1. Makalimay ko sikawdan no Kawas samaan ko demak? Misamaanay? (Nengnengen ko papotalay coka.)

MIOCORAN ni Yis ko mihakelongay cingranan a tamdaw “katayra kamo a palanisawawaan ako to polong no kasafinawlan.” (Matay 28:19) Makalimay ko sikawdan no Kawas ‘misongilaˈ milaheci’ toniya tayal. (2 Timoti 4:5) Samanen, itini kaˈorip i, palalinien to roma demak, o mitosilay a tayal o kalimlaan, o macalohay, o ciepocay. Latekay ciharatengay kita misaadihay to toki a mitosil, kawra cowa ka toor a midemak.

2. Wa itini kita i maanan a pasangaray a pakayraan milaheci to patorodan no Kawas a tayal?

² Anini, adihayay ko kalimlaan a demak to hamami palak to toki ato ˈicel ita. Saromiˈaday kita a matayal sapaririˈ to paro no lomaˈ, anca midimokos to maamaan a demak no paro no lomaˈ. Mihaenay, masomaday ko harateng, miememayho to adada; anca matoˈasayto, adadaayto. Itini pasangaray pakayraan, sasamaan kita misongilaˈ milaheci to patorodan no Kawas a tayal hani?

3. Mikitini i Matay 13:23 mananamay ita ko maanan?

³ Ano awaay koha pakayraan ita dademak to tayal ni Yihofa i, hamaan matoled ko falocoˈ. Mafanaˈay ci Yis, cowa ka lalecad ko minaroˈan no Hongti Kitakit no kahacecay tamdaw. (ˈOsien ko Matay 13:23.) Ano misarocoday kita a midemak, misakaretengay ci Yihofa a minengneng to tayal ita. (Hipray 6:10-12) Dotoc wa milengo kita, samanen  isalakaten ko tayal no Krisciyang i noka ˈorip, samanen a midolo ko nikaˈorip, samanen mitongal to inaneng a mitosil. Salakat, cipinangho kita to o manan ko tatodong no misongilaˈay milaheci toniya tatayalen.

4. O maanan ko tatodong no songilaˈen milaheci ko tatayalen hani?

⁴ Ano sapisongilaˈaw kita milaheci to tatayalen, wa misarocod to ˈicel a mitosil pakafanaˈ to tamdaw. Kawra misaaretengan ni Yihofa i, o araaw no falocoˈ ita, cowa ko hakowaay ko mapalakay a toki. Misarocod to falocoˈ ato harateng kita a midemak to tatayalen no Krisciyang, pakayniay i olah ita ci Yihofaan ato tao. * (Marko 12:30, 31; Kolosay 3:23) Tatodong no misarocod to falocoˈ matayal saki Kawas i, patafangen ko niyah, misaˈicel matayal Cingranan. O mitosilay a demak o kalikoan a tayal, mihaenay i, repeten ko toki a mifanaˈ, fanaˈen ko tamdaw to ngaˈayay lihaf.

5-6. Tano tinakoen a mitadtad, ano citolasay ko toki no cecay tamdaw, kamayan ngaˈay cingra misarocod a mitosil.

⁵ Tinakoen, o cecay kapah maolahay mitatintang cingra, ano mitintang cingra i, tada lipahakay. Ikor mahelaay ningra ko tayal, itini Pilipayan tayra kakomaenan a mitintang. Cowa ka hakowa ko lifon, mihaenay kalo a romiˈad itiniay cingra patiyamay matayal. Soˈlin koˈdaway ko toki i patiyamay a matayal cingra, kawra kamayan maolah cingra to ongkak. Makalimay cingra pacakat to inaneng a mitintang, malo mitintangay ko tayal. Nikawrira cowa kala ˈosi kora patosokan ningra, kamayan cingra mikitini ongkak milifok to lipahak, soˈlin apotoˈay ko toki a mitintang, mahemekay cingra.

⁶ Malecaday i, pakayni kita i maanan lalangian, awaay ko pakayraan adihay ko toki a mitosil. Soˈlin hatira, maolahay kita mitosil, hato misaˈicelay pacakat to sapasifanaˈ a inaneng, ho ngaˈay mitemer to falocoˈ no tamdaw. Ano maˈafasay no masakenaay demak no kaˈorip ko adihayay toki iso, samaan ngaˈ malo sakakaay i kaˈorip ko mitosilay a tayal hani?

7-8. Misamacayay ci Yis to mitosilay, samaanen ita minanam cingra hani?

⁷ Misamacayay ci Yis to mitosilay, o ngaˈayay a taˈarawan no mita. O misaaretengan ningra i, milasil to Hongti Kitakit no Kawas. (Yohani 4:34, 35) Talalotokay milakecay to ˈalo ci Yis, misarocod a mitosil to tamdaw. Ano itinito kaˈalomanan anca i lomaˈ no tao, repetan ningra ko toki mifanaˈ to soˈlinay kimad. Paisalakatan ningra ko mitosilay i kaˈorip.

⁸ O pakayraan ita a mitodong ci Kristoan ano hacowato icowato repeten ko toki mifanaˈ ko tamdaw to ngaˈayay lihaf. Makahi kita misawad to siemelay kaˈorip, misarocod to paratohay a tayal. (Marko 6:31-34; 1 Pitiro 2:21) O roma salikaka malo mikiriwiˈay misakafahay, miceriday misakafahay anca padamaay misakafahay; o roma i, minanamay to roma kitakit a sowal anca malinah tayra misaaliay a kilac mitosil. Nikawrira, adihayay mitosilay tayal, cowa ko misakafahay aca ko milaheciay, o ˈalomanay salikaka ko misaˈicelay milaheci. Ano hakowato ko mademakay ita, cowa pisaali ci Yihofa kitanan midemak to mitaˈlifay to ˈicel no niyah a demak. Tokel Ningra lipahak kita a mihodop Cingranan, milasil to ‘ˈodingaray a ngaˈayay lihaf no lipahakay a Kawas.’​—1 Timoti 1:11; Limoˈot 30:11.

9. (1) Micokangay ci Pawlo, kawra samanay cingra misaareteng to mitosilay a tayal hani? (2) Pakayni i Dmak 28:16, 30, 31, iraay ko manan a harateng ni Pawlo to mitosilay a tayal hani?

⁹ Tarokos ci Pawlo misaaretengay to mitosilay i kaˈorip, o taˈarawan no mita. Sakinatosa miliwko ci Pawlo mitosil tayra i Korinto i, cowato ka hakowa ko maˈosaway payci, mansa mipalakay cingra to toki matayal to misakopangay. Kawra cowa ko sakakaay a tayal ningra ko misakopangay. Dademak cingra tonini oha sakaˈorip aca, mihaen ngaˈ, ‘eca ka pilipayci a patenak’ to Korintoay tamdaw. (2 Korinto 11:7) Misaaretengay ci Pawlo to mitosilay, itini Paselaˈan a Romiˈad milasil to ngaˈayay lihaf. Soˈlin wa maomah cingra to sakaˈorip, kawra ‘kamayan misarocod milasil to fangcalay kimad, misawacay to Yutaya tamdaw to, ci Kristo ci Yis.’ (Dmak 18:3-5; 2 Korinto 11:9) Ikor, tosaay miheca mapalit ci Pawlo i Loma, misawacayan ningra ko milisoˈay cingranan a tamdaw, patikamiyayho to salikaka pakalalok cangranan. (ˈOsien ko Dmak 28:16, 30, 31.) Misetekay to falocoˈ cingra caka kalisangaˈ no kalo a demak ko falocoˈ, mitiliday to laenoay a sowal, sowal sa, ‘micada toniya tatayalen, cowa ko mamisawad.’ (2 Korinto 4:1) Ngaˈayay nanamen ita ci Pawlo, soˈlin adihay ko mipalakan a toki micokang, kamayan misaareteng to tayal no Hongti Kitakit.

10-11. Ano tatiih ko tireng ita i, wa ngaˈay samaan misongilaˈ milaheci to tatayalen hani?

¹⁰ O roma Krisciyang samanen matoˈasay malonayay ko tireng, pasangaray paka lomalomaˈ a mitosil alatek. Soˈlin mahaen, kamayan lipahak cangra tano roma pakayraan a misawacay. Salakatay a Krisciyang ano icowaay ko tamdaw, itiraay a mitosil. Repetan nangra ko toki, ano—​paka lomalomaˈ, i kaˈalomanan kitiraan anca cowa ko padetengay a kitiraan, misawacayay to ‘malitemohay a tamdaw.’ (Dmak 17:17; 20:20) Citolasay ko ˈicel no roma tamdaw, cowa ka ngaˈay halafin a pakalomaˈ mitosil, kawra wa ngaˈay cangra maroˈ i kaˈalomanan kitiraan, misawacay to mitaˈlifay a tamdaw; ngaˈayay tano cowa padeteng pakayraan misawacay, patikami anca patingwa  misawacay. ˈAlomanay mitosilay soˈlin caka ngaˈay mararid pakalomaˈ mitosil, kamayan mikitini roma pakayraan mitosil a milifok to kadofahay a lipahak.

¹¹ Soˈlin caka ngaˈay ko tireng ita, wa ngaˈay misongilaˈ milaheci to tatayalen. Ngaˈayay minanam kita to tarokos ci Pawloan, sanay cingra: ‘Tiˈeren ako koya pafeliay to ˈicel takowanan, maremo ko polong a demak.’ (Filipi 4:13) Itini miliwko mitosil adadaay ci Pawlo, kawra iraay ko sapafeli ni Yihofa a ˈicel, ngaˈayay padotoc a tanektek cingra. Sanay ko sowal ningra to Kalatiya tamdaw: ‘Samanen adadaay kako, hato iraay ko toki milasil to ngaˈayay lihaf tamowanan.’ (Kalatiya 4:13) Malecaday, tatiih ko tireng to latekay mafohatay ko sapitosil a toki, ngaˈay kita pasayra i ising, kangkofo, ato roma miadahay a tamdaw misawacay, oniya tamdaw cowa ka litemoh no mitosilay i lomaˈ nangra.

12. O manan ko tatodong no ‘misamocek ko mata’ hani?

¹² Sowal ni Yis: “O todong no dawdaw no tireng ko mata. Saka, ano [misamocek] ko mata iso i, taengad ko tireng iso a maemin.” (Matay 6:22) O manan ko tatodong no sowal ni Yis hani? Doloen ko kaˈorip sanay, misamacay to cecay patosokan, aka makalisangaˈ no kalo demak ko falocoˈ. Patirengay ci Yis to taˈarawan, misakareteng to mitosilay a demak i nokaˈorip, halo pasifanaˈ to nisawawaan misarocod matayal saki Yihofa ato Hongti Kitakit. Mitodong kita ci Yisan misakareteng a minengneng to mitosilay a demak, mihaen ‘isalakatay  micangacang to Hongti Kitakit ato moecelay no Kawas.’​—Matay 6:33.

13. Samaanen ita misamacay to mitosilay a tayal hani?

¹³ O pakayraan misamacay to mitosilay i, doloen ko kaˈorip no niyah, mihaen wa adihayto ko toki ita, padama to tao mafanaˈ ato maolah ci Yihofaan. * Ngaˈayay salofen ita ko katayalan a toki, mitongal to toki no niyah a mitosil han? O roma lawla, mipalakay to adihayay toki, wa ngaˈay lowanen ita ko hatiniay a demak han?

14. Cecay mararamoday misalofay to maanan a demak ngaˈayto misamacay to mitosilay a tayal hani?

¹⁴ O cecay malohemay malitengay ci Aliyas, pakayni sapisamacayaw to mitosilay mifalicay cingra ato fafahi to kaˈorip. Sanay ci Aliyas: “Awaay ko pakayraan niyam itiya tangsol malo misakafahay, kawra mikitiniay kami i mamadangar a demak misatapang. Misalofan niyam ko mimingay demak, ho matongal ko pitosil no niyah, tinakoen milowan to mapalakay payci ato milawlaay a demak, milongoc to tawki mifalic to katayalan a toki. Telocto, ngaˈayay kami mitosil to dadaya, misikay to adihayay pacekiwan, ngaˈayho kinatosa mirienang to kalo a romiˈad a pitosil, tada mahemekay kami!”

15-16. O sowal i saka 1 Timoti 4:13, 15, wa ngaˈay kita misamaan a pacakat to inaneng no niyah a mitosil hani? (Nengnengen ko sapatongal lalakaw: “ Sapisongilaˈaw Milaheci to Tatayalen, Ngaˈay Kiso Patireng to Maanan Patosokan?”)

¹⁵ O roma pakayraan misongilaˈ milaheci to tatayalen i, pacakaten ko inaneng no niyah a mitosil. O roma kahirahira a tamdaw  marariday micada to sapahatatanam, pakayni ko pacakat to sifanaˈ ato inaneng matayal. Malecaday ko mitosilay, wa padadotoc kita pacakat to inaneg no niyah mitosil ato pasifanaˈ to tamdaw a demak.​—Taneng1:5; ˈosien ko 1 Timoti 4:13, 15.

¹⁶ Nikawrira, sasamaan kita padadotoc a macakat i mitosilay a tayal hani? Songilaˈen a misinanot ko sapaini no Mitosilay ato Nikaˈorip a Saˈopo. Ciepocay ko misadakan noniya saˈopo a sapahatatanam, ngaˈay padama kitanan macakat i mitosilay a tayal. O tatiyakan no saˈopo painiay to mihatatanamay toya romiˈad. Wa ngaˈay kita mikitini minanam to sasalofen no niyah, hanaca saka dademaken i pitosilan. Ngaˈayay tahidangen ita ko kantok no kasakapot malacafay kitanan a mitosil, anca mifanaˈ kitanan to ngaˈayay pakayraan mitosil. Roma i, ngaˈayay tahidangen ita ko adihayay ko milifetan a mitosilay, misakafahay anca kasakilac kantok malacafay kitanan mitosil. Cowa konini aca, ano mafanaˈ kita misaka dademak to Lalosidan no Sapasifanaˈ, ano mitosil pasifanaˈ to tamdaw wa taˈangay ko hemek.

17. Ano masongilaˈ milaheci to tatayalen i, wa matinako iso ko manan hani?

¹⁷ Malo “kapot” ni Yihofa kita a matayal, tada o kalikoan ita a demak konini! (1 Korinto 3:9) Ano ‘mahapinang ko maanan ko kalimlaan a demak’ i, misamacay a mitosil kita, mihaen ‘oha lalipahak a mihodop ci Yihofaan.’ (Filipi 1:10; ˈOlic 100:2) Ngaˈay pakasoˈlin ko sikawdan no Kawas, ano samanayto ko pasangaray i kaˈayaw, papafelien no Kawas kita to ˈicel milaheci to tatayalen. (2 Korinto 4:1, 7; 6:4) Cowa ka lecalecad ko pakayraan no tamdaw, o roma tamdaw ngaˈayay mararid a mitosil, o roma late:kay ngaˈ mitosilay, kawra ano misarocod to falocoˈ ato harateng kita a dademak, oha tataˈangay ko lipahak. (Kalatiya 6:4) Misongilaˈ milaheci kiso to tatayalen, o maolahay ci Yihofaan ato tao. O sowal no Fangcalay Cudad: ‘Mihaen ko demak iso, wa ngaˈay milidong to niyah, halo milidong to mitengilay tisowanan a tamdaw.’​—1 Timoti 4:16.