Mafanaˈay Kiso Han?
Itini nolitengan, samaanay ko tamdaw midakaw to tamina a miliwko hani?
ITINI i lintad ni Pawlo, awaay ko hanolafang a pidakawan a tamina. Ano sapidakawaw ko tamdaw i, tatayra i misasingdiay tamina a milicay, tatalacowa a pala, makahi a padakaw hokira? (Dmak 21:2, 3) Ano cowa ko tatayra ko tamina to kahiceraan nangra i, o ngangaˈay i katomerepan no tamina i fatad a maepod, mifalic a midakaw to roma tamina tayra i ngata no kahiceraan nangra.—Dmak 27:1-6.
Cecay miheca pinapinaay aca folad parakat to tamina, hanaca awaay ko masaˈosiay a rayray no toki. Kawra adihayay ko kapaysinan no katayalan no tamina, patinakoen, ano matengil ko ˈakˈak a ˈayam i sasoˈot no tamina, anca maˈaraw ko matastasay a tamina i lawac no riyar i, maminayar to sakalingadaw a toki. Ano matatodongay ko fali i, patoor han to fali a malingad. Ano mahelato no tamdaw ko tamina i, miˈorongay to roto tayra i ngata no minato a mitala to satahidang a malingad.
O mitiliday to likisi a tamdaw ci Laynael Kasen, sanay ko sowal: “Itini i Loma iraay ko patadoay a tayal, ho caka maroray mikilim to dadakawen a tamina. Itini i kasadakan no Tiper ˈAlo, i ngata no Ostia adihayay ko katayalan no tamina. Ora katayalan no tamina naitiniay i kasasiroma a kitakit, o roma naitiniay i Napona [itiniay no aniniay a Frans], o roma naitiniay i Katayci [itiniay no aniniay a Tunisia]. Ano sapidakawaw ko tamdaw to tamina i, tatayra a milicay, o kahiceraan no tamina mamitaˈlif to katayraan nangra hokira.”
Midakaw to tamina soˈlin ˈapotoay ko toki, kawra iraay ko katalawan, mahaen ci Pawloan, itini i pitosil ningra, tahalifaay to adihayay a pades no tamina.—2 Korinto 11:25.