Winston, samaanay kiso mikilim to soˈlinay kimad hani?

Itiniay kako i Australia no Konselan a lomahad, palomaay kami to emi, awaay ko pihakelongan niyam. Tona tada mara:ayay ko kaitiraan niyam, cowa ka picawmaˈ to taotao, edeng o salawina aca niyam. Maedeng 12 ko mihecaan ako, sapikilimaw kako to soˈlinay kimad, hato mitolonan ako ko Kawas, sakafanaˈaw Cingranan. Ikor miliyasay kako to niyaroˈ, tayra kakatimolan no Australia i Atelayta a matayal. 21 ko mihecaan i, tayra kako i Sitni misalama, itiraay a masasoˈaraw aci Pamilaan. Pasowal cingra to iraay ko masakapotay a pihakelongan, pakasoˈlinay cangra to o teloteloc noya masidayay a 10 ngasaw no Israil ko Ikok a tamdaw sanay, oniya 10 a ngasaw na oya kakaˈamisan a Israil kitakit, itiniay iˈayaw ni Yis to saka 8 hahekalan mapalaˈafo. Matengil ko sowal ni Pamila i, licayan ako ko cafay a matayal i Atelayta pakayni toni demak, itiya mipacekiwan no Misawacayay Tamdaw ni Yihofa cingra. Pinaay tatokian malalengo kami, sahtoay o pakayniay nipasoˈlinan no Misawacayay Tamdaw ni Yihofa ko milengoan, tangsolay mahapinang ako to pacaˈofan no Kawas ko pitolon ako! Mananamayto ako ko pakayniay misangaˈay a Tatapangan ato kimad no Hongti Kitakit, mihaenay a matama ako ko “matekesay a cincu”!​—Matay 13:45, 46.

Pamila, kaemangho kiso misatapangayto mikilim to “matekesay a cincu”, samaanay mahela iso hani?

Itiniay i Kufus a pala a lomahad kako, iraay ko pihakelongan no paro no lomaˈ. O wama wina ato fofo ako, pakasoˈlinay to naitiniay  i masidayay a 10 ngasaw no Israil ko lalitengan no Ikok tamdaw, misaaliay cangra takowanan ato malikaka ako mitoor a pakasoˈlin tora, to mikiriwiˈay a midimokos ko Kawas to teloc no Ikok a tamdaw. ˈArawhan cowa pakasoˈlin kako, miraayay ko Kawas takowanan sanay ko harateng. Tayraay kako i masasiromaay a kiyokay, kawra cowa ka padama takowanan mafanaˈ to Kawas cangra.

Ikor malinahay ko paro no lomaˈ tayni i Sitni, itiraay mafanaˈ kako ci Winstonan, mahaen ya sowal ningra, malalengoay kami to pakayniay pihakelongan demak, hato misatapangayto minanam cingra to Fangcalay Cudad ato Misawacayay Tamdaw ni Yihofa. Makakaolah kami i, o tikami ningra adihayay ko sinael! Soˈlinay haw i, calemcem kako cingranan, maketeran nanay kako, kawra palidlid sanayto mahapinang ako to soˈlinay kimad kora nisowalan ningra.

Cowa ka olah kako mararaay aci Winstonan, saka malinah sa kako tayra i Atelayta isaka 1962 miheca. Paitinian ningra papilafin kako i lomaˈ ni Tomas aci Cenis, nao milakowitay to riyar itini i Papua Niw Kini cangra. Itiya 18 ko mihecaan ako, sidaˈitay cangra i takowanan, padama takowan mafanaˈ ci Yihofaan. Misatapang sato kako minanam to Fangcalay Cudad, caho ka halafin pakasoˈlinay kako to mahelaay ako ko soˈlinay kimad. Ikorto mararamod kami, malacafay midoko ci Yihofaan, lipahak ko kaˈorip niyam. Soˈlin iraay ko pasangar i nokaˈorip, kawra misalimlaan niyam koni “matekesay a cincu.”

Winston, ngaˈay pasowal kiso to nalifetan iso misatapang matayal to demak ni Yihofa han?

Caho ka halafin mararamod kami, mifohatay ci Yihofa i tamiyanan to adihayay a tatayalen. (1 Korinto 16:9) Saka cecay a tayal i, o salikaka ci Ciyak Porten ko somowalay, o kasakilac kantok cingra itiya. (Nohatini o Katimol Taypin Riyar a Fenpo mala iing cingra itira.) Pakalalokay ci Ciyak ato fafahi ci Roslin tamiyanan mala misakafahay, limaay miheca kami lipahak a misakafah. Ikor to 29 ko mihecaan ako i, mapanilnilay kami tayni potipot no Katimol Taypin Riyar a milisoˈ to kasakopang, orira potipot mahawpay ko Nopadaka Samoa, Samoa, Kiripati, Nauru, Niuay, Tokelaw, Tongka, Tuwalu ato Wanuatu. O Fici a Fenpo ko mikayatay tonini potipot isaˈayaw.

Itiya toya lalintadan, matalawayho to Misawacayay Tamdaw ni Yihofa ko itiraay i potipot a tamdaw, mansa mitosil kami i, misinanotay to sasowalen ato waywayan. (Matay 10:16) O romaroma kasakopang, cowa ka ˈaloman ko salikaka, awaay ko pilafinan, mansa nolatek milicayan niyam ko potal a tamdaw, to ngangaˈay milafin i lomaˈ nangra hokira, makahiyay cangra palafin tamiyanan.

Winston, maolahay kiso to mihongyakay demak. Samaanay kiso misatapang hani?

Itiya, pinaay aca ko tancang ato kihpicay cudad i Tongka a sowal. Ano mitosil ko salikaka i, tanoyaan no Padaka a Mikayatay to Saka Tahadaˈocaw a Maˈorip a cudad pacekiw to tamdaw. Kina cecayay, misikayay to 4 lipay a pahatatanamay to malohemay malitengay i Tongka, iraay ko tatolo malohemay malitengay cowa ka tada mafanaˈ tono Padaka a sowal, kamayanay makahi mihongyak toni cudad malo Tongka a sowal. Oniya kihcod a demak faloay lipay a milaheci mihongyak. Ci Pamilato i, tano taypulaytaan a mitilid, ikor pataynian i Padaka Fenpo a mitolic. Manaokaniw cowa ka tada makapah kora mihongyakan, kawra oniya cudad ˈalomanay ko mapadamaay minanam to soˈlinay kimad. Kako aci Pamila na cowa ka mihongyak iti:yaho, kawra itiyaay a makidat ko hemek niyam to mihongyakay a demak.

Pamila, o nokaˈorip i potipot samaanay ko nika sasiroma to Australiaay hani?

Tada taˈangayay ko kasasiroma! Malifaay ko adihay a pasangar, mahawpay ko likes, faedetay ko romiˈad, lifong no ˈedo, nolatek  cangoˈotay ko kakaenen. Kawra, to dadaya mahokaay ko falocoˈ niyam. Samanen awaay ko patih no lomaˈ—o eliˈ ko fadahong, ngaˈayay matapal ko riyar nai lomaˈ niyam. Ano mafolad to dadaya i, maˈaraway ko ˈadingo no ˈafinong, matedi ko likat no folad i riyar, nengneng han tada makapahayto. Itiya mitolon a misimsim ko falocoˈ, lahdaw sanayto ko mafasaway a harateng.

Maolahay kami to kaemangay. Kahemekan ko wawa, fahkaˈan nanay to kohcalay tamdaw. Maharatengay ako tiya milisoˈ kami to Niuay i, iraay ko cecay faˈinayan wawa, cowaho pakaˈaraw to makafanohay a kamay, mipohpoh to kamay ni Winston i, sanay pasowal: “Maolahay kako to opih no tireng iso.”

Tada o makapahay a pala koniya a potipot, kawra cangoˈotay to paisingan ato cemel, ato nananomen no tamdaw, manikaway ko tamdamdaw itini, masomaday kami. Nikawrira, cowa ka macariraw ko salikaka to hatiniay a demak, samanen hatinitiniay aca ko kaˈorip sanay cangra, iraho ko paro no lomaˈ pacafayay, iraho ko pidokoan to Kawas a kitiraan a pahemek ci Yihofaan, marenecayto sanay. O taˈarawan nangra padamaay tamiyanan mihapinang to maanan ko masaka limlaan a demak, halo padama tamiyanan misado:lo to kaˈorip.

Pamila, itira mamiradom kiso to nananomen, caka lecad ko pirahekadan, samaanay kiso pakadangar hani?

Pakayni tonini mamiakoˈid kako to wama ako, sasamaan a miromrom to namal ato mirahekad to kakaenen, misamaan itini i kacangoˈotan a pakayraan a maˈorip, cingra ko pakafanaˈay takowanan. Kina cecayay, milisoˈay kami to Kiripati, itiniay i mimingay o eliˈ ko fadahong a lomaˈ milafin, o mipelpelan a raka ko paenan, o ˈaol ko patih. Mikorkoran ako ko sera, tano maˈicangay ˈafinong malo kasoy, mihaenay kako a mitangtang to kakaenen niyam. O nanom i, tayniay i fanaw ko itiraay a fafahiyan, misarayaray a mitala a miradom, misoˈotan to maedengay 2 kongce a kaered ko paetang, mifahkol tayra i fanaw a miala to nanom, nengnengen hato madoloay, ˈarawhan cowa ka hatira, kinapinapinaay kako mifahkol tora paetang, cowa ka hacok ko nanom! Maˈaraw nangra kako matawato, ikor ngaˈ iraay ko siniˈadaay a fafahiyan patado takowanan. Soˈlinay haw i, ngaˈayay ko falocoˈ no itiraay a tamdaw, tataˈang ko pidama tamiyanan.

Hato maolahay kamo a matayal i potipot, iraayho ko manan mikiriwiˈay nalifetan ngaˈay pasowalen kami han?

Winston: Isalakat cowa ka tada cipinang kami to nanaman nangra, patinakoen, ano pakaen cangra tamiyanan i, patahkaan kami to polong a kakaenen, oraanto, haemin han niyam a komaen! Ikor ngaˈ, mafanaˈ kami to soˈlinay o ˈaˈosawen koha nangra kakaenen. Soˈlin cowa ka fanaˈ to nanaman nangra, kawra sidaˈitay ko salikaka tamiyanan, hanaca mahemekay maˈaraw kami a milisoˈ cangranan to kalitosa no mihecaan, samanen o edengan a naitiraay i roma kitakit a Misawacayay Tamdaw ni Yihofa kami.

O nika pilisoˈ niyam tada ngaˈayay ko pisawacay to itiraay tamdaw. Cowa ka fanaˈ cangra to masamaanay a pihakelongan ko Misawacayay Tamdaw ni Yihofa, nao mipatirengan no niyaroˈay salikaka sa miharateng. Maˈarawto nangra ko naitiraay i roma kitakit a salikaka, ngaˈ mafanaˈto o koksay likakawa ko Misawacayay Tamdaw ni Yihofa i paro no kakarayan, o masasi olaolahay, masemeran nanay cangra.

Pamila: Cowa ka mawalawal ako ko nalifetan i Kiripati, iraay ko cecay malohemay malitengay i mimingay a kasakopang, ci Matera ko ngangan, inanengay a midimokos tamiyanan. Cecay a romiˈad, telian ningra ko cecay fitaˈol i cinaw, pafeli tamiyanan. Itiya cowa ka mararid tahakaen kami to fitaˈol. Tada matemeray ko falocoˈ niyam to sapaladaˈ ningra.

 Ikor to pina a miheca, Pamila, mapatay i tiyad ko cecay wawa. O manan ko padamaay tisowanan a miremo hani?

Isaka 1973 miheca, itiniay i Katimol Taypin Riyar kami, mapoyapoyay kako. Misaˈosiay kami to maminokay i Australia, kawra ikor no sepat folad mapatay itiyad kora wawa. Tada masomaday kami. Mataˈlifto ko pina miheca, palidlid sanay masapay ko rarom no falocoˈ, kawra maˈosito ako ko 2009/4/15 a Mikecolay (no Kowaping), itira i “Salicay no Miˈosiay Tamdaw” a lalakaw ngaˈ, maadahay ko rarom no falocoˈ ako. O lalangian i, “O mapatayay itiyad no wina a wawa, iraay ko hatokel a patikol a maˈorip han?” Tora lalakaw somowalay, to mamisamaan ci Yihofa to demak, hanaca o demak Ningra sahtoay o moecelay sanay. O maamaan a dokaˈ no falocoˈ niyam, o aadahen no Kawas, samanen tada maolahay Cingra kitanan, o papakaynien i Wawa Ningra ‘palahdaw to demak ni Satan.’ (1 Yohani 3:8) Oni lalakaw paˈicelay tamiyanan mangalef ko nika pisalimla to “matekesay a cincu”, o edengan tamdaw no Kawas ngaˈ iraay ko matiniay a tokel, ano awaay ko tokel no Hongti Kitakit, awato ko pinang ako to sasamaan a misiˈayaw toni pasangar.

Mapatayto ko wawa niyam i, miliyaway haca misakafah kami. Itiniay i Fenpo no Australia (nohatini o Katimol Taypin Riyar a Fenpo hananay) matayal to pina a folad, dotoc miliyawayto milisoˈ to kasakopang. Sepatay miheca matayal i Niw Katimol Wiese kasapala ato itini inaka no Sitni, isaka 1981 miheca matahidangay tayra i Fenpo a matayal.

Winston, nohatini o iing no Katimol Taypin Riyar Fenpo kiso. O nano milifetan iso i potipot samaanay padama tisowanan hani?

Tada taˈangayay ko pipadama takowanan! Isalakat o Australia Fenpo ko midimokosay to Nopadaka Samoa ato Samoa, ikor patatekoan ko Niw Silan Fenpo ato Australia Fenpo. Orasaka, nohatini o midimokosan no Katimol Taypin Riyar Fenpo mahawpay ko Australia, Nopadaka Samoa, Samoa, Koke potipotipot, Niw Silan, Niuay, Sawali Timor, Tokelaw ato Tongka, ikor malo taypiyaw no Fenpo kako milisoˈay tora palapala. Mikapot a matayal to i potipotay a salikaka adihayay ko mananamay ako, nohatinito mangaˈayay ko nika tayal saki cangranan.

Salikor a sowal ako i, kako aci Pamila mahapinangay itiyaho, naitini i nalifetan niyam cowa aca ko malitengay tamdaw ko ciharatengay to sapikilimaw to soˈlinay kimad, ano o kaemangayto, miharatengay mikilim to “matekesay a cincu”, soˈlinto caka hemek ko paro no lomaˈ, kamayan mihaen to demak cangra. (2 Hongti 5:2, 3; 2 Rayray 34:1-3) Paifalocoˈen ita, o ciolahay a kawas ci Yihofa, tokel Ningra ano o kaemangayto malitengayto mamilifok to midaˈocay a ˈorip!

ˈAyaw no 50 miheca, kako aci Pamila misatapangay mikilim to soˈlinay kimad, itiya na cowa ka fanaˈ to mamasamaan ko noikoran. O kimad no Hongti Kitakit soˈlinay o matekesay a cincu, o setek no falocoˈ niyam i, o sasaˈicelen niyam mitafo konini a cincu!