1, 2. (1) Hano ngangaˈay malowid no kapah ko ciˈicelay a tatiihay coyoh han? (Nengnengen ko satapangan coka.) (2) Oniya lalakaw wa milengo to maanan?

PALINIAN no tarokos ci Pawlo ko kaˈorip no Krisciyang to mangangataay pilood no sofitay to ˈada. Soˈlin o noˈadingoan ko pilood no mita, cowa ko soˈlinay, kawraan iraay ko ˈada materek. Ci Satan ato tatiihay coyoh mafanaˈay milood, taˈangayay ko ˈicel, sapilowidaw cangranan, cowa ko madoloay, mangalefay pasangar ko kapah a Krisciyang. Wa ngaˈay malowid no kapah koniya ciˈicelay a tatiihay coyoh han? Wa malowid nangra ko tatiihay coyoh, hanaca mangataayto a pakalowid! Pakalowid ko kapah tamdaw to ˈada, samanen pafelian ni Yihofa cangra to ˈicel. Cowa ko pitadiˈec aca nangra to Kawas, misadayayho a milood, mahecad o pahatatanaman a sofitay, micaˈedongay cangra to ‘sapafeli no Kawas polong a sapilood a rikoˈ.’​—ˈOsien ko Ifiso 6:10-12.

² Somowal ci Pawlo toniya sapatinako i, maharatengay ko sapilood a rikoˈ no sofitay no Loma halatek. (Dmak 28:16) Oniya lalakaw wa  mitadtad, hano matatodongay koniya sapatinako, wa misinanot ko roma kapah tamdaw, micaˈedong to noˈadingoan sapilood a rikoˈ i, o mamasiˈayaw a sapalifet ato mamalifok a haepoc.

3, 4. Misamaanay hano somowal ko Fangcalay Cudad, o soˈlinay kimad mahecaday o safaked to tatelecan no sofitay no Loma hani?

³ ˈOsien ko Ifiso 6:14. O safaked a telec no sofitay no Loma, iraay ko kihepicay a marad, ngaˈayay midipot to tatelecan nangra, ngaˈayay pakakafit to karetengay a satada no falohang. O roma, o safaked to tatelecan ngaˈayay pakakafit to koˈedaway fonos ato amotoˈay fonos, ano kedecen no sofitay ko safaked, awato ko kihar malingad milood.

⁴ O minanaman ita a Kimad no Kawas, mahecaday o safake to tatelecan, wa ngaˈay midipot to noˈadingoan ita, eca ka madokaˈ no mararaway sasowalen. (Yohani 8:31, 32; 1 Yohani 4:1) Mahecad o safake to tatelecan ngaˈayay pakafit to karetengay a satada to falohang, ano matongal ko kaolah ita to soˈlinay kimad, wa madolo a micaˈedong to “sapatada to falohang,” makahi a midofdof to moecelay palinian no Kawas. (ˈOlic 111:7, 8; 1 Yohani 5:3) Cowa ka hatini aca, ano ihekal ko kacipinang ita to kimad no Kawas, cowato ko mamangiyangi ko pasoˈlin no falocoˈ, timolo a milood to misafelitay a tamdaw.​—1 Pitiro 3:15.

5. Misamaanay hano aka a pisamangah kita?

⁵ Kedecen ita kono soˈlinay kimad a safaked to tatelecan, wa mitoor to soˈlinay kimad a maˈorip, i kihecod a pakayraan cowa ko mamisamangah. Misamaanay hani? Samanen o misamangahay, o ciˈicelay a lalosidan ni Satan, o mamidokaˈ to mimangahay tamdaw ato pasoˈlinay to mangah a tamdaw. (Yohani 8:44) Mihaenay, soˈlin cowa ko malefotay kita, wa misaˈicel miliyas to misamangahay. (Ifiso 4:25) Cowa ko madoloay mihaen to demak, 18 ko mihecaan ci Apih sanay ko sowal: “Ano misamangah tolatekay mafalahay ko fangafang.” Kawra cowa pihaen ci Apih, misamaanay hani? Sanay cingra: “Malo soˈliˈlinay a tamdaw, iraay ko tingalaway falocoˈ i ˈaˈayaw ni Yihofa, malifokay ko pasoˈlin no wama wina ato widang.” Ci Fitoriya 23 ko mihecaan, sanay cingra: “Ano soˈliˈlin ko sowal iso nolatekay, anca midopo to pihakelongan, masamsamay no tao, kawra mihaen to demak, cowa ko mamasipon kiso, samanen matongalay ko pasoˈlin no falocoˈ, ato kangaˈay no kalalaˈed ci Yihofaan, hanaca mamatongal ko pikangodo no maolahay tisowanan a tamdaw.” Mihaenay a micerid “tano soˈlinay kimad misafaked to tatelecan” tada o ciepocay!

6, 7. Misamaanay hano palinien no Fangcalay Cudad ko moecelay malo sapatada to falohang hani?

⁶ Itini saka cecay hahekalan, micaˈedongan no sofitay no Loma a satada to falohang, tano kihepicay a makakadepay a marad ko sapisangaˈ, oniya ngaˈayay ˈikongen a marad, mifedfedan i falohang no sofitay, tano safaked a pakakafit toniya marad. O ˈafala no sofitay, adihayay ko mitafoay a kihepicay marad, oniya kihepicay marad, makakitingay a mafaked. Ano micaˈedong ko sofitay to hatiniay satada to falohang, cowato ka tawlik ko kawing, wa miceridho mikingsa toniya marad mahepolay hokira. Kawraan oniya sapatada to falohang, wa ngaˈay miˈading to picocok no fonos ato maeferay a panaˈ to falocoˈ ato tireng no sofitay.

⁷ O moecelay a palinian ni Yihofa, mahecaday to satada no falohang, midipot to falocoˈ no mita. (Taneng 4:23) O sofitay no litengan, cowa ko tatano komaingay a marad ko sapisangaˈ to satada no falohang, mikotay to ˈatekakay a satada no falohang, mahecaday, cowa ko ngangaˈay kita tono niyah a palinian, mikotay to moecelay palinian ni Yihofa. Citolasay ko ˈicel ita a misaˈosi, awaay ko pakayraan midipot to niyah. (Taneng 3:5, 6) Mihaenay, ceriden ita misinanot to  kapicaˈedong to noˈadingoan a satada no falohang, mihaen ngaˈ madipot ko falocoˈ.

8. Misamaanay hano mamitoor kita to palinian ni Yihofa a maˈorip?

⁸ Tolatekay miharateng kiso, o miroeroay ato miˈafasay to pasalat iso ko moecelay a palinian ni Yihofa han? Ci Taniil 21 ko mihecaan sanay cingra: “Pakayni pidofdof ako to palinian no Fangcalay Cudad, malikafay ko singsi ato cafay micudad takowanan. Iraay ko cecay liyad matoleday ko falocoˈ ako.” Samaanay patikol a mahemek ci Taniil hani? Sanay cingra: “Ikor, mahapinangay ako ko epoc mitoor to palinian ni Yihofa a maˈorip. O salakatay a ‘widang’ ako, ciwarakay, o roma misawaday micudad, mahaen cangra masomaday kako. Kawra, soˈlinay midipotay ni Yihofa takowanan, sanay ko harateng ako.” Ci Matis 15 ko mihecaan, sanay cingra: “Sapitooraw to palinian ni Yihofa a dademak, eca pahecad to demak no cafacafay, tada pasangarayto.” Samaanay ci Matis a misaysay to hatiniay a harateng hani? Sanay cingra: “Pasowalan ako ko niyah, o Misawacayay Tamdaw ni Yihofa kako, patalipaˈelalay to niyah o saˈodis ni Satan konini. Ano pakalowid kako to sakayhid i, tada mahemekay ko harateng!”

9-11. (1) Wa micaˈedong ko Krisciyang to maanan tinakoan a cokap? (2) Samaan ko demak ita wa madoloto a mitosil hani?

⁹ ˈOsien ko Ifiso 6:15. Malingad ko sofitay no Loma a milood i, salakatayho a cicokap. O hatiniay a cokap mahecaday o santalo, toloay matatingloh ko katol, mansa tanektek, o hatiniay pisafaco halafinay ato ngaˈayay a sacokapen.

¹⁰ Ano malalood ko sofitay misaaliay to ngaˈayay cokap, cicokap ko Krisciyang tinakoan a cokap, o sakangaˈay a patenak to rihadayay a ratoh. (Isaya 52:7; Loma 10:15) Kawraan, ano mitosil misaaliayho to timolo. 20 ko mihecaan ci Apu, sanay ko sowal: “Isalakat cowa ka timolo kako, tada mangodoay misawacay to cafay micudad, cowa ka fanaˈ to hano mangodo itiya. Kawra, nohatini mitosil to cafay micudad pairaay to hemek no mako.”

¹¹ Mahapinangay no ˈalomanay kapah, ano ngaˈay ko pisaday a mitosil, misawacay to tamdaw i madoloayto. Samaanen iso pisaday hani? 16 ko mihecaan ci Culiya, sanay ko sowal: “Mitelian ako ko cudad no Fangcalay Cudad i kafang, mitengilho to harateng, ato o maanan ko pakasoˈlinan no cafay micudad, mihaen wa mafanaˈto kako to sasamaan a padama cangranan. Ano ngaˈay ko pisaday ako, ora mihadakan ako a sowal wa ngaˈay padama cangranan.” Ci Mikenci 23 ko mihecaan, sanay ko sowal ningra: “Ano damsay kiso midohinga, wa ngaˈayto a cipinang to masiˈayaway no cafay micudad a pasangaray. Minengneng kako to sapafeli no likakawa to kapah tamdaw a lalakaw, hato ngaˈay kako paladaˈ to ciepocay a sinael anca lalakaw no jw.org i cafay micudad.” Mikitini nafalocoˈan noniya fafahiyan salikaka ngaˈay mahapinang, ano ngaˈay ko pisaday ita a mitosil i, o cokap no ngaˈayay ratoh cowa to ko mamahepol.

12, 13. O maanan ko “cinamalay a panaˈ” ni Satan hani?

¹² ˈOsien ko Ifiso 6:16. O ‘taˈangayay sapatada’ no sofitay no Loma, o koˈedaway, mikitini ˈafala tahira i toros no sofitay matahepoay maemin, ngaˈayayho miˈading to sapilood a lalosidan ato maeferay a panaˈ.

¹³ O paeferan ni Satan kitaanan a “cinamalay a panaˈ” o milingatay ci Yihofaan a mangah, tinakoen​—cowa ka olah ci Yihofa tisowanan, awaay ko ciharatengay tisowanan, sanay a harateng. 19 ko mihecaan ci Iciyang, awaay ko kapo no niyah, sanay a miharateng, sanay ko sowal ningra: “Miraayay ci Yihofa takowanan, cowa ka kahi misawidang Cingra takowanan, sanay kako miharateng isalakat.” Ano ira ko mahaenay harateng i,  samaanay ci Iciyang hani? Sanay cingra: “Mitongalay to pasoˈlin no falocoˈ ako ko saˈopo. Mirienang kako to saˈopo isaˈayaw aroˈ sanay i tadimocokan, cowa ka pacaˈof to salicay, awaay ko ciharatengay takowanan, sanay a miharateng. Kawra, misadayay to kako nohatini to lalakaw no saˈopo, ano masaˈopo i, kinapinaay kako pacaˈof to salicay. Mihaen to demak, cowa ko madoloay, kawra mihaen to demak ngaˈayay ko falocoˈ ako, pakalalokay ko salikaka takowanan. Ikor no masaˈopo, ano haratengen tada maolahay ci Yihofa takowanan.”

14. O nalifetan ni Iciyang mitadtaday to maanan kalimelaan a kimad hani?

¹⁴ O nalifetan ni Iciyang mitadtaday to kalimelaan a kimad: O sapatada no sofitay, cowa ka ngaˈay mifalic ko pakeciw, kawra ono pasoˈlinay falocoˈ a sapatada ita, ngaˈayay falicen ko pakeciw, ngaˈay taˈangay ngaˈayay kaeming, no niyah a haretang ko piˈarawan. (Matay 14:31; 2 Tisalonika 1:3) Mihaenay i, mitongal to pasoˈlinay a falocoˈ tada kalimelaanto!

15, 16. O sakalidong a tokel hano mahecad to kafong hani?

¹⁵ ˈOsien ko Ifiso 6:17. O kafong no sofitay no Loma, matafoay ko fongoh, liˈel ato laway nangra. Roma kafong iraay ko taametan, ngaˈay tanokamay a tatoyen no sofitay.

¹⁶ Mahecad o kafong ngaˈayay midipot to fongoh no sofitay, ‘o sakalidong a tokel’ wa ngaˈay midipot to kemoday falocoˈ, ato harateng no mita. (1 Tisalonika 5:8; Taneng 3:21) ‘O sakalidong a tokel’ padamaay kitaanan, misamocek to sakiˈok no Kawas, padamaayho kitaanan tano  matatodongay harateng minengneng to masiˈayaway no niyah a pasangaray. (ˈOlic 27:1, 14; Dmak 24:15) Kawraan, ano saka ciepocaw no “kafong”, sakafongen i fongoh ngaˈ ngaˈay, cowa ko tatatiw han i kamay.

17, 18. (1) Samaanay ci Satan mikayhid kitaanan mihepol to kafong hani? (2) Samaan ko demak ita ngaˈ, paihekal to cowa ka lipalaw ni Satan ko niyah hani?

¹⁷ Samaanay ci Satan mikayhid kitaanan, mihepol to kafong hani? Ano haratengen ita ko nano demak ningra ci Yisan, o mamafanaˈto. Mafanaˈay ci Satan to mamikowan ci Yis to polong a tamdaw noikor. Kawra, wa salakatho ci Yis misemsem ikor mapatay, hanaca mitala to cecay liyad, tahira pisaˈosian ni Yihofa a romiˈad ngaˈ mala hongti cingra. ˈArawhan kayhiden ni Satan ci Yisan, ano taˈongen ni Yis ci Satan, wa tangsol mikowan to kalo a kitakit, mihaen wa kaliki a mala hongti ci Yis. (Luka 4:5-7) Mahecaday, mafanaˈay ci Satan ano irato ko faelohay hekal, wa palipahaken ni Yihofa ko kaˈorip ita, pafeli to adihayay makapahay a demak. Kawra o mamitalaho kita, itini pitalaan a toki, wa tahalifa kita to adihayay karorayan a demak halatek, mihaenay mihadakay ci Satan to adihayay sakayhid, aniniho ngaˈayto lipahak ko kaˈorip sanay. Miowingay kitaanan micangacang to hafay—siemel ko kaˈorip nohatini, itinien i saka tosa ko Hongti Kitakit no Kawas, sanay a mikayhid.​—Matay 6:31-33.

¹⁸ Ci Kiana 20 ko mihecaan mahecaday cingra to ˈalomanay kapah a Krisciyang, cowa ka lipalaw ni Satan, sanay ko sowal ningra: “Mafanaˈay kako edengan ko Hongti Kitakit no Kawas ko ngangaˈay misalof to kihecod pasangaray no tamdaw.” O tanektekay a pasoˈlin ni Kiana, taˈangayay ko pifiyor to harateng ato waywayan ningra, sanay ko sowal: “O tokel no Lakoing padamaay takowanan, matatodong ko pinengneng to patosokan no hekal, cowa ka ciharateng kako mala idahiyay tamdaw, anca misaka dademak to ˈicel mietan to adihayay payci, o mamisadak to ˈicel micangacang to noˈadingoan a patosokan.”

19, 20. Samaan kita pacakat to inaneng a misaka dademak to Fangcalay Cudad hani?

¹⁹ Pitilidan ni Pawlo to Ifiso cudad a lintad, misaka dademakan no sofitay no Loma a fonos, maedeng 50 kongfen ko koˈedaw, o sapilood to mangangataay a ˈada. Cowa ka padik ko sofitay no Loma i piloodan, samaanen mihatatanamay to romiˈamˈad cangra to inaneng a misaka dademak to fonos.

²⁰ Patinakoan ni Pawlo ko sapafeli ni Yihofa a fonos, to o Kimad no Kawas. Kawra, wa minanam kita to inaneng a misaka dademak to fonos, ngaˈay tano Fangcalay Cudad a midama to pihakelongan ato misalof to harateng no niyah. (2 Korinto 10:4, 5; 2 Timoti 2:15) Wa samaan kita pacakat to inaneng a misaka dademak to Fangcalay Cudad hani? 21 ko mihecaan ci Saypasetian, sanay ko sowal: “Ano micekiw kako to Fangcalay Cudad i, mitilidan ko kaolahan ako a sinael i ciwming. Mihaen ko demak hato mingataay ko harateng no niyah ci Yihofaan.” O masowalay i fafekang ci Taniil, sanay ko sowal: “Ano miˈosi kako to Fangcalay Cudad i, mipiliˈan ko ngaˈayay padama to i kilacay tamdaw a sinael. Mahapinangay ako, ano mitosil maˈaraw no cilomaˈay to maolahay kako toniya sinael, misaˈicelayho padama cangranan, tada mahemekay mitengil.”

21. Hano cowa ko mamatalaw kita ci Satanan ato tatiihay a coyoh hani?

²¹ Mikitini nano sowal no ifafekangay a kapah mahapinangay ita, cowa ko mamatalaw kita ci Satanan ato tatiihay a coyoh. Soˈlin taˈangayay ko ˈicel nangra, kao citolasay ko ˈicel, hanaca cowa ko tatahadaˈoc a materek. Caka halafin, itini pikowan ni Kristo to comaˈol miheca, ci Satan ato tatiihay coyoh wa paliten, cowato ko tatatemik. Ikor no comaˈol miheca a pikowan, wa malaˈafo cangra maemin. (Paˈarawan 20:1-3, 7-10) Pafeselen ita ko pinengneng to nisahalakaan no ˈada, halo pitadiˈec to sadama ni Yihofa, mihaen wa tanektek a miconged ci Satanan!