1. Sowal no Ifiso 6:10-13, o cecay pakayraan ni Yihofa padama kitanan o maanan? Tadtaden.

TADA ciharatengay ci Yihofa to sikawdan Ningra, o cecay pakayraan i, padama cangranan micoˈay to ˈada. Sakakaay ˈada ita ci Satan ato tatiihay coyoh. Patalipaˈelalay ci Yihofa kitanan aka piingid ci Satanan ato tatiihay coyoh, halo padama kitanan micoˈay cangranan. (ˈOsien ko Ifiso 6:10-13.) Micada kita to sadama ni Yihofa, misarocod a mitadiˈec Cingranan, wa pakalowid to saˈodis ni Akoma. Malecad ci Pawloan ira ko pakasoˈlinay falocoˈ, sanay cingra: ‘Ano midamaay ko Kawas kitanan, o cima ko mamisafelit kitanan hani?’​—Loma 8:31.

2. Oniya lalakaw wa milengo to maanan?

² Kita o malo Krisciyangay, cowa ko mamasemer to demak ni Satan ato tatiihay coyoh, o mamisaˈicel mafanaˈ ci Yihofaan ato midoko Cingranan. (ˈOlic 25:5) Soˈlin mahaen, o mamafanaˈ kita to mihalakaan ni Satan, ho eca ka lipalaw ningra. (2 Korinto 2:11) Toniya lalakaw, wa milengo kita to pakayraan ni Satan ato tatiihay coyoh a milipalaw to tamdaw, wa milengoho sasamaan malaˈosi a micoˈay to tatiihay a coyoh.

3-4. (1) O maanan ko miangangay? (2) Hakowaay ko katenak no miangangay?

³ Sakakaay pakayraan ni Satan ato tatiihay coyoh milipalaw  to tamdaw pakaynian i miangangay. Sowal no miangangay a tamdaw, mafanaˈay cangra to cowa ko kafanaˈan no tao a demak, ato mikayat to demak sanay. Tinakoen, sowal no roma tamdaw ngaˈay pakayni piˈedaw a mafanaˈ to noikoran a demak, ato masasowal to mapatayay anca misakawasay, mipaˈekak to tao. *

⁴ Anini, hakowaay ko katenak no miangangay hani? O pitiyawca itini katimol no Padaka a pala ato taliyok no Kalepi Riyar 18 kakitakitan, ano tatolo-cecayay ko pakasoˈlinay to misakawasay, tatolo-cecayay ko pakasoˈlinay to, ngaˈayay ko tamdaw masasowal to mapatayay. Roma i, pitiyawca itini 18 Afrika kitakit, tatosa-cecayay ko pakasoˈlinay to miangangay. Ano icowato kita, o mamisinanot to pifiyor no miangangay, samanen padotocay ci Satan miapoh to ‘polong a tamdaw.’​—Paˈarawan 12:9.

5. Samanay ko harateng ni Yihofa to miangangay hani?

⁵ Ci Yihofa o ‘mitooray to soˈlinay kimad a Kawas.’ (ˈOlic 31:5) Samanay ko harateng Ningra to miangangay hani? Tada ˈintehay Cingra! Sanay ko sowal ni Yihofa to Israil tamdaw: ‘Ilalomaˈ namo, aka fahekolen i namal ko wawa, aka paˈedaway, pahantangay, ato mingitangit to kaloykoy to hanoikor, ato miˈedaw, anca piˈekak to tao, mingitangit to kaloykoy, ato miˈedaw tono ikoran, aka pilicay to mapatayay. Ano mihaen ko demak namo, kaˈintehan ni Yihofa.’ (Limoˈot 18:10-12) Soˈlin cowa ko mamidofdof ko Krisciyang to sapafeli ni Yihofa to Israil a sarikec, kawra mafanaˈay kita, cowa ka falic ko pinengneng ni Yihofa to miangangay a demak.​—Malaki 3:6.

6. (1) Samanay ci Satan misaka dademak to miangangay a mikariˈang to tamdaw? (2) Pakayni Patnakay 9:5, o manan ko pakayraan no mapatayay hani?

⁶ Patalipaˈelalay ci Yihofa kitanan miliyas to miangangay, samanen mafanaˈay Cingra o sakariˈang ni Satan to tamdaw a pakayraan konini. Misaka dademakan ni Satan ko miangangay miowing to masakenaay mangah, o cecay i mapatay ko tamdaw tayraay roma hekal padotoc a materek sanay. (ˈOsien ko Patnakay 9:5.) Misaka dademakanho ni Satan ko miangangay paˈangi to tamdaw a miliyas ci Yihofaan. O araaw ningra ho mitiˈer ko miangangay tamdaw to tatiihay coyoh a eca ko ci Yihofa ko tiˈeren sanay.

7. Pasowalay ci Yihofa kitanan to maanan a demakan?

⁷ Masowalay ikaˈayaw, pasowalay ci Yihofa kitanan, misinanot to maanan ho eca ka lipalaw ni Satan. Dotoc milengo kita to papadama kitanan a pakayraan micoˈay ci Satanan ato tatiihay coyoh.

8. (1) Sakakaay pakayraan ita micoˈay to tatiihay coyoh, o maanan? (2) Mikitini ˈOlic 146:4, samanay patesok to mangah ni Satan hani?

⁸ Wa miˈosi kita ato midotim to Kimad no Kawas. O sakakaay a pakayraan ita konini to sakaecaaw ka maorat no mangah no tatiihay coyoh. O Kimad no Kawas malecaday o cihinangay a fonos, ngaˈayay patesok to mangah ni Satan. (Ifiso 6:17) Tinakoen, o Kimad no Kawas pahapinangay to tamdaw, cowa ka ngaˈay masasowal to mapatayay. (ˈOsien ko ˈOlic 146:4.) Patalipaˈelalay ko Fangcalay Cudad kitanan,  edengan ci Yihofa ko matatodongay pairasol to hanoikor. (Isaya 45:21; 46:10) Ano micerid kita miˈosi ato midotim to Kimad no Kawas, cowato ko mamalipalaw no managh no tatiihay coyoh, hanaca wa ˈinteh to hatiniay a mangah.

9. Cowa ko mamidemak kita to maanan milingatay to miangangay a demak?

⁹ Cowa ko mamidemak kita to milingatay to miangangay a demak. O soˈlinay Krisciyang cowa ko mamirienang to kihcod a demak no miangangay. Tinakoen, cowa ko mamiingid anca mitanam kita a masasowal to mapatayay. Malecad o masowalay i saˈayaway lalakaw, o pisiki to mapatayay ano mitooray to: “Maˈoripay ko saloˈafang no mapatayay,” sanay a pihakelongan, cowa ko mamirienang kita. Cowa ko papakayni kita i miˈedaway a mafanaˈ to hanoikor. (Isaya 8:19) Samanen mafanaˈay kita, masakatalawan ko hatiniay a demak, malecaday o miingiday ci Satanan ato tatiihay coyoh.

10-11. (1) Ikor no minanam to soˈlinay kimad, o roma tamdaw i saka 1 hahekalan samanayto ko demak? (2) Mikitini i saka 1 Korinto 10:21, hano minanam kita to taˈarawan nangra hani? Wa samaan ko demak ita?

¹⁰ Fafalahen ita ko kihcod milingatay to misakawasay a dafong. Itini saka 1 hahekalan, itiniay Ifiso a tamdaw na midemakay to miangangay, kawra ikor no minanam to soˈlinay kimad, tangsolay a midemak. Sanay ko Fangcalay Cudad: “Patayraen no ˈalomanay a cikawasay ko cudad nangra a misaˈopo. Todohen nangra a mifalah konini i kaˈayaw no ˈalomanay.” (Dmak 19:19) Misetekay ko falocoˈ nangra micoˈay to tatiihay coyoh. Soˈlin adihayay ko mapalakay nangra a payci miˈaca to misakawasay cudad, cowa pafelien ko tao anca pacakayen nangra koniya cudad, mieminan a mitodoh. O kaciharatengan nangra sasamaan pakahemek ci Yihofaan, cowa ko hakowaay ko ˈaca noniya cudad.

¹¹ Wa samaan kita minanam to taˈarawan  no saka 1 hahekalan a Krisciyang hani? Ano iraay ko milingatay to misakawasay a dafong no mita, mahawp ko sapidipot to tireng a dafong, ato palemeday a dafong, romaroma mihawikidan sapilaplap to kaloykoy a dafong, wa eminen a mifalah.​—ˈOsien ko 1 Korinto 10:21.

12. Ano mipiliˈ kita to lawla i, ngaˈayay licayen ko niyah to maanan a salicay?

¹² O kakinsaen ita ko mipiliˈan no niyah a lawla. Ngaˈayay licayen ita ko niyah: “Miingiday kako to milingatay to misakawasay a cudad, casi, wangcan, ika, kamok no tilifi anca tasalamaan han? O mipiliˈan ako a lawla cicamolay to miangangay, kaloykoy, misakawasay a tawcikel han? Cowa ko tatiihay ko misakawasay anca paˈekakay a demak, sanay koniya lawla han?” Manaokaniw, cowa ka sahtosa o milingatay to miangangay ko tawcikel. Kawra, wa misetek kita to falocoˈ miliyas to kaˈintehan ni Yihofa a lawla, misarocod to ˈicel ‘eca ka pakararaw to Kawas.’​—Dmak 24:16. *

13. Cowa ko ngangaˈay kita midemak to maanan?

¹³ Hamaan milengo kita to misakawasay a demak. Toniya demak wa ngaˈay minanam kita to taˈarawan ni Yis. (1 Pitiro 2:21) ˈAyaw no tayni ci Yis i sera itiniay i kakarayan maˈorip, mansa adihayay ko kafanaˈan to pakayniay ci Satanan ato tatiihay coyoh a demak. Kawra cowa pilomal ci Yis to pakayniay tatiihay coyoh a tawcikel, samanen makalimay ci Yis malo Misawacayay Tamdaw ni Yihofa, eca ka patado ci Satanan a milasil. Wa ngaˈay minanam kita to taˈarawan ni Yis, aka mararid a milengo to pakayniay tatiihay  coyoh a demak. Safeliten, pahapinangen ko tamdaw to ‘matomesay i falocoˈ’ ita ko soˈlinay kimad.​—ˈOlic 45:1.

14-15. (1) Hano cowa ko mamatalaw kita to tatiihay coyoh? (2) Hano mafanaˈ kita to midipotan ni Yihofa ko finawlan Ningra anini?

¹⁴ Cowa ko mamatalaw kita to tatiihay coyoh. Toniya hekal, tahalifaay kita to tatiihay a demak. O adada ato kafahalan a demak cowa ko kafanaˈan a mifekad i tireng no mita, alatek fahal saan mapatay kita. Sahtoay o tatiihay coyoh ko pairaay, cowa ka saan. Sowal no Fangcalay Cudad: ‘Samanen o malifaay no tamdaw, o toki ato cowa ko kafanaˈan a demak ko piˈarawan.’ (Patnakay 9:11) Mafanaˈay kita, ikakaay ko ˈicel ni Yihofa to tatiihay coyoh. O roma tinakoan i, cowa pihai ko Kawas ci Satanan miˈafas to ˈorip ni Yopu. (Yopu 2:6) Itini romiˈad ni Mosi, paihkalay ci Yihofa ikakaay ko ˈicel Ningra to misakawasay a saysi no Icip. (Kasadakan 8:18; 9:11) Ciˈdilay a Yis, milifokay to fadangalan ci Yihofaan a milaplap ci Satanan ato tatiihay coyoh patayni fafekang no sera. Cato ka halafin, oniya tatiihay coyoh wa fahkolen tayra i awaay ko tolas a ofang, cowato ko mamikariˈang to tamdaw.​—Paˈarawan 12:9; 20:2, 3.

¹⁵ Paihkalay ko adihayay wacay, midipotay ci Yihofa to sikawdan Ningra anini. Haratengen hena: Itiniay i polong no hekal a mitosil ko finawlan no Kawas. (Matay 28:19, 20) Hato matihedakay ko tatiihay a demak ni Akoma. Ano iraay ko ˈicel ni Satan miconged to kihcod a tayal ita, wa mihaen cingra to demak, kawra awaay ko pakayraan ningra, mihaenay cowa ko mamatalaw kita ci Satanan ato tatiihay coyoh. Sanay ko Fangcalay Cudad: “Mihapinang a minengneng [ci Yihofa] to polong no hekal, pafelien Ningra to ˈicel ko soˈlinay ko falocoˈ a mitiˈer Cingraan a tamdaw.” (2 Rayray 16:9) Ano madimadi kita ci Yihofaan, awaay ko pakayraan no tatiihay coyoh paira to tahadaˈocay a pidokaˈ kitaanan.

16-17. Hano ira ko timolo ita ngaˈ pakacoˈay to tatiihay coyoh? Tinakoen.

¹⁶ Ira ko timolo ita ngaˈ pakacoˈay to tatiihay coyoh, mangalef ano misafelit ko  ngaˈayay ko harateng a salawina, tada misaaliay to timolo. Kawra, wa palemeden ni Yihofa ko timoloay a tamdaw. Nengnengen ko tinakoan no fafahiyan salikaka ci Arika. Itiniay i Kana kitakit cingra, 21 ko mihecaan misatapang minanam to Fangcalay Cudad. O wama ningra o misakawasay a saysi, miharateng ko roma tamdaw o mamidofodof ci Arika to nanaman, komaen to sapatafang to kawas a titi. Cowa ka kahi ci Arika komaen, cowa ka ngodo to kawas cingra sanay ko paro no lomaˈ, o papasemsemen no kawas ko harateng ato tireng nangra sanay.

¹⁷ Soˈlin paciecien no paro no lomaˈ ci Arika mitoor to nanaman a midemak, cowa ka kahi cingra, telocto malaplapay cingra. Kawra, palemedan ni Yihofa cingra. O roma salikaka micadaay cingranan malacafay mikilomaˈ, hato iraayto ko faelohay a paro no lomaˈ ningra. (Marko 10:29, 30) Soˈlin falahen no paro no lomaˈ ci Arika, todohanho ko dafong, kawra madimadiay cingra ci Yihofaan a micada to inoˈ, ikor malo miceriday misakafah. O waywayan ningra misawacayay cowa ka talaw ko niyah to tatiihay coyoh. Kamayan ciharateng ci Arika to paro no lomaˈ, sanay: “Patadoay kako to paro no lomaˈ mitolon to romiˈamiˈad, nanay mitanam cangra to lipahak a mafanaˈ ci Yihofaan, ira ko pasalat a midoko to sidaˈitay a Kawas.”

18. Mitadiˈec kita ci Yihofaan, wa malifok ko maanan sapalemed?

¹⁸ Cowa ka sahtosa micada ko tamdaw to taˈangayay sapalifet no pasoˈlinay falocoˈ. Kawra, kalimlaan ko pitadiˈec ita ci Yihofaan ato micoˈay to tatiihay coyoh. Mihaen ko demak ita wa milifok to adihayay sapalemed, ecato ka lipalaw no mangah ni Satan, cowa ko mamatalaw to tatiihay coyoh. Sakakaay i, wa matongal ko kalawidang ita ci Yihofaan. Ngaˈayay pakasoˈlinen ita ko sowal ni Yakop, sanay cingra: ‘Ka pidofdof kamo to Kawas, micoˈay ci Akomaan, wa miliyas a milaliw ci Akoma tamowanan. Ka piingid kamo to Kawas, wa ingiden no Kawas kamo.’—Yakop 4:7, 8.