafay cangranan. O roma salawina tayniay i lomaˈ niyam miala to cudad no Fangcalay Cudad.” Oniya nalifetan mananamay ita, pakayni pidopo to soˈlinay kimad cowa ko kangodoan no mita.​—ˈOsien ko Loma 1:16.

17. Samaan malo soˈliˈlinay a widang, misayar to mapatayay ko salawina a salikaka hani?

¹⁷ Ano mapatay ko salawina no salikaka i, tooren ita ko sowal i Taneng 17:17, malo ‘soˈliˈlinay a widang’ nangra, malecad o ‘malikakaay malacafay misiˈayaw to pades.’ Samaan malo ‘soˈliˈlinay a widang’ hani? Mangalef ano micada to saroero ko salikaka mirienang to misafelitay to safalod no Fangcalay Cudad a nanaman i, sasamaan padama cangranan hani? O Fangcalay Cudad wa ngaˈay padama  kitanan a misayar to mapatayay ko salawina a tamdaw. Nengnengen ko tosa milingatay a safalod no Fangdalay Cudad.

18. (1) Hano cilosaˈ ci Yis hani? (2) Mikitini taˈarawan ni Yis mananamay ita ko maanan?

¹⁸ ‘Malacafay tomangic to tomangicay a tamdaw.’ (Loma 12:15) Alatek cowa ka fanaˈ kita, o maanan ko hasowal misayar to mapatayay ko salawina a tamdaw. Latekay, palecad kita cangranan a tomangic ikakaay to mihadakan ita a sowal. Tiya mapatay ko widang ni Yis ci Lacarus i, tomangicay ci Mariya, Marta ato romaroma tamdaw. Ikor no sepat romiˈad mahicera ci Yis, soˈlin papatikolen ningra paˈorip ci Lacarus, kamayanho a ‘marowis ko losaˈ ni Yis.’ (Yohani 11:17, 33-35) Mihaen ko demak ni Yis paihkalay to harateng no kakarayan Wama, mahapinangay no ˈalomanay to maolahay cingra to paro no lomaˈ ni Lacarus, cilosaˈay cingra maedeng masayaray ci Marta aci Mariya. Anini, ano macada no salikaka ko olah ato kaciharateng ita, cowato ko mamatoˈol cangra, iraay ko widang itihi ciharateng a midama cangranan.

19. Samaan kita misakadademak to Patnakay 3:7 a safalod, mihinom to masomaday a Krisciyang hani?

¹⁹ ‘Iraay ko katomerepan, iraay ko kacaciyawan a toki.’ (Patnakay 3:7) O roma pakayraan mihinom to masomaday a Krisciyang mitengil to nafalocoˈan nangra. Songilaˈen ita a mitengil ko mihadakan nangra naifalocoˈay a sowal, ano “macaloh a caciyaw” cingra hamaan tatiih ko harateng. (Yopu 6:2, 3) Miroero ko cowa pihakelong a paro no lomaˈ ningra, matongalay ko cariraw no falocoˈ ningra. Mihaenay, ngaˈayay kalacafayen cingra a mitolon, micangacang to ‘mitengilay to satolon a Tatapangan’ pafeli cingranan to haˈicel ato pafafidaˈay a inaneng. (ˈOlic 65:2) Ngaˈayay kalacafayen cingra miˈosi to Fangcalay Cudad anca matatodongay a lalakaw, tinakoen o pakalalokay a nalifetan no tamdaw a lalakaw.

20. Dotoc a lalakaw wa milengo to maanan?

²⁰ Tada mahemekay kita cipinang to pakayniay mapatayay a kimad, ato makapahay hatokel no itademay a tamdaw. (Yohani 5:28, 29) Nanay itini sasowalen ato waywayan, timolo kita a midopo to Fangcalay Cudad, itini matatodongay a toki pasowal to tao. Dotoc a lalakaw wa milengo, misakadademakay ci Satan to roma pakayraan miapoh to tamdaw, o miangangay. Wa mananam ita hano aka piingid to miangangay ato milingatay to miangangay a lawla.